45
1 ဒီးစီၤယိၤသးကီၤအသးလၢ ပှၤလၢအဆၢထၢၣ်လၢ အဃၢၤခဲလၢာ်အမဲာ်ညါတကဲဘၣ်, ဒီးကိးထီၣ်ဝဲ, ဒုး ဟးထီၣ်ကယဲၢ်ပှၤလၢယအိၣ်တက့ၢ်. ဒီးစီၤယိၤသးလီၣ် ဖျါထီၣ်အသးလၢအဒီပုၢ်ဝဲၢ်အမဲာ်ညါအဖၢမုၢ်ဒီး, ပှၤ တဆၢထၢၣ်ဘၣ်ဒီးအီၤနီတဂၤဘၣ်.
2 ဒီးအကလုၢ်ထီၣ် ဖျဲးလၢမဲာ်ထံမဲာ်နိအပူၤ, ဒီးပှၤအဲၤကူပတူးဖိ, ဒီးဖၤရိၤ အပှၤဟံၣ်ဖိနၢ်ဟူဝဲလီၤ.
3 ဒီးစီၤယိၤသးစံးဘၣ်အဒီပုၢ်ဝဲၢ်, ယမ့ၢ်စီၤယိၤသးလီၤ. ယပၢ်မူဒံးစ့ၢ်ကီးဧါ. ဒီးအဒီပုၢ်ဝဲၢ်စံးဆၢဝဲတကဲဘၣ်. အဂ့ၢ်ဒ်အံၤ, အသူၣ်ကိၢ်အသးဂီၤလၢအအိၣ်လၢအမဲာ် ညါအဃိလီၤ.
4 ဒီးစီၤယိၤသးစံးဘၣ်အဒီပုၢ်ဝဲၢ်, သုးဘူးလၢ်သုသးဆူ ယအိၣ်တက့ၢ်. ဒီးသုးဘူးအသးလီၤ. ဒီးစံးဘၣ်အီၤ, ယမ့ၢ်သုဒီပုၢ်ဝဲၢ်စီၤယိၤသး, လၢသုဆါကွံာ်ဆူအဲၤကူပ တူးလီၤ.
5 ဒီးခဲကနံၣ်အံၤသုသုတသးအုးတဂ့ၤ. ဒီးသု သုတသးထီၣ်လီၤသုသးလၢ သုဆါကွံာ်ယၤဖဲအံၤအ ဃိတဂ့ၤ. အဂ့ၢ်ဒ်အံၤ, ယွၤမၢယဟဲလီၤလၢသုမဲာ်ညါ ဒ်သိးယကဒုးပူၤဖျဲးပှၤအသးသမူန့ၣ်လီၤ.
6 တၢ်သၣ်ဝံၤလီၤဒိအံၤအိၣ်လံလၢ ကီၢ်ပူၤခံနံၣ်အံၤလံ. ဒီးအိၣ်ဒံးယဲၢ်နံၣ်လၢအတအိၣ်ဘၣ်ဒီး ထဲၣ်တၢ်ဒီးကူး တၢ်န့ၣ်ဘၣ်လီၤ.
7 ဒီးယွၤမၢယလဲၤလၢသုမဲာ်ညါဒ်သိး အကပာ်တၢ်အိၣ်လီၤတဲာ်လၢသုဂီၢ်လၢဟီၣ်ခိၣ်ချၢ, ဒီး ဒုးမူဒံးသုလၢတၢ်မၤထူၣ်ဖျဲးတၢ်ဖးဒိၣ်လီၤ.
8 ဒီးခဲကနံၣ် အံၤသုမၢယဟဲဖဲအံၤတမ့ၢ်ဘၣ်. မ့ၢ်ယွၤလီၤ. ဒီးပာ်ယၤ လၢဖၤရိၤအပၢ်, ဒီးအပှၤဟံၣ်ဖိခဲလၢာ်အကစၢ်, ဒီးပှၤ ပၢတၢ်လၢကီၢ်အဲၤကူပတူးဒီကီၢ်ညါလီၤ.
9 က့ၤထီၣ်ချ့ချ့ဆူယပၢ်အအိၣ်, ဒီးစံးဘၣ်အီၤ, နဖိခွါ စီၤယိၤသးစံးဒ်အံၤ, ယွၤပာ်ယၤလၢကီၢ်အဲၤကူပတူးဒီ ကီၢ်ညါအကစၢ်လီၤ. ဟဲလီၤဆူယအိၣ်တက့ၢ်. မၤယံာ် မၤနီၢ်နသးတဂ့ၤ.
10 ဒီးနကအိၣ်ကဆိးလၢကီၢ်ကိရှ့ၣ်ဒီး နကအိၣ်ဘူးဒီးယၤ, နဲဒၣ်, ဒီးနဖိ, ဒီးနဖိအဖိတဖၣ်, ဒီးနသိဒီးနမဲာ်တဲးလဲးတဖၣ်, ဒီးနဂီၤဘုၣ်ဂီၤဖံးတဖၣ်, ဒီးကယဲၢ်တၢ်လၢအအိၣ်ဒီးနၤလီၤ.
11 ဒီးယကလုၢ်အီၣ် လုၢ်အီနၤဖဲန့ၣ်, (အဂ့ၢ်ဒ်အံၤ, တၢ်သၣ်ဝံၤလီၤဒိအိၣ်ဒံး ယဲၢ်နံၣ်လီၤ) နဲဒၣ်, ဒီးနပှၤဟံၣ်ဖိ, ဒီးကယဲၢ်ပှၤအိၣ် ဒီးနၤန့ၣ်ကဘၣ်တၢ်ဖှီၣ်တၢ်ယာ်ခဲလၢာ်ဘၣ်ဖုးလီၤ.
12 ဒီးကွၢ်ကွၢ်, သုမဲာ်ဒီးယပုၢ်စီၤဘံၣ်ယၤမံၣ်အမဲာ်ထံၣ် ဝဲလၢအမ့ၢ်ယထးခိၣ်လၢအကတိၤတၢ်ဒီးသုလီၤ.
13 ဒီး သုကစံးဘၣ်တဲဘၣ်ယပၢ်လၢ ယလၤကပီၤလၢကီၢ်အဲၤ ကူပတူးအပူၤခဲလၢာ်အဂ့ၢ်အကျိၤ, ဒီးကယဲၢ်တၢ်လၢ သုထံၣ်ဘၣ်ခဲလၢာ်ခဲဆ့လီၤ. ဒီးသုဘၣ်မၤချ့ချ့, ဒီးဟဲ စိာ်လီၤယပၢ်ဖဲအံၤလီၤ.
14 ဒီးထိၣ်လီၤအသးလၢအပုၢ် စီၤဘံၣ်ယၤမံၣ်အကိာ် လိၤ, ဒီးအမဲာ်ထံလီၤ, ဒီးစီၤဘံၣ်ယၤမံၣ်အမဲာ်ထံလီၤ လၢအကိာ်န့ၣ်လီၤ.
15 ဒီးနၢမူအဒီပုၢ်ဝဲၢ်ခဲလၢာ်, ဒီးအ မဲာ်ထံလီၤလၢအလိၤ, ဒီးလၢန့ၣ်အလီၢ်ခံန့ၣ်အဒီပုၢ်ဝဲၢ် ကတိၤတၢ်ဒီးအီၤလီၤ.
16 ဒီးတၢ်အကစီၣ်န့ၣ်ဟူထီၣ်လၢစီၤပၤဖၤရိၤအဟံၣ်ပူၤ, ဒီးစံးဝဲဒၣ်, စီၤယိၤသးအဒီပုၢ်ဝဲၢ်ဟဲလံ. ဒီးဂ့ၤဝဲလၢဖၤ ရိၤအမဲာ်, ဒီးလၢအခ့အပှၤအမဲာ်လီၤ.
17 ဒီးဖၤရိၤစံးဘၣ်စီၤယိၤသး, စံးဘၣ်တဲဘၣ်နဒီပုၢ်ဝဲၢ်, မၤတၢ်အံၤ, ပဒၢးထီၣ်တၢ်လၢသုဆၣ်ဖိကီၢ်ဖိအဖီခိၣ်, ဒီးလဲၤတၢ်, က့ၤက့ၤဆူကီၢ်ကနၤဧၣ်အပူၤ,
18 ဒီးဟံးန့ၢ် သုပၢ်, ဒီးသုပှၤဟံၣ်ဖိ, ဒီးဟဲဆူယအိၣ်တက့ၢ်. ဒီးယ ကဟ့ၣ်သုလၢကီၢ်အဲၤကူပတူးအတၢ်ဂ့ၤ, ဒီးသုကအီၣ် ထံဧိၤကီၢ်ဧိၤအသိလီၤ.
19 ဒီးခဲကနံၣ်အံၤတၢ်မၤလိာ်နၤ, မၤတၢ်အံၤ, ဟံးန့ၢ်လ့ၣ်ကဟၣ်လၢ ကီၢ်အဲၤကူပတူး အပူၤလၢသုဖိဒံဖိသၣ်အဂီၢ်ဒီး လၢသုဖိသုမါအဂီၢ်, ဒီး ဟဲစိာ်သုပၢ်, ဒီးဟဲက့ၤတက့ၢ်.
20 ဒီးမ်သုမဲာ်အသုတ လိးကီသုတၢ်ဖိတၢ်လံၤတဂ့ၤ. အဂ့ၢ်ဒ်အံၤ, ကီၢ်အဲၤကူ ပတူးဒီကီၢ်ညါအတၢ်ဂ့ၤန့ၣ် မ့ၢ်သုတၢ်လီၤ.
21 ဒီးအံၣ်စရ့လးအဖိတဖၣ်မၤဝဲဒ်န့ၣ်လီၤ. ဒီးစီၤယိၤသး ဟ့ၣ်အီၤလၢလ့ၣ်ကဟၣ်တဖၣ်, ဒ်ဖၤရိၤမၤလိာ်အသိး, ဒီးဟ့ၣ်အတၢ်အီၣ်တၢ်အီလၢကျဲအဂီၢ်လီၤ.
22 ဒီးဟ့ၣ်ပှၤတဖၣ်န့ၣ်ခဲလၢာ်လၢ အကူအသိးတဂၤ လၢအကကလံၤအသးအဂီၢ်, တဂၤလၢအကကလံၤ အသးအဂီၢ်လီၤ. မ့မ့ၢ်စီၤဘံၣ်ယၤမံၣ်တဂၤန့ၣ်ဟ့ၣ်အီၤ လၢစ့သၢကယၤ, ဒီးအကူအသိးလၢအကကလံၤအ သးယဲၢ်ဘျီအဂီၢ်လီၤ.
23 ဒီးဟ့ၣ်ယုၢ်အပၢ်ဒ်အံၤ, ကသ့ၣ် ယီၤအဖါပဒၢးအသးဆံဆဲၣ်ဒုလၢ ကီၢ်အဲၤကူပတူးအ တၢ်ဂ့ၤတဖၣ်, ဒီးကသ့ၣ်ယီၤအမိၢ်ဆံဆဲၣ်ဒုပဒၢးအ သးလၢဘုဧိၤဟုဧိၤ, ဒီးကိၣ်, ဒီးတၢ်အီၣ်လၢအပၢ်အ ဂီၢ်လၢကျဲပူၤလီၤ.
24 ဒီးပျၢ်အဒီပုၢ်ဝဲၢ်, ဒီးအဝဲသ့ၣ်တ ဖၣ်လဲၤဝဲလီၤ. ဒီးစံးဘၣ်အီၤ, မ်တၢ်သူၣ်တမုာ်သးတ မုာ် သုတအိၣ်ထီၣ်လၢသုကျါလၢကျဲပူၤတဂ့ၤ.
25 ဒီးအဝဲသ့ၣ်တဖၣ်န့ၣ်လဲၤထီၣ်ဝဲလၢအဲၤကူပတူး, ဒီးဟဲဝဲဆူကီၢ်ကနၤဧၣ်ဆူ အပၢ်စီၤယၤကိာ်အအိၣ်လီၤ.-
26 ဒီးစံးဘၣ်တဲဘၣ်အီၤ, ဒီးစံးဝဲဒၣ်, စီၤယိၤသးမူဒံးဒီး ပၢကီၢ်အဲၤကူပတူးဒီကီၢ်ညါလီၤ. ဒီးစီၤယၤကိာ်အသး ကတုၤလီၤ. အဂ့ၢ်ဒ်အံၤ, တနာ်ဘၣ်အီၤဘၣ်.
27 ဒီးအဝဲသ့ၣ်စံးဘၣ်တဲဘၣ်အီၤလၢ စီၤယိၤသးအတၢ် ကတိၤလၢအစံးတ့ၢ်အီၤခဲလၢာ်လီၤ. ဒီးတုၤအထံၣ်ဘၣ် လ့ၣ်ကဟၣ်တဖၣ်လၢစီၤယိၤသးဟ့ၣ်ယုၢ်အီၤဒီး, အပၢ် စီၤယၤကိာ်အသးမူထီၣ်က့ၤဝဲလီၤ.
28 ဒီးစီၤအံၣ်စရ့လးစံးဝဲဒၣ်, အါလံ, ယဖိခွါစီၤယိၤသး မူဒံးလီၤ. ယကလဲၤတၢ်, ဒီးထံၣ်ဘၣ်အီၤလၢယတချုး သံဒံးဘၣ်လီၤ.