THESALONIKA MASA
Thesalonika Khristiante Tungah Paul’ Laikhak
(Paul’s First Letter to the Thessalonians)
Thupatna
Thesalonika khua pen, Rom kumpite’ ukna Masedonia gam sungah kumpi khuapi ahi hi. Filippi khua panin a pai khiat khit ciangin Paul in hih khua-ah pawlpi a phut hi. Ahi zongin Jew ngeina hoih a sa Gentail mite lakah Paul in Khristian thu a hilh ciangin mi tampi in um ahih manin, Paul’ maavanna a haza Jew mi pawlkhat in amah hong langpan hi. Thesalonika khua panin Paul a pai khiat ding phamawh ahih manin Berea khua-ah a paisuak hi. Tua khit ciangin a naseppih Timoti tung panin Thesalonika khua-a pawlpite’ pianzia a genna laikhak khat Paul in a ngah hi.
Tua ahih manin tua lai-a Khristiante hansuahin a thakhauhsak nadingin Thesalonika Khua Khristiante tungah Paul’ Laikhak Masa a kigelh ahi hi. Amaute in upna le itna a neihna uh hangin a lungdamna thu genin, amaute tawh a omkhawm lai-a ama nuntaknazia a phawksak hi. Tua khit ciangin Khrih hong paikikna ding thu tawh kisai, amau pawlpi sungah thudotna a omte a dawng hi. Tua dotnate in: Khrih hong paikik ma-in a si thu um mite in ama hong pai ciangin hong puak ding nuntak tawntung a ngah ding uh hiam? Cik ciangin Khrih hong paikik ding ahi hiam, cihte ahi hi. Tua ahih manin Paul in a laigelhna-ah, Khrih hong paikik ding lametna tawh a ngakkawmun pau loin na a sep paisuak nading uh a gen hi.
1
Hopihna
1 Keimah Paul le Silas le Timoti in
Pa Pasian le Topa Jesuh Khrih sungah a om Thesalonika khua-a om pawlpi mite tungah lai ka hong khak uh hi. Pasian in note tungah dikna le nopsakna thupha hong tungsak tahen.Ref 1:1 Sawl 17:1
Thesalonika khuamite in Upna A Neihna le Etteh Hoih Ahihna
2 Note khempeuh hangin Pasian tungah lungdamna ko tawntungin, ka thungetna uhah note ka hong phawk tawntung uh hi.
3 Bang hang hiam cih leh i Pa Pasian kiangah thu ka nget simun note’ upna hangin na nuntakziate uh, itna na neih manun nakpitakin na nasepnate uh le i Topa Jesuh Khrih hong paikik ding lametna na neih manun kiptakin na omnate uh ka phawk tawntung uh hi.
4 Sanggamte aw, Pasian in note hong itin ama mi dingin a hong teel khitna thu ka thei uh hi.
5 Bang hang hiam cih leh note kiangah Lungdamna Thu kong hilh lai-un kam bek tawh a hong gen hi loin, Kha Siangtho’ vangliatna le Lungdamna Thu a man taktak hi, ci-in theihna tawh a hong pai ka hi uh hi. Note kiangah ka om laitakun note’ phattuam nadingin ka sep ka bawlna khempeuh uh na thei uh hi.
6 Kote le Topa’ gamtat bangin note na gamta uh a, note in gimna nakpitakin thuaklawh napi-in Kha Siangtho’ huhna tawh lungdam takin thu umin na om uh hi.Ref 1:6 Sawl 17:5-9
7 Tua ahih manin Masedonia gam le Akhaia gam sung khempeuh ah thu um mi khempeuhte adingin etteh hoih na suak uh hi.
8 Note’ gamtatna ziate’ hangin Masedonia le Akhaia gam sungteng bekah Topa’ thu a kithei hi loin, note in Pasian na upna thu uh mun khempeuh ah kiza ahih manin kote’ gen ding bangmah kisam nawn lo hi.
9 Note kiangah ka hong pai lai-un kote na hong limbawlna thu uh le a nungta a man Pasian’ thu zui-in a bia ding le,
10 a hong tung ding Pasian’ hehna panin eite a hong hon khia, sihna panin Pasian in a thawhsakkik a Tapa Jesuh, van panin a hong pai ding ngak dingin milim paisanin Pasian’ lamah na kiheina uh thute mi khempeuh in gen belin a nei uh hi.