4
Ishboshet Sat Xauh
1 Hebron mas Abna shei cho Saulo dah lo IshboshetnoteIshboshet lyis Eshba ge eq lui. xauhgyo lyis nyang dvn. Israel jens dvnganh eq chiq nyeis.
2 Ishboshet gas Bana yahge Rekhab ge dah jeszau aiq yuk yoh. Nyah aiq yuk gas Berot mas nyeis dah Benyamin vnyau Rimon dah lotang nghuot. Gvshih Berot gas Benyamin vnyau bang dah maunyeis nghuot.
3 Khasoeh ge lyis Berot dius jens gas Gitaim wus pheh phang lha khvnyhik jweh shoq houmha khau nyeis.
4 Saulo dah lo Yonathan mha khyei ma yangh dah loloeu dvyuk bos. Nyang oeng zvn uhlyis Yezrel masyah Saulo phvtang Yonathan dah loeus jweh los las, lobau soeu nyang lyis shwih phang uhlyis lvnyap wuih yvmvyah loshang bau khyoq las khyei ma yangh mus tyamp. Nyah nyings gas MephiboshetnoteMeriba ge eq lui. nghuot.Ref 4.4: 2Sa 9.3
5 Berot mas dah Rimon dah lotang Rekhab yahge Bana gas Ishboshet dah yhen pheh loh. Nyah zomh gas Ishboshet yhen mha nyeih gungs lyis jweh. Hauh uhlyis nyang dvsoq yhet joq.
6 Khomhzungh soeu ka sunghso khyink nyeis lyis yhetnguis los las yhetmuih loh. Housoeh las Rekhab yahge Bana gas khomhzungh soeu lhyi tsoek yah lai toh khoq las Ishboshet dah yhet yvp pheh wvng loh las nyah womdau mas thauh las sat. Hauh thang lhyi nyah zomh gas luiq loh.
7 Nghuot laus eq ma loh shih lyis nyah zomh gas Ishboshet nyah yhetyos mas yhet joq yvmas nyah uhloms thyet chi khoq. Hauh zis chi lha nyah zomh gas Yodan langhkhaunoteHebre mas Arabah*. mha nyens gonh suh lai loh.
8 Housoeh Ishboshet dah uhloms lyis Hebron wus Dawi jyank mas chi loh las hwankti lhyi taiq zis gas, Nvng yhensain dah kang lhyi lhom soeu, nah jes, Saulo dah lo Ishboshet dah uhloms nghuot, yoeuh aq. Khvnyhik Yhensain ka ngah yhensain hwankti nah xiklyis Saulo eq, nyah vshih lyis eq lvto phuk goeus, ge.
9 Nghuot laus eq Dawi gas Berot mas Rimon dah lotang Rekhab yahge nyah vnoeuh Bana lyis phuk taiq zis gas, Ngah kang lhyi yaukyenh chiqjyen dvnganh masyah khyuot yoeus dah Yhensain nyang nyeis zis yah dvyhangteh,
10 dvlhain dius dvyuk gausyis loeus taiq kyoh das ge nghamh las, Saulo shei goeus ge ngos lyis taiq kyoh lyis, hauh loeus kyoh gvng mas phauh shangh zis xauh das ge nghamh soeu lhyi Ziklag mas ngos nyang lyis nyhik las sat.Ref 4.10: 2Sa 1.1-16
11 Hauh thoq lyis dius lhung ka dan soeu lhyi nyah yhen khau, yhetyos mas sat lyis zes kuot gis ma nghuot lhyeh? Gvshih ngos nah zomh lyis nyah suih cangjau sang lha, nyeisjvng thoq masyah yoeus tyamp gis ma nghuot lhyeh, ge.
12 Housoeh Dawi nyah loyvm jens lyis taiq las hau aiq yuk lyis sat. Nyah zomh dah khyei loq tsain thyet las gungs lyis Hebron thomhlo mas lhangh toh. Ishboshet dah uhloms lyis gas Hebron wus, Abna dah lop mas yoeus nyhop.