6
1 Ahih hangin Topa in Moses kiangah, “Tu-in Faro’ tungah ka bawl ding na mu ding hi. Bang hang hiam cih leh amah in ut lopipi-in amaute sawl khia ding hi. Amah in ut lopipi-in ama leitang panin amaute hawl khia taktak ding hi,” a ci hi.
Moses a Kisapkhiatna Kigenkik
2 Pasian in Moses kiangah, “Kei pen Topa ka hi hi.
3 Abraham, Isaac le Jakob-te’ tungah Vanglian Pasian-in ka kilang a, ahih hangin Topa ahi keima min tawh amaute’ tungah kei ka kitheisak kei hi.Ref 6:2-3 Pian 17:1; 28:3; 35:11; Pai 3:13-15.
4 Amaute tawlkhat sung a tenna leitang ahi Kanaan gam amaute’ tungah piak dingin amaute tawh ka thuciamna zong ka kipsak hi.
5 Tua tham loin Egypt mite in salin a neih Israel mite’ thumna ka za zo a, ka thuciamna ka phawk zo hi.
6 Tua ahih ciangin Israel mite’ tungah, ‘Kei pen Topa ka hi hi. Egypt mite’ na na sepna uh panin note kong pai khiatpih ding hi. Amau’ sal hihna panin note kong khah khia dinga, a thahat ka khut zanin thukhenna nasep lian tawh note kong hon khia ding hi.
7 Keima mi dingin note kong la dinga, kei pen note’ Pasian ka hi ding hi. Egypt mite’ sila hihna panin note a hong pai khiatpih pa, Topa na Pasian uh ka hihna note in na thei ding uh hi.
8 Abraham, Isaac le Jakob-te’ tunga ka ciam leitangah note kong paipih ding hi. Tua leitang na neih dingun note’ tungah kong pia ding hi. Kei pen Topa ka hi hi, ci hi,’ ci in,” a ci hi.
9 Moses in tua bangmahin Israel mite tungah a gen hi. Ahih hangin amau’ lungsim kitapna le a salsuahna sung uhah a gimna uh hangin amaute in Moses’ thu ngai lo uh hi.
10 Tua ciangin Topa in Moses kiangah,
11 “Pai-in va tum inla, ama leitang panin Israel mite a pai khiatsak nading Egypt kumpipa Faro’ kiangah va gen in,” a ci hi.
12 Ahih hangin Moses in Topa kiangah, “En in, Israel mite nangawn in ka thu hong ngai lo uh hi. Tua ahih ciangin bangci-in thugen siam lo keima thu, Faro in hong ngai ding ahi hiam?” a ci hi.
13 Ahih hangin Topa in Moses le Aaron tungah thu gen a, Egypt gam panin Israel mite a pai khiatpih dingin note ka hong sawlna thu, Israel mite le Egypt kumpipa Faro’ tungah va gen un, ci-in a hanthawn hi.
Moses le Aaron Khangsimna
14 Hihte pen amau’ beh lutangte ahi hi: Israel’ ta a suak masa Reuben’ tapate: Hanok, Pallu, Hezron le Karmi ahi hi. Hihte pen Reuben-te beh ahi hi.
15 Simeon’ tapate: Jemuel, Jamin, Ohad, Jakhin, Zohar le Kanaan numei’ tapa Shaul ahi hi. Hihte pen Simeon-te beh ahi hi.
16 Hihte pen amau’ khang tawh kizui-in Levi’ tapate’ min ahi hi: Gershon, Kohath le Merari hi a, Levi kum za le kum sawmthum le kum sagih nungta hi.
17 Gershon’ tapate: Amau’ innkuan tawh kizui-in Libni le Shimei ahi hi.
18 Kohath’ tapate: Amram, Izhar, Hebron le Uzziel hi a, Kohath kum za le kum sawmthum le kum thum nungta hi.
19 Merari’ tapate: Mahli le Mushi ahi hi. Hihte pen amau’ khang tawh kizui-in Levi-te beh ahi hi.Ref 6:16-19 Gam 3:17-20; 26:57-58; 1Khang 6:16-19.
20 Amram in ama pa’ sanggamnu Jokhebed zi-in la a, tua nu in amah tawh Aaron le Moses nei hi. Amram kum za le kum sawmthum le kum sagih nungta hi.
21 Izhar’ tapate: Korah, Nefeg le Zikri ahi hi.
22 Uzziel’ tapate: Mishael, Elzafan le Sithri ahi hi.
23 Aaron in Amminadab’ tanu, Nahshon’ sanggamnu Elisheba zi-in la hi. Tua nu in amah tawh Nadab, Abihu, Eleazar le Ithamar nei hi.
24 Korah’ tapate: Assir, Elkanah le Abiasaf hi a, hihte pen Korah-te beh ahi hi.
25 Aaron’ tapa Eleazer in Putiel’ tanute khat zi-in la hi. Tua nu in amah tawh Finehas nei hi. Hihte pen a innkuan kuanin Levi mite’ beh lutangte ahi hi.
26 “Egypt gam panin Israel mite a honpi-in pai khiatpih in,” Topa in a cihna mite pen hih Aaron le Moses ahi uh hi.
27 Egypt gam panin Israel mite pai khiatpih nading thu Egypt kumpipa Faro’ tunga thu a gente pen hih Moses le Aaron ahi uh hi.
Moses le Aaron tungah Topa’ Genna
28 Egypt gamah Moses kiangah Topa in thu a gen ni-in,
29 Topa in Moses kiangah, “Kei pen Topa ka hi hi. Na tunga kong gen khempeuh Egypt kumpipa Faro’ tungah gen in,” a ci hi.
30 Ahih hangin Moses in Topa kiangah, “En in, kei pen thugen a siam lo mi ka hi hi. Tua ahih ciangin bangci-in Faro in ka thu hong ngai ding ahi hiam?” a ci hi.