19
Bukna Khuapite, Tanglai Gamgite
(Gam 35:9-28; Joshua 20:1-9)
1 “Topa na Pasian un amaute’ leitang note hong piak minamte beisakin, note in amaute suankhia-in, amaute’ khuapite le innte-ah na ten uh ciangin,
2 Topa na Pasian un note’ neih dingin hong piak gam sungah note adingin khuapi thum na tuamkoih ding uh hi.
3 Mi a thatkha peuhpeuh a tai theih nadingin Topa na Pasian un na neih dingun a hong piak leitang seh thumin khenin seh khat sungah khuapi khat ciat koihin a lampite na puah ding uh hi.
4-5 Mi khat sing a phuk dingin a veengpa tawh gamlakah pai-in, sing a phuk dingin a khut tawh a hei vaanin, a heitang a ga panin kikhongin a veengpa kha-in a sih bang danin, mi khat in sawm lohpi, a beisa hunah amah tawh kigal neihna om lopi-in a veengpa a sihsak khak leh, hih khuapite khat peuhpeuhah amah tai-in a nuntakna hu thei ding hi.
6 Tua bang hikeileh, amah in a beisa hunah a veengpa tawh kigal neihna nei lo ahih manin sih nading thu om lo napi-in, a hehna tawh phula nuampa in mi that khapa delhin lampi a gamlatna hangin amah pha-in a si dingin liamsak kha ding hi.
7 Tua ahih ciangin, khuapi thum tuamkoih un, ci-in note thu a hong pia ka hi hi.
8-9 “Note in Topa na Pasian uh itin, ama lampi zuih tawntungna tawh tuni-a kong gen hih thupiakna khempeuh limtakin na zuih uh a, amah in na pu na pate uh tungah a kiciam mah bangin Topa na Pasian un na gamgite uh hong keeksakin, na pu na pate uh piak dingin a ciam leitang note tungah hong piak leh, hih khuapi thum banah khuapi thum mah na behlap ding uh hi.
10 Tua hikeileh Topa na Pasian un luah dingin note hong piak leitang tungah mawhbaang lo mi kithat kha dinga, tua mi thahna hanga mawhna note’ tungah hong tu ding hi.
11 “Ahih hangin mi khat in a veengpa mudahin, amah pangsim a, amah satin liamsakin a sihsak a, tua mipa hih khuapi khat peuhpeuhah a tai leh,
12 ama khua upate in amah hong puakin hong paipih ding uh a, a sih theih nadingin phulapa tungah ap ding uh hi.
13 Note na nopsak theih nadingun amah hehpih loin, Israel-te sung panin mi that pa na beisak ding uh hi.Ref 19:1-13 Josh 20:1-9.
14 “Topa na Pasian un na neih dingun hong piak leitang tungah note’ kep ding na gamhluahna sung uhah khanglui mite in a phuhsa na veengte’ gisuang na khin kei ding uh hi.Ref 19:14 Thkna 27:17.
Tecite tawh kisai Ngeina
15 “Mi khat in a hihkhak mawhna lian ahi a, khialhna khat peuhpeuh a gamtatna-ah ahi zongin tua mipa’ langah teci khat guak kicing lo dinga, teci nih ahih kei leh teci thum bang thugenna tawh mawhsakna kikipsak bek ding hi.Ref 19:15 Gam 35:30; Thkna 17:6; Mat 18:16; Joh 8:17; 2Kor 13:1; 1Tim 5:19; Heb 10:28.
16 Elna lungsim a nei teci khat in mi khat gamta khial hi, ci-in a mawhsak leh,
17 thuneite a langnih tuakin, tuahun laitak a siampite le thukhente’ mai, Topa’ mai-ah pai ding uh hi.
18 Thukhente in limtakin kan ding uh a, teci pa pen zuau teci hi-in, a man lopi-in a sanggampa a mawhsak ahihleh,
19 a sanggampa tungah amah in hih dinga a sawm bang teekin ama tungah na hih ding uh hi. Tua bangin note sung panin gitlohna na siangsak ding uh hi.
20 Tua hileh a omlai mite in za-in lau dinga, note lakah tua bang gitlohna bawlkik ngei nawn lo ding uh hi.
21 Amah na hehpih kei ding uh hi. Nuntakna tang ding nuntakna, mit tang ding mit, ha tang ding ha, khut tang ding khut, khe tang ding khe na hisak ding uh hi.Ref 19:21 Pai 21:23-25; Siam 24:19-20; Mat 5:38.