5
Ngasa Tampi A Kimatna
(Mat 4:18-22; Mrk 1:16-20)
Khatvei, Gennesaret Tuili gei-ah Jesuh dingin a om laitakin, mite in Pasian’ thu za nuamin Jesuh hong nehcip uh hi. Jesuh in tui gei-ah gunkuang nih a om a mu hi. Tua gunkuang nei ngasa bengte a gunkuang panun tuak khia-in tui sungah a ngente a sawp uh hi. Tua gunkuangte lak pan Simon’ gunkuang sungah Jesuh tuang a, lei tawh tawm a kigamla zek dingin a gunkuang a hawh nadingin Simon kiangah a gen hi. Tua ciangin gunkuang sungah tu a, tua lai panin thu a hilh hi.Ref 5:1-3 Mat 13:1-2; Mrk 3:9-10; 4:1
Thuhilh a tawp ciangin Simon kiangah, “Tui thukna lamah na gunkuang hot inla, na ngen tawh ngasa khuh in,” a ci hi. Tua ciangin Simon in, “Sia aw, tu zanthapai ngasa ka khuh uh hangin khat zong ka man kei uh hi. Ahi zongin khuh in, nong cih leh ka khuh ding hi,” ci-in a dawng hi.Ref 5:5 Joh 21:3 A ngen a khuh uhleh ngasa tampi tak awk a, a ngen kikeek dektak hi.Ref 5:6 Joh 21:6 A gunkuang dang khatah a om a lawmte hong pai-in a huh nadingun a khut uh a van uh hi. Amaute zong hong pai uh a, gunkuang tegel sungah ngasa a dimtakin guang uh ahih manin a gunkuang tum dektak hi. Simon Peter in hih thu a muh ciangin Jesuh’ mai-ah khukdin a, “Topa aw, mawhnei mi ka hih manin ka kiang panin pai khia in,” a ci hi.
Tua zahin ngasa tampi a matna hangun amah le a lawmte in lamdang a sa mahmah uh hi. 10 Tua mah bangin Simon’ lawmte ahi, Zebedi’ tapa James le Johan-te in zong lamdang a sa uh hi. Jesuh in Simon kiangah “Lau kei in. Tu a kipanin ngasa mat bangin mi tampi a man pa na suak ding hi,” a ci hi. 11 Tui gei-ah a gunkuangte uh a tunpih khit uh ciangin a na khempeuh uh nusia-in Jesuh a zui uh hi.
Jesuh in Miphak Khat Damsak
(Mat 8:1-4; Mrk 1:40-45)
12 Khatvei, khua sung khatah Jesuh a om laitakin tua khua sungah a pumtangin phaknatna a vei mi khat a om hi. A phakpa in Jesuh a muh ciangin a mai-ah bokin, “Topa aw, hong damsak nuam peuh lecin kei nong damsak thei hi,” ci-in a thum hi.
13 Jesuh in zong a khut zanin amah lawng a, “Kong damsak nuam hi; dam ta in,” ci-in a dawng hi. Tua khit phetin a phaknatna a dampah hi. 14 Tua ciangin Jesuh in ama kiangah, “Hih thu kuamah dang kiangah gen kei in. Siampipa kiangah paisuakpah inla, kivelsak in. Tua ciangin na damna thu a kilat nadingin Moses thupiak mah bangin biakna pia in,” ci-in thu a pia hi.Ref 5:14 Siam 14:1-32 15 Ahi zongin Jesuh’ thu kitheithang semsem a, ama thu a ngai ding le a natna uh panin damna a ngah dingin mihonpite hong pai uh hi. 16 Ahi zongin gamdaihna munah Jesuh pai khia-in thu a ngen hi.
Khutlekhezaw Khat Kidamsak
(Mat 9:1-8; Mrk 2:1-12)
17 Khatvei, Jesuh in thu hilhin a om laitakin, Galilee gam, Judea gam le Jerusalem khua pan hong pai Farisi-te le Thukham hilh siate pawlkhat tua lai munah a tu uh hi. Jesuh tungah cina damsak theih nading Pasian’ vangliatna kipia hi. 18 Mi pawlkhat in khutlekhezaw mi khat a lupna pheek tawh hong pua uh a, inn sungah paipihin Jesuh mai-ah koih ding a hanciam uh hi. 19 Mihon tamlua ahih manin a lutpih nading uh lampi om lo hi. Tua ahih ciangin innkhum zangah kahpihto-in innkhum hong let uh a, mihonte’ lak, Jesuh’ omna mai sanah a lupna pheek tawh a khaisuk uh hi. 20 Jesuh in amaute’ upna a muh ciangin a mipa kiangah, “Lawm aw, na mawhnate hong kimaisak khinta hi,” a ci hi.
21 Tua ciangin Thukham hilh siate le Farisi mite in a lungsim sung uhah, “Hih bangin Pasian tawh a kikimin a pau ngam mipa kua ahi hiam? Mihing kuamah in mawhna maisak thei lo a, Pasian bek in maisak thei hi,” a ci uh hi. 22 Jesuh in amaute’ ngaihsutna thei ahih manin amaute kiangah, “Bang hangin tua bangin ngaihsun na hi uh hiam? 23 ‘Na mawhnate hong kimaisak hi,’ cih ding baih zaw ahi hiam, tua ahih kei leh, ‘Tho inla, lam pai in,’ cih ding baih zaw ahi hiam? 24 Mihing Tapa in leitungah mawhna maisak theih nading vangliatna nei hi, ci-in na theih nadingun kong lak ding hi,” a ci hi. Tua ahih ciangin khutlekhezaw mipa kiangah, “Tho inla, na lupna pheek pua-in na inn-ah ciah in,” a ci hi. 25 Thakhat thu-in amaute khempeuh’ muhin a mipa zong tho-in a lupna pheek la a, Pasian phatkawmin a inn-ah a ciah hi. 26 Tua ciangin amaute khempeuh in lamdangsa mahmah uh a, lau mahmah kawmin Pasian phatin, “Tuni-in a lamdang mahmah na khat i mu hi,” a ci uh hi.
Jesuh in Levi Sam
(Mat 9:9-13; Mrk 12:13-17)
27 Tua khit ciangin Jesuh pai khia a, siahdongpa Levi, a zumah a tu a mu hi. Jesuh in, “Kei hong zui in,” a ci hi. 28 Levi zong dingpah a, a na khempeuh nusia-in Jesuh a zui hi.
29 Tua ciangin Levi in ama inn-ah Jesuh vakna annek pawipi bawl a, annekna sabuai-ah siahdong dang tampite le midangte tawh zong a tukhawm uh hi. 30 Amaute sung panin Farisi mite le Thukham hilh siate pawlkhat nungzuite tungah phun uh a, “Bang hangin siahdongte le mawh neite tawh an nekhawm tui dawnkhawm na hi uh hiam?” ci-in a dong uh hi.Ref 5:30 Luk 15:1-2 31 Tua ciangin Jesuh in, “Cidamte in siavuan kisam lo uh a, cinate bek in kisam uh hi. 32 Mihoihte a kisik nadingun a sam dingin hong pai ka hi kei a, mite in a pampaih mite a kisik nadingun a sam dingin a hong pai ka hi hi,” ci-in a dawng hi.
Antanna Thudotna
(Mat 9:14-17; Mrk 2:18-22)
33 Tua ciangin amaute pawlkhat in Jesuh kiangah, “Johan’ nungzuite in an tangin thu ngen zelzel uh a, Farisi mite’ nungzuite zong tua bangmahin gamta napi-in, bang hangin nangma nungzuite in tang loin om se uh ahi hiam?” ci-in a dong uh hi. 34 Jesuh in amaute kiangah, “Mopawi-ah zineipa le pawisimte a omkhawm laitakin a pawisimte an tangsak thei ding na hi uh hiam? 35 Amaute kiang panin zineipa a kipaikhiatpih hun hong tung dinga, tua hun ciangin tang ding uh hi,” ci-in a dawng hi.
36 Tua ciangin Jesuh in thugentehna dang khat zong gen a, “Mi khat in puan thak khat eu khia-in puan lui thuapna-in nei lo hi. Tua bangin hih leh a puan thak pen a keeksak suak dinga, a puan thak eukhiat zong a puan lui tawh etlawm lo ding hi. 37 Kuamah in savun um lui sungah leenggahzu thak thun ngei lo hi. Thun zenzen leh leenggahzu thak in a savun um phukham dinga, a leenggahzu bua-in, a savun um zong kisia ding hi. 38 Tua ahih manin savun um thak sungah leenggahzu thak a kikoih ding ahi hi. 39 Kuamah in leenggahzu lui a nek khit ciangin a thak ne nuam nawn lo hi. Bang hang hiam cih leh amah in, ‘A lui khum zaw hi,’ ci hi,” a ci hi.