30
ဒီးတုၤတၢ်တဖၣ်န့ၣ်ဘၣ်နၤခဲလၢာ်ဒီး, တၢ်ဆိၣ်ဂ့ၤဒီး တၢ်ဆိၣ်အၢလၢယပာ်လီၤလံလၢသုမဲာ်ညါ, ဒီးသုသ့ၣ် နီၣ်ထီၣ်က့ၤအီၤလၢပှၤကလုာ်ခဲလၢာ်အကျါဖဲ ယွၤဟီ ထီၣ်ကွံာ်နၤ, ဒီးနက့ၤကဒါက့ၤဆူယွၤနကစၢ်, ဒီးနဒိ ကနၣ်အကလုၢ်, ဒ်ကယဲၢ်တၢ်လၢယမၤလိာ်နၤလၢမုၢ် မဆါတနံၤအံၤအသိးန့ၣ်, နဲဒၣ်, ဒီးနဖိနလံၤ, လၢန သူၣ်ကံၢ်သးလဲ, ဒီးနသးဒီဖျၢၣ်ညါဒီး, ယွၤနကစၢ် ကဒုးက့ၤက့ၤနကဲကုၢ်တၢ်, ဒီးကသးအိၣ်နၤ, ဒီးကဟဲ က့ၤ, ဒီးထၢဖှိၣ်နၤလၢကယဲၢ်ပှၤကလုာ်အကျါဖဲယွၤန ကစၢ်မၤလီၤပြံလီၤပြါနၤလီၤ. ဒီးပှၤဘၣ်ဃးဒီးနၤမ့ၢ် ဘၣ်တၢ်ဟီထီၣ်ကွံာ်အီၤဆူမူခိၣ်အကတၢၢ်ဒီး, ယွၤန ကစၢ်ကထၢဖှိၣ်နၤဖဲန့ၣ်, ဒီးဟံးန့ၢ်နၤဖဲန့ၣ်လီၤ.
ဒီးယွၤနကစၢ်ကဒုးက့ၤနုာ်နၤဆူ ထံဧိၤကီၢ်ဧိၤအပူၤ လၢနပၢ်တဖၣ်မၤန့ၢ်အီၤဒီးနကမၤန့ၢ်အီၤ, ဒီးအဝဲဒၣ်က မၤဂ့ၤနၤ, ဒီးဒုးအါထီၣ်နၤလၢနပၢ်တဖၣ်အဖီခိၣ်လီၤ.
ဒီးယွၤနကစၢ်ကကူးတရံးနသး, ဒီးနချံနသၣ်အသး, ဒ်သိးနကအဲၣ်ယွၤနကစၢ်လၢနသူၣ်ကံၢ်နသးလဲ, ဒီး နသးဒီဖျၢၣ်ညါ, ဒ်သိးနကမူလီၤ.
ဒီးယွၤနကစၢ်ကပာ်လီၤ တၢ်ဆိၣ်အၢအံၤခဲလၢာ်လၢ နဒုၣ်နဒါအလိၤ, ဒီးလၢပှၤလၢအသးဟ့နၤ, လၢအမၤ အၢမၤသီနၤအလိၤလီၤ.
ဒီးနကဟဲက့ၤ, ဒီးဒိကနၣ်ယွၤနကစၢ်အကလုၢ်အ ကထါ, ဒီးတိၢ်န့ၢ်အတၢ်မၤလိာ်ခဲလၢာ်လၢယမၤလိာ် နၤလၢမုၢ်မဆါတနံၤအံၤလီၤ.
ဒီးယွၤကမၤအါထီၣ်နၤလၢ ကယဲၢ်နမၤတၢ်လၢနစု, လၢနဒၢလီၢ်အတၤသၣ်ဒီး, ဒီးလၢနဆၣ်ဖိကီၢ်ဖိအတၤ သၣ်, ဒီးလၢနဟီၣ်ခိၣ်အတၤသၣ်လၢတၢ်ဂ့ၤအဂီၢ်လီၤ. အဂ့ၢ်ဒ်အံၤ, ယွၤကသးခုကဒီးလၢနဖီခိၣ်, ဒ်အသးခု လၢနပၢ်တဖၣ်အဖီခိၣ်အသိးန့ၣ်လီၤ.
10 ဒီးနမ့ၢ်ဒိကနၣ် ယွၤနကစၢ်အကလုၢ်အကထါဒ်သိး နကတိၢ်န့ၢ်အတၢ်မၤလိာ်, ဒီးအတၢ်သိၣ်တၢ်သီလၢအ ကွဲးအသးလၢ လံာ်တၢ်သိၣ်တၢ်သီအံၤအပူၤ, ဒီးနမ့ၢ် ဃၣ်လိၤနသးဆူယွၤနကစၢ်အအိၣ် လၢနသူၣ်ကံၢ်သး လဲန့ၣ်ဒီး, တၢ်ကမၤအသးဒ်န့ၣ်လီၤ.
11 အဂ့ၢ်ဒ်အံၤ, တၢ်မၤလိာ်အံၤလၢယမၤလိာ်နၤလၢမုၢ် မဆါတနံၤအံၤ တအိၣ်သဒၢဘၣ်ဒီးနၤဘၣ်, ဒီးတအိၣ် လၢအယံၤဘၣ်. 12 တအိၣ်ဘၣ်လၢမူခိၣ်လၢနကစံး, မ့ၢ် မတၤကလဲၤထီၣ်ဆူမူခိၣ်, ဒီးဟဲစိာ်အီၤဆူပအိၣ်, ဒ်သိး ပကနၢ်ဟူ, ဒီးတိၢ်န့ၢ်အီၤတဂၤလဲၣ်န့ၣ်ဘၣ်. 13 ဒီးတ အိၣ်ဘၣ်လၢပီၣ်လဲၣ်ဝၢ်ဘးခီလၢနကစံး, မ့ၢ်မတၤက လဲၤခီဂာ်ပီၣ်လဲၣ်လၢပဂီၢ်, ဒီးဟဲစိာ်အီၤဆူပအိၣ်, ဒ်သိး ပကနၢ်ဟူ, ဒီးတိၢ်န့ၢ်တဂၤလဲၣ်န့ၣ်ဘၣ်. 14 မ့မ့ၢ်တၢ် ကတိၤန့ၣ်အိၣ်ဘူးဒီးနၤ, ဖဲနထးခိၣ်, ဒီးလၢနသးကံၢ် ပူၤ, ဒ်သိးနကတိၢ်န့ၢ်အီၤလီၤ.
15 ကွၢ်, တၢ်လၢမုၢ်မဆါတနံၤအံၤ, ယပာ်လီၤတၢ်မူ ဒီးတၢ်ဂ့ၤ, ဒီးတၢ်သံဒီးတၢ်အၢလၢနမဲာ်ညါလီၤ.
16 အဂ့ၢ်ဒ်အံၤ, ယမၤလိာ်နၤလၢမုၢ်မဆါတနံၤအံၤ, လၢ နကအဲၣ်ယွၤနကစၢ်, လၢနဘၣ်ပိာ်အကျဲ, ဒီးတိၢ်န့ၢ် အတၢ်မၤလိာ်, ဒီးအတၢ်သိၣ်တၢ်သီ, ဒီးအတၢ်စံၣ် ညီၣ်, ဒ်သိးနကမူ, ဒီးအါထီၣ်လီၤ. ဒီးယွၤနကစၢ်က ဆိၣ်ဂ့ၤနၤလၢကီၢ်ပူၤဖဲနလဲၤမၤန့ၢ်အီၤလီၤ.
17 မ့မ့ၢ်နသးမ့ၢ်ဃၣ်ကွံာ်, ဒီးနမ့ၢ်တဒိကနၣ်ဘၣ်, ဒီး တၢ်မ့ၢ်ကလံာ်န့ၢ်နၤ, ဒီးနဘါထီၣ်ကစၢ်အဂၤတဖၣ်,ဒီး မၤအတၢ်ဒီး, 18 ယဒုးနဲၣ်သုလၢမုၢ်မဆါတနံၤအံၤ, လၢ သုကဟးဂီၤသပှၢ်တၢၢ်, သုတအိၣ်ကၢအိၣ်ခိးဘၣ်လၢ ကီၢ်ပူၤဖဲနလဲၤခီဂာ်ယၢ်ဒ့ၣ် ဒ်သိးနကမၤန့ၢ်အီၤဘၣ်.-
19 တၢ်လၢမုၢ်မဆါတနံၤအံၤ ယပာ်မူခိၣ်ဒီးဟီၣ်ခိၣ်လၢတၢ် အုၣ်အသးလၢသုဂ့ၢ်လီၤ. ယပာ်လီၤလံတၢ်မူဒီးတၢ်သံ, တၢ်ဆိၣ်ဂ့ၤဒီးတၢ်ဆိၣ်အၢ, လၢသုမဲာ်ညါလံ. ဒီးဃုထၢ တၢ်မူ, ဒ်သိးနဲဒၣ်ဒီးနချံနသၣ်ကမူ, 20 ဒ်သိးနကအဲၣ် ယွၤနကစၢ်, ဒ်သိးနကဒိကနၣ်အကလုၢ်, ဒ်သိးနကစဲ ဘူးဒီးအီၤ, (အဂ့ၢ်ဒ်အံၤ, အဝဲဒၣ်မ့ၢ်နတၢ်မူ, ဒီးနသူၣ် ကၢသးခိးလီၤ), ဒ်သိးနကအိၣ်လၢကီၢ်ပူၤလၢယွၤဆိၣ် တၢ်ဒီးနပၢ်တဖၣ်, ဒီးစီၤအၤဘြၤဟၣ်, စီၤအံၤစဲး, ဒီး စီၤယၤကိာ်လၢအကဟ့ၣ်လီၤဝဲလၢအီၤန့ၣ်တက့ၢ်လီၤ.