14
Aisanna tawh Kanaan gam Kihawm
1 Hihte pen, siampi Eleazar, Nun tapa Joshua le Israel minam sung pan beh lutangte in amaute tungah a piak, Kanaan gam sungah Israel mite’ ngah gamhte ahi hi.
2 Minam kua le alangte adingin Topa in Moses a thupiak bangin amau’ gamhte aisanna tawh kipia hi.Ref 14:2 Gam 26:52-56; 34:13.
3 Bang hang hiam cih leh Moses in Jordan galkhat ah minam nih le alangte tungah gamh pia khinzo hi. Ahih hangin amaute lakah Levi mite tungah bangmah pia lo hi.
4 Bang hang hiam cih leh Josef mite minam nihin kikhen a, Manasseh le Efraim minamte ahi uh hi. Tua gam sungah Levi-te tungah tanh kipia lo a, ahih hangin amau’ ten nading khuapite le a ganhingte uh adingin lonona gamte kipia bek hi.Ref 14:3-4 Gam 32:33; 34:14-15; Thkna 3:12-17.
5 Topa in Moses a thupiak bangin Israel mite gamta uh a, amaute in leitang a hawm uh hi.
Kaleb tungah Hebron Kipia
6 Tua ciangin Judah minamte Gilgal-a Joshua kiangah pai uh a, amaute sung panin Kenaz mi Jefunneh tapa Kaleb in ama kiangah, “Topa in Kadeshbarnea-ah Pasian mi Moses tungah nang le kei’ thu tawh kisai a gente na thei hi.Ref 14:6 Gam 14:30.
7 A gam sung thukansim dingin Topa’ nasem Moses in Kadeshbarnea panin kei hong sawl lai-in kum sawmli ka pha a, ka lungsim a om bangin ama kiangah thu ka tunkik hi.Ref 14:7 Gam 13:1-30.
8 Ahih hangin kei tawh hong paito khawm ka sanggamte in mite lungkiasak uh a, ahi zongin keimah in lungsim tak tawh Topa ka Pasian ka zui hi.
9 Tua ni-in Moses kiciamin, ‘Nangmah in Topa ka Pasian, lungsim tak tawh zui na hih manin na khe in a totsa leitang pen nang le na tate adingin gamh hi tawntung ding hi,’ hong ci hi.Ref 14:9 Gam 14:24.
10 Tu-in, a cihsa bangin Topa in, Israel mite sehnel gamah a pai sung, Topa in hih thu Moses tungah a gen a kipan hih kum sawmli le nga sung kei hong nungtasak a, tu-in kei kum sawmgiat le kum nga ka pha hi.
11 Moses in hong sawl hun lai mah bangin tuni-in kei ka tha hat lai a, galdo nading le kuankhiatna le ciahkik nadingin ka thatang pen tua hun lai-a ka thatang mah bang lai hi.
12 Tua ahih ciangin tu-in tua ni-a Topa’ gen hih mual tung gam kei hong pia in. Anak mite a muanhuai mahmah khuapi sungah a omna thu tua hun lai-in kong gen uh hi. Topa in kei hong ompih dinga, Topa’ cih mah bangin amaute ka hawl khia zo kha ding hi,” a ci hi.
13 Tua ciangin Joshua in amah thupha pia a, Jefunneh’ tapa Kaleb tungah gamh-in Hebron a pia hi.
14 Tua ahih ciangin amah in Topa, Israel-te’ Pasian, lungsimtak tawh zui ahih manin tuni dongin Hebron pen Kenaz mi Jefunneh’ tapa Kaleb’ gamh a suak hi.
15 Hih Hebron min a nidangin Kiriatharba kici hi; Arba pen Anak mite lakah mi lianpen khat ahi hi. Tua ciangin galdona panin tua gam a tawlnga hi.