35
Bethel-ah Pasian in Jakob Thupha Pia
1 Pasian in Jakob kiangah, “Kithawi-in Bethel-ah paito inla, tua lai-ah teeng in. Na sanggampa Esau’ kiang panin na tai hun lai-a nang’ tungah a hong kilang Pasian adingin biakna tau khat bawl in,” a ci hi.Ref 35:1 Pian 28:11-17.
2 Tua ahih ciangin Jakob in a innkuanpihte le amah tawh a omte khempeuh kiangah, “Note lakah a om gamdang pasian-te koih khia unla, nomau kisiansuahin, na puante uh khek un.
3 Ka lungkham hunin hong huhin, ka paina khempeuh ah a hong ompih Pasian adingin biakna tau khat ka bawl theih nadingin eite kipanin Bethel-ah paito ni,” a ci hi.
4 Tua ahih ciangin amaute in Jakob’ tungah amau’ neih gamdang pasian khempeuh le a bil uha om bilbahte a pia uh hi. Jakob in Shekhem khua gei-a tawsaw nuai-ah tuate a seel hi.
5 Jakob le a tapate khualzinin a pai laitakun amau’ kiima om khuapite’ tungah Pasian’ kiang panin lauhuaina lianpi khat tung ahih manin amaute in Jakob le a tapate delh lo uh hi.
6 Kanaan gam sunga om Luz (Bethel)-ah Jakob le amah tawh a om mi khempeuh tung uh a,
7 tua lai-ah amah in biakna tau khat lamin, tua mun Elbethel, ci-in min a phuak hi. Bang hang hiam cih leh a sanggampa kiang panin a tai lai-in tua munah ama tungah Pasian mahmah kilang hi.
8 Tua ciangin Rebekah a cingnu Deborah si a, Bethel khang tawsaw nuai-ah amah kivui hi. Tua ahih ciangin tua mun min pen Allonbakuth, kici hi.
9 Paddanaram panin amah hong pai ciangin Jakob’ tungah Pasian kilangkik a, amah thupha a pia hi.
10 Pasian in ama kiangah, “Na min Jakob ahi hi. Ahi zongin tu-a kipanin nangma min pen Jakob kici nawn lo dinga, Israel, hong kici ding hi,” a ci hi. Tua ahih ciangin ama min Israel, kici hi.Ref 35:10 Pian 32:28.
11 Pasian in ama kiangah, “Kei pen Vanglian Pasian ka hi hi: Pung inla, tampi pha in. Minam khat le minamte honkhat nang’ sung panin piang dinga, nang’ sung panin kumpite zong piang ding hi.
12 Abraham le Isaac tunga ka piak leitang nangma tungah kong pia dinga, nang’ khit cianga na suanlekhakte’ tungah tua leitang ka pia ding hi,” a ci hi.Ref 35:11-12 Pian 17:4-8.
13 Tua ciangin amah tawh a kihona mun ama kiang panin Pasian pai khia to hi.
14 Jakob in amah tawh a kihona munah suang khuam khat phut a, amah in tua tungah leenggahzu tawh biakpiakna a sung khia hi. Tua tungah sathau zong a sung hi.
15 Tua ahih ciangin Jakob in, Pasian in amah a hopihna mun, a min Bethel, a ci hi.Ref 35:14-15 Pian 28:18-19.
Rachel’ Sihna
16 Tua ciangin Bethel panin amaute ding khia uh a, Efrath panin a gamla sim lai mun a tun laitakun Rachel a nausuah hun tunga, amah nakpi takin a gim hi.
17 Amah a gim mahmah laitakin naudom nu in ama kiangah, “Lunghimawh kei in. Tu-in tapa dang khat na nei ding hi,” a ci hi.
18 Amah a bei laitakin amah in a min dingin Benoni, a ci hi. Ahih hangin a pa in ama min Benjamin, ci-in a phuak hi.
19 Tua ahih ciangin Rachel si-in, Efrath (Bethlehem) paina lampi-ah kivui a,
20 Jakob in ama han tungah mualsuang khat a phut hi. Tua pen tuni dongin tua lai mahah a om Rachel’ han mualsuang khuam ahi hi.
21 Israel in a khualzin zomlai a, Eder tausang galkhat ah a puanbuk a lam hi.
Jakob’ Tapate
(1Khang 2:1-2)
22 Tua gamah Israel a ten laitakin Reuben in a pa’ zineu Bilhah luppih hi. Israel in tua thu za-in heh mahmah hi. Tu-in Jakob’ tapate, sawm le nih ahi hi.Ref 35:22 Pian 49:4.
23 Leah’ tapate: Reuben (Jakob’ ta u pen), Simeon, Levi, Judah, Issakhar le Zebulun ahi hi.
24 Rachel’ tapate: Josef le Benjamin ahi hi.
25 Rachel’ nasem numei Bilhah’ tapate: Dan le Naftali ahi hi.
26 Leah’ nasem numei Zilpah’ tapate: Gad le Asher ahi hi. Hihte pen Paddanaram gamah ama sunga suak Jakob’ tapa sawm le nihte ahi hi.
Isaac’ Sihna
27 Abraham le Isaac tawlkhat a omna Mamre, ahih kei leh Kiriatharba (Hebron)-a a pa Isaac a omna-ah Jakob hong pai hi.Ref 35:27 Pian 13:18.
28 Tu-in Isaac’ khansung, kum za le kum sawmgiat ahi hi.
29 Isaac in a nunung pen a hu sang hi. Amah a teek, kum tampi a pha-in si a, ama mite’ kiangah kigawm hi. Ama tapa Esau le Jakob in amah a vui uh hi.