TIMOTHI
LYIS CANGXEIH HUON MAUSSAUH
(1 TIMOTHY)
Cangxeih vcho ka:- Phung khau mha shuot dah jyauh cho bos las zaih nhang. Houka Yuda jens dah nghamh cho yahge Yuda ma nghuot bang dah nghamh cho xonh mhayah thuq los dah cho nghuot. Hau shuot dah jyauh cho jens gas, Hai nyoq yah yoh nyvng dah mungkvn gas ma shop las dius dvyuk khyuot yoeus zis xauh das nyhenshang gohtseq nghuot las yau zis yahge noq thank dah seq cho yoh chah. Hauh thoq lyis zonoms dvkhamh lyis jhank chah, nyi ma gis yoeus, ge yvlyis vgungs toh dah lomsjingh cho tsain nghuot. Aiq vcho ka:- Phung lhyi guon cho yahge paiq cho, tsai phung lhyi shwih bang yahge pangh thuk bang mas bos chah dah wotwu teh zis yah sen lha taiq shet cho tsain bos. Thang thank Timothi gas Yhensain Yesu dah lvgyo dvyuk khasoeh bweh chah cho yahge lomsjingh dah Khristan phung dius vja ja lyis shwih uhshe soeu kuot chah dah yvwons yah sen lha joeui dyei cho tsain nghuot.
1
Yah khyuot yoeus Mangso yahge yang nghamhloms joqyos nghuot dah Khristu Yesu gvng mas, Khristu Yesu dah lvgyo ngos Paulo gas,
lomsjingh cho mha ngah lo gyingh nghuot dah Timothi jyank mas maussauh lhaih kat.Ref 1.2: Lgy 16.1
Uwus Mangso yahge yah Yhensain Khristu Yesu jyank masyah nvng lyis jyehjuh, nhaiqnyen zis yahge nyenstap zis dyei bas jungh.
Ma jus Jyauh Cho Zaih nhang
Ngos Makedoni mau pheh lai loh uhlyis nvng lyis taiq toh goeus zis yah dvyhangteh, Ephesu wus mas tsoq nyeis nhang mes. Houmha dius dvyhamh shuot dah lomsjingh cho lhyi tsain jyauh nyeis, hauh yvlyis nvng yoh tomp tyamp chah das. Jyoengh ma gis bweh dah tying dang mvnyei, ma thank lo dah dius caiq shap cho toh tyamp das xiklyis nyamoq lyis taiq aq. Hauh cho jens gas dyoqgoh nyens goh, phyen-goh cho lhoq thuq nyeis las hau lomsjingh cho yah kyingh dvyoh seq dah Mangso dah nghamh toeuq toh cho lhyi ma yoh bweh los nhang. Hai taiq toh dah toeuqkhom ka lhoqshang ehnyet masyah thuq los dah jyetdap cho, gying dah soh seq ehnyet yahge gyingh dah lomsjingh cho lhyi nhauh toq kat cho tsain nghuot. Dvyhamh gas hauh cho jens masyah whang lha vkoh vpaq vkyuh ma bos dah taiq phyen-goh cho yah dye tyamp. Nyamoq gas Mangso dah lyi jyauh bang tsain bweh mes, laus eq nyamoq gas vsainnyang taiq dang lyis eq, vsainnyang nghamhnywe zis yah taiq nyeis dah cho cha nghuot yvlyis ma tsain seqgyo.
Lyi gas yhung chah khyvlyis yhung lhyi ka hauh Lyi gis yvlyis ngamoq seq. Housoeh las yang seq toh chah cho ka, hauh lyi gas dius gis jens xiklyis ma nghuot; lyi lhyweq bang, shei mon yaunos bos bang, gywes ma tsungh bang, yaunos bos bang, lomsnoq cho ma chank bang, lomsjingh cho nghuot ya dyos yah sen cho mha nhaiq ma wvng bang, ungwes uwus lyis sat bang yahge dius sat bang, 10 wotwu dyoq bang, nye changh yukgis changh nyeis goh bang, jons ungh dah soenghi kuot bang, hwah bang, ma ying kanghjyoeng kat bang yahge gohtoeu cho vja ja khyvlyis yah lomsjingh dah jyauh cho lhyi tyixo lha kang dwis bang xiklyis lyi dvtoh. 11 Hauh jyauh cho ka phunk bos las ngelhoq Mangso mhayah gausyis Dang yah dvyhangteh nghuot. Hau gausyis dang lyis taiq hoeuh das nyhenshang Mangso ka ngos lyis kyauh toh.
Mangso Nhaiqnyen Cho
12 Ngos wons wuq muhzoh xiklyis ngos lyis yomdyei soeu, yah Yhensain Khristu Yesu lyis nhaiqshoqlang chungh. Nyang gas ngos lyis mon yih soeu nghuot ge suon lha nyang lyis phuqsoe das xiklyis toeuq toh zis xauh yvmvyah nyang lyis nhaiqshoqlang chungh. 13 Ngos gas lai loh goeus shishenh lyis Yhensain lhyi ma gis khyvlyis yobos huon, khyangh pu, shoeuhshih soeu jwangh soeu, nghuot ku laus eq, Mangso ka ngos lyis nhaiqnyen nyeis: khasoeh ge lyis ngos mas lomsjingh cho ma bos shih las ngos cha kuot nyeis zis ngos ma seq.Ref 1.13: Lgy 8.3, 9.4-5 14 Yah Yhensain ka nyah magons magoh jyehjuh ngah thoq mas huot khyoq dyei las Khristu yah dvdain dvlom kang dwis nyeis yvmvyah yang xauh yoeus vvng dah lomsjingh cho yahge jyetdap ehnyet ngos lyis dyei goeus. 15 Yaunos dap bang lyis khyuot yoeus das xiklyis Khristu Yesu gas mungkvn mas jweh lyih, ge dah dang gas top nyang lhom yoeus las lomsjingh mon, jyoeng lha wontang dah dang nghuot. Hau yaunos wons bang mas ngos yaunos nyo thank soeu nghuot. 16 Nghuot laus eq, Mangso ngos lyis nhaiqnyen cho ka thang pheh Yhensain lhyi lomsjingh las vcaiq vto kang xauh yoeus das bang dvnganh dah nyhenshang yikhyoh bweh bas jungh ge Khristu Yesu gas ngos yaunos zes nyo soeu lhyi nyah dah nhaiqlom xing xing jhen cho lhyi Chixoeuq zis nghuot. 17 Gvshih, vcaiq vto Hwankti nghuot las ma seq dyoq dyuk loh, nyoqjeih yah ma yoh nyvng, dvso kyingh dah Mangso mha phunk yahge nyoqnho ngelang gas vcaiq vto bos joq bas jungh. Amen.
18 Ngah lo Timothi eh, lai loh goeus shishenh lyis nvng lyis toeuq las taiq toh dah lvpe dang yah dvyhangteh, wons wuq loh das nyhenshang ngos nvng lyis vmingh dyei; jes vlhomuh yoh zan das xiklyis hau lvpe jens taiqtoh dang lyis kyonhkhyi teh yhung aq. 19 Hauh thoq lyis nvng mas lomsjingh cho yahge gying dah sohseq ehnyet bos aq. Dvyhamh gas sohseq ehnyet yah taiq kyingh yvlyis ma gyo yvmvyah nyamoq dah lomsjingh cho lhyi lhoeu thyoq tyamp. 20 Nyamoq mas Satan loq mas kyauh khyvlyis ngos joeng dah Himenu yahge Alesandria tsain bos. Housoeh kuot zis gas nyamoq dah loeusmus soqzo cho lhyi doms tyamp bas jungh, jyauh das xiklyis kuot zis nghuot.