9
Yhenkyoh jens lyis Soetuon
1 Heika Yhensain dah loeus nghuot.Ref 9.1: Esa 17.1-3; Yer 49.23-27; Amo 1.3-5 Ref 9.1-4: Esa 23.1-18; Ezk 26.1—28.26; Yol 3.4-8; Amo 1.9-10; Mat 11.21-22; Luk 10.13-14
Hadrak mau yahge Damasku wus xiklyis joeng cho zaudang khyoq goeus. Israel vkoq kyingh ma nghuot, dius jens dvnganh eq Yhensain yah sen.
2 Hadrak yah maukyo nghuot dah Hamat mau eq nyang yah sen lha, Taire yahge Sidon wus jens, nyamoq dah lyes bang dvnganh bos.
3 Taire wus gas, nyah xiklyis jesdvp tsain kuot toh, ngwis xing ka tsohmop teh nyoshoq boms joq.
4 Nghuot laus eq Yhensain ka nyang yoh zis dvnganh yoeus tyamp das. Nyang yoh khuiq cho lhyi thomh mas doeuh khyoq las wus lyis gas nyi yah ngheq tyamp das.
5 Haih yvlyis Ashkelon wus nyvng las gyuk das. Gaza wus eq nyvng das las shanghsenh das. Ekron eq nyvng das las nyah dah nghamhloms cho dyoq tyamp das. Gaza gas nyah hwankti thank tyamp las, Ashkelon wus gas dius ma nyeis lo jyamhjyuklhyuk joq das.Ref 9.5-7: Esa 14.29-31; Yer 47.1-7; Ezk 25.15-17; Yol 3.4-8; Amo 1.6-8; Zep 2.4-7
6 Ashdod wus mas diuszas nyau nyeis das. Yhensain taiq, Ngos hai Philisti jens dah khwank cho dvnganh lyis khyoq tyamp das.
7 Nyamoq suih bos dah shoh, gohtoeu tungtoh zonoms lyis ma zo lo das. Doeng nyeis bang dvnganh gas, ngah dius nyau mas bos los das. Nyamoq gas Yuda vkoq mas dah dvhuh teh bweh los das. Ekron jens eq Yebusi jens bweh teh ngah dius jens mas bos das.
8 Ngos ngah mau cho jesphung jens ma suh lai shoq yoeuh gomh yoeuh zungh das. Lhoeng bang ngah dius jens lyis zaiq dah toeuh ma dyei lo das. Ngos ngah dius jens khasoeh xauh kham zis nyvng goeus, ge.
Jweh Los das Hwankti
9 Gauslaus geh! gauslaus geh,Ref 9.9: Mat 21.5; Yoh 12.15
Zion dius jens eh! Yerusalem dius jens eh,
gauslaus zis yah kaiq geh!
Yoeuh aq, nah hwankti ka nah jyank mas los nyeis!
Nyang gas ung cho zainsmuh yah khyuot yoeus das zis los laus eq
ehnyet nyhen mha gyoh zis yah
mauhlyihzoe zains dah lo,
mauhlyihzoe lo thoq mas ji las los.
10 Yhensain taiq,Ref 9.10: Chd 72.8
Ngos Israel masyah jeslhyingh jens yahge
Yerusalem masyah nyang jens lyis tomh tyamp das.
Jeszan yvmas yhung dah lyei jens lyis mhont tyamp das.
Nah hwankti ka dius nyau jens mas nyenstap nhang das.
Nyang gas thomh masyah thomh jweh shoq,
Uphrat lvng masyah nyeisjvng thank shoq guon das.
Yhensain Dius lyis doms toeu
11 Yhensain taiq,Ref 9.11: Dyu 24.8
Lomhxangh suih yah kyihau tap las
nvng yah toh dah ngah thanghchvp gvng mas
ngos nah dius jens lyis lhuiq kat das,
jeis ma bos dwang ge, jonsdoeus masyah lhuiq kat das.
12 Jonsdoeus loh bang eh tauh los geh!
Gvshih namoq nghamhloms chank bos goeus.
Namoq dah jesluiq las sam joqyos mas tauh los geh,
Namoq kham khoq goeus dah shohjyen xiklyis
ngos namoq lyis shvmanh aiq huon doms dyei das oen gvshih ngos namoq lyis taiq.
13 Ngos Yuda lyis jeslo dah lyei teh,
Israel lyis nyo teh yhung das.
Ngos Zion mha dah vbusbih jens lyis
moengsa teh yhung lha Greece jens lyis zan das.
14 Yhensain ka nyah dius jens nyeis yvmas thuqh los das las,
nyah nyo jens lyis maunyoq nyik teh baiq das.
Yomzains Yhensain ka
lvbuh muot las mautyi pheh yah
lyeisjyang yah jens los das.
15 Maukhung Jesphung Yhensain ka nyah dius jens lyis gos das las
nyamoq gas nyamoq dah jeswus lyis mhont das.
Nyamoq gas jeszan yvmas yhei yet bang teh kaiq las
nyamoq dah jeswus jens dah suih huot das.
Hauh suih gas lomhxangh suih teh yaus las
khuq masyah phon mha huot teh nghuot das, ge.note 9.15 Hebre mas ma bvng.
16 Hauh buisnyeis jweh lyis Yhensain ka nyah dius jens lyis,
yvng yoeuh soeu ka nyah yvng phung lyis jes masyah khyuot yoeus teh, khyuot yoeus das.
Nyamoq gas nyah mau mas,
buismuk mas dah phauhdap luk teh tsain bvng das.
17 Hauh mau gas kha iq gis las yungh joq das lah!
Wotyamh jens gas nyah jyo yahge zvbiq gvng mas kuh las yombos los das.