11
Gualzawhna tawh Jerusalem-a Lutna
(Mat 21:1-11; Luk 19:28-40; Jhn 12:12-19)
1 Jerusalem khuanai, Bethfage le Bethany khuaneute a omna Oliv Mual a tun uh ciangin Jesuh in a nungzuite nih ma sawl a,
2 “Mai-a om khua-ah va pai un. Khua na tun phetun, kuamah a tuan ngei nai lohna lano khat khau a kikhih na mu ding uh hi. Hong sut unla hong kai un.
3 Mi khatpeuh in, ‘Bang hangin tua la khau sut na hi uh hiam?’ hong cih leh, ‘Topa in deih hi; hih lai mahah kong kaikikpah ding uh hi,’ ci-in gen un,” a ci hi.
4 Amau tegel zong paipah uh a, kongzing a kong gei khatah lano a kikhih khat mu uh ahih manin a khau a sutpah uh hi.
5 Tua kiima om mite in, “Bang hangin tua lano khau sut na hi uh hiam?” ci-in a dot uh ciangin,
6 Jesuh’ vaikhak thuteng gen uh a, bangmah cih nawn lo uh hi.
7 Jesuh kiangah a lano tunpih uh a, a lano tungah a puan uh phahin a tungah Jesuh a tuang hi.
8 Mi tampite in ama pai nading lampi-ah a puan uh na phah uh a, mi pawlkhat in lolai panin a sat uh sawlpangte na phah uh hi.
9 Jesuh’ mai-a a pai mite le a nunga a zui mite in, “Pasian phat un! Topa’ tangin a hong pai mipa, Pasian in thupha pia tahen!Ref 11:9: La 118:25-26
10 A hong tung ding i pu David’ ukna, Pasian in thupha pia tahen! Pasian phat un!” ci-in a awng uh hi.
11 Tua bangin Jerusalem khua sungah Jesuh lut a, biakinn sungah pai-in na khempeuh a en kawikawi hi. Tua ciangin ni niam khinta ahih manin sawm le nihte tawh Bethany khua-ah a pai hi.
Theikung A Kisamsiatna
(Mat 21:18-19)
12 A zing ciangin Bethany khua pan pai khia uh a, Jesuh a gil a kial hi.
13 A teh a no theikung khat galmuh ahih manin a gahkhak leh ci-in a lo dingin a va pai hi. Thei min hun hi lo ahih manin, a phung a tun ciangin a teh sim loh bangmah na om lo hi.
14 Tua ciangin theikung kiangah, “Nang tung panin kuamah in theigah loin ne nawn kei tahen,” a ci hi. Hih thu, a nungzuite in a za uh hi.
Biakinn Siansakna
(Mat 21:12-17; Luk 19:45-48; Joh 2:13-22)
15 Jerusalem khua a tun uh ciangin, biakinn huang sungah Jesuh lutin tua sungah sumzuak sumlei-a a omte hawl khiat ding kipan a, sumkhekte’ sabuaite lumlet sakin, vakhu zuakte’ tutphahte sawnpaihsak hi.
16 Biakinn huang sungah kuamah bangmah paipihsak lo hi.
17 Tua ciangin mite kiangah thu hilh a, “Ka inn pen mi khempeuh adingin thungetna inn kici ding hi,” ci-in Pasian in a genna thu Lai Siangtho sungah kigelh hi lo ahi hiam? Ahi zongin note in guta buluhte’ bukna mun na suaksak uh hi, ci-in thu a hilh hi.Ref 11:17 Isa 56:7; Jer 7:11
18 Siampi liante le Thukham hilh siate in hih thu a zak uh ciangin Jesuh a thah theih nading uh lampi a zong uh hi. Ahi zongin mihonpi in ama thuhilhna lamdangsa uh ahih manin amaute in Jesuh a kihta uh hi.
19 A nitak ciangin khuapi panin Jesuh le a nungzuite a pai khia uh hi.
Theikung Si Pan Thuhilhna
(Mat 21:20-22)
20 A zingsang ciangin tua lampi mah zui-in a paikik ciangun tua theikung a zung dongin a sihna a mu uh hi.
21 Peter in a thu phawk ahih manin, “Sia aw, na theikung samsiat a sita hi,” a ci hi.
22 Jesuh in amaute kiangah, “Upna nei un.
23 Upna na neih nak-uhleh hih mual kiangah, ‘Na omna panin pai khia-in tuipi sung kidenna in,’ ci le-uhcin, na lungsim sung uhah uplahna om loin na gen bangun piang taktak ding hi, ci-in na up nak-uhleh, na cih bangun hong piang ding hi.Ref 11:23 Mat 17:20; 1Kor 13:2
24 Tua ahih manin note kiangah kong genin-ah: Na khat peuhpeuh na nget uh ciangin ngah ding ci-in um un; tua hileh na nget peuhpeuh uh na ngah ding uh hi.
25 Thungen dingin na din uh ciangin midang tungah na hehna uh a om khat peuhpeuh maisak un; tua hileh vantungah a om na Pa un note’ mawhna hong maisak ding hi.
26 (Midangte’ mawhna na maisak kei uhleh vantungah a om na Pa un note’ mawhna zong hong maisak lo ding hi,” ci-in a dawng hi.)Ref 11:25-26 Mat 6:14-15
Jesuh’ Aana Neihna Kidong
(Mat 21:23-27; Luk 20:1-8)
27 Tua ciangin Jerusalem tungkik leuleu uh hi. Biakinn kiimah Jesuh a vak kawikawi laitakin siampi liante, Thukham hilh siate le upate hong pai uh a,
28 “Hih nate, kua’ thu tawh bawl a, na bawl nadingin kua in aana hong pia ahi hiam?” ci-in a dot uh ciangin
29 Jesuh in, “Keimah in note tungah thu khat kong dong masa ding hi; nong dawn uhleh kei zong kua thu tawh ka bawl, cih kong gen ding hi.
30 Johan in tui a phum theih nading thu Pasian kiang panin a ngah ahi hiam, ahih kei leh mihingte tung panin a ngah ahi hiam, hong gen un,” a ci hi.
31 Tua ciangin amaute khatlekhat kikum uh a, “Pasian kiang pan hi,” ci lehang, “Tua ahihleh bang hangin Johan’ thu um lo na hi uh hiam?” hong ci dinga,
32 “Mihingte’ tung pan hi,” cih ding lah, mi khempeuh in Johan pen kamsang taktakin ngaihsun uh ahih manin mite i kihta zel hi, a ci uh hi.
33 Tua ahih ciangin, “Ka thei kei uh hi,” ci-in a dawng uh hi. Jesuh in zong, “Hih nate kua thu tawh ka bawl cih thu kei zong kong gen kei ding hi,” a ci hi.