13
1 Maukhung Jesphung Yhensain taiq, Hauh shishenh jweh lyis Dawi vnyau vshih yahge Yerusalem dius jens lyis nyamoq dah yaunos yahge phvra paiq cho mhayah cheihshang kat das zis jeisthuq dwang dvkoeuq phank los das.
2 Hauh shishenh lyis ngos hau phvra dah nyings jens lyis hauh mau masyah thyuk tyamp das las hank eq hauh yvlyis ma soh lo das. Lvpe nghuot ge soeu hank lyis laus eq thyuk tyamp das. Phvra paiq mes dah ehnyet lyis eq yoeus tyamp das.
3 Dvyuk yuk lvpe pe nyeis shih lyis gas, nyah ungwes uwus nyang, nyang lyis, nvng Yhensain dah dang taiq laus eq dvhwah nyeis yvmvyah nvng sat zis xauh chah ge taiq das. Nyang lvpe pe nyeis lyis nyah ungwes uwus nyang, nyang lyis thauh sat das.
4 Hauh shishenh jweh lyis, lvpe hank eq nyah nyoqnyvng gvng mas ma khwank lo lvpe teh ma kuot lo, dius jens lyis mhuih das zis kyung dah lvpe dyixing ma wuot lo das.
5 Hauh gungsthaiq nyang gas, Ngos lvpe ma nghuot. Ngos yos zwi zo soeu dvnghuot; Ngos dvcaiq yah yos zwi zo los, ge das.note 13.5 Hebre mas ma bvng.
6 Hauh thang lhyi dvyuk yuk gas, Hau nah sainhkhonh mas dah dvm gas cha tsain nghuot lah, ge nyei lyis nyang gas, Buisnoms yhen mha xauh zis nghuot, ge toeuh das, ge.
Mangso Zaudang
7 Maukhung Jesphung Yhensain taiq, Sham eh, Yhet soh aq, ngah muh wons dah yvng yoeuh soeu lhyi zan aq, nyang lyis sat aq, yvng jens dyos loh das. Ngos ngah dius jens lyis zan das las,Ref 13.7: Mat 26.31; Mak 14.27
8 mau gonh mas dius somh boms aiq boms shei das.
9 Ngos hau doeng nyeis dah dvboms lyis shi yoeuh las ngwis lyis nyi yah cheihshang teh cheihshang das. Ngos nyamoq lyis xing lhyi shi yoeuh teh shi yoeuh das. Hauh thang lhyi nyamoq ngos lyis shvmanh dung das las ngos phuk taiq das. Ngos nyamoq lyis, nyamoq gas ngah dius jens nghuot oen taiq das las ngos gas nyamoq dah Mangso nghuot ge rhen das.