44
Biakinn sung Nasepna
Tua ciangin a mipa in nisuahna lam biakinn huang kongpi pua-ah hong paipih a, a kongpi na kikhak hi. Topa in kei kiangah, “Hih kongpi kikhak paisuak dinga, kihongkik ngei lo ding hi. Israel-te’ Topa Pasian keimah in hih kongpi tawn khin ka hih manin kuamah dang in tawn thei nawn lo dinga, a kikhak den ding ahi hi. Ahi zongin hih lai-ah gam uk na a sem laitak ulianpa pen keima omna-ah biakna an siangtho a ne dingin hong pai thei ding hi. Amah hong pai ciangin inndeipi tawnin inndei sung nung kongvangah hong lutin tua lai mahah pusuak ding hi,” hong ci hi.
Tua ciangin a mipa in leilu lam kongpi tawnin biakinn mai-ah hong paipih a, ka khuadak leh, Topa’ biakinn sung khempeuh ama minthanna vang tawh na kidim hi. Kei zong leilak kidenna-in ka boksuk hi. Tua ciangin Topa in kei kiangah, “Mihing ahi Ezekiel aw, tu-a na muh ding nate le na zak ding thute khempeuh hoihtakin ciamteh in. Ka biakinn a zatna ding ngeina om khempeuh tu-in a hong gen ding ka hi hi. Biakinn sungah a pai thei dingte le Siangtho Pen Munah a pai thei lo dingte khempeuh limtakin ciamteh in. A lehdo thei hih Israel mite tungah Topa Pasian keimah in ka gen thute, hih bangin gen in: No Israel mite aw, a beisa huna a muhdahhuai na gamtatnate khempeuh uh khawl un. Keimah biakna-in sathaute le sasite nong piak uh ciangin, keima thu a mang lo, vun a ki-at lo gamdang mite a sungah na lutsak uh a, ka biakinn na ninsak uh hi. Tua bangin a muhdahhuai na gamtatnate uh tawh ka thuciamna na siasak uh hi. Ka biakinn sungah biakna ngeinate na zui kei uh a, ka biakinn sungah gamdang mite peuh na na semsak uh hi.
“Tua ahih ciangin Topa Pasian in tu-in kong genin-ah: Vun ki-at lo gamdang mite peuhmah ka biakinn sungah lut lo ding uh a, note lakah a teeng gamdang mite nangawn lut lo ding uh hi. 10 No Israel midangte bangin kei hong nusia-in milim a bia Levi mite in zong gim thuak ding uh hi. 11 Amaute in biakinn kongcin, biakinn sung nasepte sem thei ding uh hi. Meihal biakna-a kipia ganhingte le mite in biakna-in a piak ganhingte go thei ding uh a, mite’ na a sepsak dingin tavuan la ding uh hi. 12 Ahi zongin amaute in milim biakna lamah Israel mite makai-in mawhna sungah Israel mite tunpih uh ahih ciangin, amaute gim ka piak ding, Topa Pasian keimah nakpitakin ka kiciam hi. 13 Amaute in keima siampi na sem loin, keima biakna na a siangtho nate nai-ah pai thei loin, Siangtho Pen Munah zong lut thei lo ding uh hi. Hihte pen, a muhdahhuai a gamtatnasate uh hangin a hamsiatna uh ahi hi. 14 Ahi zongin biakinn sunga nasep a kisam dangte a sem dingin amaute ka seh thei ding hi, ci-in gen in,” hong ci hi.
15 Tua ciangin Topa Pasian in keima kiangah, “Zadok’ suanlekhak Levi mi siampite ahihleh, Israel mi adangte in kei hong nusiat laitakun, amaute in citakin biakinn sungah keima na hong sem uh ahih manin, tu-in amaute in keima na hong semin, keimah biakna-in sathaute le sasite keima kiangah hong pia ding uh hi. 16 Ka biakinn sungah amaute lutin, ka biakna tau-ah na semin, biakinn sunga biaknate-ah makai ding uh hi. 17 A tual sung nung paina kongpi-ah a lut uh ciangin saihadial puan silh ding uh hi. Tual sung nung sung le biakinn sungah na a sep laitakun samul puan peuhmah silh lo ding uh hi. 18 Amaute in saiha dial puan khimin, saihadial puan teengin, khua-ul a suaksak thei kawnggak gak lo ding uh hi.Ref 44:17-18 Pai 28:39-43; Siam 16:4. 19 Midangte a omna biakinntual pua nungah a pusuah ma-un, biakinn sungah na a sep laitakun a zat uh puante suahin inndei siangtho sungah nusia ding uh hi. Tua lai panin amaute in puan dangte silhin pusuak ding uh hi. Tua hikeileh a biakna puan siangthote un midangte lawhkha ding hi.Ref 44:19 Siam 16:23.
20 “Amaute in a sam uh mettol lo ding uh a, a saulua-in zong hawi lo ding uh hi. A kilawm ciang bekin met ding uh hi.Ref 44:20 Siam 21:5. 21 Biakinntual sung nungah a lut ma-un siampite in leenggahzu ne lo ding uh hi.Ref 44:21 Siam 10:9. 22 Meigong numei ahi a, a kimasa numei ahi zongin zi-in nei lo ding uh a, Israel nungak, ahih kei leh siampite’ zi meigongte bek teenpih thei ding uh hi.Ref 44:22 Siam 21:7,13-14.
23 “Amaute in ka mite tungah, biakna na a siangtho le a mawkmawk nate le a nin le a siang nate a kilamdanna hilh ding uh hi.Ref 44:23 Siam 10:10. 24 Thunei khat peuhpeuh a om ciangin, keima ngeina omsa tawh kizui-in thu khen ding uh hi. A kiseh pawite a ngeina omsa bangin bawl ding uh a, Sabbath-te siangthosak ding uh hi. 25 Siampite pen misi lawnna tawh kininsak lo ding uh hi. Ahi zongin, a nu uh ahi a, a pa uh ahi a, a sanggam pasal uh ahih kei leh pasal a nei nai lo a sanggam numeite uh hangin kininsak thei ding uh hi.Ref 44:25 Siam 21:1-4. 26 Amaute a kisiansuah khit uh nipikal khat ciang bekin, 27 biakinntual sung nungah pai-in biakinn sungah na a sepkik theih nadingun kisiansuahna biakna pia ding uh hi. Topa Pasian in hih thu ka gen khin hi.
28 “Israel mite tungah ka piak, khang khat pan khang khatah a kiluah suksuk ding sung panin siampite’ tanh pen siampi nasep za ahi hi. Amaute in Israel mite lakah neihsa gamh nei lo ding uh hi. Amaute’ kisapna khempeuh ah kei a kicing khin ka hi hi.Ref 44:28 Gam 18:20. 29 An tawh biakna, mawhna le khialhna hanga biakna le Israel mite lak panin keima adingin a kipiakhiate khempeuh amaute in ne ding uh hi. 30 Anpal sung panin a limci pen teng le kei tungah hong kipia na khempeuh, amaute in tang ding uh hi. Israel mite’ inn sungah ka thupha a tuntheih nadingin amaute in anlum a em simun, biakna-in siampite tungah a em masak penpen uh pia ding uh hi.Ref 44:29-30 Gam 18:8-19. 31 Siampite in vasa ahi a, ganhing ahi zongin, sa’ nek baang hitaleh ama thu-in a sitawm mawkte hitaleh, ne lo ding uh hi.Ref 44:31 Siam 22:8.