6
1 Tua bangin Pasian tawh na semkhawmin om ka hih manun Pasian’ hong hehpihna thu a mawkna na suahsakkhak loh nadingun ka hong thum uh hi.
2 Bang hang hiam cih leh Pasian in,
“A hunhoih a tun ciangin
note’ hong ngetna ka hong ngai a,
kong hotkhiat ni ding ciangin
note kong huh hi,”
na ci hi. Tua hi a, tuhun pen a hunhoih hi a, tuhun pen hotkhiat ni hun hita hi.Ref 6:2 Isa 49:8
3 Ka nasepna uhah mite in mawhna hong zon ding uh ut lo ka hih manun kuamah ka nawngkaisak khak loh nadingun ka hanciam uh hi.
4 Tua ahih manin ka sepna khempeuh uhah Pasian’ nasemte ka hihna uh ka kilangsak uh a, lungduai takin gimna, haksatna, lungkhamnate ka thuak uh hi.
5 Kote hong kisatin, thongah hong kikhia-in, mihonpi in hong hih gawp uh hi; nakpitakin na semin, an ne lo, ihmu lo liangin ka om uh hi.Ref 6:5 Sawl 16:23
6 Siangtho takin nuntakna, thu theihna, lungduaina, migitna, Kha Siangtho’ huhna, itna taktak neihna,
7 thuman genna le Pasian’ nasemte ka hihna uh, Pasian’ vang tawh ka kilangsak uh hi. Kote in kihut nading le galsim nadingin hiamin thuman ka zang uh hi.
8 Kote hong kipahtawi-in hong kimindaisak zel a, hong kisimmawh bawlin zong hong kiphat zel hi. Thuman gen hinapi-in zuaugen bangin hong kingaihsun a,
9 mi khempeuh in hong theih hinapi-in theih loh mi bangin hong kibawl a, nong theih uh mah bangin kote a nungta hinapi-in misi bangin hong kingaihsun hi.
10 Dahna ka thuak uh hangin ka lungdam uh a, kote a zawng tawh kibang napi-in mi tampi ka hausak uh a, bangmah a nei het lo tawh kibang napi-in a taktakin ka neih loh uh bangmah om lo hi.
11 Korin khua-a om lawmte aw, kote in bangmah ip nei loin lungsim takpi tawh thu kong gen uh hi.
12 Kote in ka lungsim uh a hong pia lo hi loin note in na lungsim uh a hong pia lo na hizaw uh hi.
13 Tua ahih manin tate tungah thugen bangin thu kong gen hi. Kote’ ngaihsut bangin note in zong hong ngaihsun unla, na lungsim uh hong taanzausak ta un.
A Nungta Pasian’ Biakinn
14 Thu um lo mite tawh na na semkhawm kei un. Midik le mimawh bangci-in kipawl thei dinga, khuavak le khuamial bangci-in omkhawm thei ding ahi hiam?
15 Khrih le Dawimangpa bangci-in kithutuak thei dinga, thu um mi le thu um lo mi bangci-in a ngaihsutna uh kibang thei ding ahi hiam?
16 Pasian’ biakinn le lawkite’ milim bangci kilem theih ding ahi hiam? Bang hang hiam cih leh Pasian in,
“Ka mite lakah teengin
amaute tawh ka omkhawm ding hi.
Kei pen amaute’ Pasian ka hi dinga,
amaute, keima mi ahi ding uh hi.Ref 6:16 1Kor 3:16; 6:19; Siam 26:12; Ezk 37:27
17 Tua ahih manin Vanglian Topa
keimah in kong genin-ah:
Amaute tawh kikhenin
amaute kiang panin pai khia unla,
a siang lo peuhmah sukha kei un.
Tua hileh note ka hong ngai ding hi.Ref 6:17 Isa 52:11
18 Kei pen note’ Pa hong hi-in,
note, keima tate na hi ding uh hi,”
na ci hi.Ref 6:18 2Sam 7:14; 1Khang 17:13; Isa 43:6; Jer 31:9