28
1 အ့ဖရဲၣ်အပှၤအီမူၤသံးတဖၣ် အသးထီၣ်ထီအခိၣ်သ လုးဒီးအဃံအလၤ, အလၤကပီၤအသံၣ်အဖီလီၤညွံးလၢ အအိၣ်ဝဲလၢပှၤဘၣ်တၢ်ကျီအီၤ လၢစပံးထံအကစၢၢ်က ဆူးဘီၣ်သိအခိၣ်န့ၣ်ဘၣ်အဖှီၣ်လီၤ.
2 ကွၢ်ကွၢ်, တၢ်အဒိၣ်အဆူၣ်တဂၤအိၣ်ဒီးယွၤ,မၤသးဒ် ကလံၤမုၢ်အိၣ်ဒီးသူၣ်အသိး, မၤသးဒ်ကလံၤမုၢ်လၢအ မၤဟးဂီၤတၢ်အသိး, မၤသးဒ်ထံဟဲဆူၣ်လုၣ်ဘၢတၢ်အ သိးန့ၣ်မၤလီၤဃံၤဝဲလၢဟီၣ်ခိၣ်လိၤလၢအစုလီၤ.
3 အ့ဖရဲၣ်အပှၤအီမူၤသံးတဖၣ် အသးထီၣ်ထီအခိၣ်သ လုးန့ၣ် ကဘၣ်တၢ်ယီၢ်လီၤတံၢ်အီၤလၢပှၤအခီၣ်အဖီ လာ်လီၤ.
4 ဒီးအဃံအလၤ အလၤကပီၤ အသံၣ်အဖီလီၤညွံးလၢ အအိၣ်လၢအကစၢၢ်ကဆူးဘီၣ်သိအခိၣ်န့ၣ် ကမၤသး ဒ်ချၢၣ်ဒၢသၣ်လၢအမံဆိ တချုးတၢ်ကိၢ်ခါဘၣ်ဒံးဘၣ် တဖျၢၣ်လၢပှၤလၢအကွၢ်အီၤထံၣ်ဝဲဒီး, အိၣ်ဝဲလၢအစု ပူၤအဖၢမုၢ်န့ၣ်အီၣ်ယူၢ်လီၤကွံာ်ဝဲအသိးန့ၣ်လီၤ.
5 တၢ်လၢမုၢ်တနံၤန့ၣ် တၢ်သုးမုၢ်ဂီၢ်မုၢ်အယွၤကကဲ ထီၣ်တၢ်ခိၣ်သလုးအဃံအလၤ, ဒီးခိၣ်ကျီၤအလၤကပီၤ လၢအပှၤဂီၢ်မုၢ်လၢအအိၣ်လီၤတဲာ်တဖၣ်အဂီၢ်,
6 ဒီးတၢ် စံၣ်ညီၣ်အသးလၢ ပှၤလၢအဆ့ၣ်နီၤစံၣ်ညီၣ်တၢ်အဂီၢ်, ဒီးတၢ်အဂံၢ်အဘါလၢ ပှၤလၢအဘိးဃၣ်ကဒါတၢ်ဒုး သုးဆူပဲတရီအအိၣ်တဖၣ်အဂီၢ်န့ၣ်လီၤ.
7 ဒီးအဝဲသ့ၣ်တဖၣ်န့ၣ် လီၤကမၣ်စ့ၢ်ကီးလၢစပံးထံအ ဃိ,ဒီးဟးဖျိးကျဲလၢသံးအဃိလီၤ. ပှၤလုၢ်တၢ်အဒိၣ်,ဒီး ဝံလီၤကမၣ်တၢ်လၢသံးအဃိ,ဘၣ်တၢ်ယူၢ်လီၤကွံာ်အီၤ လၢစပံးထံ, ဟးဖျိးကျဲလၢသံးအဃိ,ကမၣ်တၢ်လၢအ ထံၣ်တၢ်အပူၤ,သးဒ့ဒီလၢအစံၣ်ညီၣ်တၢ်အပူၤလီၤ.
8 အဂ့ၢ်ဒ်အံၤ, စီၢ်နီၤခိၣ်ခဲလၢာ်ပှဲၤဒီးတၢ်ဘှိးဒီးတၢ်ဘၣ် အၢ,တၢ်ကဆှီအလီၢ်န့ၣ်တအိၣ်ဘၣ်ဝဲဘၣ်.
9 ကသိၣ်လိတၢ်သ့ၣ်ညါလၢမတၤလဲၣ်, ဒီးကဒုးပၢၢ်မ တၤအနၢ်လၢတၢ်နၢ်ဟူတၢ်န့ၣ်လဲၣ်.ပှၤလၢအလီၤဖှၣ်ဒီး တၢ်နုၢ်ထံ,ဒီးလီၤဖးဒီးအမိၢ်အနုၢ်ဧါ.
10 အဂ့ၢ်ဒ်အံၤ, မ့ၢ်တၢ်သိၣ်လၢတၢ်သိၣ်, တၢ်သိၣ်လၢ တၢ်သိၣ်, တဘိလၢတဘိ, တဘိလၢတဘိ, တဆံးတ က့ၢ်ဖဲအံၤ,တဆံးတက့ၢ်ဖဲန့ၣ်လီၤ.
11 အဂ့ၢ်ဒ်အံၤ,ကကတိၤတၢ်ဒီးပှၤတကလုာ်အံၤလၢပျုၤ လၢအအုးအး,ဒီးတၢ်ကတိၤတကျိာ်ဒၣ်လီၤ.
12 အဝဲဒၣ်စံးဘၣ်အီၤ, အဝဲအံၤ, မ့ၢ်တၢ်အိၣ်ဘှံးလီၤ. ဒုး အိၣ်ဘှံးပှၤတၢ်ဘှံးအသးတက့ၢ်. ဒီးအဝဲအံၤမ့ၢ်တၢ်မၤ မုာ်ထီၣ်တၢ်လီၤ.ဒီးဒိကနၣ်ဝဲန့ၣ်အသးတအိၣ်ဘၣ်.
13 မၤသးဒ်န့ၣ်ဒီးယွၤအကလုၢ်န့ၣ် ကဲထီၣ်လၢအဂီၢ်လၢ တၢ်သိၣ်လၢတၢ်သိၣ်, တၢ်သိၣ်လၢတၢ်သိၣ်, တဘိလၢ တဘိ, တဘိလၢတဘိ, တဆံးတက့ၢ်ဖဲအံၤ,တဆံးတ က့ၢ်ဖဲန့ၣ်, ဒ်သိးအကလဲၤတၢ်ဒီးလီၤဃံၤအီထီခိၣ်, ဒီး လီၤကၢ်ကွံာ်, ဒီးဘၣ်ပျံၤသကွီၤ, ဒီးဘၣ်တၢ်ဖီၣ်န့ၢ်အီၤ လီၤ.
14 မၤသးဒ်န့ၣ်ဒီးကနၣ်ယွၤအကလုၢ်တက့ၢ်, ပှၤလၢအ မၤတရီတပါပှၤလၢအပၢ ပှၤတကလုာ်အံၤလၢယရူၤၡ လ့ၣ်အပူၤသ့ၣ်ဧၢ.
15 မ့ၢ်သုစံး, ပမၤတ့ၢ်တၢ်အၢၣ်လီၤအီလီၤဒီးတၢ်သံ,ဒီး ပမၤတၢ်ဃူလိာ်ဒီးပျုၤပူၤဒီး, တုၤတၢ်အၢလုၣ်ဘၢခီဂာ် ကွံာ်တၢ်ဒီး,တဟဲဘၣ်ပှၤဘၣ်. အဂ့ၢ်ဒ်အံၤ,ပပာ်တၢ်က ဘျံးကဘျၣ်လၢပအိၣ်တဒၢအလီၢ်, ဒီးပပာ်ခူသူၣ်ပသး လၢလီတၢ်အပူၤလီၤ.
16 မၤသးဒ်န့ၣ်ဒီးကစၢ်ယွၤစံးဝဲဒ်အံၤ, ကွၢ်ကွၢ်, ယပာ် လီၤလၢၢ်တဖျၢၣ်, လၢၢ်လၢအဘၣ်တၢ်မၤကွၢ်အီၤတ ဖျၢၣ်, တၢ်သနၢၣ်အလၢၢ်,လၢအပှ့ၤဒိၣ်တဖျၢၣ်,တၢ်အ ခီၣ်ထံးအိၣ်ဂၢၢ်ဆိးကျၢၤလၢစံယိၣ်အပူၤလီၤ. ပှၤလၢအ နာ်တၢ်န့ၣ်တမၤဘၣ်တၢ်ချ့ချ့ဘၣ်.
17 ဒီးယကပာ်တၢ်စံၣ်ညီၣ်လၢပျံၤတဘိအလီၢ်, ဒီးတၢ် တီတၢ်လိၤ လၢတၢ်အဖျၢၣ်လီၤစဲၤအလီၢ်, ဒီးသူၣ်က တြူာ်ကွံာ်တၢ်ကဘျံးကဘျၣ်အအိၣ်တဒၢအလီၢ်, ထံ ကလုၣ်ဘၢတၢ်အိၣ်ခူသူၣ်အလီၢ်န့ၣ်လီၤ.
18 သုတၢ်အၢၣ်လီၤအီလီၤ ဒီးတၢ်သံန့ၣ်ကတုၤလၢတၢ် ဟးဂီၤ, ဒီးသုတၢ်မၤဃူလိာ်ဒီးပျုၤပူၤန့ၣ်တအိၣ်ဂၢၢ်ဆိး ကျၢၤဘၣ်. တုၤတၢ်အၢလုၣ်ဘၢကွံာ် တၢ်ခီဂာ်တၢ်ဒီး, သုကဘၣ်တၢ်ယီၢ်တံၢ်လၢအီၤလီၤ.
19 ဒီးတုၤအခီဂာ်တၢ်ဒီး, ကထုးထီၣ်ကွံာ်သုလီၤ. တဂီၤ ဘၣ်တဂီၤန့ၣ်ကခီဂာ်တၢ်, လၢမုၢ်ဆါဒီးလၢမုၢ်နၤ, ဒီး တၢ်နၢ်ပၢၢ်တၢ်အကစီၣ်န့ၣ်မ့ၢ်ထဲတၢ်ကိၢ်တၢ်ဂီၤလီၤ.
20 အဂ့ၢ်ဒ်အံၤ, တၢ်အလီၢ်မံလၢပကစူၣ်လီၤပသးလၢအ ဖီခိၣ်န့ၣ်ဖုၣ်ကဲၣ်ဆိး, ဒီးယၣ်လၢပကလုးအီၤလၢပလိၤ န့ၣ်အံၣ်ကဲၣ်ဆိးလီၤ.
21 အဂ့ၢ်ဒ်အံၤ, ဒ်လၢကစၢၢ်ပရၤစံၣ်အသိးန့ၣ်ယွၤကဂဲၤ ဆၢထၢၣ်ဒ်လၢကံးဘိၣ် အကစၢၢ်ကဆူးအသိးန့ၣ်အ သးကထီၣ်, ဒ်သိးအကမၤအတၢ်မၤ,အတၢ်မၤလီၤဆီ, ဒီးဒ်သိးအကမၤအတၢ်မၤလီၤဆီလီၤကျဲလီၤ.
22 ဒီးခဲကနံၣ်အံၤဒုၣ်ဒွဲၣ်တၢ်တဂ့ၤ. သုပျံၤစၢဃာ်တၢ်န့ၣ် ကဆူၣ်ထီၣ်ဘၣ်ဖုးလီၤ. အဂ့ၢ်ဒ်အံၤ,တၢ်မၤလိာ်တၢ်မၤ လၢာ်ဟီၣ်ခိၣ်ဒီဘ့ၣ်ညါန့ၣ် ယနၢ်ဟူလၢကစၢ်တၢ်သုး မုၢ်အယွၤလီၤ.
23 ဒိးသုနၢ်,ဒီးကနၣ်ယကလုၢ်,ဒိကနၣ်ဒီးကနၣ်ယတၢ် ကတိၤတက့ၢ်.
24 ပှၤထဲၣ်တၢ်ဖိန့ၣ်မ့ၢ်အထဲၣ်တၢ်ကိးမုၢ် နံၤဒဲးဒ်သိးအကဖှံတၢ်ဧါ. အိးထီၣ်ဒီးမၤဘျဲးအဟီၣ်ခိၣ် အကိၢ်လိၣ်တဖၣ်စ့ၢ်ကီးဧါ.
25 တုၤအမၤဃူအလိၤဝံၤဒီး, ဖှံစမုၣ်သူ, မၤပြံပြါစံယၤ, ဒီးပာ်ဘုကၠူၣ်လၢတကျိၤတကျိၤအပူၤ, ဒီးဘုမုယီၤလၢ အတၢ်ပနီၣ်, ဒီးဘုကူးစမ့းလၢအဃၢၤန့ၣ် တမ့ၢ်ဘၣ် ဧါ.
26 အဂ့ၢ်ဒ်အံၤ, သိၣ်လိအီၤလၢတၢ်စံၣ်ညီၣ်, အကစၢ် သိၣ်လိအီၤလီၤ.
27 အဂ့ၢ်ဒ်အံၤ,ပှၤဘၣ်ယီၢ်စမုၣ်သူလၢကရၢ်, ဒီးထုးလ့ၣ် ကဟၣ်အပၣ်လၢစံယၤအဖီခိၣ်န့ၣ်တမ့ၢ်ဘၣ်. အဂ့ၢ်ဒ် အံၤ,ပှၤဘၣ်တီၢ်စမုၣ်သူလၢနီၣ်တီၢ်,ဒီးစံယၤလၢနီၣ်ထိး ဘိန့ၣ်လီၤ.
28 ဘုဧိၤဟုဧိၤန့ၣ် ပှၤဘၣ်မၤသဘှံးအီၤ လၢကိၣ်အဂီၢ် လီၤ.အဂ့ၢ်ဒ်အံၤ,တတီၢ်ဘၣ်ဝဲတထံၣ်ဃီဘၣ်. ဒီးထုးအ လ့ၣ်ကဟၣ်အပၣ်လၢအဖီခိၣ်လီၤ. မ့မ့ၢ်လၢအကသ့ၣ် တမံၤန့ၣ်တမၤသဘှံးဘၣ်အီၤဘၣ်.
29 တၢ်န့ၣ်ဟဲထီၣ်စ့ၢ်ကီးလၢ တၢ်သုးမုၢ်ဂီၢ်မုၢ် အယွၤ လီၤ.အဝဲဒၣ်လီၤလးလၢအကူၣ်တၢ်, ဒီးဂ့ၤဝဲလၢအမၤ တၢ်လီၤ.