SIAMPI LAIBU
(Leviticus)
Thupatna
Siampi Laibu sungah tanglai mite in Pasian a biak nading zia, biakna pawi a tuamtuamte bawl nading zia le thupiakna tawh kizui-in tua thute a sem khia ding siampite’ thu kigelh hi.
Hih laibu i a thu bulphuhpi in: Pasian a siangtho ahihna thu le a siangtho Israel Pasian le ama mite a kizopna uh a tatsat loh nadingin ama mite in Pasian a biak nading ziate ahi hi.
Hih laibu sung panin mikim in a theih thu pen 19:18 sungah om a, Jesuh in thupiak a lian nihna a cih hi a, “Nomau na ki-it uh bangin na veengte na it ding uh hi,” cihna ahi hi.
1
Meihal Biakna
Topa in Moses sam a, kikhopna buk panin amah hopihin hih bangin ci hi: “Israel mite tungah gen inla, amaute tungah hih bangin ci in: Note khatpeuh in Topa’ tungah biakna na paipih uh ciangin, ganhing tawh na biakna pen bawnghon panin hitaleh tuuhon panin hitaleh na paipih ding uh hi.
“Ama biakna pen bawnghon panin meihal biakna ahihleh, amah in a sitbaang lo a pa khat pia dinga, Topa’ mai-ah a kisan theih nadingin kikhopna bukkongah pia ding hi. Amah in meihal biakna ganhing lu tungah a khut nga dinga, ama adingin kilemna bawl nadingin kisang ding hi. Tua ciangin amah in Topa’ mai-ah a bawngtal go ding hi. Aaron’ suan siampite in a si hong paipihin, kikhopna buk kong-a biakna tau kimkotah a si theh ding hi. Tua ciangin amah in meihal biakna ganhing a vun hawkin semnen dinga, Aaron’ suan siampite in biakna tau tungah mei koihin, mei tungah a ngeina bangin sing koih ding hi. Tua ciangin Aaron’ suan siampite in a sanente, a lutang le a thaute, biakna tau tunga om mei tunga sing tungah a ngeina bangin koih dinga, ahih hangin a sungkuate le a khete tui tawh sil ding hi. Tua ciangin siampipa in mei tawh kihal biakna, Topa adingin a gim namtui, meihal biakna-in biakna tau tungah a vekpi-in hal ding hi.
10 “Meihal biak nadingin ama letsong pen tuu hitaleh keel hitaleh a hon lak panin ahihleh, amah in a sitbaang lo a pa khat pia ding hi. 11 Amah in Topa’ mai biakna tau tung leilu lampangah go dinga, Aaron’ suan siampite in biakna tau tung kimkotah a si theh ding hi. 12 Tua ciangin amah in semnen dinga, biakna tau tunga om mei tunga sing tungah a ngeina bangin siampipa in a lutang le a thau tawh koih khawm dinga, 13 ahih hangin a sungkuate le a khete amah in tui tawh sil ding hi. Siampipa in a vekpi-in pia-in, biakna tau tungah hal ding hi. Tua pen Topa adingin a gim namtui, mei tawh kihal biakna, meihal biakpiakna ahi hi.
14 Topa’ tungah ama biakna pen vasa tawh meihal biakna ahihleh, amah in vakhu tawh ahi zongin, kawl vakhuno tawh ahi zongin, a biakna hong paipih ding hi. 15 Tua ciangin siampipa in biakna tau-ah paipihin a lu heektat dinga, biakna tau tungah hal ding hi. Biakna tau pangah a si taak khiasak ding hi. 16 Amah in a tangkhai le a multe bot khia-in, vut koihna, biakna tau pang nisuahna lamah lawn khia ding hi. 17 Amah in a khate-in balkek dinga, ahih hangin baltat lo ding hi. Tua ciangin siampipa in mei tunga om sing tung, biakna tau tungah hal ding hi. Tua pen Topa adingin a gim namtui, mei tawh kihal biakna, meihal biakna ahi hi.