2
1 ယစံးလၢယသးကံၢ်ပူၤ, ဟဲ, ယကမၤကွၢ်နၤလၢတၢ် နံၤတၢ်အ့လီၤ. မၤသးဒ်န့ၣ်ဒီး, မုာ်လၤတၢ်လၢတၢ်ဂ့ၤ တက့ၢ်. ဒီးကွၢ်ကွၢ်, အဝဲန့ၣ်မ့ၢ်စ့ၢ်ကီးတၢ်ကလီကလီ လီၤ.
2 ယစံးလၢတၢ်နံၤတၢ်အ့အဂ့ၢ်န့ၣ် မ့ၢ်တၢ်ပျုၢ်, ဒီး လၢတၢ်သးခုအဂ့ၢ်န့ၣ်မ့ၢ်အဂိာ်မနုၤလဲၣ်.
3 ယဃုလၢ ယသးလၢယကမၤမုာ်ယညၣ်လၢ စပံးထံ, ဒီးယသး ဆှၢဒံးယၤလၢတၢ်ကူၣ်သ့, လၢယကဟံးဃာ်ပှၤဟးဂီၤ ဖိအတၢ်တုၤယကထံၣ်တၢ်လၢအဂ့ၤ ဒီးပှၤကညီဖိလၢ အကမၤလၢမူခိၣ်အဖီလာ်တစိၤဒၣ်အီၤလီၤ.
4 ယမၤ တၢ်အဒိၣ်တဖၣ်, ယမၤဟံၣ်, ယသူၣ်စပံးအလီၢ်,
5 ယ သူၣ်ဖီအလီၢ်, ဒီးတၤသၣ်အလီၢ်, ဒီးယသူၣ်သ့ၣ်လၢအ သၣ်တၢ်ကိးကလုာ်ဒဲးလီၤ.
6 ယမၤကမါတဖၣ်ဒ်သိး ကဖှိၣ်ထံလၢသ့ၣ်တဖုဖဲ တၢ်ဒုးမဲထီၣ်သ့ၣ်တဖၣ်န့ၣ် လီၤ.
7 ယမၤန့ၢ်ကုၢ်ပိာ်ခွါ, ဒီးကုၢ်ပိာ်မုၣ်, ဒီးယအိၣ်ဒီး ကုၢ်အိၣ်ဖျဲၣ်လၢယဟံၣ်ပူၤ, ဒီးယအိၣ်ဒီးဂီၤဖံးအဖုတ ဖၣ်, ဒီးသိဒီးမဲာ်တဲးလဲးအါအါကလဲာ်, အါန့ၢ်ကယဲၢ်ပှၤ လၢအအိၣ်ဝဲ, လၢယမဲာ်ညါလၢယရူၤၡလ့ၣ်အပူၤတ က့ၢ်လီၤ.
8 ဒီးယပာ်ဖှိၣ်ကျိၣ်ဧိၤစ့ဧိၤ, ဒီးထူဧိၤလွဲၤဧိၤ, ဒီးတၢ်လုၢ်ဒိၣ်ပှ့ၤဒိၣ်ဘၣ်ဃးဒီး စီၤပၤဒီးထံဧိၤကီၢ်ဧိၤ တဖၣ်လီၤ. ယမၤန့ၢ်ပှၤသးဝံၣ်တၢ်ပိာ်ခွါ, ဒီးပှၤသးဝံၣ် တၢ်ပိာ်မုၣ်, တၢ်လၢပှၤကညီဖိမုာ်လၤလၢအီၤ, ပမါဒီးပ သံၣ်မါတဖၣ်လီၤ.
9 ဒီးယဒိၣ်ထီၣ်ဒီးယတၢ်အါထီၣ်န့ၢ် ကယဲၢ်ပှၤလၢအအိၣ်ဝဲလၢ ယမဲာ်ညါယရူၤၡလ့ၣ်အပူၤ တက့ၢ်လီၤ.ဒီးယတၢ်ကူၣ်သ့အိၣ်ဒံးစ့ၢ်ကီးဒီးယၤလီၤ.-
10 ဒီးကယဲၢ်တၢ်လၢယမဲာ်ဆၢတၢ်န့ၣ် ယဒုးန့ၢ်ဘၣ်အီၤ, ယတတြီယသးလၢတၢ်ဒုးခုယသးနီတမံၤဘၣ်. အဂ့ၢ်ဒ် အံၤ, ယသးခုလၢယမၤတၢ်ခဲလၢာ်အပူၤ, ဒီးအဝဲန့ၣ်မ့ၢ် ယဂီၢ်လၢယမၤတၢ်အဃိလီၤ.
11 ဒီးယကွၢ်ကယဲၢ်တၢ်မၤ လၢယစုမၤဝဲ, ဒီးတၢ်မၤလၢယမၤဒီးတၢ်ဘှံးယသး, ဒီး ကွၢ်ကွၢ်, ကယဲၢ်တၢ်ခဲလၢာ်မ့ၢ်တၢ်ကလီကလီ, ဒီးတၢ် မၤတဂိာ်တသီၣ်ဘၣ်တၢ်ဘၣ်, ဒီးတၢ်ဘျုးတၢ်ဖှိၣ်တ အိၣ်ဘၣ်လၢမုၢ်အဖီလာ်ဘၣ်.
12 ဒီးယဃၣ်ယသးဒ်သိးယကကွၢ်တၢ်ကူၣ်သ့, ဒီးတၢ် ပျုၢ်ဒီးပှၤဟးဂီၤဖိအတၢ်လီၤ. အဂ့ၢ်ဒ်အံၤ, ပှၤကညီဟဲ လၢစီၤပၤအလီၢ်ခံန့ၣ် ကမၤမနုၤတမံၤလဲၣ်. တၢ်လၢ ပှၤမၤတ့ၢ်လံလီၤ.
13 ဒီးယထံၣ်လၢတၢ်ကူၣ်သ့ဂ့ၤန့ၢ်ပှၤ ဟးဂီၤဖိအတၢ်ထဲသိးဒီး တၢ်ကပီၤဂ့ၤန့ၢ်တၢ်ခံးတက့ၢ် လီၤ.
14 ပှၤကူၣ်တၢ်သ့အမဲာ်သၣ်န့ၣ် အိၣ်ဝဲလၢအခိၣ် လီၤ. မ့မ့ၢ်ပှၤဟးဂီၤဖိလဲၤတၢ်လၢတၢ်ခံးကျါလီၤ.ဘၣ် ဆၣ်ဒီးယထံၣ်လၢ တၢ်တမံၤဃီဘၣ်ပှၤခဲလၢာ်လီၤ.-
15 ဒီးယစံးလၢယသးကံၢ်ပူၤ, ဒ်တၢ်ဘၣ်ပှၤဟးဂီၤဖိအသိး န့ၣ်တၢ်ကဘၣ်ယၤဒၣ်လဲာ်, သတးဒီးယကူၣ်တၢ်သ့ ဒိၣ်န့ၢ်အန့ၣ်တက့ၢ်မ့ၢ်အဘၣ်မနုၤလဲၣ်. တုၤနုၤတစုယ စံးလၢယသးကံၢ်ပူၤ, အဝဲန့ၣ်စ့ၢ်ကီးမ့ၢ်တၢ်ကလီကလီ လီၤ.
16 အဂ့ၢ်ဒ်အံၤ, တၢ်သ့ၣ်နီၣ်ထီၣ်က့ၤပှၤကူၣ်တၢ်သ့ အါန့ၢ်ပှၤဟးဂီၤဖိ, တအိၣ်ဘၣ်လီၤထူလီၤယိာ်ဘၣ်. အ ဂ့ၢ်ဒ်အံၤ, တၢ်လၢအအိၣ်ခဲကနံၣ်အံၤ, ကဘၣ်တၢ်သး ပ့ၤနီၣ်အီၤလၢမုၢ်နံၤတဖၣ်လၢအကဟဲဝဲန့ၣ်လီၤ. ဒီးပှၤ ကူၣ်တၢ်သ့န့ၣ်သံဝဲ, ဒ်ပှၤဟးဂီၤဖိအသိးန့ၣ်မးလဲၣ်.-
17 မၤသးဒ်န့ၣ်ဒီးယသးဟ့တၢ်သးသမူလီၤ. အဂ့ၢ်ဒ်အံၤ, ကယဲၢ်တၢ်မၤလၢအမၤအသးလၢ မုၢ်အဖီလာ်မ့ၢ်တၢ် အၢလၢယမဲာ်ညါလီၤ.အဂ့ၢ်ဒ်အံၤ, ကယဲၢ်တၢ်ခဲလၢာ်မ့ၢ် တၢ်ကလီကလီ, ဒီးတၢ်မၤတဂိာ်တသီၣ်ဘၣ်တၢ်ဘၣ် လီၤ.
18 ဒီးယသးဟ့ကယဲၢ်ယတၢ်မၤလၢယမၤလၢမုၢ်အ ဖီလာ်လီၤ. အဂ့ၢ်ဒ်အံၤ, ယဘၣ်ပာ်လီၤတဲာ်အီၤလၢပှၤ ကညီလၢ အကအိၣ်ဝဲလၢယလီၢ်ခံန့ၣ်လီၤ.
19 ဒီးကမ့ၢ် ပှၤကူၣ်သ့ဧါ, ပှၤဟးဂီၤဖိဧါန့ၣ်မ့ၢ်မတၤသ့ၣ်ညါတဂၤ လဲၣ်.ဒီးကပၢကယဲၢ်ယတၢ်မၤလၢယမၤအီၤ, ဒီးလၢယ ဒုးနဲၣ်ယတၢ်ကူၣ်သ့လၢမုၢ်အဖီလာ်လီၤ.အဝဲန့ၣ်မ့ၢ်စ့ၢ် ကီးတၢ်ကလီကလီလီၤ.
20 မၤသးဒ်န့ၣ်ဒီးယဃၣ် ယသးဒ်သိးယကဒုးဟးဂီၤ ယသးလၢကယဲၢ်တၢ်မၤလၢ ယမၤလၢမုၢ်အဖီလာ်အ ဃိန့ၣ်လီၤ.
21 အဂ့ၢ်ဒ်အံၤ, ပှၤလၢအမၤတၢ်လၢတၢ်ကူၣ်သ့, ဒီးတၢ် သ့ၣ်ညါ, ဒီးတၢ်တီတၢ်လိၤဘၣ်ဆၣ်ဒီး, ဘၣ်ဟ့ၣ်လီၤ အဂီၢ်လၢပှၤလၢအတမၤဘၣ်လၢအဂီၢ်ဘၣ်, အဝဲန့ၣ်မ့ၢ် တၢ်ကလီကလီ, ဒီးတၢ်အၢဖးဒိၣ်လီၤ.
22 အဂ့ၢ်ဒ်အံၤ, ပှၤ ကညီလၢအမၤတၢ်ခဲလၢာ်အဃိ, ဒီးလၢအသးကိၢ်လၢ တၢ်လၢအမၤဝဲလၢမုၢ်အဖီလာ်အဃိန့ၣ် မ့ၢ်အမ့ၢ်မနုၤ လဲၣ်.
23 အဂ့ၢ်ဒ်အံၤ, အမုၢ်နံၤခဲလၢာ်တဖၣ်မ့ၢ်တၢ်သူၣ် အုးသးအုး, ဒီးအတၢ်မၤန့ၣ်မ့ၢ်တၢ်မၤကိၢ်မၤဂီၤ, ဒီးအ သးတအိၣ်ဘှံးဘၣ်လၢမုၢ်နၤဒၣ်လဲာ်ဘၣ်. အဝဲန့ၣ်မ့ၢ် စ့ၢ်ကီးတၢ်ကလီကလီလီၤ.
24 ပှၤကညီအီၣ်တၢ်ဒီးအီတၢ် ဒီးမုာ်လၤတၢ်ဂ့ၤလၢအမၤတၢ်အပူၤန့ၣ်, မ့ၢ်တၢ်ဂ့ၤက တၢၢ်လၢအဂီၢ်လီၤ.အဝဲန့ၣ်စ့ၢ်ကီးယထံၣ်လၢအဟဲလၢ ယွၤအစုလီၤ.
25 အဂ့ၢ်ဒ်အံၤ, မ့ၢ်မတၤအီၣ်တၢ်,ဒီးမ့ၢ်မတၤ မုာ်လၤတၢ်ဒိၣ်န့ၢ်ယၤတဂၤလဲၣ်.
26 အဂ့ၢ်ဒ်အံၤ, ယွၤဟ့ၣ် လီၤပှၤကညီလၢအဂ့ၤလၢအမဲာ်ညါလၢတၢ်ကူၣ်သ့, ဒီး တၢ်သ့ၣ်ညါ, ဒီးတၢ်သးခုလီၤ.မ့မ့ၢ်အဟ့ၣ်လီၤပှၤတၢ်ဒဲး ဘးဖိလၢတၢ်မၤဘှံးအသးဒ်သိးအကထၢထီၣ်တၢ်, ဒီး ပာ်ဖှိၣ်တၢ်ဒ်သိးအကဟ့ၣ်ဝဲလၢ ပှၤဂ့ၤလၢယွၤအမဲာ် ညါလီၤ.အဝဲန့ၣ်မ့ၢ်စ့ၢ်ကီးတၢ်ကလီကလီ, ဒီးတဂိာ်တ သီၣ်ဘၣ်တၢ်ဘၣ်.