KUMPI NIHNATE
(The Second Book of Kings)
Thupatna
Kumpi Nihnate Laibu sungah Kumpi Masate Laibu sunga a kinusia Israel kumpi gam nihte thu kizomto hi. Hih laibu khen nih kisuah thei hi.
1. Jesuh’ suah ma kum zakua kimtan panin leilu lam kumpi gam a bei hun B.C. 721 ciang dong kumpi gam nihte’ thu ahi hi.
2. Israel kumpi gam a bei hun a kipanin Babylon kumpi Nebukhadnezzar in B.C. 586 kumin Jerusalem khuapi la-in a suksiat hun dong kikal Judah kumpi gam sung thu ahi hi. Babylon kumpite’ khut nuai-ah Judah gam a uk sawn Gedaliah thu le Babylon khuapi panin Judah kumpipa Jehoiakhin a kikhahna thuzaksakna tawh hih laibu a thu kikhum hi.
Hih bang minam bup siat nading hong tunna pen Israel le Judah mite le a kumpite uh a thutak lohna hang ahi hi. Jerusalem khuapi a kisuksiatna le Judah mi tampi salin a kimatna thu pen Israel mite’ tangthu-ah thukawng kiheekna lianpi khat ahi hi.
Kumpi Nihnate Laibu sungah Elijah a laih pa Elisha pen kamsang a kidawk pha pen pa ahi hi.
1
Ahaziah A Sihna
1 Ahab a sih khit ciangin Moab gam in Israel lehdo hi.
2 Samaria-a a inndei tungnung innliim panin Ahaziah kia-in a liam hi. Tua ahih ciangin amah in kamtaite sawlin amaute kiangah, “Pai un, hih natna panin ka damkik zo ding hiam cih thu Ekron pasian, Baalzebub kiangah va dong un,” a ci hi.
3 Ahih hangin Topa’ vantungmi in Tishbe mi Elijah kiangah, “Ding in, Samaria kumpipa’ kamtaite a dawn dingin paito-in amaute kiangah, ‘Ekron pasian, Baalzebub kiangah thu a dong dingin na pai nadingun Israel sungah Pasian om nawn lo ahi hiam?’ ci in.
4 Tua ahih ciangin Topa in hih bangin ci hi: ‘Nang pen tu-a na liamna panin na damkik zo nawn kei dinga, na si taktak ding hi, ci hi,’ ci in,” a ci hi. Tua ahih ciangin Elijah zong pai-in a gen hi.
5 Kamtaite zong kumpipa kiangah hong ciahkik uh a, amah in amaute kiangah, “Bang hangin hong ciahkik na hi uh hiam?” na ci hi.
6 Tua ciangin amaute in ama kiangah, “Kote a dawn dingin mi khat hong pai-in kote kiangah, ‘Note hong sawl kumpipa kiangah paikik unla, Topa in hih bangin ci hi: Ekron pasian, Baalzebub kiangah thu a dong dingin mi na sawl nadingin Israel sungah Pasian om nawn lo ahi hiam? Tua ahih ciangin tu-a na liamna panin na damkik zo nawn kei dinga, na si taktak ding hi,’ hong ci hi,” a ci uh hi.
7 Amah in amaute kiangah, “Note a dawn dingin hong pai-in hih thute a gen pa a bangci mi ahi hiam?” a ci hi.
8 Amaute in amah dawngin, “Amah in samulpuan khat silh a, a kawngah savun kawnggak gak hi,” a ci uh hi. Tua ciangin amah in, “Amah pen Tishbe mi Elijah ahi hi,” a ci hi.Ref 1:8 Mat 3:4; Mrk 1:6.
9 Tua ciangin kumpipa in ama kiangah mihing sawmnga a ukpa a mihing sawmnga tawh a sawl hi. Mual dawn khatah a tu Elijah kiangah amah paito-in ama kiangah, “Pasian’ mipa aw, kumpipa in, ‘Hong paisuk hen,’ ci hi,” a ci hi.
10 Ahih hangin Elijah in mihing sawmnga a ukpa dawngin, “Kei pen Pasian’ mi khat ka hih leh, vantung panin meikuang hong paisuk henla, nang le na mihing sawmngate hong kaangtum hen,” a ci hi. Tua ciangin vantung panin meikuang hong paisukin amah le a mihing sawmngate a kaangtum hi.
11 Tua ciangin kumpipa in ama kiangah mihing sawmnga a uk adang khat a mihing sawmnga mah tawh sawlkik hi. Tua ciangin amah paito-in ama kiangah, “Pasian’ mipa aw, kumpipa’ thupiakna hih bang ahi hi: ‘Manlang takin hong paisuk in,’ cihna ahi hi,” a ci hi.
12 Ahih hangin Elijah in amaute dawngin, “Kei pen Pasian’ mi khat ka hih leh, vantung panin meikuang hong paisuk henla, nang le na mihing sawmngate hong kaangtum hen,” a ci hi. Tua ciangin vantung panin Pasian’ meikuang hong paisukin amah le a mihing sawmngate a kaangtum leuleu hi.Ref 1:10, 12 Luk 9:54.
13 Tua ciangin kumpipa in mihing sawmnga a uk a thumna pa a mihing sawmnga mah tawh sawl leuleu hi. Tua ciangin mihing sawmnga a uk a thumna pa paito a, Elijah’ mai-ah hong pai-in khukdinin hong puk a, amah kunh-in, “Pasian’ mipa aw, nangma tungah kong thum hi, keima nuntakna le nangma nasem hih mihing sawmngate’ nuntakna pammaih sa-in hong hehpih in.
14 En in, vantung panin meikuang hong paisuk a, mihing sawmnga a uk a masa nihte a mi sawmnga tuak uh tawh kaangtum hi. Ahih hangin ka nuntakna pammaih sa-in hong hehpih in,” a ci hi.
15 Tua ciangin Topa’ vantungmi in Elijah kiangah, “Amah tawh paisuk in; amah kihta kei in,” a ci hi. Tua ahih ciangin amah dingin kumpipa kiangah amah tawh paisuk a,
16 tua ciangin ama kiangah, “Topa in hih bangin ci hi: ‘Nangmah in Ekron pasian, Baalzebub kiangah thu a dong dingin kamtaite na sawl khin hi. Thudot nading Israel sungah Pasian om nawn lo ahi hiam? Tua ahih ciangin tu-a na liamna panin nang na damkik zo nawn kei dinga, na si taktak ding hi,’ ci hi,” a ci hi.
17 Tua ahih ciangin Elijah’ gensa Topa’ kammal tawh kizui-in amah si hi. Ahaziah in tapa nei lo ahih manin Judah kumpipa Jehoshafat’ tapa Jehoram’ kum nihna kumin, a sanggampa Joram ama tangin kumpi a suak hi.
18 Ahaziah’ gamtatna a sepsa a omlaite, Israel Kumpite’ Khang Tangthu Laibu sungah kigelh hi.