24
Dawi Dius nyings Kui
(1Ss 21:1-27)
1 Tsai Yhensain ka Israel jens lyis nhaiqyo las, Dawi lyis nyamoq thoq mas yaukyenh cho chi jweh los nhang. Yhensain Dawi lyis taiq zis gas, Israel yahge Yuda dius jens lyis loh suon aq, ge.
2 Housoeh las hwankti ka nyang yah dvgeh nyeis dah jeszau zainsmuh Yoab lyis taiq zis gas, Dius khanyhoq nyeis zis ngos yoh seq das nyhenshang Dan wus masyah Besheba wus jweh shoq Israel vnyau dvnganh lyis loh suon aq, ge.
3 Nghuot laus eq Yoab hwankti lhyi taiq zis gas, Yhensain, nah Mangso ka nvng lyis nah munghdan mas nyeis dius jens gvshih thoq lyis dvxo huon tsoq je los shoq nyeis nhang bas jungh. Nghuot laus eq ngah yhensain hwankti ka haih cho lhyi chamus kuot mes lah, ge.
4 Nghuot laus eq hwankti ka nyamoq lyis dius suon das xiklyis jyuonh. Housoeh las Yoab yahge nyah zau jens gas Israel jens lyis suon das xiklyis thuq loh.
5 Cangxeih lyis nyamoq gas, Yodan lvng goeu las, Gad mau langhkhau mha joq Aroer wus dah mautsung mha thoeng. Lholha nyamoq gas Yazer wus pheh loh.
6 Hauh thang lhyi nyamoq gas Gilead mau yahge Hiti mau Kadesh mas jweh loh. Hauh thang lhyi Dan yahge Sidon wus vyvm vwi jweh shoq loh.
7 Hauh thang lhyi Taire goengtoenk wus yahge Hiwi wus jens, Khanan wus jens dvnganh mas jweh loh. Thang thank lyis Yuda mau mautyi pheh Besheba wus jweh shoq loh.
8 Housoeh nyamoq gas hau mau gonh mas jweh yenh las lhamhmuh gau khyvp buisnyeis aiqci nyeih lyis nyamoq dah muh dye las Yerusalem pheh tauh los.
9 Yoab gas dius nyings kui dah sonzoh maussauh hwankti lhyi los dyei las Israel mas jesmuh wons yam loyangh xet sens, Yuda mas oeng sens nghuot.
10 Nghuot laus eq Dawi nyang dius dye suon lhyi nyang sohseq ehnyet gas nyang lyis thauqkhyi los. Housoeh las nyang Yhensain lhyi taiq zis gas, Ngos svsoh cu goeus, ngos dius ma suon vvng. Yhensain eh, ngos lyis yobos jenh khyuot dyei aq, ngos haih koh muh kuot goeus, ge.
11 Nungsnvp Dawi dah nyvng soeu, lvpe Gad jyank mas Yhensain dah dang jweh las taiq zis gas,
12 Yhensain heisoeh ge oen Dawi lyis loh taiq aq: Ngos nvng lyis khyen yoeus das cho somh khvt dyei bah: ngos nvng lyis yau dyei das zis nah xiklyis dvkoeuq khyen yoeus aq, ge.
13 Housoeh las Gad Dawi jyank mas loh taiq zis gas, Nah mau mas somh zvn noteGreek: Hebre mas nyhet zvn ge bos phanghkhauq los das zis o lah? Jeswus jens nvng lyis khat las lhamhmuh somh khyvp phang yenh das zis o lah? Nah munghdan mas somh nyeih yomh zainsmuh gyoh nhang das zis o lah? Ngos Yhensain lhyi khasoeh doms taiq das zis nvng nghamh yoeuh las ngos lyis taiq kyoh aq, ge.
14 Dawi Gad lyis taiq zis gas, Ngos ehnyet svsoh nyo; Yhensain yang lyis joeng bas jungh; nyah nhaiqnyen cho ka kuh joq. Nghuot laus eq dius dah joeng zis ngos ma xauh bas jungh, ge.
15 Housoeh Yhensain ka hauh nvp masyah toeuq toh buisnyeis 3 nyeih jweh shoq Israel jens mas yomh nhang kat. Hau dvmau gonh mas dius nyhet mons shei tyamp.
16 Nghuot laus eq hauh dius mhont loeuswons soeu ka Yerusalem mas dius lyis mhont das zis sont lyis Yhensain ka dius jens lyis joeng cho mhayah nyah ehnyet thaiq las, Geh goeus, no aq, ge hauh loeuswons soeu lyis taiq. Hau Yhensain dah loeuswons soeu ka Yebusi dius Arauna dah thanjang nvm mas no.
17 Dius lyis yau dyei dah loeuswons soeu lhyi Dawi nyvng lyis, nyang Yhensain lhyi taiq zis gas, Ngos cu goeus, ma shop khyvlyis kuot goeus. Nghuot laus eq haih bang gas yobos ma bos, - nyamoq cha kuot goeus lah? Nah nhaiqyo zis gas ngos yahge ngah yhenbang thoq mas joq bas jungh, ge.
18 Hauh nyeih Gad Dawi jyank mas los taiq zis gas, Yebusi dius Arauna dah thanjang mas loh las Yhensain xiklyis phon ci aq, ge.
19 Housoeh las Dawi gas Yhensain nyang lyis taiq vgus kuot das xiklyis loh.
20 Arauna yoeuh kat lyis hwankti yahge nyah dius jens los nyeis yvlyis nyvng. Housoeh las Arauna thuq loh las hwankti xikkhonh mas dupaiq.
21 Hauh thang lhyi Arauna nyei zis gas, Ngah yhensain hwankti heimha chamus los, ge. Dawi toeuh zis gas, Nah thanjang wis das xiklyis los.
Dius jens masyah hauh yomh yoeus tyamp dyei das xiklyis Yhensain nyhenshang houmha phon ci das nghuot, ge.
22 Arauna Dawi lyis taiq zis gas, Ngah yhensain hwankti o nyhoq yoeus las phudyei aq, ngheq phudyei xiklyis noeulu tsain nyeis, phon thoq mas ngheq das thangh kuot das zis gukbat vyhang yahge noeu koeu tsain joq.
23 Ngos hai dvnganh hwankti lhyi dyei. Nah Yhensain Mangso nah phudyei lyis lhom yoeus bas jungh.
24 Hwankti Arauna lyis taiq zis gas, Ma nghuot, ngos nah jyank masyah phauh dyei las wis das. Ngah ngwis xing ma gyoh zis Yhensain, ngah Mangso lhyi ngheq phudyei cho ma kuot das, ge. Housoeh Dawi ngwis shekel oengci dyei las hau thanjang yahge noeulu wis.
25 Dawi eq houmha Yhensain xiklyis phon ci lha ngheq dyei jyungshuk eq, nyenstap jyungshuk eq tsain phudyei. Yhensain ka nyang vkyuh dung dang lyis gyo dyei las hauh yomh doms nhang.