34
စီၤဒၤဝံးအထါ ဖဲအမၤလီၤအသးလီၤဆီဒၣ်တၢ်လၢ စီၤအဘံးမ့လ့းအမဲာ်ညါ, ဒီးအဝဲဒၣ်ဟီထီၣ်ကွံာ်အီၤ, ဒီးဟးထီၣ်ကွံာ်ဝဲန့ၣ်လီၤ.
1 ယကစံးထီၣ်ပတြၢၤယွၤ ကိးအဆၢအကတီၢ်ဒဲး လီၤ. အတၢ်စံးထီၣ်ပတြၢၤ ကအိၣ်လၢယထးခိၣ် တထံၣ်ဃီလီၤ.
2 ယသးကပာ်ကဖိအသး လၢယွၤအပူၤ, ပှၤဘၣ် နးဘၣ်ဖှီၣ်ကနၢ်ဟူဝဲ, ဒီးကသးခုလီၤ.
3 ပာ်ဒိၣ်သကိး ယွၤဒီးယၤတက့ၢ်, ဒီးမ်ပကပာ် ထီၣ်ထီသကိးအမံၤတက့ၢ်.
4 ယဃုယွၤ, ဒီးအဝဲဒၣ်စံးဆၢယၤ, ဒီးမၤပူၤမၤ ဖျဲးယၤလၢကယဲၢ်ယတၢ်ဘၣ်ယိၣ်ခဲလၢာ်အပူၤလီၤ.
5 ပှၤကွၢ်ထီၣ်တၢ်လၢအီၤ, ဒီးဒိးတၢ်ကပီၤ, ဒီးအ မဲာ်တဆှးဘၣ်.
6 ပှၤဘၣ်ဖှီၣ်ဘၣ်ယာ်တဂၤအံၤကိးထီၣ်ဝဲ, ဒီးယွၤ ကနၣ်ဝဲ, ဒီးအုၣ်က့ၤခီၣ်က့ၤအီၤ လၢအတၢ်ကိၢ် တၢ်ဂီၤအပူၤခဲလၢာ်လီၤ.
7 ယွၤအကလူးသူၣ်ဒဲဝးတရံးပှၤလၢအပျံၤအီၤ, ဒီး မၤပူၤမၤဖျဲးအီၤလီၤ.
8 လ့ၣ်ကွၢ်, ဒီးထံၣ်လၢယွၤမ့ၢ် တၢ်ဂ့ၤန့ၣ်တက့ၢ်. ပှၤလၢအသန့ၤအသးလၢအီၤန့ၣ်ဘၣ်ဆိၣ်ဂ့ၤဝဲလီၤ.
9 ပျံၤယွၤ, အပှၤစီဆှံသ့ၣ်ဧၢ, အဂ့ၢ်ဒ်အံၤ, တၢ် လီၤစှၤတအိၣ်ဘၣ်ဒီး ပှၤလၢအပျံၤအီၤဘၣ်.
10 ခ့ယုၢ်ဖိတဖၣ်ဘၣ်ဖှီၣ်, ဒီးတၢ်သၣ်ဝံၤအသးလီၤ. မ့မ့ၢ်ပှၤလၢ အဃုယွၤတဖၣ် အတၢ်ဂ့ၤလၢအတန့ၢ် ဘၣ်န့ၣ် တအိၣ်နီတမံၤ ဘၣ်.
11 ဟဲယဖိသ့ၣ်လံၤသ့ၣ်ဧၢ, ကနၣ်ယကလုၢ်တက့ၢ်. ယကသိၣ်လိ သုလၢတၢ်ပျံၤယွၤန့ၣ်လီၤ.
12 မ့ၢ်မတၤ ဘၣ်အသးလၢတၢ်မူ, ဒီးအဲၣ်ဒိးမုၢ်ဧိၤ နံၤဧိၤ ဒ်သိးအကထံၣ်ဘၣ်တၢ်ဂ့ၤန့ၣ်တဂၤလဲၣ်.
13 တြီတၢ်အၢလၢ နပျ့ၤလိၤဒီး တၢ်ကတိၤလီတၢ် လၢနပျုၤလိၤတက့ၢ်.
14 ဟးဆှဲးတၢ်အၢ, ဒီးမၤတၢ်ဂ့ၤ, ဃုတၢ်ဃူတၢ်ဖိး, ဒီးလူၤအီၤတက့ၢ်.
15 ယွၤအမဲာ်အိၣ်လၢပှၤတီပှၤလိၤအလိၤ, ဒီးအနၢ် အိၣ်လၢအဃ့ကညးတၢ်အဂီၢ်လီၤ.
16 ယွၤအမဲာ်အိၣ်ထီဒါပှၤမၤတၢ်အၢ, ဒ်သိးအကထဲး ထီၣ်ကွံာ်တၢ်သ့ၣ်နီၣ်ထီၣ်အီၤလၢဟီၣ်ခိၣ်ချၢလီၤ.
17 ပှၤအတီအလိၤဃ့ဝဲ, ဒီးယွၤနၢ်ဟူ, ဒီးမၤပူၤမၤ ဖျဲးအီၤလၢအတၢ်ကိၢ်တၢ်ဂီၤအပူၤခဲလၢာ်လီၤ.
18 ယွၤအိၣ်ဘူးဒီးပှၤလၢအသူၣ်ကၢ်အသးလီၤ, ဒီးပှၤ လၢအပီၢ်ယၢ်လီၤက့ၤအသးန့ၣ် အုၣ်က့ၤခီၣ်က့ၤဝဲ လီၤ.
19 တၢ်အၢအါမံၤဘၣ်ပှၤအတီအလိၤ, ဘၣ်ဆၣ်ဒီး ယွၤမၤပူၤမၤဖျဲး အီၤလၢတၢ်ခဲလၢာ်န့ၣ်အပူၤလီၤ.
20 ပၢၤအဃံခဲလၢာ်, တကၢ်ဘၣ်နီတဘိဘၣ်.
21 တၢ်အၢမၤသံပှၤတတီတလိၤဘၣ်, ဒီးပှၤလၢအ သးဟ့ပှၤတီပှၤလိၤတဖၣ်န့ၣ်ကတူၢ်တၢ်ဒဲးဘးလီၤ.
22 ယွၤပှ့ၤက့ၤအခ့အပှၤအသး, ဒီးပှၤလၢအသန့ၤအ သးလၢအီၤန့ၣ် တဘၣ်ဘၣ်တၢ်ဒဲးဘးနီတဂၤဘၣ်.