3
Minam Dangte tungah Topa’ Thukhenna
1 “Tua hun ciangin
Judah le Jerusalem,
a nidang hun lai mah uh
ka bangsakkik ding hi.
2 Minam dang khempeuh kaikhawmin
Jehoshafat Kuam-ah ka paipih ding hi.
Ka mihingte tungah a bawlnasa uh hangin
tua munah amaute thu ka khen ding hi.
Amaute in Israel mite,
gam dangah thehthang uh a,
ka gam sungteng
phelhawm mangkhin uh hi.
3 A galmatte uh kua in ngah ding,
ci-in ai san uh a,
zu le numei lei nadingin
numeino le naupangnote
sila-in a zuak uh hi.
4 “Taia khua, Sidon khua le Filistia gam khempeuh aw, kei bang hong cih nuamin a kinei na hi uh hiam? Bang khat peuhpeuh hangin hong thukkik nuamin a kinei na hi uh hiam? Kei a hong thukkik na hih uhleh, kei zong manlang takin kong thukkik pah ding hi.
5 Ka ngun, ka kham le ka na manpha tampite la-in, na biakinn sung uhah na puak uh hi.
6 Judah le Jerusalem mite, amau’ gam panin gamlapi-ah paipihin, Grik mite tungah na zuak uh hi.
7 Tu-in amaute na zuakna uh mun panin a la khiakik ding ka hi a, amaute tungah na bawl bangun note tungah kong bawl ding hi.
8 Na tanute uh le na tapate uh Judah mite tungah ka zuak dinga, amaute in a gamlapi-a om Seba minamte tungah zuaksawn ding uh hi. Bang hang hiam cih leh Topa in gen khinzo hi.Ref 3:4-8 Isa 14:29-31; 23:1-18; Jer 47:1-7; Ezk 25:15-28:26; Amos 1:6-10; Zefa 2:4-7; Zek 9:1-7; Mat 11:21-22; Luk 10:13-14.
9 “Minam dangte tungah
hih bangin thuzaksakna bawl in:
Galhang mite sam unla,
galdo dingin kithawi un.
Galkap khempeuh kaikhawmin
hong kuan un!
10 Lokhawhna tute namsau-in
seek unla,
singhiang heuhna temkawite
teipi-in seek un.
A thahat lote nangawn in do uh hen.Ref 3:10 Isa 2:4; Mik 4:3.
11 Kimkotah a om
minam dang khempeuh aw,
manlangin hong kuan unla,
tua kuamah hong kikhawm un.
Topa aw,
na galhangte hong paipih suk in.
12 “Minam dangte hong kithawi henla,
Jehoshafat Kuam-ah
hong kuan suk uh hen.
Kimkotah a om
minam dang khempeuh’ thu
a khen dingin Topa ahi keimah,
tua munah ka tu ding hi.
13 Amaute gilo mahmah uh ahih manin
anlak huna buhsi bangin
at gawp unla,
leenggahtui dawhna a dim letin a luang,
leenggah cilna kuang sunga om
leenggah bangin tuancil gawp un,” a ci hi. Ref 3:13 Mang 14:14-16, 19-20; 19:15.
14 Thukhenna Kuam-ah
a tul a thenin om uh hi.
Bang hang hiam cih leh
tua lai munah
Topa’ ni hong tung baih ding hi.
15 Ni le kha mialta a,
aksite zong taang nawn lo hi.
Judah A Kihotkhiatna
16 Zion Mual panin Topa hong hawksuk a,
Jerusalem panin hong awngkek a,
vanpi le leipi a liing damdam hi.
Ahi zongin Topa pen
ama mite’ belh pa hi a,
Israel mite a hu ding hi.Ref 3:16 Amos 1:2.
17 Tua ciangin Topa in, “Israel-te aw,
ka mual siangtho Zion tungah
a teeng keimah pen
Topa note’ Pasian ka hihna
na hong thei ding uh hi.
Jerusalem pen a siangtho
biakna khuapi hi dinga,
gamdang mite in
zokik nawn lo ding uh hi.
18 Tua hun ciangin
mual tung khempeuh leenggui lo hi dinga,
mual neute khempeuh tungah
bawnghon dim dinga,
Judah gam sung khempeuh ah
tui tampi om ding hi.
Topa’ biakinn panin
luitui khat hong luang khia dinga,
Shitthim kuamsung khempeuh
19 “Amaute in Judah gam simin,
mawhnei lo mite that uh ahih manin,
Egypt gam, sehnel gam suakin,
Edom gam, gam sia suak ding hi.
20-21 A kithat mite’ phu
keimah in ka la dinga,
a mawhte ka khahkhong kei ding hi.
Judah gamah
mi teeng tawntung ta dinga,
Jerusalem-ah a khangkhangin
mi om tawntung dinga,
Zion Mual-ah Topa a teeng ding hi.” a ci hi.