28
Mihing in Pilna a Zonna
1 “Ngun a kitawh khiatna
a khuk om a,
kham a kisiansakna
a mun mah om hi.
2 Mihingte in lei sung panin sik to khia a, suang sung panin
sumsan a huantui uh hi.
3 Mihingte in
khuamial thuk pen sung zongin,
lei sung a thukpi dong
hahkatin zong uh a,
khuamial thuktawng sung pan
suang a to khia uh hi.
4 Mihingte’ tenna panin
a gamlapi mun,
kuamah a pai ngei lohna sungah
lei sung sumte a to khia uh hi.
Tua lai munah amau guak in
na semsem uh a,
lei thuk sungah khauhual tawh
kiveisuk kiveito uh hi.
5 I annek dingte leitungah
hong po khia a,
ahi zongin leinuai thuk sung
mei bangin a sa mahmah hi.
6 Lei sunga om suangte sungah
sapfaia suangmanpha om a,
a leivuite sungah kham a om hi.
7 Simbung in zong tua lampi thei ngei lo a,
luimu zong tua lai-ah va leng ngei lo hi.
8 Humpinelkai ahi a,
ganhing dangte ahi zongin
cikmah hunin tua lai-ah
9 “Mihingte in suang a sak pente to uh a,
mualte’ bul lei sung panin
a to khia uh hi.
10 Suangte a tawhvang uh ciangin
suangmanphate a mu uh hi.
11 Amaute in tuinak kipatna dong
lei sung to uh a, a kiphumcip nate
hong suah khia uh hi.
12 Ahi zongin koi lai-ah
pilna kimu ding ahi hiam?
Koi lai-ah
thutheihna nak om ahi hiam?
13 “Mihingte in a kimuhna ding
a lampi thei lo uh a,
mihingte’ gam sungah zong
a lampi om lo hi.
14 A thuk mahmah tuipi liante in,
‘Ko’ sungah om lo hi,’ ci uh a,
tuipite in, ‘Ko kiangah om lo hi,’
a ci uh hi.
15 Pilna pen kham tawh a kilei zo hi lo a,
a man ding zah zong
ngun tawh seh theih hi lo hi.
16 Ofir kham tawh pilna a kilei zo hi lo a,
suangmanpha pen tawh zong
a kilei zo hi tuan lo hi.
17 Pilna a manphatna
kham le limlang tawh tehtheih hi lo a,
kham hoih pen a kibawl
nate tawh zong lei zawh hi lo hi.
18 Pilna a manphatna
suangkhi le limlang tawh
genteh theih hi lo a,
pilna themkhat bek nangawn
kep sangin manpha zaw lai hi.
19 Ethiopia gamah a piang
topaz suangmanphate tawh
tehtheih ding hi lo a,
kham citak hoih pen tawh zong
20 “Tua ahihleh koi lai panin
pilna hong piang ahi hiam?
Thutheihna koi lai-ah om ahi hiam?
21 Nuntakna a nei sung pan
a mu thei kuamah om lo a,
a leeng thei vasate nangawn in
mu thei lo uh hi.
22 Sihna le siatna nangawn in
a thu hemzak bek ung, ci lai uh hi.
23 “Pasian bek in pilna lampi thei a,
amah bek in a omna mun a thei hi.
24 Bang hang hiam cih leh
amah in leimong dong mu a,
vantung nuai-ah a om
na khempeuh a mu thei hi.
25 Pasian in huih a gik ding zah bawlin,
tuipi a liatna ding zah a seh laitak,
26 guah zukna ding mun thu pia-in,
khuaphialep in a zuih ding
lampi bawlin
a vaihawm laitak nangawnin,
27 amah in pilna mu-in
a manphate entel a,
amah in hoihsa ahih manin
28 “Tua ciangin amah in
mihingte tungah thu genin,
‘Topa zahtakna, pilna hi a,
siatna pelhna pen
thutheihna hi,’ ci hi,”
a ci hi.Ref 28:28 La 111:10; Pau 1:7; 9:10.