4
Moses in Israel-te a Thuman’ ding uh Hanthawn
1 “Tu-in Israel-te aw, note nungta-in, Topa, na pate uh Pasian in note hong piak leitangah va pai-in na luah theih nadingun note kong hilh thukhamte le ngeina kipte don unla zui un.
2 Topa na Pasian un hong piak ahi keima hong thugente na zuih theih nadingun no kong thupiakte behlap loin, zong na khiam kei ding uh hi.Ref 4:2 Mang 22:18-19.
3 Na mit un Baalpeor-ah Topa’ hihna mu khin hi; bang hang hiam cih leh na Pasian un note’ lak panin Peor-a Baal a zui mi khempeuh susia a,Ref 4:3 Gam 25:1-9.
4 ahih hangin Topa na Pasian uh a lenkipte khempeuh tuni-in na hinglai uh hi.
5 “En un, note in a luah dingin na lutna uh gam sungah na zuih dingun Topa ka Pasian in kei hong thupiak bangin thukhamte le ngeina kipte kong hilh khinzo hi.
6 Tuate zui unla, sem un; bang hang hiam cih leh hih thukhamte khempeuh a zak uh ciangin, ‘Hih minam liante pen a pil thu thei taktak hi,’ a ci ding uh mite’ muhna-ah hih thu pen nomau’ pilna le nomau’ theihna hi ding hi.
7 “Bang hang hiam cih leh eite in Topa i sap hun simin eite’ kiangah i Pasian hong nai zahin tua bang pasian a nei minam lian koi-ah om ahi hiam?
8 Tuni-in note kong hilh thute bangin thukham le ngeina kip a man a nei minam lian koi-ah om ahi hiam?
Horeb-ah Israel-te’ Tuahte Kigenkik
9-10 “Na mit un a muhsa nate na nuntak sungun mangngilh kha-in, na lungsim panun pai khia kha ding ahih manin limtakin ngaihsunin hoihtakin kikem un. Horeb-a Topa na Pasian uh mai-ah na din ni-un Topa in kei kiangah, ‘Leitungah a nuntak laiteng uh amaute in kei hong kihtakna ding le amaute in a tate uh a hilhsawn theih nadingun keimah in amaute tungah ka thute ka zaksak theih nadingin ka kiangah mite hong khawm in,’ hong cihna thu, na tate uh le na tate uh tate’ tungah kitheisak un.
11 “Mei in mual kaang in van laizang dong banto-in, khuamial le meii le khuazing in a tuamcip laitakin note a nai-ah hong pai-in mual bulah na ding uh hi.
12 Tua ciangin mei sung panin Topa in note’ kiangah thu hong gen hi. Note in awging na za uh a, ahih hangin bangmah mu loin, awging bek a om hi.Ref 4:11-12 Pai 19:16-18; Heb 12:18-19.
13 Thupiak Sawmte ahi note’ hih dinga hong thupiak ama thuciamna note’ tungah hong gen a, amah in suangpek nih tungah tuate a gelh hi.Ref 4:13 Pai 31:18; 34:28; Thkna 9:10.
14 Note in na luah ding uh gam sungah na zuih theih nadingun, thukhamte le ngeina kipte note kong hilhna ding tua hun laitakin Topa in kei thu hong pia hi.Ref 4:14 Pai 21:1.
Milim Biak loh ding Hilhkholhna
15 “Tua ahih ciangin note hoihtakin kidawm un. Horeb-ah mei sung panin Topa in note’ tungah thu hong gen ni-in bangmah mu lo na hih manun,
16 note adingin lim khat peuhpeuh, pasal tawh a kibang hitaleh numei tawh a kibang hitaleh,Ref 4:16 Pai 20:4; Siam 26:1; Thkna 5:8; 27:15.
17 leitunga om ganhing khat peuhpeuh tawh a kibang hitaleh, huihlaka leeng kha a nei vasa khat peuhpeuh tawh a kibang hitaleh,
18 leitungah a bokvak khat peuhpeuh tawh a kibang hitaleh, leinuai-ah a om tui sunga ngasa khat peuhpeuh tawh a kibang hitaleh, a kiseek milim bawlna tawh a sia-in na gamtat khak loh nadingun kidawm un.Ref 4:17-18 Rom 1:23.
19 Note in na mit uh tawh vantung lam ento-in, ni le kha le aksite, vantung na khempeuh na muh uh ciangin, mun khempeuh a mite’ tungah Topa na Pasian un a piak nate’ lamah kihei-in tuate bia-in a na na sep khak loh nading uh kidawm un.
20 Ahih hangin Topa in tuni-a bangin sik meikhuk tawh a kibang Egypt panin ama neih mi dingin note hong la-in hong pai khiatpih khin hi.Ref 4:20 Pai 19:5; Thkna 7:6; 14:2; 26:18; Titu 2:14; 1Pe 2:9.
21 Tua tham loin note’ hangin kei’ tungah Topa heh a, keimah in Jordan kantan loin Topa na Pasian un note’ gamh dingin hong piak leitang hoihah ka lut loh nadingin a kiciam hi.Ref 4:21 Gam 20:12.
22 Hih gamah kei ka si dinga, Jordan khengin ka pai thei kei ding hi. Ahih hangin note in kantanin tua gam hoih na luah ding uh hi.
23 Topa na Pasian un note tawh hong bawl thuciamna mangngilhin, Topa na Pasian un note’ hih dinga hong kham lim khat peuhpeuh tawh a kibang a kiseek milim na bawlkhak loh nadingun kidawm un.
24 Bang hang hiam cih leh Topa na Pasian uh hong kaangtum thei mei tawh kibang a, a haza Pasian ahi hi.Ref 4:24 Heb 12:29.
25 “Note in tuleta nei-in gam sungah mi khangham na suah uh ciangin, na khat peuhpeuh tawh a kibang limin a kiseek milim bawlna le Topa na Pasian uh’ muhna-ah a sia bawlna tawh amah a heh nadingin na siat gamtat uhleh,
26 Jordan galkhat luah dingin na paina leitang uhah na siat mai mang baih nadingun note’ langkhat ah teci pang dingin tuni-in van le lei ka sam hi. Tua leitang tungah note sauvei na hing kei ding uh a, na sia maimang ding uh hi.
27 Topa in mite lakah note hong thehthang dinga, Topa in note hong hawlna minamte lakah mi tawmcik bek na omlai ding uh hi.
28 Note in tua lai munah mite’ khut in a bawl, khua mu thei lo, khua za thei lo, a ne thei lo, a nam thei lo sing le suang pasian-te’ na na sem ding uh hi.Ref 4:27-28 Thkna 28:36.
29 Ahih hangin tua lai panin Topa na Pasian uh na zong ding uh a, na lungsim khempeuh uh le na nuntakna khempeuh uh tawh na zon uhleh amah na mu ding uh hi.Ref 4:29 Jer 29:13.
30 Note in gimna thuakin, mailam hunah hih nate khempeuh note’ tungah hong tun ciangin, Topa na Pasian uh lamah kihei-in ama thu na mang ding uh hi.
31 Bang hang hiam cih leh Topa na Pasian uh hehpihna a nei Pasian ahi hi. Amah in note hong tamasak loin, hong nusia lo dinga, na pate uh tawh a thuciamna mangngilh lo ding hi.
32 “Pasian in leitungah mi a piansak ni a kipan, note’ pian ma-a hun beisa thu tu-in kan unla, van mong khat pan mong khat kikal thu zong kan un. Hih bang na lian piang ngei-in, a kiza ngei peuhmah hiam?
33 Note in Pasian’ aw za khin napi-in na hin lai uh bangin meikuang sung panin pasian dang khat peuhpeuh’ pauna aw mi khat peuhpeuh in za ngei ahi hiam?
34 Tua ahih kei leh, Topa na Pasian un Egypt gam sungah note adingin na muhna uhah a bawlte khempeuh tawh a kibangin, ze-etna, lim, nalamdang, gal, a vanglian le a thahatna le a lauhuai mahmah tawh pasian dang khat peuhpeuh in ama mite adingin minamdang khat sung pan minam khat a va lak ding hanciam ngam ngei ahi hiam?
35 Topa Pasian hi, ci-in na theih nadingun note’ tungah hih thu hong kilak hi a, amah sim loh kuamah dang om lo hi.Ref 4:35 Mrk 12:32.
36 Amah in note hong khal theih nadingin vantung panin ama aw note hong zasak hi. A mei lianpi leitungah note hong musak a, mei sung panin ama aw na za uh hi.
37 Amah in na pate uh itin, amau’ suanlekhakte hong teel a, a mahmah in ama vanglian tawh Egypt panin note hong pai khiatpih a,
38 note sangin a tam zaw le a vanglian zawte’ gamah hong paipihin, note’ luah dingin amau’ leitang hong piak nadingin note’ mai-ah amaute hong hawl khiatsak ahih manin tuni-in hih bangin na om thei uh hi.
39 Tua ahih ciangin tunga om vantung hitaleh nuai-a om leitung hitaleh Topa pen Pasian ahihna thu tuni-in thei unla, na lungsim uhah ciamteh un; kuamah dang om lo hi.
40 Tua ahih ciangin note le note’ khit a na tate uh tungah thu hong nuamin, Topa na Pasian un a tawntung a hong piak gam sungah na khan uh na sausak theih nadingun tuni-a no kiangah kong gen ahi ama thukhamte le a thupiakte na zui ding uh hi,” a ci hi.
Jordan Nisuahna lamah Bukna Khuapite
41-42 Tua ciangin, a beisa hunah amah tawh kilangneihna a om lo, tum lopi-in a veengpa a that, mi that khapa va tai-in, hih khuapite khat peuhpeuhah taina tawh a suahtak theih nadingin Moses in nisuahna lam Jordan galkhat ah khuapi thum a tuam koih hi.
43 Reuben mite adingin mualzang sehnel gam Beza khua, Gad mite adingin Gilead gam sung Ramoth khua le Manasseh mite adingin Bashan gam sung Golan khua ahi hi.Ref 4:41-43 Josh 20:8-9.
Thukham Sutkik Kipatna
44 Moses in Israel mite tungah thu pia hi.
45-46 Hihte pen, Egypt gam panin a pai khiat-un Moses le Israel mite in a zawh Heshbon-ah a teeng Amor mite’ kumpipa Sihon’ gam sung, Jordan gal, Bethpeor tawh a kigalsai kuam sungah, Egypt panin Israel mite a pai khiat lai-in Moses in amaute tungah a gen thute ahi hi.
47-49 Amaute in, Arnon kuam mong a a om Aroer panin Sirion Mual (Hermon a cihna) dong, Jordan nisuahna lama om Arabah gam khempeuh, Pisgah mual pang nuai Arabah tuipi dong tawh, kumpi Sihon’ leitang le Bashan kumpi Og’ leitang, Jordan galkhat nisuahna lamah a teeng Amor kumpi nihte’ leitang a luah uh hi.