39
1 ဒီးပှၤလဲၤစိာ်လီၤ စီၤယိၤသးဆူ ကီၢ်အဲၤကူပတူးအ ပူၤ, ဒီးပှၤအဲၤကူပတူးဖိ, ဖၤရိၤအပှၤဒ့ဒံၣ်, ပှၤမၤသံ တၢ်တဖၣ်အဒိၣ်, စီၤပိၤတံၤဖၢ်န့ၣ်ပှ့ၤအီၤလၢပှၤယံးၡ မၤဧ့လးဖိလၢအဟဲစိာ်အီၤဖဲန့ၣ်တဖၣ်အစုပူၤလီၤ.
2 ဒီးယွၤအိၣ်ဒီးစီၤယိၤသး, ဒီးမ့ၢ်ပှၤလၢအတၢ်မၤကဲ ထီၣ်တၢ်လီၤ. ဒီးအိၣ်ဝဲလၢအကစၢ် ပှၤအဲၤကူပတူးဖိ အဟံၣ်ပူၤလီၤ.
3 ဒီးအကစၢ်ထံၣ်ဘၣ်ဝဲလၢယွၤအိၣ်ဒီးအီၤ, ဒီးလၢယွၤ ဒုးကဲထီၣ်အတၢ်မၤလၢအစုပူၤခဲလၢာ်လီၤ.
4 ဒီးစီၤယိၤသးဘၣ်ဘျုးဘၣ်ဖှိၣ်လၢအမဲာ်, ဒီးမၤအီၤ လၢအခ့အပှၤအတၢ်လီၤ. ဒီးအဝဲဒၣ်ပာ်အီၤလၢအပှၤ ဟံၣ်ဖိအခိၣ်, ဒီးကယဲၢ်အတၢ်အိၣ်ဒီးအီၤန့ၣ်, ပာ်ဝဲ လၢအစုပူၤခဲလၢာ်လီၤ.
5 ဒီးတၢ်မၤအသး ဖဲအပာ်အီၤလၢအပှၤဟံၣ်ဖိအခိၣ်, ဒီးလၢ တၢ်အိၣ်ဒီးအီၤခဲလၢာ်အခိၣ်လံၤလံၤန့ၣ်, ယွၤ ဆိၣ်ဂ့ၤပှၤအဲၤကူပတူးဖိအဟံၣ် လၢစီၤယိၤသးအဃိ လီၤ. ဒီးယွၤအတၢ်ဆိၣ်ဂ့ၤဘၣ်ကယဲၢ်တၢ်လၢအအိၣ်ဒီး အီၤလၢဟံၣ်ပူၤ, ဒီးလၢအအိၣ်လၢခိခဲလၢာ်လီၤ.
6 ဒီးပာ်လီၤတဲာ် ကယဲၢ်တၢ်လၢအအိၣ်ဒီးအီၤခဲလၢာ် လၢစီၤယိၤသးအစုပူၤ, ဒီးတသ့ၣ်ညါဘၣ်တၢ်အိၣ်ဒီး အီၤနီတမံၤဘၣ်, သ့ၣ်ညါထဲတၢ်အီၣ်လၢအအီၣ်ဝဲလီၤ. ဒီးစီၤယိၤသးအက့ၢ်အဂီၤဂ့ၤ, ဒီးပကွၢ်အီၤဂ့ၤလီၤ.
7 ဒီးတၢ်မၤအသးလၢတၢ်တဖၣ်န့ၣ်အလီၢ်ခံ, အကစၢ် အမါတဂၤဒိးထီၣ်အမဲာ်လၢစီၤယိၤသးအအိၣ်, ဒီးစံးဝဲ ဒၣ်, မံဃုာ်ဒီးယၤတက့ၢ်.
8 ဒီးဂ့ၢ်လိာ်ဝဲ, ဒီးစံးဘၣ်အကစၢ်အမါ, ကွၢ်ကွၢ်, ယ ကစၢ်တသ့ၣ်ညါဘၣ်တၢ်အိၣ်ဒီးယၤလၢဟံၣ်ပူၤ, ဒီးပာ် လီၤတဲာ် ကယဲၢ်တၢ်လၢအအိၣ်ဒီးအီၤ လၢယစုပူၤခဲ လၢာ်လံ.
9 တၢ်ဒိၣ်န့ၢ်ယၤလၢဟံၣ်ပူၤအံၤတအိၣ်ဘၣ်. ဒီးတတြီဃာ်ဘၣ်တၢ်လၢယၤနီတမံၤဘၣ်, တြီဃာ်ထဲ နၤတဂၤဧိၤ, လၢနမ့ၢ်အမါအဃိလီၤ. ဒီးယကမၤတၢ် အၢတၢ်သီအဒိၣ်အယိာ်တမံၤအံၤ, ဒီးမၤကမၣ်ဘၣ်ယွၤ ဒ်လဲၣ်.
10 ဒီးတၢ်မၤအသးဖဲအကတိၤတၢ်ဒီး စီၤယိၤသးတနံၤ ဘၣ်တနံၤတနံၤဘၣ်တနံၤဒီး, မံလၢအဃၢၤမ့ၢ်ဂ့ၤ, အိၣ် ဒီးအီၤမ့ၢ်ဂ့ၤတကနၣ်ဘၣ်အကလုၢ်ဘၣ်.
11 ဒီးတၢ်မၤအ သးလၢဖဲအကတီၢ်န့ၣ်ဃၣ်ဃၣ်, စီၤယိၤသးလဲၤနုာ်လၢ ဟံၣ်ပူၤဒ်သိးအကမၤအတၢ်မၤ, ဒီးပှၤဟံၣ်ဖိပိာ်ခွါတ အိၣ်ဘၣ်လၢဟံၣ်ပူၤနီတဂၤဘၣ်.
12 ဒီးအဝဲဒၣ်ဖီၣ်န့ၢ် အီၤလၢအယၣ်ဒီးစံးဝဲဒၣ်, မံဃုာ်ဒီးယၤတက့ၢ်. ဒီး လဲၤသဒၣ်အယၣ်လၢအစုပူၤဒီးဃ့ၢ်ဝဲ, ဒီးဟးထီၣ်ဆူ ခိလီၤ.
13 ဒီးတၢ်မၤအသးတုၤပိာ်မုၣ်ထံၣ်ဝဲ လၢအလဲၤသဒၣ် အယၣ်လၢအစုပူၤ, ဒီးဃ့ၢ်ထီၣ်ကွံာ်ဆူခိဒီး,
14 အဝဲဒၣ် ကိးန့ၢ်ပှၤဟံၣ်ဖိတဖၣ်, ဒီးကတိၤတၢ်ဒီးအီၤ, ဒီးစံးဝဲ ဒၣ်, ကွၢ်, အဝဲဒၣ်န့ၣ်ဟဲစိာ်ပှၤဧ့ၤဘြံၤဖိဆူပအိၣ်ဒ်သိး အကမၤတရီတပါပှၤလီၤ. ဟဲနုာ်ဝဲလၢယအိၣ်ဒ်သိးအ ကမံဃုာ်ဒီးယၤ, ဒီးယကိးပသူထီၣ်လၢယကလုၢ်ဖးဒိၣ် လီၤ.
15 ဒီးတၢ်မၤအသးတုၤအနၢ်ဟူလၢယထုထီၣ်ယ ကလုၢ်ဒီးကိးထီၣ်ဒီး, လဲၤသဒၣ်ဝဲအယၣ်လၢယဃၢၤ, ဒီးဃ့ၢ်ထီၣ်, ဒီးဟးထီၣ်ဆူခိလီၤ.
16 ဒီးပာ်ဝဲယၣ်တဘ့ၣ်န့ၣ်လၢအဃၢၤ တုၤအကစၢ်ဟဲ ဆူအဟံၣ်လီၤ.
17 ဒီးကတိၤဒီးအီၤ, ဒ်တၢ်ကတိၤအံၤ အသိး, ဒီးစံးဝဲဒၣ်, ပှၤကုၢ်ဖိပှၤဧ့ၤဘြံၤဖိလၢနဟဲစိာ် လၢပအိၣ်တဂၤန့ၣ်ဟဲနုာ်လၢယအိၣ်ဒ်သိး အကမၤတ ရီတပါယၤလီၤ.
18 ဒီးတၢ်မၤအသးတုၤယထုထီၣ်ယက လုၢ်ဒီးကိးထီၣ်ဒီး, လဲၤသဒၣ်ဝဲအယၣ်လၢယဃၢၤ, ဒီး ဃ့ၢ်ထီၣ်ကွံာ်ဆူခိလီၤ.
19 ဒီးတၢ်မၤအသးတုၤအကစၢ် နၢ်ဟူအမါ အတၢ်က တိၤလၢအကတိၤဒီးအီၤ, ဒီးစံးဝဲလၢနကုၢ်ဖိတဂၤမၤ ယၤ ဒ်တၢ်ကတိၤတဖၣ်အံၤအသိးန့ၣ်ဒီး, အသးထီၣ် ကဲၤထီၣ်ဝဲလီၤ.
20 ဒီးစီၤယိၤသးအကစၢ်န့ၣ်ဟံးန့ၢ်အီၤ, ဒီးဒၢနုာ်အီၤ လၢဃိာ်ပူၤ, အလီၢ်ဖဲစီၤပၤအပှၤဃိာ်ဖိတဖၣ်အိၣ်စၢ ဃာ်အသးလီၤ. ဒီးအိၣ်ဝဲလၢဃိာ်ပူၤဖဲန့ၣ်လီၤ.
21 ဒီးယွၤအိၣ်ဒီးစီၤယိၤသး, ဒီးမၤအီၤလၢ အဘျုးအ ဖှိၣ်, ဒီးဒုးဘၣ်အီၤလၢတၢ်အဘျုးအဖှိၣ် လၢပှၤဃိာ် ဒိၣ်တဂၤအမဲာ်ညါလီၤ.
22 ဒီးပှၤဃိာ်ဒိၣ်တဂၤန့ၣ် ပာ်ပှၤဃိာ်ဖိအိၣ်လၢဃိာ်ပူၤ ခဲလၢာ်လၢစီၤယိၤသးအစုပူၤ, ဒီးဖဲဒၣ်ပှၤမၤတၢ်တမံၤ လၢ်လၢ်ဖဲန့ၣ်မ့ၢ်အဝဲဒၣ်မၤဝဲလီၤ.
23 ဒီးပှၤဃိာ်ဒိၣ်တဂၤ န့ၣ်တကွၢ်ဘၣ်တၢ်အိၣ်လၢအစုပူၤနီတမံၤဘၣ်. အဂ့ၢ် ဒ်အံၤ, ယွၤအိၣ်ဒီးစီၤယိၤသး, ဒီးအတၢ်မၤန့ၣ် ယွၤဒုး ကဲထီၣ်ဝဲလီၤ.