2
1 တၢ်န့ၣ်တဖၣ်အလီၢ်ခံ တုၤစီၤပၤအဃၤၡဝ့ရိၣ်အသး ထီၣ်စၢ်လီၤဝဲဒီး, သ့ၣ်နီၣ်ထီၣ်က့ၤဝဲလၢနီၢ်ဝးၡတံၤ, ဒီး တၢ်လၢအဝဲဒၣ်မၤဝဲ, ဒီးတၢ်လၢအစံၣ်ညီၣ် လၢအလိၤ လီၤ.
2 ဒီးစီၤပၤအခ့အပှၤတဖၣ် လၢအမၤအတၢ်စံးဘၣ်အီၤ, မ်ပှၤဃုန့ၢ်စီၤပၤလၢဖိသၣ်ပိာ်မုၣ်, ပှၤမုၣ်လိၣ်ဘိလၢအ က့ၢ်အဂီၤဂ့ၤတဖၣ်န့ၣ်တက့ၢ်.
3 ဒီးမ်စီၤပၤပာ်ပဒိၣ်တဖၣ် လၢအဘီအမုၢ်အထံအကီၢ်ကိးဘ့ၣ်ဒဲးအပူၤ ဒ်သိးအက ဒုးအိၣ်ဖှိၣ်ဖိသၣ်ပိာ်မုၣ်, ပှၤမုၣ်လိၣ်ဘိလၢအက့ၢ်အဂီၤ ဂ့ၤခဲလၢာ်လၢနူၢ်ရှူၡၣ်, လၢပိာ်မုၣ်အဟံၣ်ပူၤဆူစီၤပၤအ ပှၤဒ့ဒံၣ်စီၤဟ့က့ၤအစုပူၤ, လၢအပၢၤပိာ်မုၣ်ပိာ်မၢၤ, ဒီးမ် ပှၤဟ့ၣ်ပိာ်မုၣ်လၢသိနၢမူတဖၣ်,
4 ဒီးမ်ဖိသၣ်ပိာ်မုၣ်လၢ အဂ့ၤလၢစီၤပၤအမဲာ်တဂၤကဲထီၣ် နီၢ်ပၤမုၣ်လၢနီၢ်ဝးၡ တံၤအလီၢ်တက့ၢ်. ဒီးတၢ်တမံၤန့ၣ်ဂ့ၤဝဲလၢစီၤပၤအမဲာ်, ဒီးမၤဝဲဒ်န့ၣ်လီၤ.
5 ပှၤယူဒၤဖိတဂၤအိၣ်ဝဲလၢနူၢ်ရှူၡၣ်အပူၤ, ဒီးအမံၤမ့ၢ် စီၤမၢ်ဒကဲၤ, စီၤယၤအံၢ်အဖိခွါ, စီၤၡံမံၤအဖိခွါ, စီၤကံၣ် အဖိခွါ,
6 ပှၤဘံၣ်ယၤမံၣ်ဖိလၢပှၤစိာ်ထီၣ်ကွံာ်ဝဲလၢယ ရူၤၡလ့ၣ်ဒီးပှၤလၢတၢ်မၢကဲကုၢ်အီၤ, ဒီးပှၤစိာ်ထီၣ်ကွံာ် ဝဲဒီးယူဒၤအစီၤပၤယံးကၤနံယၤ, လၢဘၤဘူၤလိၣ်အစီၤ ပၤနဘူၤကးန့စၢ်စိာ်မၢကဲကုၢ်အီၤလီၤ.
7 ဒီးအဝဲဒၣ်န့ၣ် လုၢ်အီၣ်လုၢ်အီနီၢ်ဟဒးစၤ (အဝဲဒၣ် မ့ၢ်နီၢ်အ့ၤစတၢ်), အဖါတံၢ်အဖိမုၣ်လီၤ. အဂ့ၢ်ဒ်အံၤ, အ မိၢ်ဒီးအပၢ်တအိၣ်လၢၤဘၣ်. ဒီးဖိသၣ်ပိာ်မုၣ်အက့ၢ်အ ဂီၤဂ့ၤ, အိၣ်ဒီးအဃံအလၤလီၤ. ဒီးတုၤအမိၢ်အပၢ်သံဝဲ ဒီး, စီၤမၢ်ဒကဲၤဟံးန့ၢ်အီၤ, ဒီးပာ်အီၤလၢအဖိမုၣ်ဒၣ်ဝဲ အလီၢ်န့ၣ်လီၤ.
8 ဒီးတုၤစီၤပၤအတၢ်မၤလိာ်, ဒီးအတၢ် စံၣ်ညီၣ်ဟူထီၣ်ဝဲ, ဒီးတုၤဖိသၣ်ပိာ်မုၣ်အိၣ်ဖှိၣ်ရိဖှိၣ်လၢ နူၢ်ရှူၡၣ်အပူၤ လၢစီၤဟ့က့ၤအစုပူၤဒီး, ပှၤဟဲစိာ်စ့ၢ်ကီး နီၢ်အ့ၤစတၢ် ဆူစီၤပၤအဟံၣ်ပူၤ, ဆူပှၤပၢၤပိာ်မုၣ်စီၤဟ့ က့ၤအစုပူၤလီၤ.
9 ဒီးဖိသၣ်ပိာ်မုၣ်တဂၤန့ၣ် ဂ့ၤဝဲလၢအမဲာ်, ဒီးဘၣ်ဘျုး ဘၣ်ဖှိၣ်လၢအမဲာ်ညါ, ဒီးဟ့ၣ်လီၤဝဲချ့ချ့လၢသိနၢမူတ ဖၣ်, ဒီးအဂီၢ်တဖၣ်, ဒီးအဖိသၣ်ပိာ်မုၣ်နွံဂၤလၢတၢ်ဃု ထၢအီၤလၢစီၤပၤအဟံၣ်ပူၤ, ဒီးပာ်အီၤဒီး အဖိသၣ်ပိာ်မုၣ်တဖၣ်လၢတၢ်အလီၢ် အဂ့ၤကတၢၢ်လၢ ပိာ်မုၣ်အဟံၣ် ပူၤလီၤ.
10 နီၢ်အ့ၤစတၢ် တဒုးနဲၣ်ဘၣ်အပှၤတကလုာ်ဒီး အဘူး အတံၢ်ဘၣ်. အဂ့ၢ်ဒ်အံၤ, စီၤမၢ်ဒကဲၤမၤလိာ်အီၤဒ်သိး အသုတဒုးနဲၣ်ဝဲတဂ့ၤလီၤ.
11 ဒီးစီၤမၢ်ဒကဲၤဟးဝ့ၤဝီၤတၢ်လၢ ပိာ်မုၣ်အဟံၣ်အဂၢၤ အမဲာ်ညါကိးမုၢ်နံၤမုၢ်နၤဒဲး, နီၢ်အ့ၤစတၢ်အိၣ်မုာ်ဧါတ အိၣ်မုာ်ဧါန့ၣ်, တၢ်ကမၤအသးဒီးအီၤမနုၤမနုၤလဲၣ်န့ၣ် ဒ်သိးအကသ့ၣ်ညါလီၤ.
12 ဒီးဒ်တၢ်မၤလိာ်ပိာ်မုၣ်အသိး, လၢအအိၣ်တ့ၢ်တဆံခံ လါအလီၢ်ခံန့ၣ်, တုၤဖိသၣ်ပိာ်မုၣ်တဂၤတသါတဂၤတ သါကလဲၤနုာ်လၢ စီၤပၤအဃၤၡဝ့ရိၣ်အအိၣ်န့ၣ် အမုၢ်အလါဘၣ်စုာ်စုာ်ဒီး, (အဂ့ၢ်ဒ်အံၤ, အတၢ်မၤကဆှီအ မုၢ်နံၤတဖၣ်လၢထီၣ်ပှဲၤထီၣ်ဒ်အံၤ, ဃုလါအိၣ်ဒီးမူရၣ်အသိ, ဒီးဃုလါအိၣ်ဒီးတၢ်နၢမူ, ဒီးပိာ်မုၣ်အသိနၢမူ တဖၣ်လီၤ),
13 ဖိသၣ်ပိာ်မုၣ်ဟဲနုာ်လၢစီၤပၤအအိၣ်ဒ်န့ၣ် အသိးလီၤ. တုၤအကဟးထီၣ်လၢပိာ်မုၣ်အဟံၣ်ဆူ စီၤ ပၤအဟံၣ်ပူၤဒီး, ကယဲၢ်တၢ်လၢအဘၣ်အသး ပှၤဟ့ၣ် ဝဲလီၤ.
14 လဲၤနုာ်ဝဲလၢမုၢ်ဟါ, ဒီးလၢမုၢ်ဆ့ၣ်ထီၣ်တနံၤန့ၣ်က့ၤ က့ၤဝဲဆူပိာ်မုၣ်အဟံၣ်ခံဟံၣ်တဟံၣ်, ဆူစီၤပၤအပှၤဒ့ ဒံၣ် စီၤၡၤၡကးအစုပူၤလၢအပၢၤ ပှၤသံၣ်မါတဖၣ်လီၤ. ဒီးစီၤပၤမ့ၢ်တဘၣ်အသးလၢအီၤ, ဒီးတၢ်မ့ၢ်တကိးဘၣ် အီၤလၢအမံၤဘၣ်ဒီး, တဟဲနုာ်လၢၤဘၣ်ဆူ စီၤပၤအ အိၣ်ဘၣ်.
15 ဒီးတုၤစီၤမၢ်ဒကဲၤ အဖါတံၢ်စီၤအဘံဃယ့းလး အဖိ မုၣ်လၢစီၤမၢ်ဒကဲၤပာ်ဝဲလၢ အဖိမုၣ်ဒၣ်ဝဲတဂၤ ကလဲၤ နုာ်ဆူစီၤပၤအအိၣ်န့ၣ်အမုၢ်အလါဘၣ်ဝဲဒီး, တၢ်လၢပှၤ ပၢၤပိာ်မုၣ်စီၤပၤအပှၤဒ့ဒံၣ်စီၤဟ့က့ၤတဂၤ ပာ်လီၤဝဲအ မဲာ်ညါန့ၣ်တဃ့ဘၣ်တၢ်ဘၣ်. ဒီးနီၢ်အ့ၤစတၢ်ဘၣ်ဘျုး ဘၣ်ဖှိၣ်လၢကယဲၢ်ပှၤလၢအကွၢ်အီၤခဲလၢာ်အမဲာ်လီၤ.
16 ဒီးပှၤစိာ်နီၢ်အ့ၤစတၢ်ဆူ စီၤပၤအဃၤၡဝ့ရိၣ်အအိၣ် လၢဘီမုၢ်အဟံၣ်, လၢလါဆံဆဲၣ်လါတလါ, လါတ့ ဘ့းအပူၤ, လၢအကဲစီၤပၤနွံနံၣ်တနံၣ်န့ၣ်လီၤ.
17 ဒီးစီၤပၤအဲၣ်နီၢ်အ့ၤစတၢ်ဒိၣ်န့ၢ် ပိာ်မုၣ်ခဲလၢာ်တက့ၢ်, ဒီးအဘၣ်ဘျုးဘၣ်ဖှိၣ်, ဘၣ်ကူၢ်ဘၣ်တနာ်ဝဲဒၣ်လၢအ မဲာ်ညါဒိၣ်န့ၢ် ပှၤမုၣ်လိၣ်ဘိခဲလၢာ်တက့ၢ်, ဒီးပာ်ဘီမုၢ် အခိၣ်သလုးလၢအခိၣ်, ဒီးပာ်အီၤလၢနီၢ်ပၤမုၣ်လၢနီၢ်ဝး ၡတံၤအလီၢ်န့ၣ်လီၤ.
18 အန့ၣ်ဒီးစီၤပၤမၤတၢ်အီၣ်တၢ်အီဖးဒိၣ်လၢ အပဒိၣ်ဖး ဒိၣ်, ဒီးအခ့အပှၤခဲလၢာ်အဂီၢ်လၢအမ့ၢ်နီၢ်အ့ၤစတၢ်အ တၢ်အီၣ်တၢ်အီ, ဒီးပျၢ်တၢ်လၢကီၢ်တဖၣ်အပူၤ, ဒီးဟ့ၣ်လီၤတၢ်ဟ့ၣ်တဖၣ်ဒ်တၢ်အိၣ်လၢ စီၤပၤအစုပူၤအသိးန့ၣ်လီၤ.
19 ဒီးတုၤပှၤမုၣ်လိၣ်ဘိ အိၣ်ဖှိၣ်ရိဖှိၣ်ခံဘျီတဘျီန့ၣ်ဒီး, စီၤမၢ်ဒကဲၤဆ့ၣ်နီၤလၢစီၤပၤအပဲတရီပူၤန့ၣ်လီၤ.
20 နီၢ်အ့ၤစတၢ်တဒုးနဲၣ်ဒံးဘၣ်အဘူးအတံၢ်, ဒီးအပှၤတ ကလုာ်ဘၣ်, ဒ်စီၤမၢ်ဒကဲၤမၤလိာ်အီၤအသိးန့ၣ်လီၤ. အ ဂ့ၢ်ဒ်အံၤ, နီၢ်အ့ၤစတၢ်တိၢ်န့ၢ်စီၤမၢ်ဒကဲၤအတၢ်မၤလိာ်ဒ် လၢတၢ်လုၢ်အီၤလၢ အအိၣ်အဆၢအကတီၢ် အသိးန့ၣ် လီၤ.
21 တၢ်လၢမုၢ်နံၤတဖၣ်န့ၣ် ဖဲစီၤမၢ်ဒကဲၤဆ့ၣ်နီၤလၢစီၤပၤ အပဲတရီအဖၢမုၢ်န့ၣ်, စီၤပၤအပှၤဒ့ဒံၣ်ခံဂၤ လၢပှၤပၢၤ တြဲၤအကျါန့ၣ်, စီၤဘံးကသၣ်, ဒီးစီၤတ့ရ့ၣ်အသးထီၣ်, ဒီးဃုပာ်အစုလၢစီၤပၤအဃၤၡဝ့ရိၣ်အလိၤလီၤ.
22 ဒီးတၢ်န့ၣ်တမံၤ စီၤမၢ်ဒကဲၤသ့ၣ်ညါဝဲဒီး, စံးဘၣ်တဲ ဘၣ်နီၢ်ပၤမုၣ်အ့ၤစတၢ်, ဒီးနီၢ်အ့ၤစတၢ်န့ၣ် စံးဘၣ်တဲ ဘၣ်စီၤပၤလၢ စီၤမၢ်ဒကဲၤအမံၤလီၤ.
23 ဒီးတုၤပှၤဃုတၢ် လၢတၢ်န့ၣ်တမံၤအဂ့ၢ်အကျိၤ, ဒီးထံၣ်န့ၢ်ဝဲဒီး, ပှၤဘျး ထီၣ်အီၤလၢသ့ၣ်အလိၤခံဂၤလၢာ်, ဒီးကွဲးတၢ်လၢအဂ့ၢ် အကျိၤလၢ လံာ်ကွဲးနီၣ်တၢ်အပူၤ လၢစီၤပၤအမဲာ်ညါ လီၤ.