49
Topa’ Nasempa, Minamte’ Khuavak
1 Tuipi gei-a om gamte aw,
ka thu ngai un.
Gamlapi-a om mihingte aw,
ka thu ngai un.
Ka suah ma-in
Topa in kei hong teel a,
ka nu sungah ka om lai-in
amah in keima min hong pulak khin hi.Ref 49:1 Jer 1:5.
2 Amah in ka thugente,
namsau hiam bangsak a,
ama khut tawh keimah hong hu hi.
Amah in a kinawtngil
thaltang bangin kei hong bawl a,
a hiamsa-in zat pah dingin
a thallawng sungah kei hong koih hi.Ref 49:2 Heb 4:12; Mang 1:16.
3 Amah in kei kiangah, “Nang pen
keimah hong kiminthansakna ding
ka nasem pa Israel na hi hi,”
4 Ahih hangin keimah in, “Na ka sem a,
ahi zongin a kimanna om lo hi.
Ka thatang khempeuh ka beisak a,
ahi zongin bangmah ka tangtun kei hi.
Ahi zongin Topa in
a manin na hong sem ding,
ci-in ka muang a,
ka sep thaman hong pia ding hi,
ci-in ka um hi,” ka ci hi.
5 Ama kiangah Jakob kipaipihkikin,
ama kiangah Israel-te
a kikaihkhop theih nadingin
Topa’ mai-ah kei hong kipahtawi a,
Pasian pen keima thahatna suakin,
ama nasem dingin ka nu sung panin
keimah a hong piangsak Topa in
6 Amah in, “Jakob minamte
a laamto ding le
a suaktalai Israel mite
a ngei uh a bangsakkik dingin
keima nasem na hihna pen
a baih lua mahmah nasep ahi hi.
Keima hotkhiatna in
leimong dong a phak theih nadingin
minam dangte tungah khuavak ahi dingin
nang kong pia ding hi,” hong ci hi.Ref 49:6 Isa 42:6; Luk 2:32; Sawl 13:47; 26:23.
7 Israel a honpa le
ama Siangtho Pa ahi Topa in
nakpitakin simmawhna a thuak,
minamte in a muhdah,
gam ukte’ nasem pa tungah:
“Nangmah a hong teel
Israel-te’ Siangtho Pa,
a thuman Topa’ hangin
mite na hotkhiatna thu
kumpite in a muh uh ciangin
zahtakna tawh na mai-ah
hong ding ding uh a,
na mai-ah uliante
hong kun ding uh hi,” hong ci hi.
Jerusalem Phuhkik ding Ciam
8 Topa in ama mite kiangah,
“Note hotkhiat ding hun
a hong tun ciangin
maipha kong pia dinga,
huhna nong ngetna uh
kong pia ding hi.
Note hong kemin ka hong hu dinga,
note’ tungtawnin mi khempeuh tawh
thuciamna ka bawl ding hi.
A kinusia na gam sung uhah
note kong teengsakkik ding hi.Ref 49:8 2Kor 6:2.
9 Thongkia mite tungah,
‘Hong pai khia un,’ ci-in,
khuamial sunga om mite tungah,
‘Hong pusuak un,’ ka ci ding hi.
Amaute pen lam tawntung ah an a ne,
mual pawn a sang munte khempeuh ah
nuamtakin a gamta tuute tawh
kibang ding uh hi.
10 Amaute gilkial loin, dangtak lo ding uh a,
huihsa le nisa in
amaute sukha lo ding hi.
Bang hang hiam cih leh
amaute a hehpih pa in
amaute lamkaih dinga,
ciktui kiangah amaute paipih ding hi.Ref 49:10 Mang 7:16-17.
11 “Keimah in ka mite adingin
mual liante kantanin
lampi ka ziksak dinga,
ka lam lianpite-ah
phung ka ciang ding hi.
12 Ka mite a gamlapi panin
hong pai ding uh a,
leilu lam gam le
nitumna lam gamte panin
amaute hong pai-in,
pawlkhatte, leitaw lam Siene gam panin
hong ciah ding uh hi,” a ci hi.
13 Vantungte aw, lungdamin la sa un.
Leitung aw, lungdamin diang in.
Mual liante aw,
lungdamin la sa-in awng khia un!
Bang hang hiam cih leh
Topa in ama mite hehnem ta a,
gimna a thuak ama mite
14 Ahih hangin Jerusalem mite in,
“Topa in eite hong nusia khin a,
hong mangngilh khinta hi,” a ci uh hi.
15 Ahih hangin Topa in,
“Ama sung panin a suak a tapa
a hehpih lo ding zahin nupi khat in
ama nawi a teep naungek
mangngilh thei ding ahi hiam?
Hihte nangawn in
mangngilh kha thei dinga,
ahi zongin keimah in
kong mangngilh kei ding hi.
16 Jerusalem aw,
ka khutpeek sungah
nang kong gelh khinzo a,
nang ka hong mangngilh ngei kei ding hi.
17 “Nang a hong lam mite in
nang a hong susiate nuaisiah khinta uh a,
nang hong siasakte
nang kiang panin tai khia khinta uh hi.
18 Na kimkotah khuadakto inla mu in.
Na mi khempeuh hong kikhawm uh a,
nangma kiangah
amaute hong ciah uh hi.
Kei pen a nungta Topa
ka hih mah bangin,
na mite khempeuh hangin
nang na kisial dinga,
mothak in kizepna-in a zat bangin
amaute khempeuh na zang ding hi.
19 “A kisia, a kinusia khinsa
nangma munte le
a kisusia nangma gam pen
nangma tungah a teeng mite adingin
tu-in kawcik lua ta dinga,
nang hong valhtum mite,
gamlapi-ah om ding uh hi.
20 Na kikhen hun uh, salin a om sungun
a suak mite in nangma kiangah,
‘Kote adingin mun kawcik lua hi;
ka omna ding uh mun hong bawlsak in,’
hong ci ding uh hi.
21 Tua ciangin na lungsimah,
‘Kua in keima adingin
hih mite hong hinkhiatsak ahi hiam?
Kei hong kinusia-in tang-awlin ka om a,
salin hong kikoihin
hong kipaikhiatpih hi.
Hihte kua in hong khoisak ahi hiam?
Keimah guakin hong kinusia hi.
Tua ahih manin koi lai panin
hihte hong piang ahi hiam?’
22 Topa Pasian in, “En in, minamte tungah
ka khut ka laamto dinga,
mite tungah ka lim ka lakto ding hi.
Amaute in a angsung uhah
na tapate tawi-in hong paipih ding uh a,
a liangko tung uhah
na tate hong pua ding uh hi.
23 Kumpite pen nang hong kem
na pate hong hi dinga,
kumpinute pen nang hong khoi
na nute hong hi ding hi.
Amaute in a maitang uh leilak ngatin
nang kiangah hong kun ding uh a,
na khe-a leivui baangte
a liak ding uh hi.
Tua ciangin kei pen
Topa ka hihna na hong thei ding hi.
Kei hong muangte
maizum lo ding hi,” a ci hi.
24 A thahatpa’ kiang panin
nate kila khia zo dinga,
thukhauh pa’ mat mite
kihon khia zo ding ahi hiam?
25 Topa in,
“A thahatpa’ mat salte kila khia dinga,
a thukhauh pa’ na kila khia ding hi.
Nang hong dem mite
keimah in ka dem dinga,
na tate ka hon khia ding hi.
26 Nang hong nengniam mite pen
amau’ satak mah ka nesak dinga,
zukham bangin amau’ si mah
a kham ding uh hi.
Tua ciangin kei pen
Jakob’ Vanglian Pa,
nang hong Tan khiapa,
nang hong Hon Topa ka hihna
mi khempeuh in
hong thei ding uh hi,” a ci hi.