23
1 ဒီးစီၤဘံးလၣ်စံးဘၣ်စီၤဘၤလး, မၤထီၣ်န့ၢ်ယၤလၢ တၢ်လုၢ်လီၢ်နွံဖျၢၣ်, ဒီးကတဲာ်ကတီၤန့ၢ်ယၤလၢဂီၤဖံး ဖါနွံဒု, ဒီးသိဖိနွံဒုဖဲအံၤတက့ၢ်.
2 ဒီးစီၤဘၤလးမၤဝဲဒ် စီၤဘံးလၣ်ကတိၤတၢ်အသိးန့ၣ် ဒီးစီၤဘၤလး, ဒီးစီၤဘံးလၣ်လုၢ်ဂီၤဖံးဖါတဒု, ဒီးသိ ဖါတဒုလၢတၢ်လုၢ်လီၢ်တဖျၢၣ်အဖီခိၣ်လီၤ.
3 ဒီးစီၤဘံးလၣ်စံးဘၣ်စီၤဘၤလး, ဆၢထၢၣ်လၢနတၢ် လုၢ်မ့ၣ်အူအဃၢၤ, ဒီးယကလဲၤတၢ်လီၤ. ဘၣ်တဘၣ် ယွၤကဟဲသဂၢၢ်ယၤ, ဒီးတၢ်လၢအဒုးနဲၣ်ယၤန့ၣ်ယက စံးဘၣ်နၤလီၤ. ဒီးလဲၤထီၣ်ဝဲလၢတၢ်စိခိၣ်လီၤ.
4 ဒီးယွၤဟဲသဂၢၢ်စီၤဘံးလၣ်, ဒီးအဝဲဒၣ်စံးဘၣ်အီၤ, ယကတဲာ်ကတီၤလံတၢ်လုၢ်လီၢ်နွံဖျၢၣ်, ဒီးယလုၢ်လံ ဂီၤဖံးဖါတဒု, ဒီးသိဖါတဒုလၢတၢ်လုၢ်လီၢ်တဖျၢၣ်အ ဖီခိၣ်လံ.
5 ဒီးယွၤပာ်တၢ်ကတိၤလၢစီၤဘံးလၣ်အထးခိၣ်, ဒီးစံး ဝဲဒၣ်, က့ၤက့ၤဆူစီၤဘၤလးအအိၣ်တက့ၢ်. ဒီးနဘၣ် ကတိၤတၢ်ဒ်အံၤလီၤ.
6 ဒီးက့ၤက့ၤဝဲဆူအအိၣ်, ဒီးကွၢ်ကွၢ်, ဆၢထၢၣ်လၢအတၢ်လုၢ်မ့ၣ်အူအဃၢၤ, အဝဲဒၣ်န့ၣ်, ဒီးမိၤအးအပဒိၣ်ခဲလၢာ်, ဒီးထုထီၣ်အတၢ်ကတိၤဒိ, ဒီးစံးဝဲဒၣ်,-
7 လၢအရၣ်န့ၣ်စီၤဘၤလးဆှၢယၤ,မိၤအးအစီၤပၤလၢကစၢၢ်လၢမုၢ်ထီၣ်တခီ,ဟဲဆိၣ်အၢယၤကိာ်လၢယဂီၢ်,ဒီးဟဲဆိၣ်ဃီၣ်အံၣ်စရ့လးတက့ၢ်.
8 ပှၤလၢယွၤတဆိၣ်အၢန့ၣ် ယကဆိၣ်အၢအီၤဒ်လဲၣ်, ဒီးပှၤလၢယွၤတဆိၣ်ဃီၣ်န့ၣ်ယကဆိၣ်ဃီၣ်အီၤဒ်လဲၣ်.
9 အဂ့ၢ်ဒ်အံၤ, လၢလၢၢ်ခိၣ်လ့ခိၣ်ယထံၣ်ဘၣ်အီၤ, ဒီး လၢတၢ်စိခိၣ်ယကွၢ်အီၤလီၤ.ကွၢ်ကွၢ်, ပှၤဂီၢ်မုၢ်ကအိၣ်ဝဲတကလုာ်ဒၣ်,ဒီးတၢ်တဂံၢ်ဘၣ်အီၤလၢပှၤကလုာ်အကျါဘၣ်.
10 မ့ၢ်မတၤကဂံၢ်ယၤကိာ်အကမူၣ်,ဒီးအံၣ်စရ့လးလွံၢ်ပူတပူအတၢ်ဂံၢ်လဲၣ်.မ်ယကသံဒ်ပှၤတီပှၤလိၤသံအသိးတက့ၢ်.မ်ယကတၢၢ်န့ၣ်ကမၤအသးဒ်အဝဲဒၣ်အသိးတက့ၢ်.
11 ဒီးစီၤဘၤလးစံးဘၣ်စီၤဘံးလၣ်, နမၤယၤဒ်လဲၣ်. ယ ဟံးန့ၢ်နၤဒ်သိးနကဆိၣ်အၢယဒုၣ်ယဒါ, ဒီးကွၢ်ကွၢ်, နဆိၣ်ဂ့ၤအီၤသပှၢ်တၢၢ်လီၤ.
12 ဒီးစံးဆၢတၢ်, ဒီးစံးဝဲဒၣ်, တၢ်လၢယွၤပာ်လၢယ ထးခိၣ်န့ၣ်ယဘၣ်ပလီၢ်ယသး, ဒီးကတိၤတၢ်န့ၣ်, တ မ့ၢ်ဘၣ်ဧါ.
13 ဒီးစီၤဘၤလးစံးဘၣ်အီၤ, ဟဲလၢ်ဒီးယၤဆူတၢ်အလီၢ် တပူၤဒၣ်ဖဲနကထံၣ်ဘၣ်အီၤတက့ၢ်, နကထံၣ်ဘၣ်ထဲ အကတၢၢ်ဧိၤဒီးနတထံၣ်ဘၣ်အီၤခဲလၢာ်ဘၣ်လီၤ. ဒီး ဆိၣ်အၢအီၤလၢယဂီၢ်ဖဲန့ၣ်တက့ၢ်.
14 ဒီးဟဲစိာ်အီၤဆူတၢ်ပျီပူၤစိဖံၣ်, ဆူပံးစကၤအဒီခိၣ်, ဒီးမၤထီၣ်တၢ်လုၢ်လီၢ်နွံဖျၢၣ်, ဒီးလုၢ်ဂီၤဖံးဖါတဒု, ဒီး သိဖါတဒုလၢတၢ်လုၢ်လီၢ်တဖျၢၣ်အဖီခိၣ်လီၤ.
15 ဒီးစံးဘၣ်စီၤဘၤလး, ဆၢထၢၣ်ဖဲအံၤလၢနတၢ်လုၢ် မ့ၣ်အူအဃၢၤတက့ၢ်, ဒီးယဲဒၣ်အံၤယကလဲၤသဂၢၢ် တၢ်ဖဲန့ၣ်လီၤ.
16 ဒီးယွၤဟဲသဂၢၢ်စီၤဘံးလၣ်, ဒီးပာ်တၢ်ကတိၤလၢ အထးခိၣ်, ဒီးစံးဝဲဒၣ်, က့ၤကဒီးဆူစီၤဘၤလးအအိၣ်, ဒီးစံးဒ်အံၤတက့ၢ်.
17 ဒီးက့ၤက့ၤဝဲဆူအအိၣ်, ဒီးကွၢ်ကွၢ်, အိၣ်ဆၢထၢၣ် ဝဲလၢအတၢ်လုၢ်မ့ၣ်အူအဃၢၤ, ဒီးမိၤအးအပဒိၣ်တဖၣ် အိၣ်ဒီးအီၤလီၤ. ဒီးစီၤဘၤလးစံးဘၣ်အီၤ, ယွၤကတိၤ တ့ၢ်တၢ်ဒ်လဲၣ်.
18 ဒီးထုထီၣ်အတၢ်ကတိၤဒိ,ဒီးစံးဝဲဒၣ်, ဂဲၤဆၢထၢၣ်စီၤဘၤလးဧၢ, ဒီးကနၣ်,ဒိကနၣ်ယကလုၢ်, စီၤစံးပိၢ်အဖိခွါဧၢ,
19 ယွၤတမ့ၢ်ဘၣ်ပှၤကညီ လၢအကကတိၤတၢ်ကဘျံး ကဘျၣ်ဘၣ်,ဒီးတမ့ၢ်ဘၣ်ပှၤကညီဖိခွါလၢ အကပီၢ်ယၢ်လီၤက့ၤအ သးဘၣ်.စံးတၢ်, ဒီးတမၤဘၣ်ဝဲဘၣ်ဧါ,ကတိၤတၢ်, ဒီးတမၤဂၢၢ်မၤကျၢၤဘၣ်ဧါ.
20 ကွၢ်ကွၢ်, ယဒိးန့ၢ်လၢယကဆိၣ်ဂ့ၤတၢ်,ဒီးအဝဲဒၣ်ဆိၣ်ဂ့ၤဝဲ,ဒီးယဘိးကဒါတသ့ဘၣ်.
21 တကွၢ်ဘၣ်တၢ်အၢလၢယၤကိာ်အပူၤဘၣ်,ဒီးတထံၣ်ဘၣ်တၢ်မၤအၢလၢအံၣ်စရ့လးအပူၤဘၣ်.ယွၤအကစၢ်အိၣ်ဒီးအီၤ,ဒီးတၢ်ကိးပသူထီၣ်ဘၣ်ဃးဒီးစီၤပၤအိၣ်လၢအကျါ.
22 ယွၤဒုးဟးထီၣ်ကွံာ်အီၤလၢအဲၤကူပတူးအပူၤ,အိၣ်ဒီးအဂံၢ်အဘါဒ်တၤဖးအသိးလီၤ.
23 မ့ၢ်မးတၢ်ဟိၣ်တၢ်ယီလၢ အကဘၣ်ယၤကိာ်တအိၣ် ဘၣ်,ဒီးတၢ်အူတၢ်သမူလၢအကဘၣ် အံၣ်စရ့လးတအိၣ် ဘၣ်.ဖဲအကတီၢ်ဘၣ်န့ၣ်ပှၤကစံးလၢယၤကိာ်အဂ့ၢ်,ဒီးလၢအံၣ်စရ့လးအဂ့ၢ်န့ၣ်ယွၤမၤတၢ်အံၤမ့ၢ်ဒ်လဲၣ်.
24 ကွၢ်ကွၢ်, ပှၤဂီၢ်မုၢ်ကဂဲၤဆၢထၢၣ်ဒ်ခ့ယုၢ်မိၢ်အသိး, ဒီးဒ်ခ့ယုၢ်အဒူအသိးန့ၣ်ကပာ်ဂဲၤဆၢထၢၣ်အသးလီၤ.တချုးအအီၣ်ဒံးဘၣ်တၢ်ဂုာ်န့ၢ်,ဒီးတချုးအအီဒံးဘၣ်တၢ်ဘၣ်မၤသံအီၤအသွံၣ်န့ၣ်ဒီး,တမံလီၤဘၣ်လီၤ.
25 ဒီးစီၤဘၤလးစံးဘၣ်စီၤဘံးလၣ်, ဆိၣ်အၢအီၤဧီၢ်ဆိၣ် အၢအီၤတဂ့ၤ, ဆိၣ်ဂ့ၤအီၤဧီၢ်ဆိၣ်ဂ့ၤအီၤတဂ့ၤ.
26 ဒီးစီၤဘံးလၣ်စံးဆၢတၢ်, ဒီးစံးဘၣ်စီၤဘၤလး, တၢ် လၢယွၤကတိၤခဲလၢာ် ယဘၣ်မၤန့ၣ် ယစံးဘၣ်နၤ, တမ့ၢ်ဘၣ်ဧါ.
27 ဒီးစီၤဘၤလးစံးဘၣ်စီၤဘံးလၣ်, ဟဲလၢ်တက့ၢ်, ယ ကစိာ်န့ၢ်နၤဆူတၢ်အလီၢ်အဂၤတပူၤ, ဘၣ်တဘၣ်က လိၤလၢယွၤအမဲာ်ညါလၢ နကဆိၣ်အၢဘၣ်အီၤဖဲန့ၣ် လၢယဂီၢ်လီၤ.
28 ဒီးစီၤဘၤလးလဲၤစိာ်စီၤဘံးလၣ် ဆူပဧိၢ်အဖီခိၣ်လၢ အကွၢ်တၢ်ဆူယးၡံမိၣ်အမဲာ်ညါလီၤ.
29 ဒီးစီၤဘံးလၣ် စံးဘၣ်စီၤဘၤလး, မၤထီၣ်န့ၢ်ယၤလၢ တၢ်လုၢ်လီၢ်နွံ ဖျၢၣ်, ဒီးကတဲာ်ကတီၤန့ၢ်ယၤဖဲအံၤ ဂီၤဖံးဖါနွံဒု, ဒီး သိဖါနွံဒုန့ၣ်တက့ၢ်.
30 ဒီးစီၤဘၤလးမၤဝဲဒ်စီၤဘံးလၣ်စံးဝဲအသိးန့ၣ်, ဒီးလုၢ် ထီၣ်ဂီၤဖံးဖါတဒု, ဒီးသိဖါတဒု, လၢတၢ်လုၢ်လီၢ်တ ဖျၢၣ်အဖီခိၣ်လီၤ.