24
Meivak Vilna
(Pai 27:20-21)
1 Topa in Moses kiangah,
2 “Meivak khat a tawntungin a kivaksuak theih nadingin meivak adingin oliv gah a kisuzante panin sathau siangtho nang kiangah hong paipih nading uh Israel mite thu pia in.
3 Kikhopna buk sung, thuciamna singkuang dalna puan pualamah, Aaron in nitak a kipanin zingsang dongin Topa’ mai-ah a tawntungin tua meivak a ngeina bangin koih dinga, tua pen na khang tawntungun ngeina khat hi tawntung ding hi.
4 Amah in kham citak meivakkhuam tungah meivakte a ngeina bangin Topa’ mai-ah omsak tawntung ding hi.
Ompihna Anlum
5 “Nangmah in annel la inla, tua panin moh sawm le nih bawlin em in; moh khat ciangin annel lawh nih hi ding hi.
6 Nangmah in kham citak sabuai tungah tuate gual nihin na koih dinga, gual khatah guk om ding hi.Ref 24:5-6 Pai 25:30.
7 Phawkna-in Topa’ tungah mei tawh biakna-in piak dingin anlum tawh a paikhawm theih nadingin nangmah in a gual nihte-ah paknamtui siangtho na koih ding hi.
8 Sabbath ni simin Aaron in a tawntung thuciamna-in Israel mite tang dingin Topa’ mai-ah a ngeina bangin koih tawntung ding hi.
9 Tua pen Topa’ tungah mei tawh kihal biakna sung panin amah in a tawntung a a ngah ding, a siangtho pen ama kaih ahih manin, Aaron le a suante-a’ ding hi a, amaute in a siangtho mun khatah ne ding uh hi,” a ci hi.Ref 24:9 Mat 12:4; Mrk 2:26; Luk 6:4.
Gensiatna le Lohkikna Ngeina
10 Tu-in Israel numei khat’ tapa, a pa Egypt mi ahi khat, Israel mite lakah a pai hi. Israel numei’ tapa le Israel mi khat giahphual ah kitawng uh a,
11 Israel numei’ tapa in Min Siangtho gensia-in samsia hi. Amaute in Moses kiangah amah paipih uh hi. Ama nu’ min pen Shelomith hi a, Dan minam, Dibri’ tanu ahi hi.
12 Topa’ deihna amaute tungah a kigen mateng amaute in tua mipa khumcip uh hi.
13 Topa in Moses kiangah,
14 “A samsia mipa pen giahphual pualamah paipih in. Ama samsiat a za mi khempeuh ama lu tungah amau’ khut ngasak inla, mihonte khempeuh amah denglumsak in.
15 Tua ciangin Israel mite tungah hih bangin gen in: Ama Pasian a samsia mi peuhmah in ama khialhna thuak ding hi.
16 Topa’ min a gensia mipa kithat ding hi. Mihonte khempeuh in amah denglum ding uh hi. Peemta hitaleh tualsung mi hitaleh, Min Siangtho a gensiate kithat ding hi.
17 “Mi a that pa kithat ding hi.Ref 24:17 Pai 21:12.
18 Ganhing a that pa in a ganhing mahin loh ding hi. A thu-in ci lehang nuntakna le nuntakna a kithuk ding ahi hi.
19 “Mi khat in a veengte khat a poisak leh, ama hih bangin ama tung mahah kithukkik dinga,
20 guh kitan tang ding guh kitan, mittang tang ding mittang, ha tang ding ha kihih dinga, amah in mi khat a poisak bangin amah kipoisak ding hi.Ref 24:20 Pai 21:23-25; Thkna 19:21; Mat 5:38.
21 Ganhing a that pa in loh dinga, mi a that pa kithat ding hi.
22 Note in peemta le tualsung mi adingin ngeina a kibang khat na nei ding uh hi; bang hang hiam cih leh kei pen Topa na Pasian uh ka hi hi,” a ci hi.Ref 24:22 Gam 15:16.
23 Tua ahih ciangin Moses in Israel mite tungah hih thu a gen hi. Amaute in a samsia mipa giahphual pualamah paipih uh a, suang tawh a denglum uh hi. Topa in Moses a thupiak bangin Israel mite in a hih uh hi.