23
Kikhopna-ah A Kihel Thei lote
1 “A ciltang a kitam ahih kei leh, a pasal na a cing lo mipa Topa ading kikhopna sungah lut lo ding hi.
2 “Zawlta peuhmah, Topa ading kikhopna sungah lut lo ding hi. A suan a khak khang sawmna dong nangawnin Topa ading kikhopna sungah tua bang mi kuamah lut thei lo ding hi.
3 “Ammon mite ahi a, Moab mite ahi zongin Topa ading kikhopna sungah lut thei lo ding uh hi. A khang sawmna dong nangawnun Topa ading kikhopna sungah lut thei ngei peuhmah lo ding uh hi.
4 Bang hang hiam cih leh Egypt panin na pai khiat lai-un lampi-ah anletui tawh amaute in note hong dawn lo uh a, note hong samsia dingin Mesopotamia gam Pethor khua panin Beor’ tapa Balaam cial uh hi.Ref 23:4 Gam 22:1-6.
5 Ahih hangin Topa na Pasian un Balaam’ thu ngai lo hi. Topa na Pasian un note hong it ahih manin, Topa na Pasian un samsiatna pen note adingin thupha-in hong heisak zaw hi.Ref 23:3-5 Neh 13:1-2. Ref 23:5 Gam 23:7-24:9.
6 Amaute’ nopsak nading ahi a, a daupai nading uh ahi zongin na khantawnun na hanciam kei ding uh hi.
7 “Edom mite khatpeuh na mudah kei ding uh hi. Bang hang hiam cih leh amaute na sanggam uh ahi hi. Egypt mi khatpeuh na mudah kei ding uh hi. Bang hang hiam cih leh amau’ gamah peemta na hi ngei uh hi.
8 Amaute’ sung pan a piang a khang thumna mite a kipan Topa ading kikhopna sungah lut thei ding uh hi.
Galsung Giahphual Sianthona
9 “Na galte uh a do dingin kuanin giahphual ah na om uh ciangin, siatna nam khempeuh panin nomau na kikem ding uh hi.
10 Note lakah, zan sungin ama tungah thupiang hangin a siang lo mi a om leh giahphual pualamah amah pai khia dinga, giahphual sungah hong pai lo ding hi.
11 Ahih hangin nitak ciangin a mahmah tui sungah kisil dinga, ni a tum ciangin giahphual sungah hong pai thei ding hi.
12 “Giahphual pua-ah awnghawh nading mun khat na nei ding uh hi.
13 Na galhiamte uh banah tulzum khat na nei ding uh a, awng na hawh khit uh ciangin tua tawh lei to-in, na ek uh na vuk ding uh hi.
14 Bang hang hiam cih leh note hong hon ding le note’ mai-a na galte uh a hong pia dingin Topa na Pasian uh na giahphual laizang uhah hong pai hi. Tua ahih ciangin note lakah a kilawm lo nate a muh loh nading le note kiang panin amah a pai khiat loh nadingin na giahphual uh siangtho ding hi.
Ngeina Tuamtuamte
15 “A topa’ kiang panin no kiangah a hong tai sila, a topa kiang mahah na apkik kei ding uh hi.
16 Na khuapite uh lak panin ama teelna mun, ama lungkim penna, note lakah note tawh amah hong teeng dinga, amah na nengniam kei ding uh hi.
17 “Israel ta numeite biakinn sunga a paktat pawlin om lo ding uh a, Israel tapate zong a paktat pawlin om lo ding uh hi.Ref 23:17 Siam 19:29.
18 A paktat nu a kiguaihna sum ahi a, a paktat pa a kiguaihna sum ahi zongin thuciamna khat peuhpeuh piakna-in Topa note’ Pasian’ inn sungah na paipih kei ding uh hi. Bang hang hiam cih leh hih tegel pen Topa note’ Pasian’ tungah a kihhuai ahi hi.
19 “Na sanggampa tungah sumgum hitaleh, ankhing hitaleh, a meet ngaihsutna-in na khat peuhpeuh leitawi na pia kei ding uh hi.
20 Gamdang mi tungah a meetin leitawi na pia thei ding uh a, ahih hangin na sanggampa tungah a meetin leitawi na pia kei ding uh hi. Hihte pen a luah dingin na tumna uh gam sungah Topa na Pasian un na sepna khempeuh uhah thupha hong piak theih nading ahi hi.Ref 23:19-20 Pai 22:25; Siam 25:36-37; Thkna 15:7-11.
21 “Topa note’ Pasian’ tungah thuciamna na bawl ciangun na ciamna uh tungsak loin na ommawk kei ding uh hi. Bang hang hiam cih leh Topa na Pasian un hong kal teekteek dinga, note tungah khialhna hong hi ding hi.Ref 23:21 Gam 13:1-16; Mat 5:33.
22 Ahih hangin thuciamna bawl ding pan na kikep uhleh note’ sungah khialhna om lo ding hi.
23 Na kam uh tawh na ciamsa uh thu pen Topa note’ Pasian’ tungah nomau utthu-a na ciam uh ahih manin na kam uh panin a ging khia peuhmah na tunsak ding uh na ngaihsun ding uh hi.
24 “Na veengpa’ leenggui lo ah na pai uh ciangin na ut zahzah uh na kham dong uh leenggah na ne thei ding uh a, ahih hangin na van sung uhah na guang kei ding uh hi.
25 Na veengpa’ ankungte lakah na pai uh ciangin na khut uh tawh a vuite na zut thei ding uh a, ahih hangin phiaukawi tawh na veengpa’ ankungte na at kei ding uh hi.