15
တုၤနုၤတစုစီၤမိၤရှ့ဒီး ပှၤအံၣ်စရ့လးဖိသးဝံၣ်တၢ်သး ဝံၣ်အံၤလၢယွၤအဂ့ၢ်, ဒီးကတိၤတၢ်ဒီးစံးဝဲဒၣ်, ယက သးဝံၣ်ထီၣ်ယွၤ, မ့ၢ်အကဟုဒိၣ်အကညီၢ်ဒိၣ်အဂ့ၢ်, က သ့ၣ်ဒီးပှၤဒိးကသ့ၣ်န့ၣ်, တ့ၢ်လီၤကွံာ်လၢပီၣ်လဲၣ်ပူၤ လီၤ.
ယဂံၢ်ယဘါဒီးယတၢ်သးဝံၣ်မ့ၢ်ယွၤ,ဒီးကဲထီၣ်ဝဲလၢတၢ်အုၣ်က့ၤခီၣ်က့ၤယၤ,အဝဲဒၣ်န့ၣ်မ့ၢ်ယကစၢ်, ဒီးယကစံးထီၣ်ပတြၢၤအီၤ,မ့ၢ်ယပၢ်တဖၣ်အကစၢ်, ဒီးယကပာ်ထီၣ်ထီအီၤလီၤ.
ယွၤမ့ၢ်ပှၤဒုးသုး, အမံၤမ့ၢ်ယွၤလီၤ.
ကွံာ်တ့ၢ်ကွံာ် ဖၤရိၤအလ့ၣ်ကဟၣ်,ဒီးအသုးမုၢ်လၢပီၣ်လဲၣ်ပူၤ,ဒီးအသုးဖိအခိၣ် လၢအဘၣ်ဃုထၢအီၤတဖၣ်လီၤအုးသံလၢပီၣ်လဲၣ်ဂီၤပူၤလီၤ.
တၢ်ယိာ်အထံမၤဘံးမၤဘၢအီၤ,လီၤဒးဝဲဒ်လၢၢ်အသိးန့ၣ်လီၤ.
နစုထွဲ, ယွၤဧၢ, အိၣ်ဒီးအကဟုကညီၢ်လၢတၢ်အစိအကမီၤ,နစုထွဲ, ယွၤဧၢ, မၤသဘှံးအဒုၣ်အဒါ,
ဒီးနမၤဟးဂီၤကွံာ်ပှၤလၢအထီဒါနၤလၢနကဟုကညီၢ်အဒိၣ်အထီလီၤ.နမၢလီၤနတၢ်သးထီၣ်, ဒီးအီၣ်ကွံာ်အီၤဒ်လီၢ်ဧိၤဒံးဧိၤအသိးန့ၣ်လီၤ.
ဒီးထံအိၣ်ဖှိၣ်နနါဒ့အူသဖှိတၢ်,ထံတဖၣ်ဆၢထၢၣ်ဒ်တၢ်စိထီၣ်အသိး,တၢ်ယိာ်အထံလီၤသကၤလၢပီၣ်လဲၣ်အသးကံၢ်ပူၤလီၤ.
တၢ်အဒုၣ်အဒါစံး, ယကလူၤအီၤ, ယကချုးန့ၢ်အီၤ, ယကနီၤဖးတၢ်ဂုာ်ဆူၣ်န့ၢ်, ယသးကမံလၢအဂ့ၢ်,ယကဘ့ၣ်ထီၣ်ယနး, ယစုကမၤဟးဂီၤကွံာ်အီၤလီၤ.
10 နအူတၢ်လၢနကလံၤ, ပီၣ်လဲၣ်မၤဘံးမၤဘၢအီၤ,လီၤဒးဝဲဒ်ပှာ်သူအသိးလၢထံဖးဒိၣ်အပူၤလီၤ.
11 ယွၤဧၢ, မ့ၢ်မတၤလီၤဂာ်နၤလၢကစၢ်တဖၣ်အကျါတ ဂၤလဲၣ်. မ့ၢ်မတၤလီၤဂာ်နၤအိၣ်ဒီးတၢ်လၤကပီၤ လၢ တၢ်စီဆှံ, လၢပှၤစံးထီၣ်ပတြၢၤလၢတၢ်ပျံၤတၢ်ဖုး,လၢအမၤတၢ်လီၤလးတဂၤလဲၣ်.
12 နယူာ်ထီၣ်နစုထွဲ, ဟီၣ်ခိၣ်ယူၢ်လီၤကွံာ်အီၤ,
13 နမိၤပှၤဂီၢ်မုၢ်လၢနပှ့ၤက့ၤလၢနဘျုးနဖှိၣ်,နဆှၢအီၤလၢနဂံၢ်နဘါဆူနအိၣ်နဆိးအလီၢ်စီဆှံလီၤ.
14 ပှၤဂီၢ်မုၢ်ကနၢ်ဟူ, ကပျံၤဝဲ,တၢ်သးအုးကဟံးဃာ်ပှၤဖလ့ၡသးဖိ,
15 တုၤနုၤတစုကီၢ်အဒိၣ်အစကီၤတဖၣ်ကမၢကမၣ်,မိၤအးအပဒိၣ်တဖၣ်တၢ်ကနိးကစုာ်ဟံးဃာ်အီၤ,ပှၤကနၤဧၣ်ဖိပှံၢ်လီၤကွံာ်ခဲလၢာ်လီၤ.
16 တၢ်ပျံၤတၢ်ဖုးလီၤဘၣ်အီၤ,အိၣ်ဂၢၢ်ဒ်လၢၢ်အသိးလၢနစုအတၢ်ဒိၣ်အဃိ,တုၤနပှၤဂီၢ်မုၢ်ခီဂာ်တၢ်, ယွၤဧၢ,တုၤပှၤဂီၢ်မုၢ်လၢနပှ့ၤတ့ၢ်အီၤခီဂာ်တၢ်လီၤ.
17 နကဒုးဟဲနုာ်အီၤ, ဒီးသူၣ်လီၤအီၤလၢနတၢ်န့ၢ်သါအကစၢၢ်လိၤ,ဖဲနပာ်လၢနအိၣ်နဆိးအလီၢ်, ယွၤဧၢ,တၢ်အလီၢ်စီဆှံ, ကစၢ်ဧၢ, လၢနစုကတဲာ်ကတီၤလီၤ.
18 ယွၤကကဲစီၤပၤအစိၤစိၤအဃၣ်ဃၣ်လီၤ.
19 အဂ့ၢ်ဒ်အံၤ, ဖၤရိၤအကသ့ၣ်လဲၤနုာ်ဒီး အလ့ၣ်က ဟၣ်, ဒီးအပှၤဒိးကသ့ၣ်ဆူပီၣ်လဲၣ်ပူၤ, ဒီးယွၤဒုးဟဲ က့ၤကဒီးပီၣ်လဲၣ်ထံလၢအဖီခိၣ်လီၤ. မ့မ့ၢ်ပှၤအံၣ်စရ့ လးဖိလဲၤလၢခိလၢပီၣ်လဲၣ်အသးကံၢ်ပူၤန့ၣ်လီၤ.
20 ဒီးဝံပိာ်မုၣ်, စီၤအၤဟရိၣ်အဒီပုၢ်ဝဲၢ်မုၣ်, နီၢ်မံးရယၣ် ဟံးန့ၢ်ဒၢတဖျၢၣ်လၢအစုပူၤ, ဒီးပိာ်မုၣ်ခဲလၢာ်လဲၤပိာ် ထီၣ်အခံအိၣ်ဒီးဒၢဒီးတၢ်ဂဲၤကလံၣ်တဖၣ်လီၤ.
21 ဒီးနီၢ်မံးရယၣ်စံးဆၢအီၤ,သးဝံၣ်ထီၣ်ယွၤတက့ၢ်. မ့ၢ်အကဟုဒိၣ်အကညီၢ်ဒိၣ်အဂ့ၢ်,ကသ့ၣ်ဒီးပှၤဒိးကသ့ၣ်န့ၣ်တ့ၢ်လီၤကွံာ်လၢပီၣ်လဲၣ်ပူၤလီၤ.
22 ဒီးစီၤမိၤရှ့ဒုးဟးထီၣ် ပှၤအံၣ်စရ့လးဖိလၢ ပီၣ်လဲၣ် ဂီၤ, ဒီးလဲၤဝဲဆူပှၢ်မုၢ်ကနၢရှူၢ်, ဒီးလဲၤဝဲသၢနံၤကျဲလၢ ပှၢ်မုၢ်ကနၢဒီးတထံၣ်န့ၢ်ဘၣ်ထံဧိၤနိဧိၤဘၣ်.
23 ဒီးတုၤအတုၤဝဲလၢမၤရၤဒီး, အီမၤရၤအထံန့ၣ်တကဲ ဘၣ်, အဂ့ၢ်ဒ်အံၤ, ခၣ်ဝဲလီၤ. မၤသးဒ်န့ၣ်ဒီးကိးဝဲအ မံၤလၢမၤရၤလီၤ.
24 ဒီးပှၤဂီၢ်မုၢ်ကဒူးကဒ့ၣ်တၢ်လၢ စီၤမိၤရှ့အလိၤ, ဒီး စံးဝဲဒၣ်, ပကအီမနုၤလဲၣ်.
25 ဒီးစီၤမိၤရှ့ကိးထီၣ်ယွၤ, ဒီးယွၤဒုးနဲၣ်အီၤလၢသ့ၣ်တ ထံးလီၤ. ဒီးတ့ၢ်လီၤဝဲလၢထံကျါဒီးထံဘျါထီၣ်ဝဲလီၤ. ဖဲန့ၣ်ပာ်တၢ်သိၣ်တၢ်သီ, ဒီးတၢ်စံၣ်ညီၣ်လၢအဂီၢ်, ဒီး ဖဲန့ၣ်မၤကွၢ်အီၤလီၤ.
26 ဒီးစံးဝဲဒၣ်, နမ့ၢ်ကနၣ်ယွၤနကစၢ်အကလုၢ် သပှၢ် တၢၢ်, ဒီးမၤတၢ်တီတၢ်လိၤလၢအမဲာ်ညါ, ဒီးပာ်နၢ်ဟူ နနၢ်လၢအတၢ်မၤလိာ်, ဒီးတိၢ်န့ၢ်ဖံးဃာ်အတၢ်သိၣ် တၢ်သီခဲလၢာ်ဒီး, တၢ်ဆူးတၢ်ဆါလၢယဒုးဘၣ်ပှၤအဲၤ ကူပတူးဖိန့ၣ်ယတပာ်ဘၣ်လၢနလိၤနီတမံၤဘၣ်.အဂ့ၢ်ဒ်အံၤ, ယမ့ၢ်ယွၤလၢအမၤဘျါက့ၤနၤလီၤ.
27 ဒီးဟဲတုၤလၢအ့လံၣ်, ဖဲထံပူၤတဆံခံပူၤဒီးသ့ၣ်စူၣ် ပလိၣ်အိၣ်အထံးနွံဆံ, ဒီးသူၣ်အဒဲလၢထံအဃၢၤလီၤ.