109
စီၤဒၤဝံးအထါလၢတၢ်အခိၣ်အဂီၢ်.
1 အိၣ်ဘှီၣ်ကလာ်တဂ့ၤ, ယတၢ်စံးထီၣ်ပတြၢၤအက စၢ်ဧၢ.
2 အဂ့ၢ်ဒ်အံၤ, ပှၤတတီတလိၤအထးခိၣ်ဒီးပှၤ လီတၢ်အထးခိၣ်န့ၣ် အဲးထီၣ်အသး လၢယလိၤလီၤ. ကတိၤထီဒါယၤလၢအပျ့ၤကဘျံးကဘျၣ်လီၤ.
3 အိၣ်ဝး တရံးယၤလၢတၢ်သးဟ့အတၢ်ကတိၤ, ဒီးဒုးတၢ်ဒီးယၤ ကလီကလီလီၤ.
4 လၢယတၢ်အဲၣ်အဂီၢ်န့ၣ် ကဲထီၣ်လၢ ယဒုၣ်ယဒါ, ဘၣ်ဆၣ်ဒီး ယဟ့ၣ်လီၤယသးလၢ တၢ်ဘါထုကဖၣ် လီၤ.
5 ဒီးပာ်တၢ်အၢလၢယလိၤလၢတၢ်ဂ့ၤအဂီၢ်, ဒီး တၢ်သးဟ့လၢယတၢ်အဲၣ်အဂီၢ်လီၤ.
6 ပာ်ပှၤတတီတလိၤလၢအဖီခိၣ်တက့ၢ်, ဒီးမ်တၢ်အ ဒုၣ်အဒါဆၢထၢၣ်လၢအစုထွဲတက့ၢ်.
7 တုၤအဘၣ်တၢ် စံၣ်ညီၣ်ဒီး, မ်တၢ်ပာ်အီၤလၢပှၤတတီတလိၤတက့ၢ်, ဒီးမ်အတၢ်ထုကဖၣ်ကဲထီၣ်တၢ်ဒဲးဘးတက့ၢ်.
8 မ်အနံၤ အသီအိၣ်စှၤဝဲတက့ၢ်. မ်ပှၤဂၤထီၣ်ဘးအကွၢ်တၢ်အ လီၢ်တက့ၢ်.
9 မ်အဖိတဖၣ်ကဲထီၣ်ပှၤဖိၣ်ဃဲ, ဒီးအမါ လၢပှၤမုၣ်ကမဲတက့ၢ်.
10 မ်အဖိတဖၣ် ဟးဝ့ၤဝီၤတၢ်, ဒီးဃ့အီၣ်တၢ်, ဒီးဃုတၢ်လၢ အလီၢ်အိၣ်သယုၢ်အပူၤ တက့ၢ်.
11 မ်ကမၢ်အကစၢ်န့ၣ် မၤန့ၢ်ကယဲၢ်တၢ်အိၣ်ဒီးအီၤခဲ လၢာ်တက့ၢ်. ဒီးမ်ပှၤတခီဘီမုၢ်န့ၣ် ဂုာ်န့ၢ်အတၢ်မၤ တက့ၢ်.
12 မ်ပှၤမၤဘျုးမၤဖှိၣ်အီၤန့ၣ်အသုတအိၣ်တဂ့ၤ, ဒီးမ်ပှၤသးကညီၤအဖိဖိၣ်ဃဲန့ၣ် အသုတအိၣ်တဂ့ၤ.
13 မ်အစၢၤအသွဲၣ်န့ၣ်ဘၣ်တၢ်ဒီၣ်တဲာ်ကွံာ်အီၤတက့ၢ်. မ် အမံၤဘၣ်တၢ်တြူၢ်ကွံာ်အီၤလၢပှၤလၢခံလၢလာ်တစိၤ အကျါတက့ၢ်.
14 မ်ယွၤသ့ၣ်နီၣ်ထီၣ်က့ၤအပၢ်တဖၣ်အ တၢ်အၢန့ၣ်တက့ၢ်. ဒီးမ်အမိၢ်အတၢ်ဒဲးဘးသုတဘၣ် တၢ်တြူာ်ကွံာ်အီၤတဂ့ၤ.
15 မ်အအိၣ်လၢယွၤအမဲာ်ညါ တထံၣ်ဃီ, ဒ်သိးအကဒီၣ်တဲာ်ကွံာ် အတၢ်သ့ၣ်နီၣ် ထီၣ်က့ၤအီၤလၢဟီၣ်ခိၣ်ချၢတက့ၢ်.
16 အဂ့ၢ်ဒ်အံၤ, တသ့ၣ်နီၣ်ထီၣ်မၤတၢ်ဘျုးတၢ်ဖှိၣ်ဘၣ်. ဒီးမၤအၢပှၤဘၣ်နးဘၣ်ဖှီၣ်, ဒီးပှၤဖှီၣ်ဖိယာ်ဖိ, ဒီးပှၤ အသူၣ်ကၢ်အသးလီၤန့ၣ်, ဒ်သိးအကမၤသံအီၤလီၤ.
17 ဒီးအဲၣ်ဒိးဝဲလၢတၢ်ဆိၣ်အၢဒီး, အဝဲန့ၣ်ဘၣ်ကဒါက့ၤ အီၤလီၤ. ဒီးတဘၣ်ဘၣ်အသးလၢတၢ်ဆိၣ်ဂ့ၤဘၣ်ဒီး, အိၣ်ယံၤဝဲဒီးအီၤလီၤ.
18 ဒီးသိးတၢ်ဆိၣ်အၢဒ်ဆ့တဘ့ၣ် အသိး, ဒီးအဝဲန့ၣ်ဟဲနုာ်လၢအဟၢဖၢပူၤ ဒ်ထံအသိး န့ၣ်, ဒီးလၢအဃံပူၤဒ်သိအသိးန့ၣ်လီၤ.
19 မ်အကဲထီၣ် လၢအဂီၢ်ဒ်ယၣ်လၢအကၤဝဲအသိး, ဒီးဒ်အယီၢ်တကိး လၢအကံၢ်တူာ် အယီၢ်ဒ့တထံၣ်ဃီအသိးန့ၣ်တက့ၢ်.-
20 မ်တၢ်န့ၣ်ကဲထီၣ်ပှၤထီဒါယၤ, ဒီးပှၤလၢအစံးအၢယသး တဖၣ်အဘူးအလဲ လၢယွၤအစုပူၤန့ၣ်တက့ၢ်.
21 ဒီးနဲဒၣ်, ယွၤကစၢ်ဧၢ, မၤတၢ်လၢယဂီၢ်လၢနမံၤအ ဃိန့ၣ်တက့ၢ်. မ့ၢ်နဘျုးနဖှိၣ်ဂ့ၤဝဲဒီး, မၤပူၤမၤဖျဲးယၤ တက့ၢ်.
22 အဂ့ၢ်ဒ်အံၤ, ယဲဒၣ်အံၤ, ယမ့ၢ်ပှၤဘၣ်နးဘၣ်ဖှီၣ်,ဒီး ပှၤဖှီၣ်ဖိယာ်ဖိ, ဒီးယသးဘၣ်ဆဲးလၢယပူၤလီၤ.
23 ယ ဘၣ်လဲၤတၢ် ဒ်တၢ်အကဒုလၢအမၤထီထီၣ်အသးအဖၢ မုၢ်အသိးန့ၣ်လီၤ. ယဘၣ်တၢ်ဟီထီၣ်ကွံာ်ယၤဒ်ဒွဲၣ်အၢ် ဘၤအသိးန့ၣ်လီၤ.
24 ယခီၣ်လ့ၢ်ခိၣ်ကနိးလၢ တၢ်ဒုၣ် တၢ်အီၣ်အဃိ, ဒီးယညၣ်ဃဲၤလီၤလၢတၢ်ဘီၣ်တအိၣ် ဘၣ်အဃိလီၤ.
25 ဒီးယကဲထီၣ်တၢ်ဒုၣ်ဒွဲၣ်အလီၢ်လၢ အဂီၢ်လီၤ. ကွၢ်ယၤတကူၢ်သ့ၣ်, ကျၢၢ်ကျာ်အခိၣ်လီၤ.
26 မၤစၢၤယၤ, ယွၤယကစၢ်ဧၢ, အုၣ်က့ၤခီၣ်က့ၤယၤဒ် နဘျုးနဖှိၣ်အသိးန့ၣ်တက့ၢ်.
27 ဒ်သိးပှၤကသ့ၣ်ညါလၢ တၢ်အံၤမ့ၢ်နစု, လၢနမၤအီၤလီၤ, ယွၤဧၢ.
28 အဝဲသ့ၣ်ကဆိၣ်အၢဒၣ်ဝဲ, မ့မ့ၢ်နဲဒၣ်အံၤဆိၣ်ဂ့ၤတၢ် တက့ၢ်. အဝဲသ့ၣ်ဂဲၤဆၢထၢၣ်ဝဲဒီး, မ်အမဲာ်ဆှးတ က့ၢ်. မ့မ့ၢ်နခ့နပှၤန့ၣ်မ်အသးခုတက့ၢ်.
29 မ်ပှၤထီဒါ ယၤတဖၣ်န့ၣ် ကသိးတၢ်မဲာ်ဆှး, ဒီးလုးဘၢအသး လၢတၢ်မဲာ်ဆှးဒ်လၢယၣ်တဘ့ၣ်အသိးန့ၣ်တက့ၢ်.
30 ယကစံးထီၣ်ပတြၢၤယွၤ လၢယထးခိၣ် အါအါက လဲာ်ဒီးလၢပှၤအါဂၤအကျါန့ၣ် ယကစံးထီၣ်ပတြၢၤအီၤ လီၤ.
31 အဂ့ၢ်ဒ်အံၤ, ကဆၢထၢၣ်လၢပှၤဖှီၣ်ဖိယာ်ဖိအ စုထွဲဒ်သိးအကအုၣ်က့ၤခီၣ်က့ၤအီၤလၢ ပှၤလၢအက စံၣ်ညီၣ်ဃၣ်အသးအစုပူၤလီၤ.