SOLOMON LVKHYANK
(SONG OF SONGS)
Jew jens gas haih lvkhyank gas, Mangso yahge nyah dius nyau jens zomhgoh cho lhyi chixoeuq ge eq, Khristan jens gas Khristu yahge phung zomhgoh cho lhyi chixoeuq, ge eq vjyuk gyangh phant.
1
Solomon dah gyomes thank lvkhyank jens.Ref 1.1: 1Hw 4.32
Lvkhyank Cangxeih Vyang
Vmesbih
Nah nhuotkuk yah ngos lyis bvlot nyoshoq lhain tanh;
nah dah jyet cho ka zvbiq thoq lyis zes gis.
Nah xangh coeu ka xangh shom nvm las,
nah nyings gas hau xangh shom lhyi doms soh nhang.
Khah vmesbih eq nvng lyis ma ngwis ma yoh nyeis.
Nvng ngos lyis shwih loh aq, yang phang goh.
Nvng ngah hwankti duot las ngos lyis nah yvp mas shwih loh aq.
Nah jyetdap zis gas zvbiq shuk thoq lyis zes gis.
Vmesbih khanghmuh nvng lyis jyet zis
mauh chank ma bos.
Yerusalem vmesbih jens eh,
ngos gas Keda mas sihyos zvng teh noq laus eq,
Solomon dah hwankti yhen mha khomh gos teh yungh.
Buis lhap yvmvyah ngah vwot gvng mas
ngos lyis dius ngis vkhyoq goh.
Ngah vmang moq ngos lyis nhaiqyo las
zvbiq khyam mha muh zwi nhang lha
ngos ngvnyang gungs lyis loqzamh zwi das shishenh ma bos.
Ngos jyet soeu eh,
nvng nah yvng phung lhyi khamha shwih kat tsoh las,
nyeihgungs lyis khamha no das zis taiq kyoh aq.
Ngos chamus gohtoeu yvng yoeuh bang dah
yvng phung jens mas nvng lyis xo chah das lah?note 1.7 Haih zis Hebre mas ma bvng.
Vbusbih
Vmesbih jens mas yungh thank soeu eh,
nvng hauh joqyos ma seq lhyeh?
Yvng phung thang mha chank loh aq;
yvng yoeuh bang dah zvng nvm mas
nah shvbeq jens xiklyis katjang xo aq.
 
Ngah hwank nyhiq eh, nyang zains gas Pharao jeslhyingh mas dah nyanglus jens lyis sainh hwangh nhang teh
nvng gas ngos lyis sainh hwangh nhang.
10 Nah nodangh gas nah bvlot thoq mas yungh las
nah lainzain chank phauhdap luk teh gyoh loh.
11 Nghuot laus eq ngamoq nah xiklyis
ngwis yah dungh dah xing jvngchoh kuot dyei das.
Vmesbih
12 Ngah hwankti ka nyah jung mas lhain toh,
hauh uhlyis ngah xangh coeu ka lyeis mas xangh nhoenk loh.
13 Ngah hwank phoq gas nyang ngah sainhkhonh mas lhain toh uhlyis
ngos nyah jyank masyah mura shom yoh.
14 Ngah hwank phoq gas Engedi zvbiq khyam mha buh dah
mhanhdyvp ban teh nghuot.
Vbusbih
15 Ngah hwank nyhiq eh, nvng kha iq yungh!
Nah nyoqjeih jyet vwot yah bvng joq.
Vmesbih
16 Ngos jyet thank soeu eh, nvng kha iq yombos yungh!
Nvng ngos lyis pyo nhang!
Mhanh nyaus gas yah yhetyos duot das,
17 Arit gas yah yhen bausjang,
xoeuh zains gas yah yhenkhung teh duot das.