20
1 ဒီးလၢမုၢ်နွံနံၤအကျါ, မုၢ်ခီၣ်ထံးတနံၤဂီၤဂီၤ, တၢ်ခံး ဒံးန့ၣ်, ပှၤမၤကဒၤလ့ၣ်ဖိနီၢ်မၤရံလဲၤဆူတၢ်သွၣ်ခိၣ်န့ၣ်, ဒီးထံၣ်ဝဲလၢလၢၢ်အိၣ်လၢတၢ်သွၣ်ခိၣ်အပူၤန့ၣ်, တလ့ၣ် ကွံာ်အသးလီၤ.
2 မၤသးဒ်န့ၣ်ဒီးဃ့ၢ်ဝဲ, ဒီးဟဲဆူစီၤပ့းတ ရူးဒီး အပျဲၢ်အဘီၣ်အဂၤ လၢယ့ၣ်ရှူးအဲၣ်အီၤတဂၤအ အိၣ်, ဒီးစံးဘၣ်အီၤ, ပှၤလဲၤစိာ်ကွံာ်လံကစၢ်လၢတၢ်သွၣ် ခိၣ်အပူၤလံ. ဒီးပာ်က့ၤအီၤဖဲလဲၣ်န့ၣ်, ပတသ့ၣ်ညါဘၣ်.
3 မၤသးဒ်န့ၣ်ဒီးစီၤပ့းတရူး ဒီးအပျဲၢ်အဘီၣ်အဂၤတဂၤ န့ၣ်, ဟးထီၣ်ဝဲ, ဒီးလဲၤဝဲဆူတၢ်သွၣ်ခိၣ်လီၤ.
4 ဒီးပှၤခံဂၤ ဃ့ၢ်ဃုာ်, ဒီးအပျဲၢ်အဘီၣ်အဂၤတဂၤန့ၣ်ဃ့ၢ်ပူၤကွံာ်စီၤ ပ့းတရူး, ဒီးတုၤဆိလၢတၢ်သွၣ်ခိၣ်လီၤ.
5 ဒီးသကူးလီၤ အသး, ဒီးထံၣ်ဖှီဝါကဆှၣ်အိၣ်ပာ်လီၤအသးဘၣ်ဆၣ် ဒီး, တလဲၤနုာ်ဘၣ်ဝဲဘၣ်.
6 မၤသးဒ်န့ၣ်ဒီးစီၤၡံမိၣ်ပ့းတ ရူးတုၤလၢအလီၢ်ခံ,ဒီးလဲၤနုာ်ဝဲဆူတၢ်သွၣ်ခိၣ်အပူၤလီၤ. ဒီးထံၣ်ဖှီဝါကဆှၣ်အိၣ်ပာ်လီၤအသး,
7 ဒီးတၢ်စှၢၤလၢ အဘံဃာ်အခိၣ်န့ၣ်တအိၣ်ဘၣ်ဒီးဖှီဝါကဆှၣ်ဘၣ်. မ့ၢ် အအိၣ်ထူထီၣ်အသးလၢအလီၢ်တပူၤဒၣ်လီၤ.
8 မၤသး ဒ်န့ၣ်ဒီးအပျဲၢ်အဘီၣ်အဂၤတဂၤ, လၢအလဲၤတုၤဆိဆူ တၢ်သွၣ်ခိၣ်န့ၣ်, လဲၤနုာ်ဝဲဒီးထံၣ်တၢ်, ဒီးနာ်တၢ်လီၤ.-
9 အဂ့ၢ်ဒ်အံၤ, တၢ်ကွဲးအသးလၢအဘၣ်ဂဲၤဆၢထၢၣ်က့ၤ လၢတၢ်သံန့ၣ်, အဝဲသ့ၣ်အနၢ်တပၢၢ်ဒံးဘၣ်.
10 မၤသးဒ်န့ၣ်ဒီး အပျဲၢ်အဘီၣ်က့ၤကဒါက့ၤဆူ အပှၤ ဒၣ်ဝဲအအိၣ်လီၤ. မ့မ့ၢ်နီၢ်မၤရံ ဆၢထၢၣ်လၢတၢ်သွၣ်ခိၣ် အဃၢၤ, ဒီးဟီၣ်ဝဲလီၤ.
11 မၤသးဒ်န့ၣ်ဒီးဟီၣ်ဝဲအဖၢမုၢ် ဒီးသကူးလီၤအသး, ဒီးကွၢ်နုာ်လၢတၢ်သွၣ်ခိၣ်အပူၤ,-
12 ဒီးထံၣ်ကလူးခံဂၤ လၢအကူအသိးဝါဝဲ, ဆ့ၣ်နီၤဖဲယ့ၣ် ရှူးအစိၣ်ပာ်လီၤအသးအလီၢ်န့ၣ်, လၢအခိၣ်တဂၤ, ဒီး လၢအခီၣ်တဂၤလီၤ.
13 ဒီးအဝဲသ့ၣ်စံးဘၣ်အီၤ, နီၢ်ဧၢ, ဘၣ်မနုၤလၢနဟီၣ်လဲၣ်. ဒီးအဝဲဒၣ်စံးဘၣ်အီၤ, အဂ့ၢ် ဒ်အံၤ, ပှၤလဲၤစိာ်ကွံာ်ယကစၢ်, ဒီးပာ်အီၤဖဲလဲၣ်ဖဲလဲၣ် န့ၣ် ယတသ့ၣ်ညါဘၣ်.
14 စံးတၢ်န့ၣ်တဖၣ်ဝံၤဒီး ဃၣ်ဃီၤအသးဆူအလီၢ်ခံ, ဒီး ထံၣ်ယ့ၣ်ရှူးဆၢထၢၣ်, ဒီးတသ့ၣ်ညါဘၣ်လၢအမ့ၢ်ယ့ၣ် ရှူးဘၣ်လီၤ.
15 ယ့ၣ်ရှူးစံးဘၣ်အီၤ, နီၢ်ဧၢ, ဘၣ်မနုၤနဟီၣ် လဲၣ်. နဃုမတၤတဂၤလဲၣ်. အဝဲဒၣ်ဆိကမိၣ်လၢအမ့ၢ် ပှၤပၢၤတၤသၣ်အလီၢ်, ဒီးစံးဘၣ်အီၤ, ကစၢ်ဧၢ, နမ့ၢ် စိာ်ကွံာ်အီၤဒီး, နပာ်အီၤဖဲလဲၣ်ဖဲလဲၣ်န့ၣ်, စံးဘၣ်တဲဘၣ် ယၤတက့ၢ်. ဒီးယကလဲၤဟံးန့ၢ်အီၤလီၤ.
16 ယ့ၣ်ရှူးစံးဘၣ် အီၤ, နီၢ်မၤရံဧၢ. အဝဲဒၣ်ဃၣ်ဃီၤအသး ဒီးစံးဘၣ်အီၤ လၢဧ့ၤဘြံၤအကျိာ်, ရၤဘူနံၤဧၢ, (အခီပညီန့ၣ်မ့ၢ်သရၣ် ကစၢ်လီၤ.).
17 ယ့ၣ်ရှူးစံးဘၣ်အီၤ, ထိးယၤတဂ့ၤ. ယတ လဲၤထီၣ်ဒံးဘၣ်ဆူယပၢ်အအိၣ်ဘၣ်. မ့မ့ၢ်လဲၤဆူယဒီပုၢ် ဝဲၢ်တဖၣ်အအိၣ်, ဒီးစံးဘၣ်အီၤ, ယလဲၤထီၣ်ဆူယပၢ်ဒီး သုပၢ်အအိၣ်, ဒီးဆူယယွၤဒီးသုယွၤအအိၣ်န့ၣ်လီၤ.
18 ပှၤမၤကဒၤလ့ၣ်ဖိနီၢ်မၤရံ က့ၤစံးဘၣ်တဲဘၣ် အပျဲၢ် အဘီၣ်လၢ သါထံၣ်ဘၣ်ကစၢ်န့ၣ်, ဒီးလၢအစံးဘၣ်သါ လၢတၢ်န့ၣ်တဖၣ်လီၤ.
19 မၤသးဒ်န့ၣ်ဒီးလၢမုၢ်နွံနံၤအကျါ မုၢ်ခီၣ်ထံးတနံၤန့ၣ်, ဘၣ်မုၢ်ဟါလီၤ, ဒီးမ့ၢ်အပျံၤပှၤယူဒၤဖိသတးဒီး, အပျဲၢ် အဘီၣ်အိၣ်ဖှိၣ်ရိဖှိၣ် ကးတံာ်ဃာ်တြဲၤအဖၢမုၢ်ဒီး, ယ့ၣ် ရှူးဟဲဒီးဆၢထၢၣ်လၢအကျါလၢတၢ်အသးကံၢ်ပူၤ, ဒီးစံး ဝဲဒၣ်,
20 မ်တၢ်မုာ်တၢ်ဖိးအိၣ်ဒီးသုတက့ၢ်. စံးတၢ်န့ၣ်ဝံၤ ဒီး, ဒုးနဲၣ်အစုလၣ်, ဒီးအကပၤလၢအီၤလီၤ. မၤသးဒ် န့ၣ်ဒီးအပျဲၢ်အဘီၣ် ထံၣ်ဘၣ်ကစၢ်န့ၣ် ဒီးအသးခုထီၣ် ဝဲလီၤ.
21 မၤသးဒ်န့ၣ်ဒီးယ့ၣ်ရှူးစံးကဒီးဝဲ, မ်တၢ်မုာ်တၢ်ဖိးအိၣ် ဒီးသုတက့ၢ်. ဒ်ယပၢ်မၢလီၤယၤအသိးန့ၣ်, ယမၢလီၤ သုစ့ၢ်ကီးလီၤ.
22 စံးတၢ်န့ၣ်တဖၣ်ဝံၤဒီး, သါသဖှိထီၣ် လၢအလိၤ, ဒီးစံးဘၣ်အီၤ, ဒိးန့ၢ်သးစီဆှံတက့ၢ်.
23 ဖဲဒၣ် ပှၤအတၢ်ကမၣ်လၢသုပျၢ်ကွံာ်အီၤတဖၣ်န့ၣ်, ကဘၣ်ပျၢ် ကွံာ်အီၤလီၤ. ဒီးဖဲဒၣ်ပှၤအတၢ်ကမၣ်လၢသုဟံးဃာ်အီၤ တဖၣ်န့ၣ်, ကဘၣ်ဟံးဃာ်အီၤလီၤ.
24 ဒီးဖဲယ့ၣ်ရှူးဟဲန့ၣ်, ပှၤလၢပှၤတဆံခံဂၤအကျါ, စီၤ သိၤမါကိးဝဲလၢစီၤဒံဒူၤမူးတဂၤ, တအိၣ်ဘၣ်ဒီးအဝဲသ့ၣ် ဘၣ်.
25 မၤသးဒ်န့ၣ်ဒီးအပျဲၢ်အဘီၣ်တဖၣ်စံးဘၣ်အီၤ, ပ ထံၣ်ဘၣ်လံကစၢ်န့ၣ်လံ. ဒီးအဝဲဒၣ်န့ၣ်စံးဆၢအီၤ, ယမ့ၢ် တထံၣ်ဘၣ်ထးအလီၢ်လၢအစုလၣ်ပူၤ, ဒီးယမ့ၢ်တအူ ဘၣ်အပူၤလီၢ်လၢယစုနၢ, ဒီးယမ့ၢ်တဘုးဘၣ်အကပၤ အပူၤလီၢ်လၢယစုဘၣ်ဒီး, ယတနာ်ယဲဘၣ်.
26 ဒီးဃိးနံၤအလီၢ်ခံန့ၣ် အပျဲၢ်အဘီၣ် အိၣ်ကဒီးလၢ ဟံၣ်ပူၤ, ဒီးစီၤသိၤမါအိၣ်ဒီးအီၤလီၤ. တြဲၤကးတံာ်ဃာ် အသးဒီး, ယ့ၣ်ရှူးဟဲဆၢထၢၣ်လၢအကျါ, ဒီးစံးဝဲဒၣ်, တၢ်မုာ်တၢ်ဖိးမ်အအိၣ်ဒီးသုတက့ၢ်.
27 တုၤနုၤတစု, စံး ဘၣ်စီၤသိၤမါ, ယူာ်ထီၣ်နစုနၢဖဲအံၤ, ဒီးကွၢ်ယစုလၣ်, ဒီးယူာ်ထီၣ်နစုဒီး ဘုးကွၢ်ယကပၤအပူၤလီၢ်အံၤတက့ၢ်. ဒီးနသးသုတဒ့ဒီတဂ့ၤ, မ့မ့ၢ်နာ်တၢ်တက့ၢ်.
28 စီၤသိၤမါ စံးဆၢတၢ်ဒီးစံးဘၣ်အီၤ, ယကစၢ်, ဒီးယယွၤန့ၣ်လီၤ.-
29 ယ့ၣ်ရှူးစံးဘၣ်အီၤ, မ့ၢ်နထံၣ်ယၤဒီးနနာ်နဲ, ပှၤလၢအ တထံၣ်ဘၣ်ဝဲဒီးနာ်ဝဲတဖၣ်န့ၣ်, ဘၣ်ဆိၣ်ဂ့ၤဝဲလီၤ.
30 မၤသးဒ်န့ၣ်ဒီး တၢ်လီၤလးလၢအဂုၤအဂၤလၢ အတ ကွဲးဘၣ်အသးလၢလံာ်အံၤအပူၤဘၣ်န့ၣ်, ယ့ၣ်ရှူးမၤစ့ၢ် ကီးဝဲအါမံၤ, လၢအပျဲၢ်အဘီၣ်အမဲာ်ညါလီၤ.
31 ဘၣ်ဆၣ် ဒီးဒ်သိးသုကနာ်လၢ ယ့ၣ်ရှူးမ့ၢ်ခရံာ်, ယွၤအဖိခွါ, ဒီးသု နာ်တၢ်သတးဒီး, ဒ်သိးသုကန့ၢ်ဘၣ်တၢ်မူလၢအမံၤဒီး, တၢ်အံၤတဖၣ်ဘၣ်ကွဲးအသးလီၤ.