19
Sianthona le Thutang Ngeinate
Topa in Moses kiangah, “Israel mihonte khempeuh kiangah hih bangin gen in: Note na siangtho ding uh hi; bang hang hiam cih leh Topa note’ Pasian keimah ka siangtho hi.Ref 19:2 Siam 11:44-45; 1Pe 1:16. Note a kuamah peuh in na nu le na pa uh zahtakin, note in ka Sabbath-te na tang ding uh hi; kei pen Topa na Pasian uh ka hi hi.Ref 19:3 Pai 20:8, 12; Thkna 5:12, 16.
“Milimte lamah kihei kei unla, note in a kisungtawm pasian-te nomau adingin bawl kei un; kei pen Topa na Pasian uh ka hi hi.Ref 19:4 Siam 26:1; Pai 20:23; 34:17; Thkna 27:15.
“Note in Topa’ tungah thunuama biakpiakna na piak uh ciangin, note hong kisan theih nadingin na pia ding uh hi. Tua pen na piak ni mah uh ahih kei leh a zing ciangin kine dinga, a ni thum ni ciang dongin a omlai peuhmah mei tawh kihal ding hi. A ni thum ni-in a kinek peuhmah leh, tua pen a kihhuai hi a, kisang lo ding hi. Tua a ne mi peuhmah in ama mawhna pua ding hi; bang hang hiam cih leh amah in Topa’ na a siangtho ninsak ahih manin ama mite sung panin kihawl khia ding hi.
“Na leitang tung panun an na lak uh ciangin, na lo uhah a nawl dongin an na la kei ding uh a, an na lak khit uh ciangin a sang zong na khawm kei ding uh hi. 10 Note in na leenggui lo uh hawkmai loin, leenggah a kiate zong na leenggui lo panun na tawm kei ding uh hi. Note in mizawngte le peemtate adingin tuate na nusia ding uh hi; kei pen Topa na Pasian uh ka hi hi.Ref 19:9-10 Siam 23:22; Thkna 24:19-22.
11 “Note na guta kei ding uh hi. A man loin na gamta kei ding uh a, khatlekhat tungah zuau na kigen kei ding uh hi.Ref 19:11 Pai 20:15-16; Thkna 5:19-20. 12 Note in a man lopi-in keima min tawh na kiciam kei ding uh a, tua bangin na Pasian uh’ min na daisak kei ding uh hi; kei pen Topa ka hi hi.Ref 19:12 Pai 20:7; Thkna 5:11; Mat 5:33.
13 “Note in na veengte uh na nengniam kei ding uh a, a na na sut kei ding uh hi. A kicial nasem pa’ thaman pen a zingsang dong zan tawntung na kemcip kei ding uh hi.Ref 19:13 Thkna 24:14-15. 14 Note in bilngongte phuisam loin, mittawte’ mai-ah a puk theih nading na na koih kei ding uh a, note in na Pasian uh na zahtak ding uh hi; kei pen Topa ka hi hi.Ref 19:14 Thkna 27:18.
15 “Note in thukhenna-ah thu a tang loin na khen kei ding uh hi. Mizawngte lang gen loin, a liante’ thu zui loin, thumanna tawh na veengte uh thu na khen ding uh hi.Ref 19:15 Pai 23:6-8; Thkna 16:19. 16 Note in na mipihte lak uhah mi gensia-in vaksuk vakto loin, na veengpa uh a sih nadingin na langpang kei ding uh hi; kei pen Topa ka hi hi.
17 “Note in na lungsim sung uhah na sanggampa uh na mudah kei ding uh a, na veengte uh tawh thu na kituah lohna uh kikum khawmin na siangsak ding uh hi; tua hikeileh ama hangin khialhna na pua ding uh hi.Ref 19:17 Mat 18:15. 18 Note in nomau’ mipihte tungah phu la loin, amau na lungsim neih kei ding uh a, nomau na ki-it uh bangin na veengte uh na it ding uh hi; kei pen Topa ka hi hi.Ref 19:18 Mat 5:43; 19:19; 22:39; Mrk 12:31; Luk 10:27; Rom 13:9; Gal 5:14; James 2:8.
19 “Note in ka thukhamte na zui ding uh hi. Note in na ganhingte uh a namdang tawh ta na neisak kei ding uh hi. Note in na lo uhah khaici nam nih na pawikhawm kei ding uh a, khau nam nih a kigan puan zong na silh kei ding uh hi.Ref 19:19 Thkna 22:9-11.
20 “Sila ahi numei, midang khat in zuthawl a piaksa, kitankhia nai loin amah suahtakna a kipia nai lo nu, pasal dang khat in a lupkhoppih leh, thukanna kinei ding hi. Amaute kithat lo ding hi; bang hang hiam cih leh tua nu sila hi lai hi. 21 Ahih hangin tua pa in a mahmah adingin mawhna hanga biak nadingin tuutal khat, kikhopna bukkong, Topa’ kiangah hong paipih ding hi. 22 Siampipa in, tua pa a gamtatnasa a khialhna hangin mawhna hanga biakna tuutal tawh Topa’ mai-ah ama adingin kilemna bawlsak dinga, a gamtatnasa a khialhna kimaisak ding hi.
23 “Note, Kanaan gamah tungin nek dingin kung nam khempeuh na suan uh ciangin, note in amau’ gahte kum thum sung na ne kei ding uh hi. 24 A kum lina ciangin amau’ gah khempeuh siangtho-in, Topa’ tungah phatna biakna hi ding hi. 25 Ahih hangin a kum ngana ciangin tuate pen note adingin hong gah semsem nadingin tuate’ gah na ne thei ding uh hi; kei pen Topa na Pasian uh ka hi hi.
26 “Note in sa khat peuhpeuh a sunga si tawh na nekhawm kei ding uh hi. Mailam thugen kholhna, ahih kei leh aisan na sem kei ding uh hi.Ref 19:26 Pian 9:4; Siam 7:26-27; 17:10-14; Thkna 12:16, 23; 15:23; 18:10. 27 Note in na baa samte uh met loin na khamul mongte uh zong na tan kei ding uh hi. 28 Note in mi site’ hangin dahna limin na ci tung uh liamsak loin note’ tungah ciaptehna khat peuhpeuh zong na sun kei ding uh hi; kei pen Topa ka hi hi.Ref 19:27-28 Siam 21:5; Thkna 14:1.
29 “Na tanu uh biakinn sungah paktat dinga piakna tawh siasak kei un. Tua bang hileh pasian dangte biakna sungah na tung ding uh a, gam sung khempeuh, mawhna tawh a kidim suak kha ding hi.Ref 19:29 Thkna 23:17. 30 Note in ka Sabbath ni tangin keimah hong kibiakna mun na zahtak ding uh hi; kei pen Topa ka hi hi.Ref 19:30 Siam 26:2.
31 “Vankahte le aisanna lamah kihei kei un. Amaute tawh a kininsak dingin amaute zong kei un; kei pen Topa na Pasian uh ka hi hi.Ref 19:31 Thkna 18:11; 1Sam 28:3; 2Kum 23:4; Isa 8:19.
32 “Note, sam kangte’ mai-ah na kun ding uh a, puteekte’ maitang zahtakin, na Pasian uh na kihta ding uh hi; kei pen Topa ka hi hi.
33 “Na gam sung uhah note lakah khualmi khat hong peem leh, ama tungah a man loin na gamta kei ding uh hi. 34 Note lakah a hong peem khualmite tualsung mi mah bangin na ngaihsun ding uh a, nomau mah bangin amaute na it ding uh hi; bang hang hiam cih leh note pen Egypt gam sungah khualmi na hi ngei uh hi; kei pen Topa na Pasian uh ka hi hi.Ref 19:33-34 Pai 22:21; Thkna 24:17-18; 27:19.
35 “Note in thukhenna, a sau tehna, a tam tehnate-ah a man loin na gamta kei ding uh hi. 36 Note in tawi khaina man, tawisuang man, seu man, bung man, na zang ding uh hi. Kei pen Egypt gam panin a hong pai khiatpih Topa na Pasian uh ka hi hi.Ref 19:35-36 Thkna 25:13-16; Pau 20:10; Ezk 45:10. 37 Note in ka thukhamte khempeuh le ka biakna ngeina kipte khempeuh zui-in tuate na sem ding uh hi; kei pen Topa ka hi hi,” a ci hi.