35
1 ဒီးစီၤယိၤၡံယၤမၤဘူၣ်လဲၤကပာ် လၢယွၤအဂီၢ်လၢယ ရူၤၡလ့ၣ်အပူၤ, ဒီးလၢလါခီၣ်ထံးတလါထီၣ်တဆံလွံၢ် နံၤတနံၤန့ၣ် မၤသံတၢ်လဲၤကပာ်လီၤ.
2 ဒီးပာ်ပှၤလုၢ် တၢ်အဒိၣ်တဖၣ်လၢအတၢ်မၤအလီၢ်, ဒီးဒုးဆူၣ်ထီၣ်အီၤ လၢအကမၤယွၤအဟံၣ်အတၢ်မၤလီၤ.
3 ဒီးစံးဘၣ် ပှၤလ့ၤဝံဖိလၢအသိၣ်လိ အံၣ်စရ့လးခဲလၢာ်, လၢအမ့ၢ်ပှၤစီဆှံလၢယွၤအဂီၢ်, ပာ်တလါစီဆှံလၢယွၤအဟံၣ်, လၢစီၤဒၤဝံးအဖိခွါစီၤၡလိၤမိၤသူၣ်ဝဲန့ၣ်တက့ၢ်. တကဲဘၣ်တၢ်ယိးလၢသုဖံဘၣ်ခိၣ်ဘၣ်. မၤယွၤသုကစၢ်, ဒီးအပှၤဂီၢ်မုၢ်အံၣ်စရ့လးအတၢ်တက့ၢ်.-
4 ဒီးကတဲာ်ကတီၤတၢ်ဒ်သုပၢ်အဟံၣ်အသိးန့ၣ်, ဒ်သုတီၤ တတီၤတတီၤအသိး, ဒ်အံၣ်စရ့လးအစီၤပၤဒၤဝံးအလံာ် အသိး, ဒီးဒ်အဖိခွါစီၤၡလိၤမိၤအလံာ်အသိးန့ၣ်,
5 ဒီး ဆၢထၢၣ်လၢတၢ်အလီၢ်စီဆှံအပူၤ, ဒ်ပှၤဂီၢ်မုၢ်သုဒီပုၢ်ဝဲၢ် အပၢ်အပှၤဟံၣ်ဖိအတၢ်နီၤဖးတဖၣ်အသိး, ဒီးဒ်ပှၤလ့ၤ ဝံဖိအဒူၣ်အတၢ်နီၤဖးတဖၣ်အသိးန့ၣ်တက့ၢ်.
6 ဒီးမၤ သံတၢ်လဲၤကပာ်, ဒီးမၤစီဆှံသုသး, ဒီးကတဲာ်ကတီၤ သုဒီပုၢ်ဝဲၢ်ဒ်သိးအကမၤဝဲ ဒ်ယွၤအကလုၢ်ကထါလၢစီၤ မိၤရှ့အစုပူၤအသိးန့ၣ်တက့ၢ်.
7 ဒီးစီၤယိၤၡံယၤဟ့ၣ်လီၤပှၤဂီၢ်မုၢ်လၢ သိဒီးမဲာ်တဲးလဲး အကျါလၢသိဖိတဖၣ်ဒီးမဲာ်တဲးလဲးဖိတဖၣ် ခဲလၢာ်လၢ ဘူၣ်လဲၤကပာ်အဂီၢ်, လၢကယဲၢ်ပှၤလၢအအိၣ်ဝဲခဲလၢာ် တုၤအပှဲၤထီၣ်သၢကလး, ဒီးဂီၤဖံးဖါသၢကထိလီၤ. အဝဲ သ့ၣ်န့ၣ်မ့ၢ်ဝဲလၢစီၤပၤအတၢ်ဖိတၢ်လံၤအကျါလီၤ.
8 ဒီးပဒိၣ်ဖးဒိၣ်တဖၣ် ဟ့ၣ်တီနံဒၣ်တၢ်လၢ ပှၤဂီၢ်မုၢ်, လၢပှၤလုၢ်တၢ်အဒိၣ်, ဒီးလၢပှၤလ့ၤဝံဖိလီၤ. ယွၤအဟံၣ် အခိၣ်တဖၣ်, စီၤဃံးလကံယၤ, ဒီးစီၤစကၤရယၤ, ဒီး စီၤယဃံအ့လးသ့ၣ်တဖၣ်န့ၣ် ဟ့ၣ်ပှၤလုၢ်တၢ်အဒိၣ်လၢ တၢ်အဒုခံကထိဃုကယၤ, ဒီးဂီၤဖံးသၢကယၤလၢဘူၣ် လဲၤကပာ်အဂီၢ်လီၤ.
9 ဒီးပှၤလ့ၤဝံဖိအဒိၣ်တဖၣ် စီၤကနၤနယၤ, ဒီးစီၤၡမါ ယၤဒီးစီၤနၤသန့လး, အဒီပုၢ်ဝဲၢ်တဖၣ်, ဒီးစီၤဃၡၤဘ ယၤ, ဒီးစီၤယဃ့ၤအ့လး, ဒီးစီၤယိၤစဘးသ့ၣ်တဖၣ်ဟ့ၣ် ပှၤလ့ၤဝံဖိလၢတၢ်အဒုယဲၢ်ကထိ, ဒီးဂီၤဖံးဖါယဲၢ်ကယၤ လၢဘူၣ်လဲၤကပာ်အဂီၢ်လီၤ.
10 ဒီးတၢ်မၤန့ၣ်ကတဲာ်ကတီၤအသး, ဒီးပှၤလုၢ်တၢ်အ ဒိၣ်ဆၢထၢၣ်လၢအလီၢ်, ဒီးပှၤလ့ၤဝံဖိလၢတတီၤတတီၤ, ဒ်စီၤပၤအတၢ်မၤလိာ်အသိးန့ၣ်လီၤ.
11 ဒီးပှၤမၤသံတၢ်လဲၤကပာ်, ဒီးပှၤလုၢ်တၢ်အဒိၣ်တဖၣ် ဖှံတၢ်လၢအစု, ဒီးပှၤလ့ၤဝံဖိအုၣ်ကွံာ်အဖံးလီၤ.
12 ဒီးသုးကွံာ်တၢ်လုၢ်မ့ၣ်အူတဖၣ် ဒ်သိးအကဟ့ၣ်တၢ် ဒ်ပှၤဂီၢ်မုၢ်အပၢ်အပှၤဟံၣ်ဖိ အတၢ်နီၤဖးတဖၣ်အသိး, ဒ်သိးအကလုၢ်ယွၤ ဒ်တၢ်ကွဲးအသးလၢလံာ်မိၤရှ့အပူၤ အသိးန့ၣ်လီၤ. ဒီးဂီၤဖံးဖါတဖၣ်န့ၣ်ဒ်န့ၣ်အသိးလီၤ.
13 ဒီးဘၣ်တၢ်လဲၤကပာ်လၢမ့ၣ်အူ ဒ်တၢ်စံၣ်ညီၣ်အသိးန့ၣ်, ဒီးတၢ်စီဆှံတဖၣ်ချီဝဲလၢသပၢၤပူၤ, ဒီးလၢသပၢၤ ချီတၢ်အပူၤ, ဒီးလၢသပၢၤအဘ့ၣ်ဘၣ်အပူၤ, ဒီးနီၤဖးဝဲ ချ့ချ့လၢပှၤဂီၢ်မုၢ်ခဲလၢာ်အကျါလီၤ.
14 ဒီးလၢအလီၢ်ခံန့ၣ် ကတဲာ်ကတီၤတၢ်လၢအကစၢ်ဒၣ်ဝဲအဂီၢ်, ဒီးလၢပှၤလုၢ်တၢ်အဒိၣ်အဂီၢ်လီၤ. အဂ့ၢ်ဒ်အံၤ, စီၤအၤဟရိၣ်အဖိခွါပှၤလုၢ်တၢ်အဒိၣ်တဖၣ် အိၣ်ဝဲဒီးအ တၢ်လုၢ်မ့ၣ်အူ, ဒီးတၢ်အသိတုၤလီၤလၢမုၢ်နၤလီၤ. ဒီး ပှၤလ့ၤဝံဖိကတဲာ်ကတီၤတၢ်လၢအဂီၢ်ဒၣ်ဝဲ, ဒီးလၢစီၤ အၤဟရိၣ်အဖိခွါပှၤလုၢ်တၢ်အဒိၣ်တဖၣ်အဂီၢ်လီၤ.
15 ဒီးပှၤသးဝံၣ်တၢ်ဖိစီၤအၤစာ်အဖိခွါတဖၣ် အိၣ်ဝဲလၢ အလီၢ်, ဒ်စီၤဒၤဝံး, ဒီးစီၤအၤစာ်, ဒီးစီၤဟ့မၣ်, ဒီးစီၤ ပၤအပှၤထံၣ်တၢ် စီၤယဒူၣ်သၣ်အတၢ်မၤလိာ်အသိးန့ၣ်, ဒီးပှၤပၢၤပဲတရီအိၣ်ဝဲဖဲပဲတရီကိးပူၤဒဲးလီၤ. တလဲၤသ ဒၣ်ဘၣ်အတၢ်မၤဘၣ်. အဂ့ၢ်ဒ်အံၤ, အဒီပုၢ်ဝဲၢ်ပှၤလ့ၤဝံ ဖိကတဲာ်ကတီၤတၢ်လၢအဂီၢ်လီၤ.
16 ဒီးတၢ်မၤယွၤအတၢ်ခဲလၢာ်န့ၣ် ကတဲာ်ကတီၤအသး မုၢ်တနံၤဃီ, ဒ်သိးအကမၤဘူၣ်လဲၤကပာ်, ဒီးလုၢ်တၢ် လုၢ်မ့ၣ်အူလၢယွၤအတၢ်လုၢ်လီၢ်အဖီခိၣ်, ဒ်စီၤပၤယိၤၡံ ယၤအတၢ်မၤလိာ်အသိးန့ၣ်လီၤ.
17 ဒီးပှၤအံၣ်စရ့လးဖိ လၢအအိၣ်ဝဲတဖၣ်န့ၣ် မၤဘူၣ် လဲၤကပာ်လၢအကတီၢ်ဖဲန့ၣ်, ဒီးဘူၣ်ကိၣ်တအိၣ်ဘၣ် ဒီးကိၣ်မံၣ်နွံနံၤလီၤ.
18 ဒီးလၢဝံၡှမူၤအ့လး အမုၢ်နံၤတဖၣ်လံၤလံၤန့ၣ် ပှၤတ မၤဘၣ်ဘူၣ်လဲၤကပာ်ဒ်န့ၣ်အသိးဘၣ်. ဒီးဘူၣ်လဲၤက ပာ်လၢစီၤယိၤၡံယၤ, ဒီးပှၤလုၢ်တၢ်အဒိၣ်, ဒီးပှၤလ့ၤဝံ ဖိ, ဒီးကယဲၢ်ပှၤယူဒၤဖိ, ဒီးအံၣ်စရ့လးဖိလၢအအိၣ်ဝဲ, ဒီးပှၤအိၣ်ဝဲဆိးဝဲလၢယရူၤၡလ့ၣ်အပူၤသ့ၣ်တဖၣ် မၤဝဲ န့ၣ် အံၣ်စရ့လးအစီၤပၤတမၤဘၣ်ဘူၣ်လဲၤကပာ်ဒ်န့ၣ် အသိးနီတဂၤဘၣ်.
19 လၢစီၤယိၤၡံယၤအနံၣ်ပှဲၤထီၣ် တဆံဃိးနံၣ်တနံၣ်န့ၣ် ပှၤမၤဘူၣ်လဲၤကပာ်န့ၣ်လီၤ.
20 တၢ်တဖၣ်ခဲလၢာ်အလီၢ်ခံန့ၣ်, တုၤစီၤယိၤၡံယၤက တဲာ်ကတီၤတ့ၢ်နူၢ်ဧိၤစီၤဧိၤဝံၤဒီး, အဲၤကူပတူးအစီၤပၤန ကိၤဟဲထီၣ်ဒ်သိးအကဒုးတၢ်ဒီးကၢ်ကမံၣ် လၢထံမိၢ်ပှၢ် ဖရၤသးအနံၤ, ဒီးစီၤယိၤၡံယၤလဲၤထီဒါအီၤလီၤ.
21 ဒီးအဝဲဒၣ်မၢလီၤကလူးတဖၣ်ဆူအအိၣ်, ဒီးစံးဝဲဒၣ်, ယူဒၤအစီၤပၤဧၢ, တၢ်ဘၣ်ဃးဒီးယၤဒီးနၤမ့ၢ်ဒ်လဲၣ်. တၢ် လၢမုၢ်တနံၤအံၤ ယဟဲထီဒါနၤတမ့ၢ်ဘၣ်. မ့ၢ်ယထီဒါ ဟံၣ်တဖျၢၣ်လၢယဒုးတၢ်ဒီးအီၤအလီၢ်အိၣ်လီၤ. ဒီးယွၤ မၤလိာ်ယၤဒ်သိးယကမၤချ့ချ့လီၤ. တြီယွၤလၢအအိၣ်ဒီး ယၤတဂ့ၤ. ဒ်သိးအသုတမၤဟးဂီၤနၤတဂ့ၤ.
22 ဘၣ်ဆၣ်ဒီးစီၤယိၤၡံယၤ တဃၣ်ကဒါက့ၤအသးလၢ အီၤ, ဒီးမၤလီၤဆီအသး, ဒ်သိးအကဒုးသုးဒီးအီၤ, ဒီး တဒိကနၣ်ဘၣ် စီၤနကိၤအတၢ်ကတိၤလၢယွၤအထးခိၣ် ဘၣ်. ဒီးဟဲဒုးတၢ်လၢကစၢၢ်ကဆူးမကံးဒိၤအပူၤလီၤ.
23 ဒီးပှၤခးတၢ်ဖိခးဘၣ်စီၤပၤယိၤၡံယၤ, ဒီးစီၤပၤစံးဘၣ် အခ့အပှၤ, စိာ်ထီၣ်ကွံာ်ယၤတက့ၢ်. အဂ့ၢ်ဒ်အံၤ, ယ ဘၣ်တၢ်ဆဲးနးမးလီၤ.
24 ဒီးအခ့အပှၤစိာ်ထီၣ်ကွံာ်အီၤ လၢအလ့ၣ်ကဟၣ်အ ပူၤ, ဒီးပာ်အီၤလၢလ့ၣ်ကဟၣ်ခံဆိတဆိအပူၤ လၢအ အိၣ်ဒီးအီၤ, ဒီးစိာ်ထီၣ်အီၤဆူယရူၤၡလ့ၣ်, ဒီးသံဝဲ, ဒီး ပှၤခူၣ်လီၤကွံာ်အီၤလၢအပၢ်တဖၣ်အတၢ်သွၣ်ခိၣ်ပူၤ, ဒီး ယူဒၤ, ဒီးယရူၤၡလ့ၣ်ဖိခဲလၢာ်ဟီၣ်ဝဲယၢၤဝဲလၢစီၤယိၤ ၡံယၤအဃိလီၤ.
25 ဒီးစီၤယံးရမံယၤဟီၣ်ဝဲယၢၤဝဲ လၢစီၤယိၤၡံယၤအဃိ, ဒီးပှၤမၤထါဖိပိာ်ခွါ, ဒီးပှၤမၤထါဖိပိာ်မုၣ်ကတိၤတၢ်လၢ စီၤယိၤၡံယၤအဂ့ၢ်အကျိၤ လၢအသးသယုၢ်တၢ်အပူၤတုၤ မုၢ်မဆါတနံၤအံၤ, ဒီးမၤတၢ်အလုၢ်အလၢ်လၢအံၣ်စရ့ လးအပူၤ, ဒီးကွၢ်ကွၢ်, ကွဲးအသးလၢလံာ်သးသယုၢ် တၢ်အပူၤလီၤ.
26 ဒီးတၢ်အိၣ်လီၤတဲာ်ဘၣ်ဃးဒီး စီၤယိၤၡံယၤ အတၢ် မၤ, ဒီးအတၢ်ဂ့ၤတၢ်ဝါဒ်တၢ်ကွဲးအသးလၢ ယွၤအတၢ် သိၣ်တၢ်သီအပူၤအသိးန့ၣ်,
27 ဒီးအမၤတၢ်တဖၣ်, တၢ် အခီၣ်ထံး, ဒီးတၢ်အကတၢၢ်န့ၣ်, ကွၢ်ကွၢ်, ကွဲးအသး လၢအံၣ်စရ့လး, ဒီးယူဒၤအစီၤပၤအလံာ်ပူၤလီၤ.