8
1 ဒီးမုၢ်ဆ့ၣ်ထီၣ်န့ၣ်, ဟဲကဒီးဆူတၢ်လုၢ်အဟံၣ်ပူၤ,-
2 ဒီးပှၤဂီၢ်မုၢ်ခဲလၢာ်ဟဲဆူအအိၣ်, ဒီးဆ့ၣ်နီၤဝဲဒီးသိၣ်က့ၤ သီက့ၤအီၤလီၤ.
3 ဒီးပှၤကွဲးလံာ်ဒီးပှၤဖၤရံၤၡဲသ့ၣ်တဖၣ်, ဟဲဆှၢပိာ်မုၣ်လၢပှၤဖီၣ်န့ၢ်ဝဲ လၢအအဲၣ်ဘၢတၢ်အဖၢမုၢ်, ဒီးပာ်လီၤအီၤလၢတၢ်အသးကံၢ်ပူၤ,
4 ဒီးစံးဝဲဒၣ်, သရၣ် ဧၢ, ပိာ်မုၣ်တဂၤအံၤပှၤဖီၣ်န့ၢ်အီၤ ဖဲအအဲၣ်ဘၢတၢ်အဖၢ မုၢ်ဒၣ်လဲာ်လီၤ.
5 ဒီးစီၤမိၤရှ့မၤလိာ်ဝဲလၢတၢ်သိၣ်တၢ်သီ အပူၤ, ပှၤဒ်န့ၣ်တဖၣ်ကဘၣ်တၢ်ကွံာ်အီၤလၢလၢၢ်လီၤ. မၤသးဒ်န့ၣ်ဒီးမ့ၢ်နကစံးနဲဒ်လဲၣ်.
6 ဘၣ်ဆၣ်ဒီးစံးတၢ် န့ၣ်မ့ၢ်အလ့ပစီအီၤ, ဒ်သိးအပာ်တၢ်ကမၣ်လၢအလိၤအ လီၢ်ကအိၣ်လီၤ.
7 ဒီးယ့ၣ်ရှူးသကူးလီၤအသးဒီးကွဲးလီၤ ဟီၣ်ခိၣ်လၢအစုမုၢ်စုနၢလီၤ. ဒီးပှၤသံကွၢ်ဒံးတၢ်လၢအီၤ ဒီးအဝဲဒၣ်စူၣ်ထီၣ်အသး ဒီးစံးဘၣ်အီၤ, ပှၤလၢသုကျါ လၢအတၢ်ဒဲးဘးတအိၣ်ဘၣ်တဂၤန့ၣ်, ကကွံာ်ဆိအီၤ လၢလၢၢ်တဖျၢၣ်တက့ၢ်.
8 ဒီးသကူးလီၤကဒီးအသး, ဒီး ကွဲးလီၤက့ၤဟီၣ်ခိၣ်လီၤ.
9 ဒီးပှၤလၢအနၢ်ဟူတၢ်တဖၣ် န့ၣ်, အသးလၢအသ့ၣ်ညါဒၣ်တၢ်သိၣ်ဃီၣ်အီၤ, ဒီးလၢ အသးပှၢ်ကတၢၢ်တုၤလီၤလၢအသးစၢ်ကတၢၢ်တဂၤန့ၣ်, ဟးထီၣ်ကွံာ်ဝဲတဂၤဘၣ်တဂၤ, တဂၤဘၣ်တဂၤလီၤ. ဒီး ယ့ၣ်ရှူးအိၣ်လီၤတဲာ်ဝဲတဂၤဃီ, ဒီးပိာ်မုၣ်အိၣ်ဆၢထၢၣ် ဝဲလၢတၢ်သးကံၢ်ပူၤလီၤ.
10 ဒီးယ့ၣ်ရှူးစူၣ်ထီၣ်အသး, ဒီး တထံၣ်ဘၣ်ပှၤနီတဂၤဘၣ်. ထံၣ်ထဲပိာ်မုၣ်တဂၤန့ၣ်ဒီး စံးဘၣ်အီၤ, နီၢ်ဧၢ, ပှၤလၢအပာ်တၢ်ကမၣ်လၢနလိၤတ ဖၣ်န့ၣ်, အိၣ်ဖဲလဲၣ်. မ့ၢ်အတစံၣ်ညီၣ်ဃၣ်ဘၣ်နၤနီတ ဂၤဘၣ်ဧါ.
11 ဒီးစံးဝဲဒၣ်, နီတဂၤဘၣ်, ကစၢ်ဧၢ. ဒီးယ့ၣ် ရှူးစံးဘၣ်အီၤ, ယဲဒၣ်အံၤ, ယတစံၣ်ညီၣ်ဃၣ်စ့ၢ်ကီးဘၣ် နၤဘၣ်. က့ၤက့ၤ, ဒီးမၤလၢၤတၢ်ဒဲးဘးတဂ့ၤ.
12 မၤသးဒ်န့ၣ်ဒီးယ့ၣ်ရှူးစံးဘၣ်ကဒီးပှၤတဖၣ်, ဒီးစံးဝဲ ဒၣ်, ယဲဒၣ်အံၤ, ယမ့ၢ်ဟီၣ်ခိၣ်အကပီၤလီၤ. ပှၤလၢအ ပိာ်ယခံတဖၣ်န့ၣ်, တဟးဘၣ်ဝဲလၢတၢ်ခံးကျါဘၣ်, ဒီး ကန့ၢ်ဘၣ်တၢ်မူအတၢ်ကပီၤလီၤ.
13 မၤသးဒ်န့ၣ်ဒီးပှၤဖၤ ရံၤၡဲသ့ၣ်တဖၣ်စံးဘၣ်အီၤ, နအုၣ်နသးလၢနကစၢ်ဒၣ်နဲ အဂ့ၢ်လီၤ. နတၢ်အုၣ်နသးန့ၣ်တတီဘၣ်.
14 ဒီးယ့ၣ်ရှူး ကတိၤဆၢတၢ်ဒီးစံးဘၣ်အီၤ, ယအုၣ်ယသးလၢယဂ့ၢ်ဒၣ် ယဲဘၣ်ဆၣ်ဒီး,ယတၢ်အုၣ်ယသးန့ၣ်မ့ၢ်အမ့ၢ်အတီလီၤ. အဂ့ၢ်ဒ်အံၤ, မ့ၢ်ယဟဲလၢလဲၣ်လၢလဲၣ်, မ့ၢ်ယကက့ၤဆူ လဲၣ်ဆူလဲၣ်န့ၣ်, ယသ့ၣ်ညါလီၤ. မ့မ့ၢ်သုဝဲသ့ၣ်အံၤ, မ့ၢ် ယဟဲလၢလဲၣ်လၢလဲၣ်, မ့ၢ်ယကက့ၤဆူလဲၣ်ဆူလဲၣ်န့ၣ်, သုတသ့ၣ်ညါဘၣ်သုဝဲဘၣ်.
15 သုဝဲသ့ၣ်အံၤ, သုစံၣ်ညီၣ် တၢ်ဒ်တၢ်ညၣ်အသိးလီၤ. ယဲဒၣ်အံၤ, ယတစံၣ်ညီၣ်ဘၣ် ပှၤနီတဂၤဘၣ်.
16 ဒီးယမ့ၢ်စံၣ်ညီၣ်တၢ်ဒီး, ယတၢ်စံၣ်ညီၣ် န့ၣ်မ့ၢ်အတီလီၤ. အဂ့ၢ်ဒ်အံၤ, ယအိၣ်တဂၤဧိၤတမ့ၢ်ဘၣ်, ယအိၣ်ဒီးပၢ်လၢအမၢလီၤယၤလီၤ.
17 ဒီးတၢ်ကွဲးအသး လၢသုတၢ်သိၣ်တၢ်သီအပူၤ, လၢပှၤခံဂၤအတၢ်အုၣ်အ သးန့ၣ်မ့ၢ်အတီလီၤ.Ref 8.17 ၅မိၤ. ၁၉း၁၅.
18 ယဲဒၣ်အံၤ, ယအုၣ်ယသးလၢယဂ့ၢ်, ဒီးပၢ်လၢအမၢလီၤယၤန့ၣ်အုၣ် အသးလၢယဂ့ၢ်လီၤ.
19 မၤသးဒ်န့ၣ်ဒီး အဝဲသ့ၣ်စံးဘၣ် အီၤ, နပၢ်အိၣ်ဖဲလဲၣ်. ယ့ၣ်ရှူးကတိၤဆၢဝဲဒၣ်, ယၤမ့ၢ်ဂ့ၤ, ယပၢ်မ့ၢ်ဂ့ၤ, သုတသ့ၣ်ညါဘၣ်သုဝဲဘၣ်. သုမ့ၢ်သ့ၣ် ညါယၤဒီး, သုကသ့ၣ်ညါယပၢ်စ့ၢ်ကီးလီၤ.
20 ယ့ၣ်ရှူးသိၣ်က့ၤသီက့ၤတၢ်လၢ တၢ်လုၢ်အဟံၣ်ပူၤအ ဖၢမုၢ်ဒီး, အိၣ်လၢစ့ပာ်ဖှိၣ်အလီၢ်, ဒီးစံးဘၣ်တၢ်တဖၣ် န့ၣ်လီၤ. ဒီးပှၤတပာ်ဘၣ်အစုလၢအလိၤ နီတဂၤဘၣ်. အဂ့ၢ်ဒ်အံၤ, အဆၢအကတီၢ်တဘၣ်ဒံးဘၣ်လီၤ.
21 မၤသးဒ်န့ၣ်ဒီးယ့ၣ်ရှူးစံးဘၣ်ကဒီးပှၤတဖၣ်, ယလဲၤတၢ်, ဒီးသုကဃုယၤ, ဒီးသုကသံလၢသုတၢ်ဒဲးဘးအပူၤ, ဒီးဖဲယလဲၤတၢ်အလီၢ်န့ၣ်, သုလဲၤတသ့ဘၣ်လီၤ.-
22 မၤသးဒ်န့ၣ်ဒီးပှၤယူဒၤဖိတဖၣ်စံးဝဲဒၣ်, အဝဲန့ၣ်စံးဝဲ, ဖဲ ယလဲၤတၢ်အလီၢ်န့ၣ်သုလဲၤတသ့ဘၣ်ဒီး, မ့ၢ်အကမၤသံ လီၤအသးန့ၣ်ဧါ.
23 ဒီးစံးဘၣ်အီၤ, သုဝဲသ့ၣ်အံၤ, သုဘၣ် ဃးဒီးတၢ်လၢလာ်ခီ, မ့မ့ၢ်ယဲဒၣ်အံၤ, ယဘၣ်ဃးဒီးတၢ် လၢထးခီလီၤ. သုဝဲသ့ၣ်အံၤ, သုဘၣ်ဃးဒီးဟီၣ်ခိၣ်, မ့ မ့ၢ်ယဲဒၣ်အံၤ, ယတဘၣ်ဃးဘၣ်ဒီးဟီၣ်ခိၣ်ဘၣ်.
24 မၤ သးဒ်န့ၣ်ဒီး, ယစံးတ့ၢ်သုလၢသုကသံလၢသုတၢ်ဒဲးဘး အပူၤလီၤ. အဂ့ၢ်ဒ်အံၤ, သုမ့ၢ်တနာ်ဘၣ်လၢယမ့ၢ်တၢ် န့ၣ်ဒီး, သုကသံလၢသုတၢ်ဒဲးဘးအပူၤလီၤ.
25 မၤသးဒ် န့ၣ်ဒီး အဝဲသ့ၣ်တဖၣ်စံးဘၣ်အီၤ, နဲဒၣ်အံၤနမ့ၢ်မတၤ လဲၣ်. ဒီးယ့ၣ်ရှူးစံးဘၣ်အီၤ, ယမ့ၢ်ဒ်ယစံးဘၣ်တဲဘၣ် သုလၢသီလံၤလံၤအသိးန့ၣ်လီၤ.
26 ယကတိၤတၢ်ဒီးယ စံၣ်ညီၣ်တၢ်လၢသုဂ့ၢ်သုကျိၤအလီၢ်အိၣ်အါမံၤလီၤ. မ့မ့ၢ် ပှၤလၢအမၢလီၤယၤတဂၤန့ၣ်, မ့ၢ်အတီအလိၤ, ဒီးတၢ် လၢယနၢ်ဟူလၢအီၤန့ၣ်, ယစံးဘၣ်ပှၤဟီၣ်ခိၣ်ဖိလီၤ.-
27 ဒီးအဝဲသ့ၣ်တသ့ၣ်ညါဘၣ်လၢ အကတိၤတၢ်လၢပၢ်အ ဂ့ၢ်အကျိၤန့ၣ်ဘၣ်.
28 မၤသးဒ်န့ၣ်ဒီးယ့ၣ်ရှူးစံးဘၣ်အီၤ, တုၤသုယူာ်ထီၣ်ပှၤ ကညီဖိခွါအံၤဒီး, သုကသ့ၣ်ညါလၢယမ့ၢ်တၢ်န့ၣ်, ဒီး လၢယတမၤဒၣ်ယတၢ်နီတမံၤဘၣ်. မ့ၢ်ဒ်ယပၢ်သိၣ်လိ ယၤအသိးယကတိၤတၢ်,
29 ဒီးပှၤလၢအမၢလီၤယၤတဂၤ န့ၣ်အိၣ်ဒီးယၤလီၤ. တဟးသဒၣ်ဘၣ်ယၤဘၣ်. အဂ့ၢ်ဒ် အံၤ, တၢ်လၢအဘၣ်အသးတဖၣ်န့ၣ်, ယမၤတထံၣ်ဃီ လီၤ.
30 စံးဘၣ်တဲဘၣ်တၢ်တဖၣ်န့ၣ်အဖၢမုၢ်ဒီး, ပှၤစူၢ် က့ၤနာ်က့ၤအီၤအါဂၤလီၤ.
31 မၤသးဒ်န့ၣ်ဒီးယ့ၣ်ရှူးစံးဘၣ် ပှၤယူဒၤဖိလၢအစူၢ်က့ၤ နာ်က့ၤအီၤတဖၣ်န့ၣ်, သုမ့ၢ်အိၣ်မ့ၢ်ဆိးလၢယကလုၢ်က ထါအပူၤဒီး, သုမ့ၢ်ယပျဲၢ်ယဘီၣ်အနီၢ်အသံးလီၤ.
32 ဒီး သုကသ့ၣ်ညါတၢ်မ့ၢ်တၢ်တီ, ဒီးတၢ်မ့ၢ်တၢ်တီန့ၣ်ကမၤ ထူၣ်ဖျဲးသုလီၤ.
33 ဒီးအဝဲသ့ၣ်စံးဆၢအီၤ, ပဝဲဒၣ်အံၤ, ပ မ့ၢ်စီၤအၤဘြၤဟၣ်အချံအသၣ်, ဒီးပတကဲကုၢ်လၢပှၤတ ဂၤဂၤအစုပူၤနီတခီၣ်ဘၣ်. နစံးလၢတၢ်ကမၤထူၣ်ဖျဲးသု န့ၣ်မ့ၢ်ဒ်လဲၣ်.
34 ဒီးယ့ၣ်ရှူးကတိၤဆၢအီၤ, ယစံးဘၣ်သု တီတီလိၤလိၤလၢကယဲၢ်ပှၤလၢအမၤတၢ်ဒဲးဘးန့ၣ်, မ့ၢ် တၢ်ဒဲးဘးအကုၢ်လီၤ.
35 ဒီးကုၢ်န့ၣ်တအိၣ်ဘၣ်လၢဟံၣ် ပူၤတဘိယူၢ်ဃီဘၣ်. မ့မ့ၢ်ဖိခွါန့ၣ်အိၣ်ဝဲတဘိယူၢ်ဃီ လီၤ.
36 မၤသးဒ်န့ၣ်ဒီး, ဖိခွါမ့ၢ်မၤထူၣ်ဖျဲးသုဒီး, သုကထူၣ် ဖျဲးနီၢ်နီၢ်လီၤ.
37 ယသ့ၣ်ညါလၢသုမ့ၢ်စီၤအၤဘြၤဟၣ်အချံ အသၣ်လီၤ.ဘၣ်ဆၣ်ဒီးသုဃုမၤသံယၤလီၤ. အဂ့ၢ်ဒ်အံၤ, ယကလုၢ်ယကထါ တအိၣ်တဆိးဘၣ်လၢသုပူၤဘၣ်.-
38 တၢ်လၢယထံၣ်လၢယပၢ်အအိၣ်န့ၣ် ယကတိၤယဲ, ဒီး တၢ်လၢသုထံၣ်လၢသုပၢ်အအိၣ်န့ၣ်, သုမၤသုဝဲလီၤ.
39 ဒီးအဝဲသ့ၣ်စံးဆၢတၢ်ဒီးစံးဘၣ်အီၤ, စီၤအၤဘြၤဟၣ် မ့ၢ်ပပၢ်လီၤ. ဒီးယ့ၣ်ရှူးစံးဘၣ်အီၤ, သုမ့မ့ၢ်စီၤအၤဘြၤ ဟၣ်အဖိဒီး, သုကမၤစီၤအၤဘြၤဟၣ်အတၢ်မၤလီၤ.
40 ဒီး ခဲကနံၣ်အံၤ, သုဃုမၤသံယၤ, ပှၤလၢအစံးဘၣ်တဲဘၣ် သုလၢတၢ်မ့ၢ်တၢ်တီ လၢယနၢ်ဟူလၢယွၤန့ၣ်လီၤ. စီၤ အၤဘြၤဟၣ်တမၤဘၣ်ဒ်န့ၣ်ဘၣ်.
41 သုဝဲသ့ၣ်အံၤ, သုမၤ သုပၢ်အတၢ်မၤလီၤ. မၤသးဒ်န့ၣ်ဒီး, အဝဲသ့ၣ်စံးဘၣ်အီၤ, ပဝဲဒၣ်အံၤပတအိၣ်ဖျဲၣ်ဘၣ်လၢပှၤမၤကမၣ်မုၣ်ကမၣ်ခွါ ဘၣ်,ပအိၣ်ဒီးပပၢ်ယွၤတဂၤဃီန့ၣ်လီၤ.
42 မၤသးဒ်န့ၣ်ဒီး ယ့ၣ်ရှူးစံးဘၣ်အီၤ, ယွၤမ့မ့ၢ်သုပၢ်ဒီး, သုကအဲၣ်ယၤလီၤ. အဂ့ၢ်ဒ်အံၤ, ယဟးထီၣ်လၢယွၤအအိၣ်, ဒီးယဟဲလီၤယဲ လီၤ. အဂ့ၢ်ဒ်အံၤ, တမ့ၢ်ဘၣ်ယဟဲဒၣ်ယဲဘၣ်, မ့ၢ်အမၢ လီၤယၤလီၤ.
43 ဘၣ်မနုၤလၢသုနၢ်တပၢၢ်ဘၣ်ယတၢ်က တိၤလဲၣ်. မ့ၢ်သုဒိကနၣ်ယကလုၢ်ကထါတသ့ဘၣ်အဂ့ၢ် လီၤ.
44 သုဝဲသ့ၣ်အံၤ, သုဘၣ်ဃးဒီးသုပၢ်မုၣ်ကီၤလံၢ်, ဒီး ဖဲဒၣ်သုပၢ်အသးန့ၣ်, တၢ်မိၣ်မၤသုသးလီၤ. အဝဲန့ၣ်လၢ သီလံၤလံၤ, မ့ၢ်ပှၤလၢအမၤသံပှၤကညီ, ဒီးတဆၢထၢၣ် ဘၣ်လၢတၢ်မ့ၢ်တၢ်တီအပူၤဘၣ်. အဂ့ၢ်ဒ်အံၤ, တၢ်မ့ၢ်တၢ် တီတအိၣ်ဘၣ်လၢအပူၤဘၣ်. တုၤအကတိၤတၢ်ကဘျံး ကဘျၣ်ဒီး, မ့ၢ်အကတိၤတၢ်လၢအတၢ်ဒၣ်ဝဲလီၤ. အဂ့ၢ် ဒ်အံၤ, မ့ၢ်ပှၤလၢအကတိၤတၢ်ကဘျံးကဘျၣ်, ဒီးမ့ၢ်တၢ် ကတိၤကဘျံးကဘျၣ်အပၢ်လီၤ.
45 ဒီးယဲဒၣ်အံၤ, ယက တိၤတၢ်မ့ၢ်တၢ်တီအဃိဒီး, သုတနာ်ဘၣ်ယၤဘၣ်.
46 မ့ၢ်မတၤလၢသုကျါ ကဒုးနဲၣ်ယၤလၢတၢ်ကမၣ်အဂ့ၢ် တဂၤလဲၣ်. ဒီးယမ့ၢ်ကတိၤတၢ်မ့ၢ်တၢ်တီဒီး, ဘၣ်မနုၤ လၢသုတနာ်ဘၣ်ယၤလဲၣ်.
47 ပှၤဘၣ်ဃးဒီးယွၤန့ၣ်, ဒိ ကနၣ်ယွၤအကလုၢ်ကထါလီၤ. မ်ဒ်န့ၣ်ဒီးသုဝဲသ့ၣ်အံၤ, မ့ၢ်သုတဘၣ်ဃးဘၣ်ဒီးယွၤဘၣ်ဒီး, သုတဒိကနၣ်သုဝဲ ဘၣ်လီၤ.
48 မၤသးဒ်န့ၣ်ဒီး ပှၤယူဒၤဖိ ကတိၤဆၢတၢ်ဒီးစံးဘၣ် အီၤ, နဲဒၣ်အံၤ, ပစံးဘၣ်မး, လၢနမ့ၢ်ပှၤၡၤမရံဖိ, ဒီးတၢ် နါအိၣ်လၢနလိၤ,တမ့ၢ်ဘၣ်ဧါ.
49 ဒီးယ့ၣ်ရှူးကတိၤဆၢဝဲ ဒၣ်, တၢ်နါတအိၣ်ဘၣ်လၢယလိၤဘၣ်. မ့မ့ၢ်ယယူးယီၣ် ယပၢ်, ဒီးသုတယူးတယီၣ်ဘၣ်ယၤဘၣ်.
50 ယတဃု ဘၣ်ယလၤယကပီၤဒၣ်ယဲဘၣ်. ပှၤလၢအဃုတၢ်ဒီးစံၣ် ညီၣ်တၢ်န့ၣ်,အိၣ်တဂၤလီၤ.
51 ယစံးဘၣ်တဲဘၣ်သုတီတီ လိၤလိၤ, ပှၤမ့ၢ်တိၢ်န့ၢ်ယကလုၢ်ယကထါ တဂၤဂၤဒီး, လီၤထူလီၤယိာ်, တထံၣ်ဘၣ်တၢ်သံဘၣ်.
52 မၤသးဒ်န့ၣ် ဒီးပှၤယူဒၤဖိစံးဘၣ်အီၤ, အအံၤတစုအံၤ, ပသ့ၣ်ညါလၢ တၢ်နါအိၣ်လၢနလိၤလီၤ. စီၤအၤဘြၤဟၣ်ဒီးဝံသ့ၣ်တဖၣ် န့ၣ်သံလံဝဲလံ, ဒီးနစံးနဲ, ပှၤတဂၤမ့ၢ်တိၢ်န့ၢ်ယကလုၢ်ယ ကထါဒီး, လီၤထူလီၤယိာ်တလ့ၣ်ကွၢ်ဘၣ်တၢ်သံဘၣ်.-
53 နဲဒၣ်အံၤ, မ့ၢ်နဒိၣ်န့ၢ်ပပၢ်စီၤအၤဘြၤဟၣ်လၢအသံတ့ၢ် တဂၤန့ၣ်ဧါ. ဒီးဝံသ့ၣ်တဖၣ်သံဝဲလီၤ. နဲဒၣ်အံၤ, နမၤန သးလၢမတၤတဂၤလဲၣ်.
54 ယ့ၣ်ရှူးစံးဆၢဝဲဒၣ်, ယဲဒၣ် အံၤ, ယမ့ၢ်မၤလၤကပီၤလီၤယသးဒီး, ယလၤကပီၤန့ၣ်မ့ၢ်တၢ်ကလီကလီလီၤ. ပှၤလၢအမၤလၤကပီၤယၤ, မ့ၢ် ယပၢ်လၢသုစံး လၢအမ့ၢ်သုကစၢ်လီၤ.
55 ဒီးသုတသ့ၣ် ညါဘၣ်အီၤဘၣ်. မ့မ့ၢ်ယဲဒၣ်အံၤယသ့ၣ်ညါအီၤလီၤ. ဒီး ယမ့ၢ်စံးလၢယတသ့ၣ်ညါဘၣ်အီၤဒီး, ယကကဲလၢပှၤ ကတိၤတၢ်ကဘျံးကဘျၣ်ဒ်သိးဒီးသုလီၤ. မ့မ့ၢ်ယသ့ၣ် ညါအီၤ, ဒီးယတိၢ်န့ၢ်အကလုၢ်အကထါလီၤ.
56 သုပၢ်စီၤ အၤဘြၤဟၣ်ဆၢထံၣ်ဘၣ်ယနံၤယသီအံၤ, ဒီးထံၣ်ဝဲဒီးအ သူၣ်ဖှံအသးညီလီၤ.
57 မၤသးဒ်န့ၣ်ဒီး, ပှၤယူဒၤဖိစံးဘၣ် အီၤ, နဲဒၣ်အံၤနသးတအိၣ်ဒံးဘၣ်အနံၣ်ယဲၢ်ဆံဘၣ်ဒီး, မ့ၢ်နထံၣ်လံ စီၤအၤဘြၤဟၣ်လံဧါ.
58 ဒီးယ့ၣ်ရှူးစံးဘၣ် အီၤ, ယစံးဘၣ်တဲဘၣ်သုတီတီလိၤလိၤ, စီၤအၤဘြၤဟၣ် တချုးအိၣ်ထီၣ်ဒံးဘၣ်န့ၣ်ယမ့ၢ်ယဲလီၤ. မၤသးဒ်န့ၣ်ဒီး, အဝဲသ့ၣ်ဟံးထီၣ်လၢၢ်ဒ်သိးအကကွံာ်အီၤလီၤ.
59 ဒီးယ့ၣ် ရှူးပာ်ခူသူၣ်အသး, ဒီး (ခီတူာ်လၢအကျါဒီး, ဟးပူၤကွံာ် ဒ်န့ၣ်, ဒီး) ဟးထီၣ်ကွံာ်ဝဲလၢတၢ်လုၢ်အဟံၣ်ပူၤလီၤ.