2
1 ကွဲးန့ၢ်အ့းဖ့းစူးအတၢ်အိၣ်ဖှိၣ်အကလူး, ပှၤလၢအ ဟံးဃာ်ဆၣ်နွံဖျၢၣ်လၢအစုထွဲပူၤ, ဒီးဟးလၢမ့ၣ်အူဒၢ ထူနွံဖျၢၣ်အကျါတဂၤန့ၣ်,စံးတၢ်ဒ်အံၤ,
2 ယသ့ၣ်ညါန တၢ်ဖံးတၢ်မၤ, ဒီးနမၤတၢ်တုၤတၢ်ဘှံးနသး,ဒီးနတၢ်ဝံ သးစူၤ, ဒီးလၢနအိၣ်ဘၣ်လိာ်ဒီးပှၤအအၢအသီတကဲ ဘၣ်, ဒီးပှၤလၢအစံးလီၤအသးလၢပှၤတၢ်မၢဖိဒီးတမ့ၢ် ဘၣ်ဝဲတဖၣ်န့ၣ်,နမၤကွၢ်အီၤ,ဒီးနထံၣ်န့ၢ်အီၤလၢအမ့ၢ် ပှၤကတိၤကဘျံးကဘျၣ်,
3 ဒီးလၢနအိၣ်ဒီးနတၢ်ဝံသး စူၤ,ဒီးနဒိးတၢ်လၢယမံၤအဃိ, ဒီးတၢ်တဘှံးဘၣ်နသး ဘၣ်လီၤ.
4 ဘၣ်ဆၣ်ဒီး,ယပာ်တၢ်ကမၣ်လၢနလိၤလီၤ. အဂ့ၢ်ဒ် အံၤ,နလဲၤသဒၣ်နတၢ်အဲၣ်လၢအခီၣ်ထံးတမံၤန့ၣ်လီၤ.
5 မၤသးဒ်န့ၣ်ဒီး, မ့ၢ်နလီၤတဲာ်ကွံာ်လၢလဲၣ်လၢလဲၣ် န့ၣ်သ့ၣ်နီၣ်ထီၣ်က့ၤ,ပီၢ်ယၢ်လီၤက့ၤနသး,ဒီးမၤက့ၤတၢ် လၢနမၤလၢသီန့ၣ်တက့ၢ်. မ့တမ့ၢ်ဘၣ်ဒ်န့ၣ်ဒီးယက ဟဲဆူနအိၣ်, ဒီးနမ့ၢ်တပီၢ်ယၢ်လီၤက့ၤနသးဘၣ်ဒီး,ယ ကစိာ်ကွံာ်နမ့ၣ်အူဒၢလၢအလီၢ်န့ၣ်လီၤ.
6 မ့မ့ၢ် နအိၣ်ဒီးနတၢ်အံၤတမံၤ, လၢနသးဟ့ပှၤနံၤက လါဖိအတၢ်မၤတဖၣ်လၢယသးဟ့စ့ၢ်ကီးလီၤ.
7 ပှၤအိၣ်ဒီးအနၢ်, မ်အနၢ်ဟူတၢ်လၢသးန့ၣ် စံးဘၣ် တၢ်အိၣ်ဖှိၣ်တဖၣ်တက့ၢ်. ပှၤလၢအမၤနၢၤတၢ်န့ၣ်,ယ ကဟ့ၣ်အီၣ်အီၤလၢသ့ၣ်မူ အိၣ်ဝဲလၢယွၤအပၤရဒံစူးအ သးကံၢ်ပူၤလီၤ.
8 ဒီးကွဲးန့ၢ်စမူရနၤအတၢ်အိၣ်ဖှိၣ်အကလူး, ပှၤလၢအ မ့ၢ်တၢ်အခီၣ်ထံးဒီးတၢ်အကတၢၢ်, ပှၤလၢအသံတ့ၢ်,ဒီး မူထီၣ်က့ၤတဂၤန့ၣ်, စံးတၢ်ဒ်အံၤ,
9 ယသ့ၣ်ညါနတၢ်နး တၢ်ဖှီၣ်,ဒီးနတၢ်ဖှီၣ်တၢ်ယာ်,ဘၣ်ဆၣ်ဒီးနထူးနတီၤ,ဒီး ယသ့ၣ်ညါပှၤအတၢ်ဒုၣ်ဒွဲၣ် လၢအစံးလီၤအသးလၢပှၤ ယူဒၤဖိ, ဒီးတမ့ၢ်ဘၣ်,မ့ၢ်လၢမုၣ်ကီၤလံၢ်အတၢ်အိၣ်ဖှိၣ် လီၤ.
10 တၢ်နးတၢ်ဖှီၣ်လၢအကဘၣ်နၤန့ၣ်သုတပျံၤအီၤ နီတမံၤတဂ့ၤ. ကွၢ်ကွၢ်,ဒ်သိးကလ့ပစီသုဒီး,မုၣ်ကီၤလံၢ် ကဒၢနုာ်သုလၢဃိာ်ပူၤတနီၤ, ဒီးသုကဘၣ်တၢ်နးတၢ် ဖှီၣ်ဆံဆဲၣ်သီလီၤ. အိၣ်နဲဆိးနဲလၢနကလုၢ်တီတုၤနသံ တက့ၢ်. ဒီးယကဟ့ၣ်နၤလၢ တၢ်မူအခိၣ်သလုးန့ၣ် လီၤ.
11 ပှၤအိၣ်ဒီးအနၢ်,မ်အနၢ်ဟူတၢ်လၢသးန့ၣ်စံးဘၣ် တၢ်အိၣ်ဖှိၣ်တဖၣ်တက့ၢ်. ပှၤလၢအမၤနၢၤတၢ်န့ၣ်,တၢ် သံပှဲၤထီၣ်ခံစုတစုတမၤအၢဘၣ်အီၤဘၣ်.
12 ဒီးကွဲးန့ၢ်တၢ်အိၣ်ဖှိၣ်လၢပ့ၢ်ကမူးအကလူး, ပှၤအိၣ် ဒီးအနးအ့ၣ်ဂ့ၤလၢအကနၣ်အိၣ်ခံခီလိာ်တဂၤန့ၣ်, စံး တၢ်ဒ်အံၤ,
13 ယသ့ၣ်ညါနအိၣ်နဆိးဖဲမုၣ်ကီၤလံၢ်အလီၢ် ပစိာ်အိၣ်ဝဲအလီၢ်, ဒီးနဟံးဃာ်ယမံၤ,ဒီးလၢယပှၤအုၣ် သးအကလုၢ်တီစီၤအၣ်တံပၤ, ဒိးသံအသးလၢယဃိ လၢသုကျါ, ဖဲမုၣ်ကီၤလံၢ်အိၣ်ဝဲအလီၢ်, အမုၢ်နံၤတဖၣ် ဒၣ်လဲာ်န့ၣ်,နတသမၢဘၣ်ယတၢ်နာ်ဘၣ်လီၤ.
14 ဘၣ်ဆၣ်ဒီးယပာ် တၢ်ကမၣ်အဆံးအစှၤလၢနလိၤ, အဂ့ၢ်ဒ်အံၤ,နအိၣ်ဒီးပှၤဖဲန့ၣ်, လၢအဟံးဃာ်စီၤဘံးလၣ် အတၢ်သိၣ်တၢ်သီ, လၢအသိၣ်က့ၤသီက့ၤစီၤဘၤလး,ဒ် သိးအကပာ်တၢ်လီၤဃံၤအလီၢ်လၢ ပှၤအံၣ်စရ့လးဖိအ မဲာ်ညါ,ဒ်သိးပှၤကအီၣ်တၢ်လၢပှၤလုၢ်လၢတၢ်ဂီၤ,ဒီးမၤ ကမၣ်မုၣ်ကမၣ်ခွါလီၤ.
15 ဒ်န့ၣ်အသိး, နအိၣ်ဒီးပှၤလၢ အဟံးဃာ်စီၤနံၤကလါ အတၢ်သိၣ်တၢ်သီဒ်န့ၣ်အသိး စ့ၢ်ကီးလီၤ.
16 ပီၢ်ယၢ်လီၤက့ၤနသးတက့ၢ်. မ့တမ့ၢ်ဘၣ် ဒီး,ယကဟဲဆူနအိၣ်ချ့ချ့, ဒီးယဒုးတၢ်ဒီးပှၤတဖၣ်န့ၣ် လၢယထးခိၣ်အနးလီၤ.
17 ပှၤအိၣ်ဒီးအနၢ်, မ်အနၢ်ဟူတၢ်လၢသးန့ၣ်စံးဘၣ် တၢ်အိၣ်ဖှိၣ်တဖၣ်တက့ၢ်. ပှၤလၢအမၤနၢၤတၢ်န့ၣ်,ယ ကဟ့ၣ်အီၤလၢမၤနၤခူသူၣ်, ဒီးယကဟ့ၣ်အီၤလၢလၢၢ် ဝါတဖျၢၣ်, ဒီးအမံၤသီကွဲးအသးလၢလၢၢ်အလိၤလၢပှၤ တသ့ၣ်ညါဘၣ်နီတဂၤဘၣ်.သ့ၣ်ညါထဲပှၤလၢအဒိးန့ၢ် အီၤတဂၤဧိၤလီၤ.
18 ဒီးကွဲးန့ၢ်တၢ်အိၣ်ဖှိၣ်လၢ သူၤအတံရၤအကလူး,ပှၤ အိၣ်ဒီးအမဲာ်သၣ်တိၣ်ဒ်မ့ၣ်အူလၣ်, ဒီးအခီၣ်ဒ်တိၢ်ဘီစီ အသိးန့ၣ်,ယွၤအဖိခွါတဂၤ,စံးတၢ်ဒ်အံၤ,
19 ယသ့ၣ်ညါ နတၢ်ဖံးတၢ်မၤ, ဒီးနတၢ်အဲၣ်တၢ်ကွံ,ဒီးနမၤတၢ်အခ့အ ပှၤအတၢ်မၤ,နတၢ်စူၢ်တၢ်နာ်,ဒီးနတၢ်ဝံသးစူၤ, ဒီးနတၢ် မၤလၢခံကတၢၢ်န့ၣ်အါန့ၢ်လၢသီတက့ၢ်လီၤ.
20 ဘၣ်ဆၣ်ဒီးယပာ်တၢ်ကမၣ်လၢနလိၤ, အဂ့ၢ်ဒ်အံၤ, နတူၢ်လိာ်ပိာ်မုၣ်, နီၢ်အံၤစ့ဘ့ၤလး,လၢအစံးလီၤအသး လၢဝံမုၣ်တဂၤ, ဒီးအဝဲဒၣ်သိၣ်က့ၤသီက့ၤတၢ်လၢအ တၢ်ကမၣ်မုၣ်ကမၣ်ခွါ, ဒီးလီန့ၢ်ယခ့ယပှၤ, ဒ်သိးအ ကမၤကမၣ်မုၣ်ကမၣ်ခွါ, ဒီးအီၣ်တၢ်လၢပှၤလုၢ်လၢတၢ် ဂီၤလီၤ.
21 ဒီးယဟ့ၣ်အဝဲဒၣ်အဆၢကတီၢ်ဒ်သိးအကပီၢ် ယၢ်လီၤက့ၤအသးလီၤ. ဒီးပီၢ်ယၢ်လီၤက့ၤအသးလၢအ တၢ်မၤကမၣ်မုၣ်ကမၣ်ခွါန့ၣ်အသးတအိၣ်ဘၣ်.
22 ကွၢ် ကွၢ်, ယတ့ၢ်လီၤအီၤဆူလီၢ်မံပူၤဒီးပှၤလၢအမၤကမၣ်မါ ဒီးအီၤတဖၣ်န့ၣ်, မ့ၢ်တပီၢ်ယၢ်လီၤက့ၤအသးလၢအတၢ် မၤတဖၣ်ဘၣ်ဒီး, (ယကတ့ၢ်လီၤအီၤ)ဆူတၢ်နးတၢ်ဖှီၣ် ဖးဒိၣ်အပူၤလီၤ.
23 ဒီးယကမၤသံအဖိတဖၣ်လၢတၢ်သံ, ဒီးတၢ်အိၣ်ဖှိၣ်ခဲလၢာ်ကသ့ၣ်ညါလၢယမ့ၢ်ပှၤလၢအဃု ကွၢ်ပှၤကလ့ၢ်ဒီးအသူၣ်အသးလီၤ. ဒီးယကဟ့ၣ်သုဒ် သုမၤတၢ်အသိးန့ၣ်ကိးဂၤဒဲးလီၤ.
24 ဘၣ်ဆၣ်ဒီးယစံးဘၣ်သု, ပှၤလၢသူၤအတံရၤလၢအ အိၣ်လီၤတဲာ်, လၢအတဟံးန့ၢ်တၢ်သိၣ်တၢ်သီအဝဲန့ၣ် ဘၣ်, ဒီးတသ့ၣ်ညါဘၣ်မုၣ်ကီၤလံၢ်အတၢ်ယိာ်ဒ်အဝဲ သ့ၣ်စံးအသိးန့ၣ်, တၢ်ဝံတၢ်စိာ်အဂုၤအဂၤ ယတပာ် ဘၣ်လၢသုလိၤဘၣ်.
25 ဘၣ်ဆၣ်ဒီး တၢ်လၢသုန့ၢ်ဘၣ် န့ၣ်, ဟံးဃာ်တုၤယဟဲန့ၣ်တက့ၢ်.
26 ပှၤလၢအမၤနၢၤ တၢ်,ဒီးဟံးဃာ်ယတၢ်မၤတုၤအကတၢၢ်န့ၣ်,ယကဟ့ၣ် အီၤလၢအစိအကမီၤလၢပှၤကလုာ်တဖၣ်အဖီခိၣ်,
27 ဒီး ကပၢဘၣ်အီၤဒီးနီၣ်တီၢ်ထး, ဒီးကမၤသဘှံးအီၤဒ်ပှၤမၤ သဘှံးသပၢၤအသိး, ဒ်ယဒိးန့ၢ်တၢ်လၢယပၢ်အသိးန့ၣ် လီၤ.
28 ဒီးယကဟ့ၣ်လီၤအီၤလၢဆၣ်တူၢ်ဂီၤလီၤ.
29 ပှၤအိၣ်ဒီးအနၢ်, မ်အနၢ်ဟူတၢ်လၢသးန့ၣ်စံးဘၣ် တၢ်အိၣ်ဖှိၣ်တဖၣ်တက့ၢ်.