3
Dvnyens thang lhyi dvnyens ngos ngah yhetyos mas
ngos jyet soeu lhyi yhetmoq moq;
ngos nyang lyis xo laus eq ma nyvng.
Ngos wus chank loh las,
wus talhoeu,
wus thunk chank yah ngos jyet soeu lhyi xo,
nghuot laus eq ngos nyang lyis ma nyvng.
Wus zungh bang ngos lyis nyvng.
Ngos gas nyamoq lyis, Ngah hwank phoq lyis vnyvng lah, oen nyei.
Nyamoq masyah lai loh yah dvyih, ngos nyang lyis xo nyvng.
Ngos nyang lyis ma kat kat lo.
Ngah ungwes yhen,
ngos lyis khoeu kat dah yvp mas shwih jweh shoq zwi toh.
 
Yerusalem vmesbih jens eh, ngos lyis dangthoengh toh geh.
Namoq ngamoq dah jyet cho mha ma nhauh das oen
yvng dah cvt jens, lvlyo jens lyis lui las maukhi geh.
Lvkhyank somh vyang
Vmesbih
Soenghi jens ungh dah loban yahge Mura xangh lyis
nyi ngheq masyah thuq los dah nyikhauh bungh teh,
sihyos masyah los nyeis dah vyhang ka cha nghuot lah?
Hauh zis gas Solomon lyis nyah kyau mhayah dvng los nyeis;
Israel mas gis thank jes thoeuqzoe jens
khyukci gungs zungh jens bos los.
Nyamoq dvnganh gas sham chi yvmas lyes bang nghuot.
Nyamoq gas jeszan cho mha pot goeus bang nghuot.
Nyamoq gas hank eq hank sham wons las
nyenh lyis zan los bang lyis zungh nyeis.
Hwankti Solomon lyis Lebanon mas gis thank
saiq yah kuot dah kyau mhayah dvng los.
10 Hau kyau dah zains jens lyis ngwis yah kyop toh;
hauh thoq mas xing khying yah khoh kat dah misseh yah thop toh.
Tsunggus lyis Yerusalem vmesbih jens jyetdap ehnyet yah yoq dah
nesnoq seh yah nghop toh.
11 Zion vmesbih jens eh, hwankti Solomon lyis los yoeuh geh.
Nyang gas nyah nyi hwank nyeih,
nyang gausyis las gauslaus nyeih lyis nyah ungwes nyah uhloms mas
tsungh dyei dah buismuk tsungh toh.