JOSHUA
(The Book of Joshua)
Thupatna
Joshua Laibu sungah Moses a laih pa Joshua makaihna tawh Israel mite in Kanaan gam a simna thu kigelh hi. Hih laibu sungah a kigelh thupiang a liante sungah Jordan gun kantanna, Jerikho khuapi a kilakna, Ai khua-ah gal kidona le Pasian le a mite in thu a ciam phat kikna uh kihel hi. Hih laibu sungah a kithei kim pen thu khat in, “Kua’ na sem ding cih thu tuni-in teel un. Kei le ka innkuanpihte in ahihleh Topa’ na ka sem ding uh hi,” (24:15) a cihna thu ahi hi.
1
Kanaan Lak nading Kiginnate
1 Topa’ nasem Moses a sih khit ciangin Topa in Moses’ nasem, Nun tapa Joshua kiangah,
2 “Ka nasem pa Moses si ta ahih ciangin tu-in ding inla, nang le hih mite khempeuh, hih Jordan kantanin Israel mite tungah ka piak gam sungah pai un.
3 Moses tungah ka ciamsa bangin na khe in a sikna mun khempeuh nang tungah kong pia hi.
4 Sehnel gam le hih Lebanon panin gun lianpi Eufratis gun dong, ni a tumna lama Tuipi Lian lam, Hit mite’ leitang khempeuh nangma gam hi ding hi.
5 Na nuntak sung tawntung kuamah in na mai hong khak zo lo ding hi. Moses tawh ka om mah bangin nang tawh zong kong om ding hi. Nang kong tamasak kei dinga, kong nusia kei ding hi.Ref 1:3-5 Thkna 11:24-25 Ref 1:5 Thkna 31:6, 8; Heb 13:5.
6 Thahat inla, hang in; bang hang hiam cih leh amaute piak dingin a pu a pate uh tungah ka ciam leitang hih mite na luahsak ding hi.Ref 1:6 Thkna 31:6, 7, 23.
7 Thahat-in hang inla, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuhah hoihtakin na lamzan theih nadingin tuate khat zong pelh kei in.
8 Hih thukham laibu na mangngilh ngei kei ding hi. A sunga kigelh thute khempeuh tawh kizui-in na gamtat theih nadingin sunlezanin na lung ngaingai ding hi. Tua hileh na maa vang dinga, na nasep tangtung ding hi.
9 Thu hong pia khin hi lo ka hi hiam? Thahat inla hang in. Lau kei inla lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi.
10 Tua ciangin Joshua in mi makaite thu pia-in,
11 “Giahphual ah pai unla, mite thu pia-in, ‘Na lam-an ding uh kiging khol un; bang hang hiam cih leh Topa na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi.
12 Tua ciangin Joshua in Reuben mite, Gad mite le Manasseh minam a langte tungah,
13 “‘Topa na Pasian un note tawlngakna mun hong pia-in, hih leitang note hong pia ding hi,’ a cihna Topa’ nasem Moses in note tungah hong gen kammal phawk un.
14 Moses in Jordan galkhat a note hong piak leitangah na zite uh, na taneute uh le na ganhingte uh a na om ding uh hi. Ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in,
15 note hong piak bangin Topa in na sanggamte uh tungah tawlngakna pia-in, Topa na Pasian un amaute a piak leitang amaute in zong a luah mateng uh na huh ding uh hi. Tua ciangin note’ neih leitangah ciahkikin, Topa’ nasem Moses in Jordan gal ni a suahna lamah note hong piak leitang na luah ding uh hi,” a ci hi.Ref 1:12-15 Gam 32:28-32; Thkna 3:18-20; Josh 22:1-6.
16 Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi.
17 Na khempeuh ah Moses’ thu ka man uh mah bangin nangma thu zong kong mang ding uh hi. Moses a ompih mah bangin Topa na Pasian in nang hong ompih tahen!
18 Na thupiakna le na thute, na thupiak peuhpeuh hong langpangin a mang lo mipa kithat ding hi. Thahat inla hang in,” a ci uh hi.