17
Khialh nading Ze-etnate
(Mat 18:6-7, 21-22; Mrk 9:42)
Tua ciangin Jesuh in a nungzuite kiangah, “Mite a puk theih nading ze-etna hong piang hamtang ding hi. Ahi zongin tua puk nading a piangsak mipa in gimna ngah ding hi. Hih naupangno khat a khialh nading a piansak sangin a ngawngah an gawina suang lianpi khat khihin tuipi sungah kikhia leh ama adingin hoih zaw thampek ding hi. Note hoihtakin kingaihsun un. Na sanggampa uh no tungah hong khialh leh amah taii unla, a kisik leh a mawhna maisak un.Ref 17:3 Mat 18:15 Nikhat sungin sagihvei ciang dong hong khialh hangin zong, a sagihvei mahin no kiangah hong pai-in, ‘Ka kisik hi,’ hong cih nakleh na maisak khin ding uh hi,” a ci hi.
Ka Upna uh Hong Liansak In
Nikhat, sawltakte in Topa kiangah, “Ka upna uh hong liansak in,” a ci uh hi. Topa in, “Ankam tang cia a pha upna nei le-uhcin, hih nailung kung kiangah, ‘Kizunglot inla tuipi sungah va po in,’ ci le-uhcin na cih bangun piang zo ding hi.
Nasempa’ Tavuan
“Note khatpeuh in na lo uh hong khawhsak ahi a, na tuu uh a hong cinsak ahi zongin nasem khat nei le-uhcin, inn-ah a hong tun ciangin, ‘Hong pai inla na an ne pah in,’ na ci uh hiam? Na ci kei uh hi. Ama kiangah, ‘Ka nitak-an ding hong bawl inla, na puan silhin ka annek sungteng hong vil in. Ka man khit ciangin na ne thei ding hi,’ na ci zaw uh hi. Tua bangin a sawl teng a sepna hangin a nasem pa tungah, ‘Ka nuam mahmah hi,’ ci tuan lo hi. 10 Tua mah bangin note in zong hong kisawl teng na sep khit uh ciangin, ‘Nasem mawkmawkte mah ihi a, i tavuan teng bek mah a sem khin ihi hi,’ na ci uh hi,” ci-in a dawng hi.
Jesuh in Miphak Sawm Damsak
11 Jerusalem khua manawhin Jesuh a pai laitakin Samaria le Galilee gam kikal tawnin a pai hi. 12 Khuaneu khatah a lut dektak laitakin miphak sawm in a dawntuah uh hi. Jesuh tawh a kigamla munah ding uh a, 13 nakpitakin kiko-in, “Topa Jesuh aw, kote hong hehpih in,” a ci uh hi. 14 Jesuh in amaute a muh ciangin, “Pai unla siampite va kivelsak un,” a ci hi. Amaute a va pai uh ciangin lamkalah a dam uh hi.Ref 17:14 Siam 14:1-32 15 Amaute sung panin a damlam a kitheih ciangin khat hong lehtaikik a, nakpitakin Pasian a phat hi. 16 Tua ciangin Jesuh’ khe mai-ah bokin a lungdamna a ko hi. Hih mipa pen Samaria mi ahi hi. 17 Tua ciangin Jesuh hong pau khia a, “Mihing sawm kidamsak hi lo ahi hiam? Adang kuate koi lai-ah om ahi uh hiam? 18 Bang hangin hih gamdang mipa bek Pasian’ tungah lungdamna a ko dingin hong kileh ahi hiam?” a ci hi. 19 Tua ciangin Jesuh in ama kiangah, “Tho inla ciah in. Na upna in nang hong damsak hi,” a ci hi.
Pasian’ Uk Hun hong Tunna
(Mat 24:23-28, 36-41)
20 Khatvei Farisi mite pawlkhat in, cik ciangin Pasian’ Ukna hun hong tung ding ahi hiam, ci-in Jesuh dong uh a, Jesuh in, “Pasian’ Ukna pen mit tawh muh theihin hong tung lo ding hi. 21 Hih lai-ah om hi, hua lai-ah om hi, cih bangin kuama gen theih hi lo hi. Bang hang hiam cih leh note lakah Pasian’ Ukna hong om khinzo hi,” ci-in a dawng hi.
22 Tua ciangin Jesuh in nungzuite kiangah, “Nikhat ni ciangin Mihing Tapa nikhat sung bek nangawn na muhnop hun uh hong tung dinga, ahi zongin na mu kei ding uh hi. 23 Mite in, ‘Hih lai-ah om hi,’ hong ci ding uh hi. Ahi zongin amau’ cihna mun a en dingin pai khia kei un. 24 Amah hong pai taktak ciangin khuaphialep in van mong khat pan mong khat dong hong taanzaih mah bangin kitheikim ding hi. 25 Ahi zongin amah in gimna tampi tak thuak masa dinga, ama huna mite in amah nial ding uh hi. 26 Noah hunin up lohpi-in tuiciin a tun bangin Mihing Tapa zong up loh hun khatin hong tung ding hi.Ref 17:26 Pai 6:5-8 27 Teembaw sungah Noah lutin Tuiciin in mi khempeuh a sihsak ni ciang dongin tua huna mite in anne zune-in om uh a, mo kipi mo kikha-in a om uh hi.Ref 17:27 Pian 7:6-24 28 Lot huna mah tawh zong hong kibang ding hi. Tua hun lai-in zong anne zune-in om uh a, sumlei sumzuak, lokho, inn lamin a omom laitakun, 29 Sodom panin Lot a pai khiat ni-in van panin kaat leh meikuang hong kiasuk a, amaute khempeuh a kaangtum hi.Ref 17:28-29 Pian 18:20-19:25 30 Mihing Tapa hong kilat ni ciangin zong tua mah tawh hong kibang ding hi.
31 “Tuani a hong tun ciangin a innkhum zangah a om mipa in a innsunga a om a neihsate a la dingin kumsuk kei hen. Tua mah bangin lo ah a om mipa zong a inn-ah ciahkik kei hen.Ref 17:31 Mat 24:17-18; Mrk 13:15-16 32 Lot’ zi na phawk un.Ref 17:32 Pian 19:26 33 A nuntakna a hu nuamte in a nuntakna bulpi taanlawh dinga, a nuntakna a taanlawhte in a nuntakna bulpi hu zo ding hi.Ref 17:33 Mat 10:39; 16:25; Mrk 8:35; Luk 9:24; Joh 12:25 34 Ke’n kong cih in-ah, tuahun laitakin zanin lupna tungah a lumkhawm mi nih sung panin khat kila-in khat kinusia ding hi. 35 An a sukhawm numei nih, khat kila-in khat kinusia ding hi. 36 Lo a kuankhawm mi nih, khat kila-in khat kinusia ding hi,” a ci hi. 37 Tua ciangin a nungzuite in Jesuh kiangah, “Topa aw, koi laitakah tua thute hong piang ding ahi hiam?” ci-in a dot uh ciangin Jesuh in, “Sapul omna peuhah musane a om mah bangin mi omna peuhah hong piang ding hi,” ci-in a dawng hi.