29
Jeremiah in Saltangte Lai Khak
1 Jerusalem khua panin Nebukhadnezzar in Babylon khua-ah salin a pai khiatpih uliante, siampite, kamsangte le mi khempeuhte’ tungah lai khat ka khak hi.
2 Tua hunin kumpi Jehoiakhin le a nu, a kumpi innsungmaangte, Judah gam le Jerusalem khua-a makai upate, khutsiamte le sikseekte, Jerusalem khua panin kipai khiatpih khinzo hi.Ref 29:1-2 2Kum 24:12-16; 2Khang 36:10.
3 Tua laikhak pen Judah kumpipa Zedekiah in Babylon khua Nebukhadnezzar kumpipa kiangah kumpi taangmi dingin a puak Shafan’ tapa Elasah le Hilkiah’ tapa Gemariah-te ka puasak hi. Tua sungah:
4 “Jerusalem panin Babylon-ah a hong kipuak khia saltang mi khempeuhte’ tungah Vanglian Topa, Pasian in hih bangin hong ci hi:
5 Inn lam unla, a sungah teeng un. Huan bawl unla, a sungah na cinte uh ne un.
6 Zi pi unla tanu tapa nei un. Na tapate ading mo la unla, na tanute uh mo kha un; tua hileh amau in zong tanu tapa hong nei ding uh hi. Kiam kei unla, pung zaw un.
7 Note salin kong koihna khuapi’ phattuamna ding bawl unla, tua khuapi adingin Topa’ tungah thu ngetsak un. Bang hang hiam cih leh tua khuapi in phattuamna ngah leh no zong phattuamna a ngah mah na hi uh hi.
8 Vanglian Topa, Israel mite’ Pasian in kong genin-ah: Note’ lakah a om na kamsangte uh le na aisan theite uh’ khemsa-in ta kei unla, a mangmat hong gente uh na ngai kei un.
9 Bang hang hiam cih leh ka min tawh no tungah hong gen uh thute zuauthu hi a, ka sawl lohpi ahi uh hi, Topa in ci hi.
10 “Topa in kong cih in-ah: Babylon khua-ah kum sawmsagih na om khit uh ciangin, note kong kankik dinga, kong kamciamnasa hong tangtung sakin hih munah kong lakik ding hi.Ref 29:10 2Khang 36:21; Jer 25:11; Dan 9:2.
11 Bang hang hiam cih leh Topa in kong cih in-ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi.
12 Tua hun ciangin note in kei hong samin, hong pai-in thu nong ngen ding uh a, ke’n zong kong dawng ding hi.
13 Note in kei nong zong ding uh a, na lungsim khempeuh uh tawh nong zon uh ciangin nong mu ding uh hi.Ref 29:13 Thkna 4:29.
14 Topa in kong cih in-ah, note in nong mu ding uh a, na saltanna uh hong beisakin, kong hawl khiatna gam khempeuh le mun khempeuh panin kong kaikhawmkik dinga, note kong lakkhiatna gam mahah kong tunpihkik ding hi, Topa in kong ci hi.
15 “Note in, ‘Eite adingin Topa in Babylon khua-ah kamsang hong koihsak hi,’ ci-in gen na hih manun
16 David kumpi tokhom tunga tu kumpipa le hih khuapi sunga om, note tawh saltang dingin a paikhawm lo na behte khempeuh uh tawh kisai-in Topa in kong genin-ah:
17 En un, amaute tungah namsau tawh kithahna, kialpi le pulnatna ka tungsak dinga, amaute, a kine thei lo theigah muat ka bangsak ding hi.
18 Amaute, namsau, kialpi le pulnatna tawh ka nungdelh dinga, ka hawl khiatna ding mun khempeuh ah mite in kihamsiatna-in a zat dingun simmawhna le zahkonate ka thuaksak dinga, amaute’ thuakna hangin leitung gam khempeuh ka lausak ding hi.
19 Bang hang hiam cih leh, Topa in kong cih in-ah, ka nasem ka kamsangte’ tungtawnin kong puak ngitnget thute amaute in thupisim loin a hong mang kei uh hi.
20 Jerusalem khua panin Babylon khua-ah kong puakkhiat, no saltangte khempeuh aw, Topa’ kammal ngai dih un:
21 “Vanglian Topa, Israel mite’ Pasian in, kei’ min tawh note kiangah zuauthu a hong hilh Kolaiah’ tapa Ahab le Maaseiah’ tapa Zedekiah-te tawh kisai-in kong genin-ah: En un, keimah in amaute Babylon kumpipa Nebukhadnezzar’ khut sungah ka pia dinga, amah in note’ muhin amaute a thatlum ding hi.
22 Amaute’ hangin Judah gam panin Babylon khua-ah saltang mi khempeuh in, ‘Babylon kumpipa in Zedekiah le Ahab, a hingtangin mei sungah a hal bangin Topa in nang hong hal tahen,’ ci-in kihamsiatna-in a zang ding uh hi.
23 Bang hang hiam cih leh amaute, Israel gamah hai gamtat uh hi: A innveengte’ zite mawhpih uh a, thu ka piak lohpi ka min tawh zuauthu a gen uh hi. Keimah Topa in ka mu a, teci ka hi hi, hong ci hi,” ci-in ka gelh hi.
24-25 Nehelam khuami Shemaiah kiangah thugen dingin Vanglian Topa, Israel mite’ Pasian in kei hong sawl hi. Shemaiah in ama min tawh Jerusalem khua-a om mi khempeuhte’ kiang le siampi Maaseiah’ tapa Zefaniah le siampi khempeuhte kiangah lai na khak hi. Tua a lai sungah Shemaiah in Zefaniah’ kiangah,
26 “Topa in siampi Jehoiada tangin nangmah siampi-in hong koih khinzo a, Topa’ biakinnpi sungah a ukpi ding na hi ta hi. Tua ahih manin thu a hilh mawkmawk mihaite thong kia sakin kol na bulh ding hi.
27 Bang hangin note kiangah thu a hong hilh Anathoth khuami Jeremiah tai lo na hi hiam?
28 Bang hang hiam cih leh amah in Babylon khua-ate lai hong khakin, sawt veipi sal tang ding na hih manun, inn lamin a sungah teeng unla, huan bawlin a sunga na cinte uh ne un, hong ci hi,” ci-in a gelh hi. Hih bangin Zefaniah’ kiangah a laikhakna thu tawh kisai Shemaiah kiangah a gen dingin Pasian in kei hong sawl hi.
29 Siampipa Zefaniah in hih laikhak kei kiangah hong sim khia hi.
30 Tua ciangin Topa in kei hong hopih a,
31 “Saltang mi khempeuhte’ kiangah Nehelam khuami Shemaiah tawh kisai-in Topa’ thugenna hih bangin zasak in: Kong sawl lohpi Shemaiah in note kiangah thu hong gen a, zuauthu hong umsak ahih manin,
32 Topa in kong cih in-ah: En un, keimah in Nehelam khuami Shemaiah le a suan a khakte gim ka pia ding hi. Amah in keimah hong langpanna ding thu gen ahih manin ka mite adingin a hoih ka bawl ding nate, amah le a suan a khakte khat beek in a mu kei ding uh hi, ci-in gen in,” hong ci hi.