13
1 ဒီးပှၤအံၣ်စရ့လးဖိမၤကဒီးတၢ်အၢလၢယွၤအမဲာ်, ဒီး ယွၤဟ့ၣ်လီၤကွံာ်အီၤဆူ ပှၤဖလ့ၡသးဖိအစုပူၤ, အနံၣ် လွံၢ်ဆံလီၤ.
2 ဒီးပှၤလၢစိးရၤအိၣ်ဝဲတဂၤလၢပှၤဒၣ်ဖိအဒူၣ်ကျါ, ဒီး အမံၤမ့ၢ်စီၤမၤနိ, ဒီးအမါန့ၣ်မ့ၢ်ပှၤတူာ်ဖိ, ဒီးအဖိတ အိၣ်ဘၣ်.
3 ဒီးယွၤအကလူးလီၣ်ဖျါထီၣ်အသးလၢ ပိာ်မုၣ်န့ၣ် အမဲာ်ညါ, ဒီးစံးဘၣ်အီၤ, ကွၢ်ကွၢ်, ခဲကနံၣ်အံၤန မ့ၢ်ပှၤတူာ်ဖိ, ဒီးတဆံးစၢ်ဘၣ်တၢ်ဘၣ်. ဘၣ်ဆၣ်ဒီး နကဒၢထီၣ်, ဒီးနကဆံးစၢ်န့ၢ်နဖိပိာ်ခွါလီၤ.
4 ဒီးခဲက နံၣ်အံၤ ပလီၢ်နသးတက့ၢ်.ဒီးစပံးထံမ့ၢ်ဂ့ၤ, သံးဧိၤမ့ၤ ဧိၤမ့ၢ်ဂ့ၤ, အီတဂ့ၤ, ဒီးအီၣ်တၢ်တကဆှီဘၣ်နီတမံၤ တဂ့ၤ.
5 အဂ့ၢ်ဒ်အံၤ, ကွၢ်ကွၢ်, နကဒၢထီၣ်,ဒီးနက ဆံးစၢ်န့ၢ်နဖိပိာ်ခွါ, ဒီးဒီလူၤတဘၣ်ဘၣ်အခိၣ်ဘၣ်. အဂ့ၢ်ဒ်အံၤ, လၢအမိၢ်ဒၢလီၢ်လံၤလံၤန့ၣ်, ဖိသၣ်န့ၣ် ကကဲထီၣ် ပှၤနစၤရံဖိလၢ ယွၤအဂီၢ်လီၤ. ဒီးကမၤ ပူၤမၤဖျဲးသီအံၣ်စရ့လးလၢ ပှၤဖလ့ၡသးဖိအစုပူၤလီၤ.
6 ဒီးပိာ်မုၣ်န့ၣ်ဟဲတဲဘၣ်အဝၤ, ဒီးစံးဝဲဒၣ်, ယွၤအပှၤ ကညီတဂၤဟဲဆူယအိၣ်ဒီး အမဲာ်မၤသးဒ်ယွၤအကလူး တဂၤအမဲာ်အသိးန့ၣ်, တၢ်ပျံၤအလီၢ်ဒိၣ်မးလီၤ. ဘၣ် ဆၣ် မ့ၢ်အဟဲလၢလဲၣ်လၢလဲၣ်န့ၣ် ယတသံကွၢ်အီၤ ဘၣ်. ဒီးတစံးဘၣ်ယၤလၢအမံၤဘၣ်.
7 ဒီးစံးဘၣ်ယၤ, ကွၢ်ကွၢ်, နကဒၢထီၣ်, ဒီးနကဆံးစၢ်န့ၢ်နဖိပိာ်ခွါလီၤ. ဒီးခဲကနံၣ်အံၤစပံးထံမ့ၢ်ဂ့ၤ, သံးဧိၤမ့ၤဧိၤမ့ၢ်ဂ့ၤ, အီတ ဂ့ၤ, ဒီးတၢ်တကဆှီဘၣ်န့ၣ်အီၣ်နီတမံၤတဂ့ၤ. အဂ့ၢ်ဒ် အံၤ, ဖိသၣ်န့ၣ်ကကဲထီၣ် ပှၤနစၤရံဖိလၢယွၤအဂီၢ်လၢ အမိၢ်အဒၢလီၢ်လံၤလံၤန့ၣ်တုၤမုၢ်တနံၤလၢအသံဝဲလီၤ.
8 ဒီးစီၤမၤနိဃ့ကညးယွၤ, ဒီးစံးဝဲဒၣ်, အိယကစၢ်ဧၢ, မ်ယွၤအပှၤကညီလၢနမၢလီၤတဂၤန့ၣ် ဟဲက့ၤကဒီးဆူ ပအိၣ်, ဒီးပကမၤဖိသၣ်လၢ အကအိၣ်ဖျဲၣ်တဂၤဒ် လဲၣ်ဒ်လဲၣ်န့ၣ်သိၣ်လိပှၤတက့ၢ်.
9 ဒီးယွၤကနၣ်စီၤမၤနိအကလုၢ်, ဒီးဖဲပိာ်မုၣ်န့ၣ်ဆ့ၣ် နီၤလၢပျီပူၤဒီးယွၤအကလူးဟဲကဒီးဆူအအိၣ်လီၤ. ဒီး အဝၤစီၤမၤနိတအိၣ်ဘၣ်ဒီးအီၤဘၣ်.
10 ဒီးပိာ်မုၣ်န့ၣ် မၤဝဲချ့ချ့ဒီးဃ့ၢ်ဝဲ, ဒီးဒုးနဲၣ်တၢ်လၢအ ဝၤ, ဒီးစံးဘၣ်အီၤ, ကွၢ်ကွၢ်, ပှၤကညီလၢအဟဲဆူ ယအိၣ်လၢမုၢ်တနံၤန့ၣ် လီၣ်ဖျါထီၣ်လံအသးလၢယ မဲာ်ညါလံ.
11 ဒီးစီၤမၤနိန့ၣ် ဂဲၤဆၢထၢၣ်, ဒီးပိာ်အမါအခံ, ဒီးလဲၤတုၤလၢပှၤကညီန့ၣ်အအိၣ်, ဒီးစံးဘၣ်အီၤ, နမ့ၢ်ပှၤကညီလၢအကတိၤတၢ်ဒီးပိာ်မုၣ်န့ၣ်ဧါ. ဒီးစံးဝဲဒၣ် ယၤလီၤ.
12 ဒီးစီၤမၤနိစံးဝဲဒၣ်, ခဲကနံၣ်အံၤ, နတၢ်ကတိၤကကဲထီၣ် တၢ်လီၤ.ပကစံၣ်ညီၣ်ဖိသၣ်ဒ်လဲၣ်,ဒီးပကမၤအီၤဒ်လဲၣ်.
13 ဒီးယွၤအကလူးန့ၣ်စံးဘၣ်စီၤမၤနိ, ကယဲၢ်တၢ်လၢ ယစံးဘၣ်တဲဘၣ်ပိာ်မုၣ်န့ၣ် မ်အတိၢ်န့ၢ်တက့ၢ်.-
14 တ ဘၣ်အီၣ်တၢ်ဘၣ်ဃးဒီး စပံးသၣ်နီတမံၤဘၣ်. ဒီးစပံး ထံမ့ၢ်ဂ့ၤ, သံးဧိၤမ့ၤဧိၤမ့ၢ်ဂ့ၤ, မ်အသုတအီတဂ့ၤ. ဒီးတၢ် လၢအတကဆှီဘၣ်န့ၣ် မ်အသုတအီၣ် နီတမံၤတဂ့ၤ. ကယဲၢ်တၢ်လၢယမၤလိာ်အီၤန့ၣ်မ်အတိၢ်န့ၢ်တက့ၢ်.
15 ဒီးစီၤမၤနိစံးဘၣ်ယွၤအကလူးန့ၣ်, မ်ပကဒုးအိၣ်ဒံး နၤတက့ၢ်. ဒီးပကကတဲာ်ကတီၤ မဲာ်တဲးလဲးဖိတဒု လၢနဂီၢ်လီၤ.
16 ဒီးယွၤအကလူးန့ၣ်စံးဘၣ်စီၤမၤနိ, နမ့ၢ်ဒုးအိၣ်ဒံးယၤ ဘၣ်ဆၣ်ဒီး, ယတအီၣ်ဘၣ်နကိၣ်ဘၣ်. ဒီးနမ့ၢ်လုၢ်တၢ် လုၢ်မ့ၣ်အူဒီး, နဘၣ်လုၢ်အီၤလၢယွၤလီၤ. အဂ့ၢ်ဒ်အံၤ, စီၤမၤနိတသ့ၣ်ညါဘၣ်လၢအမ့ၢ်ယွၤအကလူးဘၣ်.
17 ဒီးစီၤမၤနိစံးဘၣ်ယွၤအကလူးန့ၣ် တုၤနကတိၤတၢ် န့ၣ်ကဲထီၣ်ဝဲဒီး, ဒ်သိးပကမၤလၤကပီၤနၤဒီး, နမံၤဒ် လဲၣ်.
18 ဒီးယွၤအကလူးန့ၣ် စံးဘၣ်အီၤ, မ့ၢ်ယမံၤမ့ၢ်တၢ် လီၤလးဒီး, နဃ့ယမံၤမ့ၢ်အဘၣ်မနုၤလဲၣ်.
19 ဒီးစီၤမၤနိဟံးန့ၢ်မဲာ်တဲးလဲးဖိ, ဒီးတၢ်မၤဘူၣ်ကိၣ်, ဒီးလုၢ်အီၤလၢယွၤလၢလၢၢ်တဖျၢၣ်အလိၤ, ဒီးတၢ်လီၤ လးမၤအသး, ဒီးစီၤမၤနိဒီးအမါကွၢ်ဝဲလီၤ.
20 ဒီးတုၤမ့ၣ်အူလၣ်ထီၣ်ဝဲလၢ တၢ်လုၢ်လီၢ်ဆူမူခိၣ်ဒီး, တၢ်မၤအသးလၢယွၤအကလူးန့ၣ် လဲၤထီၣ်လၢမ့ၣ်အူ လၣ်အကျါလၢတၢ်လုၢ်လီၢ်အဖီခိၣ်, ဒီးစီၤမၤနိဒီးအမါ ကွၢ်ဝဲ, ဒီးထိၣ်လီၤပှီၤအသးလၢဟီၣ်ခိၣ်အဖီခိၣ်လီၤ.
21 ဒီးယွၤအကလူးန့ၣ် တလီၣ်ဖျါထီၣ်လၢၤဘၣ်အသး လၢစီၤမၤနိဒီးအမါအမဲာ်ညါဘၣ်. တုၤနုၤတစုစီၤမၤနိ သ့ၣ်ညါဝဲလၢအမ့ၢ်ယွၤအကလူးလီၤ.
22 ဒီးစီၤမၤနိစံးဘၣ်အမါ, ပကသံသပှၢ်တၢၢ်လီၤ. အ ဂ့ၢ်ဒ်အံၤ, ပထံၣ်ဘၣ်လံယွၤလံလီၤ.
23 မ့မ့ၢ် အမါစံးဘၣ်အီၤ, ယွၤအသးမ့ၢ်အိၣ်လၢအက မၤသံပှၤဒီး, တတူၢ်လိာ်ဘၣ် တၢ်လုၢ်မ့ၣ်အူ, ဒီးတၢ် မၤဘူၣ်ကိၣ်လၢပစုပူၤဘၣ်. ဒီးတဒုးနဲၣ်ဘၣ်ပှၤလၢက ယဲၢ်တၢ်တဖၣ်ခဲလၢာ်န့ၣ်, ဒီးအကတီၢ်ဖဲအံၤ, တစံး ဘၣ်တဲဘၣ်ပှၤလၢတၢ်တဖၣ်ဒ်အံၤအသိးဘၣ်.
24 ဒီးပိာ်မုၣ်န့ၣ် ဆံးစၢ်န့ၢ် အဖိခွါ, ဒီးယုၢ်အမံၤလၢ စီၤၡံၣ်ၡိၣ်လီၤ. ဒီးဖိသၣ်န့ၣ်ဒိၣ်ထီၣ်, ဒီးယွၤဆိၣ်ဂ့ၤ အီၤလီၤ.
25 ဒီးယွၤအသးထိၣ်ဂဲၤသီအီၤတဘျီဘျီ လၢဒၣ်အသူၣ် ဒဲအလီၢ်ပူၤ, လၢစိးရၤဒီးအ့ၤၡတိလးအဘၢၣ်စၢၤလီၤ.