64
စီၤဒၤဝံးအထါလၢတၢ်အခိၣ်အဂီၢ်.
1 လၢယဘါထုကဖၣ်န့ၣ်ဒိကနၣ်ယကလုၢ်, ယွၤဧၢ, ပၢၤယသးသမူလၢ တၢ်ပျံၤယဒုၣ်ယဒါန့ၣ်တက့ၢ်.
2 ပာ်ခူသူၣ်ယၤလၢပှၤအၢဖိအတၢ်ကူၣ်ခူသူၣ်န့ၣ်, လၢ ပှၤမၤအၢတၢ်အတၢ်တၢထီၣ်တၢလီၤန့ၣ်တက့ၢ်.
3 အဝဲ သ့ၣ်ကျ့အပျ့ၤဒ်နးလၢအအ့ၣ်ဝဲအသိးန့ၣ်, ပညိၣ်အ ပျၢ်, တၢ်ကတိၤအခၣ်န့ၣ်,
4 ဒ်သိးအကခးခူသူၣ်ပှၤ အလၢအပှဲၤန့ၣ်လီၤ. ခးဝဲသတူၢ်ကလာ်, ဒီးတပျံၤ ဘၣ်တၢ်ဘၣ်.
5 ဒုးဆူၣ်ထီၣ်လိာ်အသးလၢ တၢ်အၢ အပူၤ, ကူၣ်ထီၣ်ဝဲလၢအကဆဲခူသူၣ် ပျံၤသကွီၤလီၤ. စံးဝဲ, မ့ၢ်မတၤကထံၣ်ဘၣ်အီၤလဲၣ်.
6 ကွၢ်ဃုတၢ်အၢ, ကူၣ်ထီၣ်ဒီးစံးဝဲ, ပဃုတၢ်လၢလၢ ပှဲၤပှဲၤလံ. ဒီးပှၤကိးဂၤဒဲးအတၢ်ဆိကမိၣ်လၢညါ, ဒီး အသးန့ၣ်ယိာ်ဝဲလီၤ.
7 ဘၣ်ဆၣ်ဒီးယွၤကခးဘၣ်အီၤ လၢပျၢ်, ဒီးကဘၣ်ဆဲးသတူၢ်ကလာ်လီၤ.
8 ဒ်န့ၣ်အ သိး, တၢ်ကဒုးလီၤဃံၤအီၤ, ဒီးအပျ့ၤဒၣ်ဝဲ ကထီဒါ အီၤလီၤ. ကယဲၢ်ပှၤလၢအထံၣ်အီၤ ကဃ့ၢ်ကွံာ်ကိး ဂၤဒဲးလီၤ.
9 ဒီးပှၤကညီခဲလၢာ်ကပျံၤတၢ်, ဒီးဒုးနဲၣ် ယွၤအတၢ်မၤ, ဒီးကကွၢ်ဆိကမိၣ်ဝဲ အမၤတၢ်အဂ့ၢ် အကျိၤလီၤ.
10 ပှၤတီပှၤလိၤ ကသးခုလၢယွၤအပူၤ, ဒီးကသန့ၤ အသးလၢအီၤ, ဒီးပှၤအသးစၢၢ်ဆၢန့ၣ် ကပာ်ကဖိ အသးခဲလၢာ်လီၤ.