19
1 ဒီးမုၢ်ဟါလီၤန့ၣ်ကလူးခံဂၤဟဲဝဲဆူဝ့ၢ်စဒိၣ်လီၤ. ဒီး စီၤလိာ်ဆ့ၣ်နီၤလၢဝ့ၢ်စဒိၣ်အပဲတရီပူၤ, ဒီးစီၤလိာ်ထံၣ် ဘၣ်ဝဲ, ဒီးဂဲၤဆၢထၢၣ်ဒ်သိးကသဂၢၢ်အီၤ, ဒီးတီၤလီၤ ကဒွံကျိာ်ဒီးအမဲာ်ဆူဟီၣ်ခိၣ်န့ၣ်,
2 ဒီးစံးဝဲဒၣ်, ကွၢ် ကွၢ်, ယကစၢ်သ့ၣ်ဧၢ, ဟဲက့ၤနုာ်ဆူသုကုၢ်သုပှၤအ ဟံၣ်ပူၤ, ဒီးအိၣ်သီတနၤကျၢၤ, ဒီးသ့ကွံာ်သုခီၣ်တ က့ၢ်. ဒီးသုကဂဲၤဆၢထၢၣ်ဂီၤဂီၤ, ဒီးလဲၤဒံးသုကျဲန့ၣ် လီၤ. ဒီးစံးဝဲဒၣ်, တမ့ၢ်ဘၣ်. မ့မ့ၢ်ပကအိၣ်လၢကျဲ ပူၤသီတနၤကျၢၤလီၤ.
3 ဒီးကညးဝဲဆူၣ်မးဒီးအဝဲသ့ၣ်ဟဲက့ၤဆူအအိၣ်, ဒီး လဲၤနုာ်ဆူအဟံၣ်ပူၤလီၤ. ဒီးမၤတၢ်အီၣ်တၢ်အီလၢအ ဂီၢ်, ဒီးသၣ်မံကိၣ်လၢအတအိၣ်ဘၣ်ဒီးကိၣ်မံၣ်, ဒီးအ ဝဲသ့ၣ်အီၣ်တၢ်လီၤ.
4 ဘၣ်ဆၣ်ဒီးတချုးမံလီၤဒံးဘၣ်ဝဲဒီး, ပှၤဝ့ၢ်ဖိ, ပှၤစ ဒိၣ်ဖိလၢ ပှၤအသးစၢ်ပၢၢ်လၢပှၤအသးပှၢ်, ကယဲၢ်ပှၤ လၢတခီလၢ်လၢ်န့ၣ် ဟဲအိၣ်ဝးတရံးဟံၣ်တဖျၢၣ်န့ၣ် လီၤ.
5 ဒီးကိးထီၣ်စီၤလိာ်ဒီးစံးဘၣ်အီၤ, ပှၤလၢအဟဲ ဆူနအိၣ်မုၢ်ဟါအံၤ, မ့ၢ်အအိၣ်ဖဲလဲၣ်. ဟဲစိာ်အီၤဆူ ပဒိၣ်, ဒ်သိးပကသ့ၣ်ညါအီၤတက့ၢ်.
6 ဒီးစီၤလိာ်ဟးထီၣ်လၢကျဲစၢၤဆူအအိၣ်, ဒီးကးတံာ် ဃာ်တြဲၤလၢအလီၢ်ခံ,
7 ဒီးစံးဝဲဒၣ်, ယဒီပုၢ်ဝဲၢ်သ့ၣ် ဧၢ, မ်သုသုတမၤတၢ်အၢတၢ်သီထဲထဲအံၤတဂ့ၤ.
8 ကွၢ် ကွၢ်, ယအိၣ်ဒီးယဖိမုၣ်ခံဂၤလၢအတသ့ၣ်ညါဘၣ်ပိာ် ခွါဘၣ်, ဒီးပျဲလၢယဟဲစိာ်အီၤဆူသုအိၣ်, ဒီးမၤအီၤဖဲ ဒၣ်အဂ့ၤလၢသုမဲာ်တက့ၢ်. မ့မ့ၢ်ပှၤကညီတဖၣ်အံၤသု သုတမၤအီၤလၢတၢ်နီတမံၤတဂ့ၤ. အဂ့ၢ်ဒ်အံၤ, မ့ၢ်အ ဟဲလံလၢယဟံၣ်ခိၣ်အကဒုပူၤလံလီၤ.
9 ဒီးအဝဲသ့ၣ်စံး, သုးကွံာ်နသး, ဒီးစံးကဒီးဝဲ, အဝဲ တဂၤအံၤဟဲအိၣ်တမှံၤ, ဒီးပာ်မးအသးလၢပှၤစံၣ်ညီၣ် တၢ်လီၤ. ခဲကနံၣ်အံၤပကမၤနၤနးန့ၢ်အဝဲသ့ၣ်တဖၣ်န့ၣ် တက့ၢ်လီၤ. ဒီးသနံးမးပှၤတဂၤ, စီၤလိာ်တဂၤန့ၣ်,ဒီး ဘူးဒီးအကမၤသ့ၣ်ဖးတြဲၤလီၤ.
10 ဒီးပှၤကညီတဖၣ်န့ၣ် ယူာ်ထီၣ်အစု, ဒီးဒုးဟဲက့ၤစီၤလိာ်ဆူအအိၣ်လၢဟံၣ် ပူၤ, ဒီးကးတံာ်ဃာ်တြဲၤလီၤ.
11 ဒီးမၤဘျီၣ်ပှၤလၢအအိၣ် လၢဟံၣ်ကျဲစၢၤထံးအမဲာ်,လၢအဆံးပၢၢ်လၢအဒိၣ်လီၤ. ဒီးအဝဲသ့ၣ်မၤဘှံးအသးလၢတၢ်ဃုကျဲစၢၤအဃိလီၤ.
12 ဒီးပှၤကညီတဖၣ်န့ၣ်စံးဘၣ်စီၤလိာ်, ပှၤဘၣ်ဃးဒီး နၤအိၣ်ဒံးဖဲအံၤတဂၤဂၤဧါ. နမာ်ဒီးနဖိခွါသ့ၣ်ဒီးနဖိမုၣ် သ့ၣ်ဒီးကယဲၢ်နတၢ်အိၣ်ဝဲလၢဝ့ၢ်ပူၤ တမံၤလၢ်လၢ်န့ၣ် ဒုးဟးထီၣ်ကွံာ်လၢတၢ်အလီၢ်အံၤတက့ၢ်.
13 အဂ့ၢ်ဒ်အံၤ, ပကမၤဟးဂီၤတၢ်အလီၢ်အံၤလီၤ. အဂ့ၢ်ဒ်အံၤ, အတၢ် ကိးဒိၣ်ထီၣ်လၢယွၤအမဲာ်ညါ, ဒီးယွၤမၢပဟဲမၤဟးဂီၤ အီၤလီၤ.
14 ဒီးစီၤလိာ်ဟးထီၣ်ဝဲ, ဒီးကတိၤတၢ်ဒီးအမာ်လၢအ န့ၢ်မါလၢအဖိမုၣ်သ့ၣ်တဖၣ်, ဒီးစံးဝဲဒၣ်, ဂဲၤထၢၣ်, ဟးထီၣ်ကွံာ်လၢအလီၢ်အံၤတက့ၢ်. အဂ့ၢ်ဒ်အံၤ, ယွၤ ကမၤဟးဂီၤဝ့ၢ်တဖျၢၣ်အံၤလီၤ. ဘၣ်ဆၣ်ဒီးလၢအမာ် သ့ၣ်အမဲာ်ညါန့ၣ်မၤအသးဒ် ပှၤကတိၤလိာ်ကွဲတၢ်အ သိးန့ၣ်လီၤ.
15 ဒီးတုၤမုၢ်ဆ့ၣ်ထီၣ်ဒီး, ကလူးတဖၣ်မၢစီၤလိာ်လဲၤ တၢ်ချ့ချ့,ဒီးစံးဝဲဒၣ်, ဂဲၤထၢၣ်, ဟံးန့ၢ်နမါဒီးနဖိမုၣ်ခံ ဂၤလၢအအိၣ်ဖဲအံၤတက့ၢ်. နကတုၤဘၣ်ဖုးလၢတၢ်ဟး ဂီၤလၢဝ့ၢ်အံၤအတၢ်ဒဲးဘးအပူၤလီၤ.
16 ဒီးဖဲအမၤယံာ် မၤနီၢ်အသးအဖၢမုၢ်ဒီး, မ့ၢ်ယွၤသးအိၣ်အီၤဒီး, ပှၤတ ဖၣ်န့ၣ်ဟံးဃာ်အစု, ဒီးအမါအစု, ဒီးအဖိမုၣ်ခံဂၤအ စု, ဒီးဆှၢထီၣ်အီၤဒီးပာ်အီၤလၢဝ့ၢ်အခိတခီန့ၣ်လီၤ.
17 ဒီးတၢ်မၤအသးတုၤအဒုးဟးထီၣ်အီၤဆူခိဝံၤဒီး, စံး ဝဲဒၣ်, ဟးပူၤဖျဲးကွံာ်လၢနသးသမူအဂီၢ်တက့ၢ်. ကွၢ် က့ၤလၢနချၢဃံတဂ့ၤ. အိၣ်လၢပျီအံၤ နီတပူၤတဂ့ၤ. ဟးပူၤဖျဲးကွံာ်ဆူကစၢၢ်ကလိတက့ၢ်. နကတုၤဘၣ်ဖုး လၢတၢ်ဟးဂီၤလီၤ.
18 ဒီးစီၤလိာ်စံးဝဲဒၣ်, ယကစၢ်ဧၢ, မ်အသုတမၤအသး ဒ်န့ၣ်တဂ့ၤ,
19 ကွၢ်ကွၢ်, နကုၢ်နပှၤဘၣ်ဘျုးဘၣ်ဖှိၣ်လၢ နမဲာ်ညါ, ဒီးမ့ၢ်နဒုးမူဒံးယၤဒီး, နမၤဒိၣ်ထီၣ်နဘျုးန ဖှိၣ်လၢနမၤယၤလီၤ. ဒီးယဟးပူၤဖျဲးကွံာ်ဆူကစၢၢ်န့ၣ် တသ့ဘၣ်. တၢ်အၢတၢ်နးတမံၤမံၤကဘၣ်ယၤဘၣ်ဖုး, ဒီးယကသံလီၤ.
20 ကွၢ်ကွၢ်, ဝ့ၢ်တဖျၢၣ်အံၤအိၣ်ဘူးလၢ ပကဃ့ၢ်ဆူအအိၣ်, ဒီးမ့ၢ်အဆံးတဖျၢၣ်လီၤ. ပျဲယဟး ပူၤဖျဲးကွံာ်လၢ်ဆူန့ၣ်တက့ၢ်. မ့ၢ်ဝ့ၢ်အဆံးတဖျၢၣ်တမ့ၢ် ဘၣ်ဧါ. ဒီးယသးကမူဒံးလီၤ.
21 ဒီးအဝဲဒၣ်စံးဘၣ်အီၤ, ကွၢ်ကွၢ်, ယဝံၣ်ထီၣ်လံနမဲာ် လၢတၢ်တမံၤအံၤအဂ့ၢ်စ့ၢ်ကီးလီၤ. ယတမၤဟးဂီၤဘၣ် ဝ့ၢ်တဖျၢၣ်လၢနကတိၤတၢ်လၢအဂ့ၢ်ဘၣ်လီၤ.
22 ဟးပူၤ ဖျဲးကွံာ်ချ့ချ့ဆူန့ၣ်တက့ၢ်. အဂ့ၢ်ဒ်အံၤ, နတချုးလဲၤတုၤ ဒံးဘၣ်ဖဲန့ၣ်ဒီး, ယမၤတသ့ဘၣ်နီတမံၤဘၣ်. မၤသးဒ် န့ၣ်ဒီး ဝ့ၢ်ဘၣ်တၢ်ကိးအမံၤလၢစိၤဧၢ်လီၤ.
23 မုၢ်ထီၣ် လၢဟီၣ်ခိၣ်ချၢ ဖဲစီၤလိာ်လဲၤနုာ်လၢဝ့ၢ်စိၤဧၢ်အပူၤလီၤ.
24 ဒီးယွၤမၢတၢ်ဟဲစူၤကးဒီးမ့ၣ်အူလၢ စဒိၣ်ဒီးဂမိရၤအ ဖီခိၣ်, လၢယွၤအအိၣ်လၢမူခိၣ်လီၤ.
25 ဒီးမၤဟးဂီၤကွံာ် ဝ့ၢ်တဖၣ်န့ၣ်, ဒီးပျီဒီဘ့ၣ်ညါ, ဒီးကယဲၢ်ပှၤဝ့ၢ်ဖိ,ဒီး တၢ်မဲတၢ်မါလၢဟီၣ်ခိၣ်န့ၣ်လီၤ.
26 မ့မ့ၢ်အမါတဂၤကွၢ်ကဒါက့ၤဆူအလီၢ်ခံ, ဒီးကဲထီၣ် လၢအံသၣ်ထူၣ်လီၤ.
27 ဒီးစီၤအၤဘြၤဟၣ် ဂဲၤဆၢထၢၣ်ဂီၤဂီၤ, ဒီးလဲၤဆူအ လီၢ်လၢအအိၣ်ဆၢထၢၣ်လၢ ယွၤအမဲာ်ညါ,
28 ဒီးကွၢ် လီၤဝဲဆူ စဒိၣ်ဒီးဂမိရၤအအိၣ်, ဒီးဆူပျီအဟီၣ်ခိၣ်ဒီ ဘ့ၣ်ညါအအိၣ်, ဒီးကွၢ်ထီၣ်ဝဲ, ဒီးကွၢ်ကွၢ်, ဟီၣ်ခိၣ် အမ့ၣ်အူခုၣ်ထီၣ်ဒ်ဖၣ်ကပူၤအမ့ၣ်အူခုၣ်အသိးန့ၣ်လီၤ.
29 ဒီးတၢ်မၤအသးတုၤယွၤမၤဟးဂီၤ ပျီအဝ့ၢ်တဖၣ်ဒီး, ယွၤသ့ၣ်နီၣ်ထီၣ်စီၤအၤဘြၤဟၣ်, ဒီးတုၤအမၤဟးဂီၤ ဝ့ၢ်လၢစီၤလိာ်အိၣ်လၢအပူၤဒီး, မၢစီၤလိာ်ဟးထီၣ်ကွံာ် လၢတၢ်ဟးဂီၤအပူၤလီၤ.
30 ဒီးစီၤလိာ်ဟးထီၣ်လၢဝ့ၢ်စိၤဧၢ်, ဒီးအိၣ်ဝဲဆိးဝဲလၢက စၢၢ်ကလိ, ဒီးအဖိမုၣ်ခံဂၤအိၣ်ဒီးအီၤလီၤ. အဂ့ၢ်ဒ်အံၤ, အိၣ်ဝဲလၢဝ့ၢ်စိၤဧၢ်န့ၣ်ပျံၤတၢ်လီၤ. ဒီးအိၣ်ဝဲဆိးဝဲလၢ တၢ်အိပူၤအဝဲဒၣ်ဒီးအဖိမုၣ်ခံဂၤအိၣ်ဒီးအီၤလီၤ.
31 ဒီးအဝဲၢ်ကိတဂၤ စံးဘၣ်အပုၢ်, ပပၢ်အသးပှၢ်တ့ၢ် လံ. ဒီးပှၤလၢအကဟဲဆူပအိၣ် ဒ်ပှၤဟီၣ်ခိၣ်ဖိအလုၢ် အလၢ်အသိးန့ၣ်, တအိၣ်ဘၣ်လၢဟီၣ်ခိၣ်ချၢနီတဂၤ ဘၣ်.
32 ဟဲမီၣ်, မၢသကိးပပၢ်အီစပံးထံ, ဒီးမံဃုာ်ဒီး အီၤ, ဒ်သိးပကဒုးမူထီၣ်တၢ်အချံလၢပပၢ်န့ၣ်တက့ၢ်.
33 ဒီးလၢမုၢ်တနၤန့ၣ် ဒုးအီအပၢ်လၢစပံးထံ, ဒီးအဝဲၢ် ကိတဂၤလဲၤနုာ်မံဃုာ်ဒီးအပၢ်လီၤ. ဒီးမံလီၤမ့ၢ်ဂ့ၤ, ဂဲၤ ဆၢထၢၣ်မ့ၢ်ဂ့ၤ, တသ့ၣ်ညါဘၣ်ဝဲဘၣ်.
34 ဒီးတၢ်မၤအ သးလၢမုၢ်ဆ့ၣ်ထီၣ်တနံၤန့ၣ်, အဝဲၢ်ကိစံးဘၣ်အပုၢ်, ကွၢ်ကွၢ်, မုၢ်ဟါတနံၤန့ၣ်ယမံဃုာ်ဒီးယပၢ်လီၤ. မၢ သကိးအအီစပံးထံခဲမုၢ်နၤစ့ၢ်ကီး, ဒီးလဲၤနုာ်မံဃုာ်နဲဒီး အီၤ, ဒ်သိးပကဒုးမူထီၣ်တၢ်အချံလၢပပၢ်န့ၣ်တက့ၢ်.
35 ဒီးဒုးအီအပၢ်လၢစပံးထံ လၢမုၢ်တနၤန့ၣ်စ့ၢ်ကီး, ဒီး ပုၢ်တဂၤဂဲၤဆၢထၢၣ်, ဒီးမံဃုာ်ဒီးအီၤ, ဒီးမံလီၤမ့ၢ်ဂ့ၤ, ဂဲၤဆၢထၢၣ်မ့ၢ်ဂ့ၤ, တသ့ၣ်ညါဘၣ်ဝဲဘၣ်.
36 ဒီးစီၤလိာ် အဖိမုၣ်ခံဂၤန့ၣ်ဒၢထီၣ်ဝဲလၢအပၢ်လီၤ.
37 ဒီးအဝဲၢ်ကိတဂၤဆံးစၢ်အဖိခွါ, ဒီးယုၢ်ဝဲအမံၤလၢစီၤ မိၤအးလီၤ. အဝဲဒၣ်မ့ၢ်ပှၤမိၤအးဖိအပၢ်တုၤမုၢ်မဆါတ နံၤအံၤလီၤ.
38 ဒီးအပုၢ်တဂၤဆံးစၢ်စ့ၢ်ကီးအဖိခွါ, ဒီး ယုၢ်ဝဲအမံၤစီၤဘ့ၣ်ဧၣ်မံလီၤ. အဝဲဒၣ်မ့ၢ်ပှၤဧၣ်မိၣ်ဖိအ ပၢ်တုၤမုၢ်မဆါတနံၤအံၤလီၤ.