12
Moses in a Zawh Kumpite
Tu-in nisuahna lam Jordan galkhat, Arnon kuam panin Arabah khempeuh, Hermon Mual ciang dong Israel mite in a leitang uh laksakin a zawh kumpi nihte: 2-3 Heshbon-ah a teeng Amor kumpi, Arnon kuam gei-a om Aroer pan le Gilead kuam laizang panin phel lang ahi Ammon mite’ gamgi Jabbok gun ciang dong le Arabah panin nisuahna lamah Khinneroth Tuipi le Bethjeshimoth lamah Pisgah mual pang bul leitaw lama om Ci Tuipi ahi Arabah tuipi ciang dong a uk Sihon; 4-5 le Bashan kumpi, Refaim panin a suaktate lakah khat, Ashtaroth le Edrei-ah teengin, Hermon Mual le Salekah le Bashan gam khempeuh, Geshur mite le Maakath mite gamgi ciang le Gilead langkhat panin Heshbon kumpipa Sihon’ gamgi ciang dong a uk Og ahi hi.Ref 12:1-5 Gam 21:21-35; Thkna 2:26-3:11. Topa’ nasem Moses le Israel mite in amau tegel a zo uh hi. Tua ciangin Topa’ nasem Moses in Reuben mite, Gad mite le Manasseh minam alangte tungah a neih dingun amau’ leitang a pia hi.Ref 12:6 Gam 32:33; Thkna 3:12.
Joshua in a Zawh Kumpite
7-8 Hihte pen, Joshua le Israel mite in a zawh Jordan nitumna lampang, Lebanon kuam sung Baalgad panin Seir lamah a kikhungto Halak Mual kikal-a om kumpite ahi hi. (Joshua in mual tung gam, lei niamna gam, Arabah gam, mual pang suk, sehnel gam le Negeb gam sunga om Hit mite, Amor mite, Kanaan mite, Perez mite, Hiv mite le Jebus mite’ leitangte Israel minamte’ tungah amau’ ngah ding tawh kizui-in a neih dingun a pia hi.) A zawh uh kumpite: Jerikho kumpi, khat; Bethel gei-a om Ai kumpi, khat; 10 Jerusalem kumpi, khat; Hebron kumpi, khat; 11 Jarmuth kumpi, khat; Lakhish kumpi, khat; 12 Eglon kumpi, khat; Gezer kumpi, khat; 13 Debir kumpi, khat; Geder kumpi, khat; 14 Hormah kumpi, khat; Arad kumpi, khat; 15 Libnah kumpi, khat; Adullam kumpi, khat; 16 Makkedah kumpi, khat; Bethel kumpi, khat; 17 Tappuah kumpi, khat; Hefer kumpi, khat; 18 Afek kumpi, khat; Lasharon kumpi, khat; 19 Madon kumpi, khat; Hazor kumpi, khat; 20 Shimronmeron kumpi, khat; Akshaf kumpi, khat; 21 Taanak kumpi, khat; Megiddo kumpi, khat; 22 Kadesh kumpi, khat; Karmel gam sunga Jokneam kumpi, khat; 23 Nafathdor sunga Dor kumpi, khat; Galilee sunga Goiim kumpi, khat; 24 Tirzah kumpi, khat; a vekpi-in kumpi sawmthum le khat ahi hi.