8
Biakinn sungah Thuciam Singkuang Kipaipih
(2Khang 5:2-14)
1 Tua ciangin Solomon in Zion a kici David khuapi panin Topa’ Thuciamna Singkuang la-in Biakinn sungah a paipih dingin Jerusalem khua sung ama kiangah Israel upate le minam lutang, Israel beh makaite a khawm hi.Ref 8:1 2Sam 6:12-16; 1Khang 15:25-29.
2 Tua ciangin Israel mite khempeuh a kha sagihna Ethanim kha sunga pawi hunin Kumpi Solomon kiangah kikhawm uh hi.Ref 8:2 Siam 23:34.
3 Israel upate khempeuh hong pai uh a, siampite in Thuciamna Singkuang la-in Biakinn-ah paipih uh hi.
4 Tua ciangin amaute in kikhopna buk le puanbuk sunga om a siangtho nazatte khempeuh a paipih uh hi. Siampite le Levi mite in tuate paipihto uh hi.
5 Thuciamna Singkuang mai-ah a kikhawm Kumpi Solomon le Israel mihonte khempeuh in biakna-in tuu le bawngtalte tampi tak pia uh ahih manin tuate a phazah kisim zo lo hi.
6 Tua ciangin siampite in a kherub-te’ kha nuai, siangtho pen mun sung, biakinn sung nung lama ama munah Topa’ Thuciamna Singkuang paipih uh hi.
7 Kherub-te in Thuciamna Singkuang omna mun tungah a kha uh zak ahih manin Thuciamna Singkuang le a zawlte tungah kherub-te in khuhna piangsak uh hi.
8 A zawlte sau mahmah ahih manin biakinn sung nung mai siangtho mun panin a zawl mongte kimu a, ahih hangin a pualam panin kimu thei lo hi. Tuni dongin tua san takah tuate om hi.
9 Tua Thuciamna Singkuang sungah, Egypt gam panin a pai khiat lai-un Topa in Israel mite tawh thuciamna a bawlna Horeb-ah Moses in suangpek nih a koih sim loh bangmah dang om lo hi.Ref 8:9 Thkna 10:5.
10 Siangtho mun panin siampite a pai khiat ciangin meii in Topa’ biakinn tuam a,
11 meii hangin siampite nasem dingin om thei lo uh hi; bang hang hiam cih leh Topa’ minthanna vang in Topa’ biakinn a tuam hi.Ref 8:10-11 Pai 40:34-35.
Biakinn Apna
(2Khang 6:1—7:10)
12 Tua ciangin Solomon in,
“Topa in vantungah ni koih khin a,
ahih hangin khuamial sahpi sungah
amah a ten ding gen khin hi. Ref 8:12 La 18:11; 97:2.
13 Keimah in nangma adingin
a kipahtawi mun khat,
na ten tawntung nading
biakinn khat ka lam khin hi,”
a ci hi.
14 Tua ciangin Israel a kikhawmte a din laitakin kumpipa in en kawikawi-in Israel a kikhawmte khempeuh thupha a pia hi.
15-16 Tua ciangin amah in, “‘Egypt panin ka mi Israel-te ka pai khiatpih a kipanin keima min a om theih nadingin biakinn khat lamna ding Israel minam khempeuh sungah khuapi khat zong ka teel kei hi. Ahih hangin ka mi Israel-te tungah a uk dingin David ka teel hi,’ ci-in ka pa David tungah a kam tawh a ciamsa a tungsak Israel Pasian, Topa in thupha ngah tahen.Ref 8:16 2Sam 7:4-11; 1Khang 17:3-10.
17 Israel Pasian, Topa’ min dingin biakinn khat lam ding ka pa David’ lungsim sungah om ngei hi.
18 Ahih hangin Topa in ka pa David kiangah, ‘Keima min dingin biakinn khat lam ding na lungsim sungah a omna thu a hoih mahmah ahi hi.Ref 8:17-18 2Sam 7:1-3; 1Khang 17:1-2.
19 Ahi zongin nangmah in a biakinn na lam kei dinga, nangma sung pan hong suak ding na tapa in ka min dingin biakinn a lam ding hi,’ a ci hi.Ref 8:19 2Sam 7:12-13; 1Khang 17:11-12.
20 Tu-in ama bawlsa thuciamna Topa in tungsak khin hi. Bang hang hiam cih leh ka pa David’ munah keimah khangin, Topa’ ciamsa bangin Israel kumpi tokhom tungah ka tu a, Israel Pasian, Topa’ min dingin a biakinn ka lam khin hi.
21 Amah in Egypt leitang panin amaute a pai khiatpih lai-in amah in i pu i pate tawh a bawl Topa’ thuciamna a omna Thuciamna Singkuang adingin tua lai-ah mun khat ka bawlsak hi,” a ci hi.
22 Tua ciangin Israel a kikhawmte khempeuh a omna Topa’ mai-ah Solomon dinga, vantung lamah a khutte zak hi.
23 Amah in, “Israel Pasian, Topa aw, tunga om vantung ahi a, nuai-a om leitungah ahi zongin, nangma mai-ah a lungsim khempeuh uh tawh a gamta na nasemte tungah thuciamna lenin itna kip a lak, nang tawh a kibang pasian om lo hi.
24 Na nasem ka pa David tungah na gensa thu na kipsak hi. Nangmah in na kam tawh na gen a, tuni-in na tungsak hi.
25 Tua ahih ciangin tu-in Israel Pasian, Topa aw, ama tungah, ‘Keima mai-ah nang na gamtat mah bangin na tapate in keima mai-ah gamtat ding a kidop nak-uhleh, Israel kumpi tokhom tungah a tu dingin keima mai-ah mi khat zong na tasam kei ding hi,’ ci-in na nasem ka pa David tungah na ciamsa thu lenkip in.Ref 8:25 1Kum 2:4.
26 Tua ahih ciangin tu-in Israel Pasian aw, na nasem ka pa David tungah na gensa thu kipsak in.
27 “Ahih hangin leitungah Pasian teeng taktak ding ahi hiam? Vantung le vantung a sang pen in nang hong huam zo lo hi. Tua ahih manin keima lamsa hih biakinn in bangzahin nang hong huam zo lo zaw kan ding ahi hiam?Ref 8:27 2Khang 2:6.
28 Ahi zongin na nasem pa’ thungetna le a hong thumna hong don inla, Topa ka Pasian aw, tuni-in nangma mai-ah na nasem pa in a hong ngetna, a kikona le a thungetna hong ngai in.
29 ‘Tua lai-ah ka min om ding hi,’ na cihna mun hih biakinn lamah sun le zanin na mit hak inla, na nasem pa in hih mun lamah a thungetna hong za in.Ref 8:29 Thkna 12:11.
30 Amaute in hih mun lamah hong nget uh ciangin na mi Israel-te’ hong thumna zong ngai in. Na tenna mun vantung panin hong za inla, ka mawhna uh hong maisak in.
31 “Mi khat a veengpa tungah khialin, amah a kiciamsak a, amah hong pai-in hih biakinn sung nangma biakna tau mai-ah a kiciam leh,
32 nangmah in vantung panin za-in gamta inla, na nasemte thu khen inla, a mawh pa thuak sakin ama lu tung mahah ama gamtatna tungsak inla, a dikpa a dikna langsakin ama dikna tawh kizui-in thaman pia in.
33 “Nangma tungah hong khialhna hangin galte mai-ah na mi Israel-te a guallelh ciangin, amaute nang lamah hong kiheikikin nangma min hong phawk a, hih biakinn sungah thu ngenin nang tungah hong thum uhleh,
34 vantung panin za-in na mi Israel-te’ khialhna maisak inla, a pu a pate uh tungah na piak leitangah amaute paipihkik in.
35 “Nangma tungah hong khialhna hangin vantung kikhakcipin guah a zuk loh ciangin, amaute in hih mun lamah thu ngenin na min hong phawk a, amaute na gimsak ciangin amau’ khialhna panin a kihei uhleh,
36 vantung panin za-in na mi Israel, na nasemte’ khialhna maisak inla, amaute’ zuih ding lampi hoih hilh inla, na mite tungah gamh-in na piaksa leitang tungah guah zusak in.
37 “Gam sungah kialpi tungin, pulnatna ahi a, ankung natna ahi a, ankung zawngkhalna ahi a, kauphe ahi a, lung ahi zongin a om a, amau’ khuapi khat peuhpeuh a galte un umcihin, bangbang gimna, bangbang natna hitaleh,
38 mi khatpeuh ahi a, na mi Israel-te khempeuh in ahi zongin amau’ lungsim natna thei-in hih biakinn lamah a khutte hong zanin bangbang thungetna hitaleh bangbang thumna hitaleh hong bawl uhleh,
39 na tenna vantung panin za-in maisak in. Tua ciangin amau’ gamtatna khempeuh tawh kizui-in a lungsim uh na theih bangin amaute tungah pia ciat in (bang hang hiam cih leh nang, nang bek in mihing khempeuh lungsim na thei hi).
40 Tua hileh ka pu ka pate uh tungah na piak leitang tungah a nuntak hun sung khempeuh uh amaute in nang hong zahtak ding uh hi.
41 “Tua mah bangin na mi Israel a hi lo gamdang mi khat nangma min hangin a gamlapi panin hong pai-in
42 (bang hang hiam cih leh amaute in a lian nangma minthanna le nangma mite adingin na sepsak na liante’ thu za ding uh hi), hih biakinn lamah thu hong nget ciangin,
43 na tenna vantung panin za inla, tua gamdang mipa in nang tungah hong ngetna khempeuh tawh kizui-in hih in. Nangma mi Israel-te mah bangin leitung mi khempeuh in na min thei-in nang hong zahtak nading le hih ka lamsa biakinn pen nangma min tawh a kilo ahihna a theih nading uh ahi hi.
44 “A galte uh a do dingin na mite kuan khia-in, bangbang lamah amaute sawl hita lecin, nangmah in na teelsa khuapi lam, Topa’ tung le nangma min dingin ka lamsa biakinn lamah thu hong nget uh ciangin,
45 amau’ hong thungetna le hong thumna vantung panin za-in amau’ vai huh in.
46 “Amaute nang tungah hong khialin - bang hang hiam cih leh mi a khial lo kuamah om lo hi - amaute tungah nang heh a, galte tungah amaute pia-in, amaute kimanin a galte’ gam a gamla ahi a, a nai-ah ahi zongin kipuakhia a,
47 ahi zongin amaute a kipuak khiatna leitangah amaute in a lungsim uhah thu ngaihsunin kisikkik a, ‘Kote khialin lampialin ka gitloh tat uh hi,’ ci-in amaute a mante’ leitang panin nang tungah hong thum uh a,
48 amaute manin a pua khia a galte uh leitangah a ngaihsutna khempeuh uh le a lungsim khempeuh uh tawh amaute kisikkikin, nangmah in na teelsa khuapi, amau’ pute pate’ tungah na piaksa amau’ leitang le nangma min dingin ka lam biakinn lam nga-in nangma tungah thu hong nget uhleh
49 vantung na tenna mun panin amau’ hong thungetna le hong thumna za-in, amau’ vai huh in.
50 Nang tungah hong khial na mite le nang tunga hong gamtatna uh amau’ thupalsatnate khempeuh maisakin, a galte un amaute tungah hehpihna a neih theih nadingun amaute manin a pua khia mite’ muhna-ah amaute hehpih in.
51 (Bang hang hiam cih leh amaute pen Egypt panin na pai khiatpih, sik meiphual sung panin na pai khiatpih nangma mi le nangma luah ahi uh hi.)
52 Na nasem pa’ hong thumna le na mi Israel-te’ hong thumna-ah maipha tawh hong en tawntung inla, nang hong sap peuhmah uh ciangin amaute na bil na ngat in.
53 Egypt panin ka pate uh na pai khiatpih lai-in na nasem pa Moses tungtawnin na gen bangin nangma luah ahi dingin leitung mi khempeuh lak panin amaute na teng khia hi, Topa Pasian aw,” a ci hi.
54 Tu-in Solomon in hih thungetna le thumnate khempeuh Topa’ tungah a bawl khit ciangin, vantung lamah a khutte a zan sa-in a khukdinna mun Topa’ biakna tau mai panin amah dingto hi.
55 Tua ciangin amah dingin awging pha tawh Israel a kikhawmte khempeuh thupha pia-in,
56 “Ama hong ciamsa khempeuh tawh kizui-in ama mi Israel-te tungah tawlngakna a pia Topa in thupha ngah tahen! A nasem pa Moses tungtawnin a gensa ama thuciam hoihte khempeuh kam khat zong maimawk lo hi.Ref 8:56 Thkna 12:10; Josh 21:44-45.
57 I pu i pate a ompih mah bangin Topa i Pasian in eite hong ompih henla, eite hong nusia kei henla, hong taisan kei hen.
58 Amah in i pu i pate a thupiaksa ahi ama lampi khempeuh a zui ding le ama thupiaknate, a thukhamte le a ngeina kipte a zui dingin ama lamah i lungsim hong awnsak hen.
59 Topa’ mai-ah ka thumna kammalte sun le zanin Topa i Pasian in hong za henla, nisimin a kisam bangin a nasem pa’ vai le ama mi Israel-te’ vai hong huh tahen.
60 Tua hileh mi khempeuh in Topa pen Pasian hi, ci-in thei ding uh a, kuamah dang a om lohna phawk ding uh hi.
61 Tua ahih ciangin Topa i Pasian’ tungah na lungsim khempeuh uh tawh thuman unla, tuni-a bangin ama thukhamte zui-in a thupiaknate mang un,” a ci hi.
62 Tua ciangin kumpipa le amah tawh a om Israel mi khempeuh in Topa’ mai-ah biakna a pia uh hi.
63 Solomon in thunuama biakna-in Topa’ tungah bawngtal tul sawmnih le tulnih le tuu tul zakhat le tul sawmnih a pia hi. Tua bangin kumpipa le Israel mi khempeuh in Topa’ biakinn a ap uh hi.
64 Tua ni mahin kumpipa in Topa’ biakinn mai-a om inntual laizang ap hi; bang hang hiam cih leh meihal biakna le an tawh biakna le thunuama biakna a thaute a ta zo dingin Topa’ mai-a sumngo biakna tau neulua ahih manin tua lai-ah meihal biakna le an tawh biakna le thunuama biakna thaute a pia hi.
65 Tua hi a, tua hun lai-in Solomon le amah tawh a om Israel mi khempeuh in Topa i Pasian’ mai-ah ni sagih sung, Hamath khua lutna panin Egypt lui dong kikhopna lianpi khat bawlin pawi khat kham uh hi.
66 A ni giat ni-in amah in mite ciahsak hi. Amaute in kumpipa thupha pia uh a, Topa in a nasem pa David le ama mi Israel-te tungah hoihna a lahnate khempeuh hangin lungdamna le lungsim kipahna tawh a inn ciat uhah a ciah uh hi.