2
1 ဒီးစီၤဒၤဝံးအမုၢ်နံၤလၢအကသံန့ၣ် သုးဘူးအသး,ဒီး မၤလိာ်အဖိခွါစီၤၡလိၤမိၤ,ဒီးစံးဝဲဒၣ်,
2 ယပိာ်ပှၤဟီၣ် ခိၣ်ဖိခဲလၢာ်အကျဲလီၤ.ပာ်ဆူၣ်နသး, ဒီးပာ်ပိာ်ခွါနသး တက့ၢ်.
3 ဒီးကွၢ်ယွၤနကစၢ်အတၢ်ကွၢ်,ဒ်သိးနကပိာ်အ ကျဲတဖၣ်, ဒီးတိၢ်န့ၢ်အတၢ်မၤလိာ်,ဒီးအတၢ်သိၣ်တၢ် သီ,ဒီးအတၢ်စံၣ်ညီၣ်, ဒီးအတၢ်အုၣ်အသး,ဒ်တၢ်ကွဲး အသးလၢစီၤမိၤရှ့အတၢ်သိၣ်တၢ်သီအပူၤ, ဒ်သိးနက ဘီၣ်ထီၣ်ညီထီၣ်လၢကယဲၢ်တၢ်လၢနမၤအီၤ, ဒီးလၢက ယဲၢ်တၢ်လၢနဃၣ်နသးဆူအအိၣ်န့ၣ်တက့ၢ်.
4 ဒ်သိး ယွၤကဒုးအိၣ်ဂၢၢ်ဆိးကျၢၤအတၢ်ကတိၤလၢ အကတိၤ တၢ်လၢယဂ့ၢ်ယကျိၤ, ဒီးစံးဝဲဒၣ်,နဖိနလံၤမ့ၢ်တိၢ်န့ၢ်အ ကျဲဒ်သိးအကလဲၤတၢ်လၢ ယမဲာ်ညါလၢတၢ်မ့ၢ်တၢ်တီ, လၢအသးဒီးဖျၢၣ်ညါ,ဒီးလၢအသးတုၤအလၢာ်ဒီး, (စံး ဝဲဒၣ်,) ပှၤဘၣ်ဃးဒီးနၤလၢအံၣ်စရ့လးအလီၢ်ပစိာ်န့ၣ် တလီၤတူာ်ဘၣ်လီၤ.
5 ဒီးနီၢ်စရူယၤအဖိခွါစီၤယိၤအာ်မၤယၤဒ်လဲၣ်န့ၣ် နသ့ၣ် ညါစ့ၢ်ကီးလီၤ. မၤသံအံၣ်စရ့လးအပှၤသုးမုၢ်အခိၣ်ခံဂၤ, စီၤန့ၢ်အဖိခွါစီၤအဘံန့ၢ်, ဒီးစီၤဃ့သ့ၢ်အဖိခွါစီၤဧမါစၤ, ဒီးမၤသံဝဲ, ဒီးဂၢ်လီၤတၢ်ဒုးသုးအတၢ်သွံၣ်လၢတၢ်ဃူ တၢ်ဖိးအပူၤ, ဒီးပာ်တၢ်ဒုးသုးအတၢ်သွံၣ်လၢအယီၢ်တ ကိးအလိၤလၢအအိၣ်ဝဲလၢအယီၢ်ဒ့, ဒီးလၢအခီၣ်ဖံး ပူၤလၢအအိၣ်ဝဲလၢအခီၣ်န့ၣ်လီၤ.
6 ဒီးမၤတၢ်ဒ်နတၢ်ကူၣ်သ့အသိးန့ၣ်, ဒီးဒုးလဲၤလီၤအ ခိၣ်ဝါဆူပျုၤပူၤအိၣ်ဒီးတၢ်ဃူတၢ်ဖိးတဂ့ၤ.
7 ဒီးမၤဘျုးမၤဖှိၣ်ပှၤကံလဧးဖိ စီၤဘၢ်စံးလဲအဖိခွါတ ဖၣ်, ဒီးဒုးအိၣ်အီၤလၢပှၤလၢအအီၣ်တၢ်လၢနစီၢ်နီၤခိၣ် တဖၣ်အကျါန့ၣ်တက့ၢ်. အဂ့ၢ်ဒ်အံၤ,လၢယဃ့ၢ်လၢန ဒီပုၢ်ဝဲၢ်စီၤအးဘၡါလိၣ်အမဲာ်ညါန့ၣ် ဟဲဝဲဆူယအိၣ် ဒ်န့ၣ်လီၤ.
8 ဒီးကွၢ်ကွၢ်, ပှၤဘံၣ်ယၤမံၣ်ဖိစီၤက့ရၤအဖိခွါစီၤၡံမံၤ ဘၣ်ဃးဒီးဘၤဃူရံၣ်တဂၤလၢ အဆိၣ်အၢယၤလၢတၢ် ဆိၣ်အၢလၢမုၢ်တနံၤလၢ ယလဲၤဆူမၤဃန့ၤအပူၤန့ၣ် အိၣ်ဝဲဒီးနၤလီၤ. ဘၣ်ဆၣ်ဒီးဟဲလီၤသဂၢၢ်ယၤဖဲယၢ်ဒ့ၣ်, ဒီးယဆိၣ်တၢ်ဒီးအီၤလၢယွၤအမဲာ်ညါ, ဒီးစံး,ယတမၤ သံဘၣ်နၤလၢနးဘၣ်.
9 ဒီးခဲကနံၣ်အံၤပာ်အီၤလၢအ တၢ်ဒဲးဘးတအိၣ်ဘၣ်န့ၣ်တဂ့ၤ. အဂ့ၢ်ဒ်အံၤ,နကူၣ်တၢ် သ့နဲ, ဒီးနကမၤအီၤဒ်လဲၣ်ဒ်လဲၣ်န့ၣ်နသ့ၣ်ညါလီၤ.ဒုး လဲၤလီၤအခိၣ်ဝါဆူပျုၤပူၤလၢတၢ်သွံၣ်အပူၤန့ၣ်တက့ၢ်.
10 ဒီးစီၤဒၤဝံးမံဝဲဒီးအပၢ်တဖၣ်, ဒီးပှၤခူၣ်လီၤကွံာ်အီၤလၢ စီၤဒၤဝံးအဝ့ၢ်ပူၤန့ၣ်လီၤ.
11 ဒီးမုၢ်နံၤတဖၣ်လၢ စီၤဒၤဝံးကဲစီၤပၤလၢအံၣ်စရ့လးအ ဖီခိၣ်န့ၣ် မ့ၢ်အနံၣ်လွံၢ်ဆံလီၤ. ကဲစီၤပၤနွံနံၣ်လၢဃ့ ဘြိၣ်အပူၤ, ဒီးကဲစီၤပၤသၢဆံသၢနံၣ်လၢယရူၤၡလ့ၣ် အပူၤလီၤ.
12 ဒီးစီၤၡလိၤမိၤဆ့ၣ်နီၤဝဲလၢ အပၢ်စီၤဒၤဝံးအလီၢ်ပစိာ်, ဒီးအဘီအမုၢ်ဂၢၢ်ထီၣ်ကျၢၤထီၣ်ဒိၣ်မးလီၤ.
13 ဒီးနီၢ်ဃးကံၤအဖိခွါစီၤအဒိနံၤယၤ ဟဲဆူစီၤၡလိၤမိၤ အမိၢ်နီၢ်ဘၤသရှ့ၤဘၤအအိၣ်, ဒီးအဝဲဒၣ်စံးဘၣ်အီၤ,န ဟဲမုာ်မုာ်စ့ၢ်ကီးဧါ.ဒီးစံးဆၢဝဲဒၣ်,မုာ်မုာ်လီၤ.
14 ဒီးစံးဝဲ ဒၣ်, ယကတိၤတၢ်ဒီးနၤအလီၢ်အိၣ်, ဒီးစံးဝဲဒၣ်,ကတိၤ တၢ်တက့ၢ်,
15 ဒီးစံးဝဲဒၣ်,နသ့ၣ်ညါလၢဘီဧိၤမုၢ်ဧိၤမ့ၢ် ယတၢ်လီၤ. ဒီးအံၣ်စရ့လးခဲလၢာ်ပာ်အမဲာ်လၢယလိၤ ဒ်သိးယကကဲထီၣ်စီၤပၤလီၤ. ဒီးဘီဧိၤမုၢ်ဧိၤဃၣ်ကဒါ က့ၤအသး,ဒီးကဲထီၣ်ဝဲလၢယဒီပုၢ်ဝဲၢ်အတၢ်လီၤ. အဂ့ၢ် ဒ်အံၤ,ကဲထီၣ်အတၢ်လၢယွၤလီၤ.
16 ဒီးခဲကနံၣ်အံၤယ ကဃ့တၢ်တမံၤလၢနၤ, ဃၣ်ကွံာ်နမဲာ်တဂ့ၤ.ဒီးအဝဲဒၣ် စံးဘၣ်အီၤ, ကတိၤတၢ်တက့ၢ်.
17 ဒီးစံးဝဲဒၣ်, ကတိၤလၢ်ဒီးစီၤပၤၡလိၤမိၤ, (အဂ့ၢ်ဒ်အံၤ, တဃၣ်ကွံာ်အမဲာ်လၢနၤဘၣ်), ဒ်သိးအကဟ့ၣ်လီၤယၤ လၢပှၤရှူန့ၣ်ဖိနီၢ်အဘံၡးလၢယမါတက့ၢ်.
18 ဒီးနီၢ်ဘၤသရှ့ၤဘၤစံးဝဲဒၣ်, ဂ့ၤလံ,ယကကတိၤတၢ်ဒီး စီၤပၤလၢနဂီၢ်လီၤ.
19 ဒီးနီၢ်ဘၤသရှ့ၤဘၤလဲၤဆူစီၤပၤၡလိၤမိၤအအိၣ် ဒ်သိး အကကတိၤတၢ်လၢ စီၤအဒိနံၤယၤအဂီၢ်, ဒီးစီၤပၤဂဲၤ ဆၢထၢၣ်သဂၢၢ်အီၤ,ဒီးဆုးလီၤအခိၣ်, ဒီးဆ့ၣ်နီၤလၢအ လီၢ်ပစိာ်,ဒီးဒုးပာ်လီၤပှၤလၢလီၢ်ပစိာ်လၢစီၤပၤအမိၢ်အ ဂီၢ်, ဒီးအဝဲဒၣ်ဆ့ၣ်နီၤလၢအစုထွဲလီၤ.
20 ဒီးစံးဝဲဒၣ်, ယဃ့တၢ်ဃ့အဆံးတမံၤလၢနၤ,ဃၣ်ကွံာ် နမဲာ်တဂ့ၤ. ဒီးစီၤပၤစံးဝဲဒၣ်,ဃ့တက့ၢ်,ယမိၢ်ဧၢ,အဂ့ၢ် ဒ်အံၤ,ယတဃၣ်ကွံာ်ယမဲာ်ဘၣ်.
21 ဒီးစံးဝဲဒၣ်, ဟ့ၣ်လီၤပှၤရှူန့ၣ်ဖိနီၢ်အဘံၡးလၢနဒီပုၢ်ဝဲၢ် စီၤအဒိနံၤယၤလၢအမါတက့ၢ်.
22 ဒီးစီၤပၤၡလိၤမိၤစံးဆၢတၢ်, ဒီးစံးဘၣ်အမိၢ်,ဒီးနဃ့ ပှၤရှူန့ၣ်ဖိနီၢ်အဘံၡးလၢစီၤအဒိနံၤယၤအဂီၢ် မ့ၢ်အဘၣ် မနုၤလဲၣ်.ဃ့စ့ၢ်ကီးဘီဧိၤမုၢ်ဧိၤလၢအဂီၢ်တက့ၢ်. အဂ့ၢ် ဒ်အံၤ,အဝဲဒၣ်န့ၣ်မ့ၢ်ယဝဲၢ်လီၤ. ဒီးဃ့လၢအဂီၢ်,ဒီးလၢ ပှၤလုၢ်တၢ်အဒိၣ် စီၤအ့ဘယၤသၢ်အဂီၢ်, ဒီးလၢနီၢ်စရူ ယၤအဖိခွါစီၤယိၤအာ်အဂီၢ်န့ၣ်တက့ၢ်.
23 ဒီးစီၤၡလိၤမိၤဆိၣ်တၢ်လၢယွၤအမဲာ်ညါ, ဒီးစံးဝဲဒၣ်, တၢ်ကတိၤတထံၣ်အံၤ, စီၤအဒိနံၤယၤမ့ၢ်တကတိၤဘၣ် ထီဒါအသးသမူဒၣ်ဝဲဘၣ်ဒီး, မ်ယွၤမၤယၤဒ်န့ၣ်ဒီးအါ န့ၢ်အန့ၣ်တက့ၢ်.
24 ဒီးခဲကနံၣ်အံၤယွၤမူဝဲလၢအဒုးအိၣ်ဂၢၢ်ဆိးကျၢၤယၤ, ဒီးပာ်ထီၣ်ထီယၤလၢယပၢ်စီၤဒၤဝံးအလီၢ်ပစိာ်အဖီခိၣ်, ဒီးမၤယၤလၢဟံၣ်တဖျၢၣ်ဒ်အစံးပာ်အသိးန့ၣ်, စီၤအဒိနံၤယၤကဘၣ်တၢ်မၤသံအီၤလၢ မုၢ်မဆါတနံၤအံၤလီၤ.
25 ဒီးစီၤပၤၡလိၤမိၤမၢလီၤစီၤယဟိၤယဒါအဖိခွါ စီၤဘနါယၤ, ဒီးအဝဲဒၣ်ကျီကွံာ်အီၤ,ဒီးသံဝဲလီၤ.
26 ဒီးစီၤပၤစံးဘၣ်ပှၤလုၢ်တၢ်အဒိၣ် စီၤအ့ဘယၤသၢ်,ဟး ထီၣ်ကွံာ်ဆူဧၤနသိး, ဆူနဟီၣ်ခိၣ်အကဝီၤဒၣ်နဲတက့ၢ်. အဂ့ၢ်ဒ်အံၤ, နမ့ၢ်တၢ်သံအပှၤကညီဘၣ်ဆၣ်ဒီး,ယတ ဒုးမၤသံဘၣ်နၤလၢမုၢ်မဆါတနံၤအံၤဘၣ်. အဂ့ၢ်ဒ်အံၤ, နစိာ်ကစၢ်ယွအတလါ လၢယပၢ်စီၤဒၤဝံးအမဲာ်ညါ လီၤ.ဒီးအဂ့ၢ်ဒ်အံၤ, နဘၣ်တၢ်နးတၢ်ဖှီၣ်လၢကယဲၢ်တၢ် နးတၢ်ဖှီၣ်အပူၤလၢအဘၣ်ယပၢ်လီၤ.
27 ဒီးစီၤၡလိၤမိၤဟီထီၣ်ကွံာ်စီၤအ့ဘယၤသၢ်လၢ ပှၤလုၢ် တၢ်အဒိၣ်အလီၢ်လၢယွၤအမဲာ်ညါ, ဒ်သိးအကမၤလၢ ထီၣ်ပှဲၤထီၣ်ယွၤအကလုၢ်ကထါ လၢအကတိၤတၢ်လၢ စီၤဧ့လံၤအပှၤဟံၣ်ဖိအဂ့ၢ်အကျိၤလၢၡံလိၤအပူၤလီၤ.
28 ဒီးတၢ်အကစီၣ်န့ၣ်ဟူဝဲဆူ စီၤယိၤအာ်အအိၣ်လီၤ.အ ဂ့ၢ်ဒ်အံၤ,စီၤယိၤအာ်တဃၣ်ဘၣ်အသးဆူ စီၤအးဘၡါ လိၣ်အလီၢ်ခံဘၣ်ဆၣ်ဒီး, ဃၣ်အသးဆူစီၤအဒိနံၤယၤ အလီၢ်ခံန့ၣ်လီၤ. ဒီးစီၤယိၤအာ်ဃ့ၢ်ဝဲဆူယွၤအဒဲပူၤ,ဒီး ဟံးဃာ်တၢ်လုၢ်လီၢ်အနၢၤတဖၣ်လီၤ.
29 ဒီးပှၤစံးဘၣ်စီၤပၤၡလိၤမိၤ လၢစီၤယိၤအာ်ဃ့ၢ်လံဆူ ယွၤအဒဲပူၤ, ဒီးကွၢ်ကွၢ်,အိၣ်ဝဲလၢတၢ်လုၢ်လီၢ်အဃၢၤ လီၤ. ဒီးစီၤၡလိၤမိၤမၢလီၤစီၤယဟိၤယဒါအဖိခွါစီၤဘ နါယၤ, ဒီးစံးဝဲဒၣ်, လဲၤကျီကွံာ်အီၤတက့ၢ်.
30 ဒီးစီၤဘနါယၤဟဲဆူယွၤအဒဲပူၤ, ဒီးစံးဘၣ်အီၤ,စီၤပၤ စံးတၢ်ဒ်အံၤ, ဟဲထီၣ်တက့ၢ်.ဒီးစံးဝဲဒၣ်,ယတဟဲဘၣ်. ယကသံဖဲအံၤလီၤ. ဒီးစီၤဘနါယၤစိာ်တၢ်ကတိၤန့ၣ် ဆူစီၤပၤအအိၣ်,ဒီးစံးဝဲဒၣ်, စီၤယိၤအာ်စံးဝဲဒ်အံၤ,ဒီးစံး ဆၢယၤဒ်အံၤလီၤ.
31 ဒီးစီၤပၤစံးဘၣ်အီၤ, မၤအီၤဒ်အစံးဝဲအသိးန့ၣ်,ကျီကွံာ် အီၤ, ဒီးခူၣ်လီၤကွံာ်အီၤ,ဒ်သိးနကသုးကွံာ်တၢ်သွံၣ်လၢ အတၢ်ဒဲးဘးတအိၣ်ဘၣ်လၢစီၤယိၤအာ် ဒုးလူလီၤဝဲ န့ၣ်လၢယၤ,ဒီးလၢယပၢ်အပှၤဟံၣ်ဖိန့ၣ်တက့ၢ်.
32 ဒီး ယွၤကဒုးဟဲက့ၤအသွံၣ်လၢအခိၣ်ဒၣ်ဝဲ, ပှၤလၢအကျီ ကွံာ်ပှၤခံဂၤလၢအတီန့ၢ်ဒီးဂ့ၤန့ၢ်အကစၢ်ဒၣ်ဝဲ, ဒီးမၤသံ အီၤလၢနး, (ယပၢ်စီၤဒၤဝံးတသ့ၣ်ညါဘၣ်), အံၣ်စရ့ လးအပှၤသုးမုၢ်အခိၣ်စီၤန့ၢ်အဖိခွါစီၤအဘံန့ၢ်, ဒီးယူ ဒၤအပှၤသုးမုၢ်အခိၣ်စီၤယ့သၢ်အဖိခွါ စီၤဧမါစၤလီၤ.-
33 အသွံၣ်ကဟဲက့ၤဘၣ်စီၤယိၤအာ်အခိၣ် ဒီးအချံအသၣ် အခိၣ်လီၤထူလီၤယိာ်လီၤ. မ့မ့ၢ်လၢစီၤဒၤဝံးအလိၤ,ဒီး လၢအချံအသၣ်အလိၤ, ဒီးလၢအပှၤဟံၣ်ဖိအလိၤ,ဒီး လၢအလီၢ်ပစိာ်အဖီခိၣ်န့ၣ် တၢ်ဃူတၢ်ဖိးကအိၣ်အစိၤ စိၤအဃၣ်ဃၣ်လၢယွၤလီၤ
34 ဒီးစီၤယဟိၤယဒါအဖိခွါ စီၤဘနါယၤလဲၤထီၣ်,ဒီးကျီ ကွံာ်အီၤ,ဒီးမၤသံအီၤ, ဒီးပှၤခူၣ်လီၤကွံာ်အီၤလၢအဟံၣ် ဒၣ်ဝဲလၢပှၢ်လၢ်ကျါန့ၣ်လီၤ.
35 ဒီးစီၤပၤပာ်ထီၣ်စီၤယဟိၤယဒါအဖိခွါ စီၤဘနါယၤ လၢအလီၢ်လၢပှၤသုးမုၢ်အဖီခိၣ်, ဒီးစီၤပၤပာ်ပှၤလုၢ်တၢ် အဒိၣ်စီၤစၤဒိးလၢစီၤအ့ဘယၤသၢ်အလီၢ်န့ၣ်လီၤ.
36 ဒီးစီၤပၤမၢလီၤတၢ် ဒီးကိးန့ၢ်စီၤၡံမံၤ, ဒီးစံးဘၣ်အီၤ, သူၣ်နဟံၣ်လၢယရူၤၡလ့ၣ်အပူၤ, ဒီးအိၣ်ဖဲန့ၣ်တက့ၢ်, ဒီးဟးထီၣ်ဖဲန့ၣ်နီတပူၤတဂ့ၤ.
37 ဒီးမုၢ်တနံၤလၢနဟး ထီၣ်, ဒီးခီဂာ်ထံကျိကံၤဒြိၣ်ဒီး, တၢ်ကမၤအသးလၢ နကသ့ၣ်ညါသပှၢ်တၢၢ်လၢနဘၣ်သံနီၢ်နီၢ်လီၤ. နသွံၣ် ကအိၣ်လၢနခိၣ်ဒၣ်နဲလီၤ.
38 ဒီးစီၤၡံမံၤစံးဆၢစီၤပၤ, တၢ်ကတိၤန့ၣ်ဂ့ၤလံ.ဒ်ယက စၢ်စီၤပၤစံးဝဲအသိးန့ၣ်နခ့နပှၤကမၤဒ်န့ၣ်သိးလီၤ. ဒီးစီၤ ၡံမံၤအိၣ်ဝဲလၢယရူၡလ့ၣ်အပူၤအါနံၤအါသီလီၤ.
39 ဒီးသၢနံၣ်အကတၢၢ်န့ၣ် တၢ်မၤအသးလၢစီၤၡံမံၤအ ကုၢ်ခံဂၤဃ့ၢ်ထီၣ်ကွံာ်ဆူကၤသးအစီၤပၤ စီၤမၤကၤအ ဖိခွါစီၤအၤကံၣ်အအိၣ်, ဒီးပှၤဒုးနဲၣ်စီၤၡံမံၤ,ဒီးစံးဝဲဒၣ်, ကွၢ်ကွၢ်, နကုၢ်နပှၤန့ၣ်အိၣ်ဝဲလၢကၤသးအပူၤလီၤ.
40 ဒီးစီၤၡံမံၤဂဲၤဆၢထၢၣ်, ဒီးဂီၤကၢ်ကသ့ၣ်ယီၤဒီးလဲၤဝဲ ဆူကၤသး,ဆူစီၤအၤကံၣ်အအိၣ်, ဒ်သိးအကဃုန့ၢ်အ ကုၢ်အပှၤလီၤ. ဒီးစီၤၡံမံၤလဲၤတၢ်, ဒီးဟဲစိာ်အကုၢ်အ ပှၤလၢကၤသးအပူၤလီၤ.
41 ဒီးပှၤစံးဘၣ်စီၤၡလိၤမိၤလၢ စီၤၡံမံၤလဲၤထီၣ်လၢယ ရူၡလ့ၣ်ဆူကၤသး,ဒီးဟဲက့ၤကဒါက့ၤဝဲလီၤ.
42 ဒီးစီၤပၤမၢလီၤတၢ်, ဒီးကိးန့ၢ်စီၤၡံမံၤ, ဒီးစံးဘၣ်အီၤ,ယဒုးဆိၣ်နၤလၢယွၤအမဲာ်ညါ, ဒီးယအုၣ်ယသးဒီးနၤ,ဒီးစံး, မုၢ်တနံၤလၢနဟးထီၣ်ကွံာ်,ဒီးလဲၤတၢ်ဖဲအံၤဖဲနုၤန့ၣ်နကသ့ၣ်ညါသပှၢ်တၢၢ်လၢနသံနီၢ်နီၢ်, တမ့ၢ်ဘၣ်ဧါ.ဒီးနစံးဆၢယၤ, တၢ်ကတိၤလၢယနၢ်ဟူန့ၣ်ဂ့ၤလံ.-
43 ဒီးနတတိၢ်န့ၢ်ဘၣ်တၢ်ဆိၣ်ဘၣ်ဃးဒီးယွၤ, ဒီးတၢ်မၤ လိာ်လၢယမၤလိာ်နၤန့ၣ်မ့ၢ်အဘၣ်မနုၤလဲၣ်.
44 ဒီးစီၤပၤစံးဘၣ်စီၤၡံမံၤ, နသ့ၣ်ညါလၢနသးကံၢ်ပူၤက ယဲၢ်တၢ်အၢလၢနမၤယပၢ်စီၤဒၤဝံး, ဒီးယွၤအကဒုးဟဲ က့ၤကဒါက့ၤနတၢ်အၢလၢနခိၣ်ဒၣ်နဲန့ၣ်လီၤ.
45 ဒီးစီၤ ပၤၡလိၤမိၤကဘၣ်တၢ်ဆိၣ်ဂ့ၤအီၤ, ဒီးစီၤဒၤဝံးအလီၢ် ပစိာ်ကအိၣ်ဂၢၢ်ဆိးကျၢၤ လၢယွၤအမဲာ်ညါလီၤစိၤလီၤ ထီလီၤ.
46 ဒီးစီၤပၤမၤလိာ် စီၤယဟိယဒါအဖိခွါစီၤဘနါယၤ,ဒီး အဝဲဒၣ်ဟးထီၣ်, ဒီကျီကွံာ်အီၤ,ဒီးသံဝဲလီၤ. ဒီးဘီဧိၤ မုၢ်ဧိၤဂၢၢ်ဝဲကျၢၤဝဲလၢစီၤၡလိၤမိၤအစုပူၤလီၤ.