12
Yerusalem lyis Khyuot das
1 Heika Yhensain jyank masyah, Israel dah loeus nghuot. Hauh Yhensain ka maukhung lhyi tsain lhywa lha nyeisjvng lyis gvnkhanh toh las, dius lyis kang dyei. Nyang taiq,
2 Ngos Yerusalem lyis zvbiq kom teh kuot das. Nyah vyvm vwi mas nyeis dah dius nyau jens gas hauh yvlyis shuk las yhei yet bang teh vtyi vkamh mus das. Nyamoq Yerusalem wus lyis lhaink toh uhlyis nyet shih dah Yuda wus jens eq lhaink toh zis xauh das.
3 Nghuot laus eq hauh shishenh jweh lyis, ngos Yerusalem lyis lyei dah lukzains teh kuot das. Hauh yvlyis tungh toeu dah khah dius nyau laus eq nos das. Mungkvn dius nyau jens dvnganh nyang lyis zan das zis jesdvp los tsoq das.
4 Hauh shishenh lyis ngos nyamoq dah nyang jens dvnganh lyis gyuk dvn nhang das, nyang ji bang dvnganh lyis koh loh nhang das. Ngos Yuda dius jens lyis zungh dyei das laus eq nyamoq dah jeswus jens dah nyang jens lyis nyoqjet nhang das.
5 Housoeh Yuda vhuh jens gas, Yerusalem mas nyeis dah Maukhung Jesphung Yhensain Mangso ka nyah dius jens lyis yomdyei, ge tsain taiq zo das.
6 Hauh shishenh lyis ngos Yuda vhuh jens lyis saiqkhyam mha nyi teh, guk nyhink joq yvmas ngeh dah nyi teh kuot das. Nyamoq gas vyvm vwi dius nyau jens dvnganh lyis mhont das. Yerusalem dius jens gas wus khau mha jes luiq shoh luiq nyeis das.
7 Ngos Yhensain ka Yuda jesphung jens lyis shih ung cho dyei das, housoeh Dawi dah vnyau vshih yahge Yerusalem dius jens yoh dah nyoqnho ngelang gas nyet shih dah Yuda jens thoq lyis ma zes das.
8 Hauh shishenh lyis Yhensain ka Yerusalem mas nyeis bang lyis gomh das las nyamoq mas yomnhuk thank soeu yangh Dawi yombos khoq teh bweh das. Dawi dah vnyau vshih gas Yhensain dah loeuswons soeu teh, Mangso nyang teh nyamoq lyis uhshe das.
9 Hauh shishenh lyis Yerusalem lyis tungh zan los dah vnyau khanghmuh lyis ngos mhont tyamp das.
10 Ngos Dawi vnyau vshih jens yahge gohtoeu Yerusalem dius jens lyis nhaiqnyen ehnyet yahge shvmanh dung dah ehnyet tyink dyei das. Housoeh nyamoq gas nyamoq thauh phank soeu lhyi yoeuh las, loteh xiklyis kuk bang teh, nyah xiklyis kuk das. Nyamoq gas nyah xiklyis yukgis lomons chithyuk bang kuk ngaus teh kuk ngaus das.Ref 12.10: Yh 19.37; Nyoq 1.7 Ref 12.10-14: Mat 24.30; Nyoq 1.7
11 Hauh shishenh lyis Yerusalem mas kuk cho ka Megido janggyon mas Hadad Rimonnote 12.11 Hadad Rimon ge zis Bala phvra nyings nghuot. xiklyis kuk dah kuk zainsmuh teh nghuot das.
12-14 Hauh mau mas nyang yuk nyang yhenbang gohtoeu toeu tsain kuk ngaus das. Dawi masyah dyos dah yhenbang, Nathan masyah dyos dah yhenbang, Lewi masyah dyos dah yhenbang, Shimei masyah dyos dah yhenbang, yahge gohtoeu yhenbang dvnganh. Nyang yuk nyang yhenbang gohtoeu toeu tsain kuk ngaus das. Dvyhenbang mas dah vbusbih jens, vmesbih jens gohtoeu toeu tsain kuk ngaus das.