25
Ammon Mite’ Siat ding Genkholhna
1 Topa in kei kiangah thu hong gen a,
2 “Mihing ahi Ezekiel aw, Ammon mite’ lam nga inla, amaute mawhsakna thu gen in.
3 Topa Pasian ahi keimah in amaute tungah ka gen thu hih bangin gen in: Ka biakinn kininsakin, Israel gam kisusia-in, Judah mite salin a pai na muh uh ciangin nuamin na lungdam se uh hi.
4 Tua ahih manin nisuahna lam panin a hong pai mite’ khut sungah note kong pia dinga, amaute in note’ gam sungah phual hong satin hong teeng ding uh hi. Note’ nek ding singgahte le note’ dawn ding bawngnawite hong gaihsak mang ding uh hi.
5 Rabbah khuapi pen kalaoh khua ka suaksak dinga, Ammon khuapi dangte zong tuukhawk ka suaksak ding hi. Tua ciangin Topa ka hihna thu nong thei ding uh hi.
6 “Bang hang hiam cih leh Topa Pasian ahi keimah in kong genin-ah: Note lungdamin khut bengin, kipakin na diang uh a, Israel gam na simmawhbawl uh hi.
7 Hih bangin gamta se na hih manun note’ nate hong sut gawp ding minamte’ khut sungah kong pia ding hi. Note hong sumai mang ding ka hih manin a minamin ahi a, a gamin ahi zongin na ding zo nawn kei ding uh hi. Tua ciangin Topa ka hihna na hong thei ding uh hi, ci-in gen in,” a hong ci hi.Ref 25:1-7 Jer 49:1-6; Ezk 21:28-32; Amos 1:13-15; Zefa 2:8-11.
Moab Mite’ Siat ding Genkholhna
8 Topa Pasian in kei kiangah thu hong gen a, “Moab mite in a thugenna uhah, Judah gammite pen minam dangte bangmah hi lel uh hi, ci se uh hi.
9 Tua ahih manin Moab gam hutna-in a kiphut a kiima om khuapite le a khuapi minthang pente ahi Bethjeshimoth, Baalmeon le Kiriathaim khuapite, midangte ka simsak ding hi.
10 Ammon mite a zawh gawp mah bangin, Moab mite zong, nisuahna lam mite ka zo gawpsak dinga, Moab mite pen minamin ding zo nawn lo ding uh hi.
11 Tua bangin Moab mite gim ka pia dinga, tua ciangin Topa ka hihna thu hong thei ding uh hi,” a hong ci hi.Ref 25:8-11 Isa 15:1-16:14; 25:10-12; Jer 48:1-47; Amos 2:1-3; Zefa 2:8-11.
Edom Mite’ Siat ding Genkholhna
12 Topa Pasian in kei kiangah thu hong gen a, “Edom mite in Judah mite tungah a phulakna uh nasia lua ahih manin tua a phulakna hangun Edom mite tungah mawhna om hi.
13 Tua ahih ciangin Edom mite gim pia-in, a mihing a ganhingin ka thahmangna ding thu tu-in kong pulak hi. Teman khuapi pan a kipan Dedan khuapi dongin a gam sung khempeuh uh gamkhing ka suaksak dinga, a mite khempeuh uh gal sungah si ding uh hi.
14 Keima mi Israel-te in Edom mite tungah phu hong laksak ding uh a, ka heh mahmahna tawh kizui-in Edom mite thuaksak ding uh hi. Keima phulakna zia Edom mite in thei ding uh hi. Topa Pasian in thu gen khin hi,” a hong ci hi.Ref 25:12-14 Isa 34:5-17; 63:1-6; Jer 49:7-22; Ezk 35:1-15; Amos 1:11-12; Oba 1-14; Mal 1:2-5.
Filistia-te’ Siat ding Genkholhna
15 Topa Pasian in kei kiangah thu hong gen a, “Filistia mite in galin a neih tawntung mite uh tungah phu nasia lakin hehna tawh susia gawp uh hi.
16 Tua ahih ciangin Filistia mite simin ka beimangsakna ding thu a hong gen khia ta ka hi hi. Filistia Zanglei a a omlai mi khempeuh ka susia mang ding hi.
17 Amaute nakpitakin gim pia-in, a kicing zah dongin amaute tungah phu ka la dinga, ka hehna a thuak ding uh hi. Tua ciangin Topa ka hihna thu hong thei ding uh hi,” a hong ci hi.Ref 25:15-17 Isa 14:29-31; Jer 47:1-7; Joel 3:4-8; Amos 1:6-8; Zefa 2:4-7; Zek 9:5-7.